ၸွမ်းၼင်ႇမီးၵၢၼ်လိူၵ်ႈသၢင် ၵႅမ်ၸွမ်ၸိုင်ႈမၢႆ 1 ၶိုၼ်ႈမႃး မႂ်ႇၼၼ်ႉ လႆႈႁၼ်ဝႃႈတၢၼ်းသူၺ်ႇ ၵေႃႉယၢမ်ႈ ပဵၼ်ၸွမ် ၸိၵ်းသိုၵ်းမၢၼ်ႈ တိုၵ်ႉမီးဢႃႇၼႃႇဢေႃးၸႃႇၼိူဝ်ဝၢၼ်ႈ မိူင်း။

ဝၼ်းထိ 10/07/12 ပၢင်ၵုမ်သၽႃးၼေႇပျီႇတေႃႇႁၼ်လီ တၢင်ႇယိုၼ်ႈၸိုဝ်ႈလိူၵ်ႈသၢင် ၽူႈၵွၼ်းတိူင်း သိုၵ်းၵဝ်ႇ (တႃႈၵုင်ႈ) မျိၼ်ႉသူၺ်ႇ ၶိုၼ်ႈပဵၼ်ၵႅမ်ၸွမ်ၸိုင်ႈမၢႆ 1 ပိူဝ်ႈတႃႇပုတ်ႈတႅၼ်းတၼ်းႁဵင်း တိၼ်ႇ ဢွင်ႇမျိၼ်ႉဢူး ၵေႃႉဢၼ်ဢိင်ဢၢင်ႈ ပၢႆးယူႇလီဢမ်ႇၶႅမ်ႉသေ ယွၼ်းၵိုတ်းလိုဝ်ႈၵၢၼ်ၵႂႃႇ။ ၵၢၼ်လိူၵ်ႈ ၵႅမ်ၸွမ်ၸိုင်ႈပွၵ်ႈၼႆႉ ပဵၼ်ၾၢႆႇသိုၵ်းဢၼ်မီးတူဝ်တႅၼ်း ၼႂ်းသၽႃး 1 ပုၼ်ႈၼႂ်း 4 ပုၼ်ႈ လိူၵ်ႈတင်ႈၶိုၼ်ႈ မႃး၊ ၵွပ်ႈဝႃႈ တိၼ်ႇဢွင်ႇမျိၼ်ႉဢူးၵေႃႉၵိုတ်းလိုဝ်ႈၵႂႃႇပဵၼ်တူဝ်တႅၼ်း ၾၢႆႇသိုၵ်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ မိူဝ်ႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၵႂႃႇဢုပ်ႇဢူဝ်း လွင်ႈငမ်းယဵၼ်ၸၼ်ႉ ၸိုင်ႈမိူင်းႁူမ်ႈတုမ် တီႈၵဵင်းတုင် ပူၼ်ႉမႃးမိူဝ်ႈ 19/05/12 ၼၼ်ႉ ဢိင်ၼိူဝ်မီးၵၢၼ် တွင်ႈထၢမ်သေ ၸဝ်ႈၼႃႈတီႈမၢၼ်ႈၸၼ်ႉ သုင်ၵေႃႉၼိုင်ႈ ၼႂ်းၸုမ်းၶပ်းၶိုင်လွင်ႈငမ်းယဵၼ်ၸိုင်ႈမိူင်း ႁူမ်ႈတုမ် ဢၼ်လုၵ်ႉၼေႇပျီႇတေႃႇမႃးတွပ်ႇလၢတ်ႈဝႃႈ-ဢၼ်တိၼ်ႇ ဢွင်ႇမျိၼ်ႉဢူး ယွၼ်းၵိုတ်းလိုဝ်ႈ ၵၢၼ်ၵႂႃႇၼၼ်ႉ ၸႂ်ႈတႄႉ၊ ၵူၺ်းၵႃႈ တၢင်းၵၢၼ်ဢမ်ႇဢွၵ်ႇၶၢဝ်ႇ၊ ၵွပ်ႈဝႃႈပေႃးတၢင်းၵၢၼ် ဢွၵ်ႇၶၢဝ်ႇ ၼႂ်းပိူင်ငဝ်ႈပိုင်းမိူင်းမီးဝႆႉဝႃႈ တေလႆႈလိူၵ်ႈၶိုၼ်း ၼႂ်းၶၢဝ်းတၢင်း 15 ဝၼ်း၊ ၵွပ်ႈၼၼ် ယူႇတီႈၸွမ်ၸိုင်ႈ ၵေႃႈ ၸင်ႇပႆႇတၵ်းသဵင်- ဝႃႈၼႆ။

