ၵူၼ်းၼုမ်ႇတႆး ဢၼ်ႁဵတ်းႁၢႆႉၶႃႈပၢတ်ႇၶေႃးၼၢင်းယိင်း သႅၼ်းၶၢဝ်ႉ တၢႆၵိုၵ်းႁိူၼ်းၼႂ်းသူၼ် တီႈမႄႈရိမ်ႊ ၵဵင်းမႆႇ၊ ဢၼ်ပဵၼ်ၶၢဝ်ႇလိုဝ်းယႂ်ႇၼႂ်းၵဵင်းမႆႇၼၼ်ႉ ထုၵ်ႇၸုမ်း ပီႇတုၸိတ်ႉ SSS ႁူဝ်မိူင်းတိလႆႈ တီႈတႃႈ သႅၼ်ဢိၼ်း (တႃႈၶူင်း)။ ယူႇတီႈမၢၼ်ႈတေသူင်ႇပၼ်တၢင်းၵၢၼ်ထႆး ၵွပ်ႈပိူင်ပဵၼ်ၵိူတ်ႇၶိုၼ်ႈၼႂ်းမိူင်းထႆး။

မိူဝ်ႈဝၼ်းထိ 30/06/12 ၸုမ်း SSS ႁူဝ်မိူင်း တိၺွပ်းလႆႈၸၢႆးၶျႆး ဢႃႇယု 25 ပီ၊ ဢၼ်ၶႃႈပၢတ်ႇၶေႃး ပႃႈၼၢင်းလႃႉၵျီႇ ၸူၼ်ႁိမ်ဢဝ်ၶူဝ်းၶွင်ငိုၼ်းၶမ်းတီႈမႄႈရိမ်း (ၵဵင်းမႆႇ) ပူၼ်ႉမႃးမိူဝ်ႈဝၼ်းထိ 22/06/12 သေပၢႆႈပွၵ်ႈမိူဝ်း တၢင်းမိူင်းတႆး တီႈတႃႈသႅၼ်ဢိၼ်း (တႃႈၶူင်း)။ လႆႈႁူႉဝႃႈ မၼ်းပၢႆႈႁွတ်ႈထိုင်ႁူဝ်မိူင်း ဝၼ်းထိ 27/06/12 ။ ဢိင်ၼိူဝ်တၢင်းထႆး ပၼ်ၶေႃႈ မုလ်း/ႁၢင်ႈထၢႆႇမၼ်းမိူဝ်း ႁႂ်ႈတိၵူၼ်းပၼ်ၵူၼ်း ၵေႃႉၼၼ်ႉၵေႃႉၼႆႉလႄႈ ၽွင်း မၼ်းၸၢႆးႁွတ်ႈႁူဝ်မိူင်းၼၼ်ႉ ၸုမ်း SSS ၶဝ် ၵႂႃႇတိဢဝ်မၼ်းၼႂ်းၵၢတ်ႇ၊ ၵူၺ်းၵႃႈ မၼ်းၸၢႆးသမ်ႉလႅၼ်ႈပၢႆႈ လွတ်ႈပႅတ်ႈ၊ ၸင်ႇၶိုၼ်းၵႂႃႇတိလႆႈထႅင်ႈတီႈတႃႈသႅၼ်ဢိၼ်း ၼႆႉ- ၼႆယဝ်ႉ။

