ၼႂ်းဝူင်ႈပူၼ်ႉမႃးၼႆႉ တပ်ႉသိုၵ်းၸိုင်ႈတႆး SSA လွႆၵေႃႇ ဝၼ်း ၾိုၵ်းၵၢၼ်သိုၵ်းယိုဝ်းၵွင်ႈ ႁဵတ်းႁႂ်ႈၵူၼ်းမိူင်း ၸိူဝ်း ယူႇသဝ်းပိုင်ႈဢိင်ၸွမ်းလႅၼ်လိၼ်ထႆး တူၵ်းၸႂ်လႂ်တိုၼ်ႇ၊ ၵမ်ႈၽွင်ႈဝူၼ်ႉဝႃႈပဵၼ်ပၢင်တိုၵ်း။ ၼွၵ်ႈသေၼၼ်ႉ မီးၵၢၼ်ၾိုၵ်းသိုၵ်းတီႈငဝ်ႈတပ်ႉလၢႆတီႈ။ ၸဝ်ႈယွတ်ႈသိုၵ်း ဝႃႈ လွင်ႈငမ်းယဵၼ်ပဵၼ် ၵၢၼ်မႃး 25%။

ၵူၼ်းဝၢၼ်ႈယူႇသဝ်းပွတ်းလႅၼ်လိၼ်ၵေႃႉၼိုင်ႈလၢတ်ႈဝႃႈ- ၶဝ်ၸႂ်ႉၵွင်ႈသင်လၢႆလၢႆတႄႉဢမ်ႇႁူႉ၊ မိူဝ်ႈဝႃးၼႆႉ (29/07/12) သဵင်မၼ်းၶႂ်ႈလင်ဝႆႉ၊ သဵင်မၢၵ်ႇလူင်ၵေႃႈလႆႈငိၼ်း။ ၵူၼ်းဝၢၼ်ႈၵေႃႈတူၵ်းၸႂ်၊ ဝူၼ်ႉဝႃႈၶဝ် ယိုဝ်းၵၼ်၊ ၵူၺ်းၵႃႈ ယူႇတီႈၵူၼ်း ဝၢၼ်ႈသမ်ႉဢမ်ႇႁၼ်သိုၵ်းထႆးတူင်ႉတိုၼ်ႇသင်၊ ႁဵတ်းၵၢၼ် ၶဝ်မိူၼ်ၵဝ်ႇ ၵူၺ်းလႄႈ ၵမ်ႈၽွင်ႈၵေႃႈဝႃႈၶေးဢမ်ႇၸႂ်ႈပၢင်တိုၵ်း။

ၵပ်းၵၢႆႇလွင်ႈၼႆႉ တွင်ႈထၢမ်ၸဝ်ႈသိုၵ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ 1 (ၼႃႈလိၼ်သိုၵ်းၵဵင်း တုင်) တွပ်ႇလၢတ်ႈ ဝႃႈ- ၸႂ်ႈတႄႉယူႇ၊ ႁဝ်းၶႃႈလႆႈၾိုၵ်းၵၢၼ်သိုၵ်းမႃးၸဵမ်မိူဝ်ႈဝူင်ႈပူၼ်ႉ၊ ဝၼ်းထိ 27-28-29 ၼႆႉ ႁဝ်းလႆႈၶွတ်ႇယွတ်ႈလူပ်း လိုၼ်းမၼ်း လူၺ်ႈၵၢၼ်ယိုဝ်း။ ၵူၺ်းၵႃႈ ဢၼ်ႁဝ်းလိုမ်ႉၵၢၼ် သိုၵ်းပွၵ်ႈၼႆႉ ဢမ်ႇၸႂ်ႈၵၢၼ်ၾိုၵ်းသိုၵ်းၶိုၵ်ႉတွၼ်း၊ ဢမ်ႇၸႂ်ႈ ၾိုၵ်းသိုၵ်းၶိုၵ်ႉၶၵ်ႉ၊ ထိုင်ၶၢဝ်းမၼ်းမႃးလႄႈ ၾိုၵ်းၵၢၼ်သိုၵ်း မိူၼ်ၼင်ႇ ယၢမ်ႈႁဵတ်းမႃးၵူႈပီတႃႇသေႇၼၼ်ႉၵူၺ်း။ ဢၼ်ႁဝ်း ႁဵတ်းႁႂ်ႈၵူၼ်းဝၢၼ်ႈ ၵူၼ်းမိူင်းၸွမ်းလႅၼ်လိၼ် တူၵ်းၸႂ်ၼႆႉ ယူႇတီႈႁဝ်းၾၢၵ်ႇၵႂၢမ်းယွၼ်းၼွမ်းယႂ်ႇၼမ်- ဝႃႈၼႆ။

ၼွၵ်ႈသေၼၼ်ႉ ငဝ်ႈငုၼ်းတပ်ႉယႂ်ႇၶွင် RCSS/SSA ၸိူဝ်းပၵ်းၸွမ်းလႅၼ်လိၼ်မိူင်းထႆး 5 တီႈ (1.လွႆတႆး လႅင်း၊ တေႃႇၼႃႈ ၸႄႈဝဵင်းပၢင်မၢၵ်ႇၽႃႈ၊ မႄႈႁွင်ႈသွၼ်။ 2.လွႆၵေႃႇဝၼ်း၊ ၸႄႈဝဵင်းမႄႈၾႃႉလူင်၊ ၵဵင်းႁၢႆး။ 3.လွႆသၼ်ၸု၊ ၸႄႈဝဵင်းမိူင်းၾၢင်၊ ၵဵင်းမႆႇ။ 4.လွႆလမ် ၸႄႈဝဵင်းဝဵင်းႁႅင်၊ ၵဵင်းမႆႇ။ တီႈ SSA ပၵ်းယူႇ 5.ၵွင်းမုင်ႈမိူင်း မႄႈႁွင်ႈသွၼ်)ၵေႃႈ လႆႈငိၼ်းဝႃႈမီးၵၢၼ် ၾိုၵ်းၵၢၼ်သိုၵ်းၵူႈတီႈ၊ ပိူင်လူင်မၼ်း တီႈလွႆတႆးလႅင်း မီးၵၢၼ်ၾိုၵ်းၵၢၼ်သိုၵ်းယႂ်ႇသုတ်း - ၼႆယဝ်ႉ။