ဢိင်ၼိူဝ်မီးၵၢၼ်တွင်ႈထၢမ်ဝႃႈ တေၸၢင်ႈမီးၽႂ်မႃးပုတ်ႈတႅၼ်းလႆႈၼၼ်ႉ မၼ်းၸဝ်ႈ(ၽူႈယႂ်ႇမၢၼ်ႈ) တွပ်ႇလၢတ်ႈဝႃႈ- တိၼ်ႇဢွင်ႇမျိၼ်ႉဢူးပဵၼ်ၼႂ်းၾၢႆႇသိုၵ်း၊ ၵွပ်ႈၼၼ် ၾၢႆႇသိုၵ်းတေလႆႈလိူၵ်ႈ။ ပေႃးမီး ၵၢၼ်လိူၵ်ႈမႃးၸိုင် ပေႃးဢဝ်တၢၼ်း သူၺ်ႇဝႃႈ တၵ်းလႆႈလိူၵ်ႈမျိၼ်ႉသူၺ်ႇ၊ ပေႃးဢဝ်ၽူႈၵွၼ်းသိုၵ်းသုင် သုတ်း (ၸွမ်သိုၵ်းလူင်)မိၼ်းဢွင်ႇလၢႆႇဝႃႈ မၼ်းၶႂ်ႈပဵၼ် တိၼ်ႇဢေး၊ ၵူၺ်းၵႃႈ ပေႃးဢဝ်ၸွမ်ၸိုင်ႈတဵင်း ၸဵင်ႇဝႃႈ ၶႂ်ႈႁႂ်ႈပဵၼ် လႃႉထေးဝိၼ်း- ၸဝ်ႈၼႃႈတီႈၾၢႆႇ RCSS ၸဝ်ႈၼိုင်ႈ လၢတ်ႈၼင်ႇၼႆ။

ၽူႈလဵပ်ႈႁဵၼ်းၶဝ်ထတ်းသၢင်ဝႃႈ- မျိၼ်ႉသူၺ်ႇ ပဵၼ်ၵူၼ်းတၢၼ်းသူၺ်ႇ၊ ပဵၼ်ၵူၼ်းတေႃႇၵျၢႆႇၵျၢႆႇ ၵေႃႉပဵၼ် မေးၼၢင်း တၢၼ်းသူၺ်ႇ။ ဢၼ်လိူၵ်ႈမျိၼ်ႉသူၺ်ႇၶိုၼ်ႈမႃးၼႆႉ ၼႄဝႃႈတၢၼ်းသူၺ်ႇ တိုၵ်ႉမီးဢေႃးၸႃႇ ယႂ်ႇ ၼႂ်းဝၢၼ်ႈမိူင်းယူႇ- ဝႃႈၼႆ။

ၵပ်းၵၢႆႇလွင်ႈၼႆႉ ၼႂ်းသိုဝ်ႇထႆး ASTV ၽူႈၸတ်းၵၢၼ်ဢွၼ်ႊလၢႆႊ (10/07/12)ၵေႃႈဝႃႈ မျိၼ်ႉသူၺ်ႇၼႆႉ ပဵၼ်သၢႆႁူဝ်ၶႅင်၊ ပဵၼ်ၵူၼ်းၸမ်ၸႂ်တၢၼ်းသူၺ်ႇ ၽူႈၼမ်းၵဝ်ႇမိူင်းမၢၼ်ႈ၊ မီးသုၼ်ႇႁူမ်ႈၵႂၢတ်ႇၽဵဝ်ႈ ပၢင်ၼႄၵၢင်ၸႂ်လူၺ်ႈလၢႆးၵတ်းယဵၼ် ဢၼ်သင်ၶၸဝ်ႈဢွၼ်ႁူဝ် မိူဝ်ႈပီ 2007 ပူၼ်ႉမႃး။ ပဵၵ်ႉသမ်ႉပဵၼ် ၵူၼ်း ၸမ်ၸႂ်တၢၼ်းသူၺ်ႇၵေႃႈ ပိူၼ်ႈယင်းႁၼ်ဝႃႈ မျိၼ်ႉသူၺ်ႇ ပဵၼ်ၵူၼ်းၽႃႇၵၢင်ဝၢင်းၶိုင်ႈလိူဝ် တိၼ်ႇဢွင်ႇမျိၼ်ႉဢူး- ၼႆယဝ်ႉ။