ဝၢႆးထုၵ်ႇတိယဝ်ႉ ယူႇတီႈၸုမ်း SSS ထဵတ်ႈထၢမ်သေ မၼ်းၸၢႆးယွမ်းႁပ်ႉတွပ်ႇလၢတ်ႈဝႃႈ- လႆႈၶႃႈတၢႆ ပႃႈလႃႉၵျီႇတႄႉ။ ဢွၼ်ၼႃႈၼၼ်ႉ မၼ်းၵႂႃႇႁဵတ်းၵၢၼ်ၵေႃႇသၢင်ႈႁိမ်းၼၼ်ႉ၊ ဝၢႆးမႃးၶဝ်ႈဢွၵ်ႇၵၼ်သေ ပဵၼ်ၵူၼ်းမိုတ်ႈၵိုဝ်းၵၼ်။ ဝၼ်းၼၼ်ႉ (ဝၼ်းထိ 22/06/12) မၼ်းၵႂႃႇလၢင်ႉလူတ်ႉသေ ၶၢင်းဝႃႈ တွင်ႉမႆႈ ၶဝ်ႈ၊ ပႃႈလႃႉၵျီႇ ႁဵတ်းၶဝ်ႈႁဵတ်းၽၵ်းလဵင်ႉမၼ်း၊ မၼ်းဝႃႈ တေဢဝ်မိူဝ်းၵိၼ်တီႈႁွင်ႈၼႆသေ ပႃႈလႃႉၵျီႇ ၵေႃႈ ၸွၵ်းႁေႃႇသႂ်ႇထူင်ပၼ်မၼ်းထႅင်ႈ။ မိူဝ်းၵိၼ်လဝ်ႈမဝ်းသေ မွၵ်ႈ 9 မူင်း ၵၢင်ၶိုၼ်းပွၵ်ႈမႃးၶိုၼ်း၊ ပေႃးမႃးၵေႃႈ ၸၼ်ႉႁုၵ်ႉၶႅၼ်ပႃႈလႃႉၵျီႇၶဝ်ႈၼႂ်းႁိူၼ်း၊ ပႃႉလႃႉၵျီႇပိတ်ႉမၼ်းပၢပ်းၵႅမ်ႈမၼ်း။ မၼ်းသမ်ႉ ဢဝ်လဵၵ်းလိမ်ႇသႄႈ (ၶႆၶူင်း) တမ်ပုမ်ပႃႈလႃႉၵျီႇ၊ ပႃႈလႃႉၵျီႇသမ်ႉဝၵ်ႉလႆႈမိတ်ႈတၢင်းႁူဝ်တီႈၼွၼ်းမႃး၊ မၼ်းၸၢႆး ၵေႃႈဝၵ်ႉႁိမ် ဢဝ်ထိူဝ်ၶေႃးပႃႈလႃႉၵျီႇထိုင်တီႈၸမ်တေပုတ်း ၵိုတ်းထႅင်ႈမွၵ်ႈႁူဝ်မႄႈမိုဝ်းၵူၺ်း- ဝႃႈၼႆ။

ယွၼ်ႉပိူဝ်ႈလိူတ်ႈဢွၵ်ႇၼမ်ၼႅၼ်ႇသေမၼ်းၸၢႆး ဢဝ်ၽႃႈဝႆပူၵ်ႉပႅတ်ႈသေလူလၢႆထႅင်ႈ။ ပေႃးယဝ်ႉ ဢူၺ်းၵေႃႉ မၼ်းၸၢႆး မွၼ်း (ၵူၼ်းမွၵ်ႇမႆႇ) မႃးႁူမ်ႈၵႃႇမလူလၢႆတူဝ်တၢႆၼၼ်ႉထႅင်ႈ။ ပေႃးယဝ်ႉ ၶႃသွင်ၵေႃႉၸင်ႇႁုပ်ႈဢဝ် ၶူဝ်းၶွင်ငိုၼ်းၶမ်း ဝႅၼ် ၶမ်းဝူင်းၵိုင်ႇဝၢတ်ႇဝူင်းၼိုင်ႈ၊ သၢႆၶေႃးသဵၼ်ႈ 1 မၢတ်ႈၼိုင်ႈသဵၼ်ႈ၊ လၵ်ႉဢဝ်ပႃး လူတ်ႉၶိူင်ႈပႃႈလႃႉၵျီႇသေ ပၢႆႈၵႂႃႇၸူးဢူၺ်း ၵေႃႉထႅင်ႈၵေႃႉၼိုင်ႈ ၸိုဝ်ႈၸၢႆးပိူင်း ဢၼ်ယူႇတၢင်းဝၢၼ်ႈထိ (ႁူင်းမႆႉ) လမ်းပုၼ်း။ လူတ်ႉၶိူင်ႈၼၼ်ႉ ဢဝ်ၵႂႃႇၶၢႆပၼ် လုင်းၼိတ်း (ၵူၼ်းထႆး)သေလႆႈငိုၼ်း လႆႈငိုၼ်း 18,000 ၊ ၶဝ် 3 ၵေႃႉၸႅၵ်ႇပၼ်ၵၼ် လႆႈၵေႃႉလႂ် 6 ႁဵင်၊ ၶမ်းတႄႉ တူဝ်မၼ်း (ၸၢႆးၶျႆး-ၸူၼ်ပၢတ်ႇၶေႃး)ၵႂႃႇၶၢႆႁင်းၵူၺ်း- ၼႆယဝ်ႉ။