ဝၢႆး RCSS/SSA ဢုပ်ႇဢူဝ်းလွင်ႈငမ်းယဵၼ် တူၵ်းလူင်းၵိုတ်းယိုဝ်းၵၼ်တင်း ၸုမ်းလူင်ပွင်ၸိုင်ႈတဵင်း ၸဵင်ႇ မႃးၸဵမ်မိူဝ်ႈ ဝၼ်းထိ 02/12/11 မႃးၼႆႉ တင်းၾၢႆႇသိုၵ်းမၢၼ်ႈ လႆႈယိုဝ်းၵၼ်တီႈဢေႇသုတ်း ဢမ်ႇယွမ်း 25 ပွၵ်ႈ။ ၵွပ်ႈၾၢႆႇသိုၵ်းမၢၼ်ႈ ဢမ်ႇၵိုတ်းၽႅၼ်ၵၢၼ်/ၵုမ်းၵမ်ပတ်းၽဵဝ်ႈၼႃႈလိၼ် လႄႈ လႆႈပဵၼ်ပၢင်တိုၵ်း ၵၼ်တင်း RCSS/SSA မႃးၶိူဝ်းၶိူဝ်း၊ ၼႂ်း 25 ပွၵ်ႈၼႆႉ ၼႃႈလိၼ်သိုၵ်းၵဵင်းတုင်ၵူၺ်း ဢမ်ႇယွမ်း 7 ပွၵ်ႈ။

မိူဝ်ႈလိူၼ်ပူၼ်ႉ ၸုမ်းသိုဝ်ႇၶၢဝ်ႇထႆးတွင်ႈထၢမ်ၸဝ်ႈယွတ်ႈသိုၵ်း ႁူဝ်ပဝ်ႈ RCSS/SSA ဝႃႈ- ဢၼ်လႆႈ ၵိုတ်းယိုဝ်းၵၼ်မႃးၼႆႉ ပဵၼ်ၼမ်ႉပဵၼ်တူဝ်၊ ၶိုၼ်ႈယႂ်ႇၶိုပ်ႈၼႃႈ၊ ပဵၼ်ၵၢၼ်မႃးမွၵ်ႈၵႃႈႁိုဝ်ၼႆၼၼ်ႉ မၼ်းၸဝ်ႈတွပ်ႇဝႃႈ - ပဵၼ်ၵၢၼ်မႃးမီးမွၵ်ႈ 25% ။ 4 ၶေႃႈ ဢၼ်တုၵ်းယွၼ်းဝႆႉမိူဝ်ႈ 19/11/11 ၼၼ်ႉ 1.ၵိုတ်းယိုဝ်း၊ 2.တင်ႈလုမ်းၵပ်းသၢၼ်၊ 3.ပူၵ်းပွင်ၼႃႈလိၼ်ၶိုၵ်ႉတွၼ်း၊ 4.ႁူမ်ႈမိုဝ်းၽဵဝ်ႈမူၺ်ႉယႃႈမဝ်းၵမ် ၸိူဝ်းၼႆႉ ႁၢၼ်ႉတေႃႇမိူဝ်ႈလဵဝ် ဢၼ်ပဵၼ်ၼမ်ႉပဵၼ်တူဝ်မႃး မီးၶေႃႈထိ 2 လႄႈ ယူႇတီႈ RCSS/SSA လႆႈလူင်းသူၼ်းတုမ်ဢုပ်ႇဢူဝ်းၵူၼ်းမိူင်း၊ ႁူပ်ႉဢုပ်ႇၵူႈမူႇၵူႈၸုမ်းၸိူဝ်းၼႆႉ။ (ၶေႃႈ 1-3-4 တိုၵ်ႉမီးၼႂ်း ၸေႈၵူၺ်း၊ ပႆႇၼႄၼမ်ႉၼႄတူဝ်သင်လႆႈ)။

ၸိူင်ႉႁိုဝ်ၵေႃႈယဝ်ႉ ပူၼ်ႉမႃးမိူဝ်ႈဝၼ်းထိ 26-27/07/12 ၼႆႉ တၢင်းလွႆတႆးလႅင်း လႆႈႁဵတ်းပၢင်ၵုမ် ႁူဝ်ႁုပ်ႈ 6 လိူၼ်။ ဢုပ်ႇဢူဝ်းၵၼ်သင် ဢမ်ႇႁူႉႁူဝ်ယွႆႈယႅမ်းသေတႃႉ ၼႂ်းၶေႃႈတႅပ်းတတ်းၼၼ်ႉ လႆႈငိၼ်းဝႃႈ RCSS/SSA တေသိုပ်ႇႁဵတ်းၵႂႃႇ ၸွမ်းပေႃႇလသီႇၵၢၼ်ၵိုတ်းယိုဝ်း ဢဝ်လွင်ႈငမ်းယဵၼ်မႃး- ၼႆယဝ်ႉ။