လၢတ်ႈဝႃႈ- ၵေႃႉႁႅမ်ၶႃႈပၢတ်ႇၶေႃးပဵၼ်မၼ်းၸၢႆး၊ ၵေႃႉပၼ်တၢင်းဝူၼ်ႉတၢင်းၶႆႈၸႂ်ပဵၼ်ၸၢႆးမွၼ်း။ ဝၢႆးၶၢႆ လူတ်ႉၶိူင်ႈလႆႈယဝ်ႉ တင်းၸၢႆးမွၼ်း ဢွၼ်ၵၼ်ပၢႆႈလုၵ်ႉၵဵင်းမႆႇ ၶိုၼ်ႈမိူဝ်းတၢင်းမႄႈႁွင်ႈသွၼ်၊ မိူဝ်းၵႂႃႇ တၢင်း ႁူဝ်မိူင်း၊ မိူဝ်ႈလႅၵ်ႈငိုၼ်းမၢၼ်ႈတီႈ ႁူဝ်မိူင်း၊ မၼ်းၸၢႆးၸင်ႇထုၵ်ႇၸုမ်း SSS မႃးႁႃတိၺွပ်းတီႈ ၵၢတ်ႇ- ဝႃႈၼႆ။ (ၸၢႆးမွၼ်းၼၼ်ႉ တၼ်းလွတ်ႈၶၢမ်ႈၶူင်းမိူဝ်းမိူင်း တႆးပႅတ်ႈ၊ ၵွပ်ႈဝႃႈ ဢၼ်ၸဝ်ႈၼႃႈတီႈထႆး သူင်ႇပၼ်ၶေႃႈမုလ်း/ႁၢင်ႈထၢႆႇတီႈ ၸုမ်း SSS ႁူဝ်မိူင်းဢမ်ႇပႃးႁၢင်ႈထၢႆႇၸၢႆးမွၼ်း)- ၼႆယဝ်ႉ။

ၸွမ်းၼင်ႇတွင်ႈထၢမ်ၼၼ်ႉ မၼ်းၸၢႆးဝႃႈ- လႅၼ်ႈပၢႆႈလွတ်ႈတီႈႁူဝ်မိူင်းယဝ်ႉ ပႆတၢင်းၵႂႃႇတႃႈသူပ်းတဵင်း တင်းၶိုၼ်း၊ (ၶီႇလူတ်ႉမွၵ်ႈ 2 ၸူဝ်ႈမူင်း၊ မၼ်းပႆႇၶိုၼ်းၼိုင်ႈ)၊ ပႆလတ်းထိူၼ်ႇမီးတပ်ႉမၢၼ်ႈ၊ တပ်ႉ SSS သေၵႂႃႇႁွတ်ႈတႃႈသူပ်းတဵင်း၊ ဢၢင်ႈႁဵတ်းပႄးသေၶၢမ်ႈၶူင်းႁင်းၵူၺ်း၊ ၵူၺ်းၵႃႈ ႁၼ်ႁိူဝ်းပိူၼ်ႈတေ ၶၢမ်ႈသေ လႅၼ်ႈၵႂႃႇၶီႇၸွမ်းႁိူဝ်းပိူၼ်ႈ၊ ပိူၼ်ႈသမ်ႉတိလႆႈ ထႅင်ႈသေ လႅၼ်ႈပၢႆႈတင်ႈတႄႇတႃႈသူပ်းတဵင်း လူင်းၵႂႃႇၸွမ်း ၾင်ႇၶူင်းတိၵ်းတိၵ်းတေႃႇထိုင်တႃႈသႅၼ်ဢိၼ်း- ၼႆယဝ်ႉ။

လုၵ်ႉတႃႈသူပ်းတဵင်းလူင်းၵႂႃႇၸူးတႃႈသႅၼ်ဢိၼ်း ၵူၼ်းပႆမွၵ်ႈၶၢဝ်းတၢင်းဝၼ်းပၢႆ၊ ပဵၼ်တႃႈၸုမ်း SSS ၵူၺ်းၵႃႈ ပဵၼ်တႃႈႁၢမ်း ဢမ်ႇမီးႁိူဝ်းၶၢမ်ႈ။ ဢၼ်မၼ်းၸၢႆးလႅၼ်ႈပၢႆႈတီႈတႃႈသူပ်းတဵင်းၼႆႉ ၸုမ်း SSS လႆႈၶၢဝ်ႇသေၸွမ်းၵႂႃႇတိၺွပ်းလႆႈ- ၼႆယဝ်ႉ။

ၸၢႆးၶျႆးၼႆႉ ၶဝ်ႈႁဵတ်းၵၢၼ်မိူင်းမိူင်းထႆး 10 ပီပၢႆ၊ ယိပ်းဝႂ်ႁႅင်းငၢၼ်း၊ ပဵၼ်ၵူၼ်းၸႃႇတိပွတ်းမိူင်းၼၢႆး။ ပႃႈလႃႉၵျီႇမီးဝႂ်ထႆး၊ မီးလုၵ်ႈလၢင်းယဝ်ႉႁူင်းႁဵၼ်းထႆး မေႃႊ 6 (မိူင်းမၢၼ်ႈတႅၵ်ႈလႆႈၸၼ်ႉ 10)၊ ယူႇႁိူၼ်း (ၼႂ်းသူၼ်ပိူၼ်ႈ)ၵေႃႉလဵဝ်၊ မၢင်ၶိုၼ်း တႄႉ လုၵ်ႈၸၢႆးမႃးၼွၼ်းႁဵတ်းၵေႃႉယူႇ၊ မၢင်ၶိုၼ်းၵေႃႈဢမ်ႇၼွၼ်း- ၼႆယဝ်ႉ။

ၵူၼ်းတႆးတူင်ႇဝူင်းၵႂၢင်ႈ ဢၼ်ၶဝ်ႈဢွၵ်ႇလႆႈလၢႆၾၢႆႇၵေႃႉၼိုင်ႈလၢတ်ႈဝႃႈ- မိူဝ်ႈလဵဝ် ပေႃးမၢင်ႇႁဵတ်းႁၢႆႉ ၶႃႈၵူၼ်းၼႂ်းမိူင်းထႆး သေပၢႆႈမိူဝ်းမိူင်းတႆး မိူင်းမၢၼ်ႈတႄႉ ဢမ်ႇလွတ်ႈယဝ်ႉ။ ပေႃးပၢႆႈမိူဝ်းတၢင်းႁူဝ် မိူင်းၺႃး ၸုမ်း SSS တိၺွပ်းပၼ်၊ ပေႃးပၢႆႈ မိူဝ်းတၢင်းၼွင်ဢုၵ်း BP1 ၺႃးဝႃႉတိပၼ်၊ ပၢႆႈမိူဝ်းတၢင်းလွႆ တႆးလႅင်း ၵေႃႈၸုမ်းလွႆတႆးလႅင်းတိပၼ်၊ ပေႃးပၢႆႈမိူဝ်းတၢင်းတႃႈ ၶီႈလဵၵ်း ၵေႃႈၺႃးမၢၼ်ႈတိ။ ၵွပ်ႈဝႃႈ လၢႆလၢႆၸုမ်း ၸိူဝ်းၼႆႉတင်းထႆး မီးၵၢၼ်တိတ်းတေႃႇၵပ်းသၢၼ်ပွင်ႇလႅင်းၸူးၵၼ် တႃႇသေႇ -ဝႃႈၼႆ။

လၢတ်ႈၼႄပႃးဝႃႈ- ၸၢႆးၶျႆးၼႆႉ တၢင်းၸုမ်း SSS လႆႈဢဝ်မႃးဝႆႉတီႈႁူဝ်မိူင်းသေထဵတ်ႈထၢမ်ယဝ်ႉ မွပ်ႈပၼ်မၢၼ်ႈ၊ ယွၼ်ႉထႆး ယွၼ်းတူဝ်ၵႂႃႇပဵၼ်တၢင်းၵၢၼ်လႄႈ ယူႇတီႈမၢၼ်ႈတေ သူင်ႇပၼ်ထႆးပဵၼ် တၢင်းၵၢၼ်။ ၸၢင်ႈတေဢဝ်ၵႂႃႇတီႈလူင်ပွင်ၸိုင်ႈ ၸႄႈမိူင်းတႆး တီႈတူၼ်ႈတီးသေ သိုပ်ႇသူင်ႇပၼ်ထႆး ၽၢၼ်ႇတၢင်း တႃႈၶီႈလဵၵ်း-မႄႈသၢႆ ႁိုဝ် ၽၢၼ်ႇတၢင်းၼေႇပျီႇတေႃႇ။

ငိုၼ်းတွင်းဢၼ်တိလႆႈၶိုၼ်းၵေႃႈ ၶိုၼ်းမႃးလႅၵ်ႈငိုၼ်းထႆးလႆႈမွၵ်ႈႁိမ်း 2 မိုၼ်ႇဝၢတ်ႇသေယူႇတီႈတူဝ် တႅၼ်း ၸုမ်း SSS ၶိုၼ်းမႃးမွပ်ႈပၼ်တီႈလုၵ်ႈလၢင်း ပႃႈလႃႉၵျီႇ တီႈလႅၼ်လိၼ်တႆး-ထႆး တီႈၼိုင်ႈယဝ်ႉ၊ လူတ်ႉၶိူင်ႈ ၼၼ်ႉၵေႃႈ ဝၢႆးမႃးမီး ၵူၼ်းသိုဝ်ႉသိုပ်ႇတီႈၵူၼ်းထႆးလမ်းပုၼ်းၵႂႃႇထႅင်ႈသေ မႃးၶီႇတၢင်းမႄႈ ၵျူဝ်ႉ (ၵဵင်းမႆႇ)၊ ပလိၵ်ႈထႆးၵႂႃႇတိလႆႈၶိုၼ်းယဝ်ႉ ၼင်ႇၵဝ်ႇ- ဝႃႈၼႆ။

လႆႈႁူႉပႃးဝႃႈ ၸၢႆးၶျႆးၼႆႉ ၵၢၼ်ၶႃႈႁႅမ်ပွၵ်ႈၼႆႉ ပဵၼ်ၵူၼ်းၵေႃႉထိ 2 ယဝ်ႉ၊ ၵေႃႉဢွၼ်တၢင်းၼၼ်ႉပဵၼ် ၵူၼ်းၸၢႆး၊ ပဵၼ်တႆး ၶဝ်ႈႁဵတ်းၵၢၼ်ၼႂ်းမိူင်းထႆးၼင်ႇၵဝ်ႇ။ လွင်ႈတၢင်းမၼ်းတႄႉ ၵႂႃႇၵိၼ်လဝ်ႈဝူင်း လဵဝ်ၵၼ်သေမီးလွင်ႈ ၽိတ်းမေႃးၵၼ်လႄႈ ၵူၼ်းၸၢႆးၵေႃႉၼၼ်ႉ ဢဝ်တဝ်ႈလဝ်ႈထုပ်ႉႁူဝ်ပီႈဢၢႆႈမၼ်း၊ မၼ်းငႅၼ်းၶေႃးတၢႆပႅတ်ႈ။ ၶဝ်ဢဝ်တူဝ်တၢႆၵႂႃႇၾင်ႁင်းၵူၺ်း၊ ဢမ်ႇမီးၶၢဝ်ႇဢွၵ်ႇသင်- ၽူႈတူင်ႇဝူင်းၵႂၢင်ႈ သိုပ်ႇလၢတ်ႈထႅင်ႈၼင်ႇၼႆ။