ယႃႈမဝ်းၵမ် ၸိူဝ်းၸဝ်ႈၼႃႈတီႈထႆးတိလႆႈတီႈၵူၼ်းၵႃႉ ၸိူဝ်းထုၵ်ႇယိုဝ်းတၢႆ တီႈလႅၼ်လိၼ်ပွတ်းၵဵင်းႁၢႆး ပဵၼ်ၶွင်ၸုမ်းပီႇတုၸိတ်ႉ လႃးႁူႇ ပူႇၼႃးၵူဝ်။

ဝၼ်းထိ 16/07/12 မိူဝ်ႈဝႃးၵၢင်ၼႂ်ၸဝ်ႉ ယႃႈမႃႉ 550,000 မဵတ်ႉ၊ ယႃႈဢႆႊသ် မွၵ်ႈ 70 ၵီႊလူဝ်ႊ၊ ပေႃးၶၢႆလႆႈ တင်းမူတ်း ၵႃႈၶၼ်ငိုၼ်းမွၵ်ႈ 200 လၢၼ်ႉဝၢတ်ႇ၊ ဢၼ်ၸဝ်ႈၼႃႈတီႈၾၢႆႇသိုၵ်းထႆး တိလႆႈဝၢႆးၵိူတ်ႇၵၢၼ်ပိုတ်း ယိုဝ်းၶႃႈတၢႆၸုမ်းယိပ်း ၵွင်ႈၵၢင်ႇ ၵူၼ်းတေႃႉသူင်ႇယႃႈ 7 ၵေႃႉ ၼႂ်းထိူၼ်ႇႁိမ်းလႅၼ်လိၼ်ထႆး ပွတ်းဝၢၼ်ႈၽႃမီ ၸႄႈဝဵင်းမႄႈၾႃႉလူင် ၸႄႈတွၼ်ႈ ၵဵင်းႁၢႆးၼၼ်ႉ ပဵၼ်ၶူဝ်းၶွင်ၸုမ်း ပီႇတုၸိတ်ႉလႃးႁူႇ ပူႇၼႃးၵူဝ် ဢၼ်ၵျငွႆႉ တင်းၸၢႆးဢၢႆႈလူင်ပဵၼ်ၽူႈၼမ်း- လႅင်ႇၶၢဝ်ႇ လႅၼ်လိၼ် လၢတ်ႈမႃးၼင်ႇၼႆ။

ပူႇၼႃးၵူဝ် ယူႇၼႂ်းမိူင်းတုမ်း ၸႄႈတွၼ်ႈမိူင်းသၢတ်ႇ။ ၵူၺ်းၵႃႈ ၵၢၼ်တေႃႉယႃႈပွၵ်ႈၵမ်းၼႆႉ ဢမ်ႇတေႃႉၶဝ်ႈမိူင်းထႆးၼႂ်းပိုၼ်ႉ တီႈဢၼ်ၸမ်လိူဝ် မိူၼ်ၼင်ႇပွတ်းမႄႈၵျူၵ်ႉ(ၾင်ႇတႆး)လႄႈမူင်ႉၵဝ်ႈလင်(ၾင်ႇထႆး)၊ ပိၼ်ႇသဵၼ်ႈတၢင်းၵႂႃႇပွတ်းလွႆတေႃႇ ၶမ်း၊ ဝၢၼ်ႈသၢမ်ပီးသေၶဝ်ႈမိူင်းထႆးပွတ်းဝၢၼ်ႈၽႃမီ။

လႅင်ႇၶၢဝ်ႇလႅၼ်လိၼ်သပ်းလႅင်းၼႄဝႃႈ- ပေႃးတေႃႉၶဝ်ႈမိူင်းထႆးတၢင်းမႄႈၵျူၵ်ႉ-မူင်ႈၵဝ်ႈလင် ထုၵ်ႇပိူၼ်ႈပၵ်းတႃႁႅင်း ၼႅၼ်ႇ ၸင်ႇဢဝ်ၵႂႃႇတေႃႉၶဝ်ႈတၢင်းသၢမ်ပီး၊ လွင်ႈတၢင်းဢဝ်ၵႂႃႇတေႃႉၶဝ်ႈပွတ်းၼၼ်ႉ ၸုမ်းပူႇၼႃးၵူဝ်မီးၵၢၼ်သၢၼ်မိုဝ်း ၵၼ်တင်းၸုမ်းပီႇတုၸိတ်ႉသၢမ်ပီးသေ ၸင်ႇတေႃႉၶဝ်ႈၵေႃႈၸၢင်ႈပဵၼ်လႆႈ၊ ၸုမ်းပီႇတုၸိတ်ႉၼမ်ႉပုင်ႇတႄႉဢမ်ႇလႅပ်ႈ ၵဵဝ်ႇၶွင်ႈၸွမ်း- ဝႃႈၼႆ။

ၽူႈလဵပ်ႈႁဵၼ်းၵမ်ႈၽွင်ႈဝႃႈ- ၸုမ်းယိပ်းၵွင်ႈၵၢင်ႇၵႃႉယႃႈၶဝ်ၼႆႉ ပေႃးၶဝ်သိုဝ်ႉၶၢႆသူင်ႇယႃႈမႅင်ႇၵၼ်ၵမ်ႈၼမ် ပဵၼ်ၸွမ်းလႅၼ် လိၼ်၊ ဢမ်ႇလႃႈလီႈယိပ်းၵွင်ႈၸေးမိုဝ်းၶဝ်ႈမိူင်းထႆးပဵၼ်ၸုမ်းၸိူင်ႉၼႆ။ လွင်ႈပႃးၵွင်ႈၵၢင်ႇ ၶဝ်ႈသူင်ႇယႃႈၵၼ်ၼႂ်းမိူင်းထႆးၼႆႉ မၢင်ၽဝ်ႇတင်းၸဝ်ႈၼႃႈတီႈၼႂ်းပိုၼ်ႉတီႈ ယၢမ်ႈသၢင်ႈလွင်ႈယုမ်ႇယမ်ၵၼ်မႃး ဢွၼ်တၢင်းၵေႃႈၸၢင်ႈပဵၼ်လႆႈ၊ ႁဵတ်းႁႂ်ႈၸုမ်း ၵႃႉယႃႈၶဝ်ယုမ်ႇယမ်ၼိူဝ်ၵၼ်သေပဵၼ်ၵႆႇၼႂ်းလဝ်ႉၵႂႃႇပႅတ်ႈ ၵမ်းၼႆႉ- ဝႃႈၼႆ။

ပူၼ်ႉမႃးမိူဝ်ႈဝၼ်းထိ 23/03/12 မီးၵၢၼ်ၵႂႃႇသွၵ်ႈယႃႈမဝ်းၵမ်တီႈဝၢၼ်ႈပူႇၼႃးၵူဝ် ဢိူင်ႇမိူင်းတုမ်း ၸႄႈဝဵင်းမိူင်းသၢတ်ႇ၊ ၸိူဝ်းၵႂႃႇသွၵ်ႈၼၼ်ႉ ၵမ်ႈၽွင်ႈဝႃႈပႃးၸဝ်ႈၼႃႈတီႈၶႄႇ။ ၵူၺ်းၵႃႈ ၵွပ်ႈမီးၵၢၼ်ပွင်ႇၵၼ်ဝႆႉ လူင်ႈၼႃႈၼင်ႇၵဝ်ႇလႄႈ ၵႂႃႇသွၵ်ႈဢမ်ႇၺႃးသင်။

ၵူၼ်းပွတ်းတႃႈၶီႈလဵၵ်းၵေႃႉၼိုင်ႈလၢတ်ႈၼႄဝႃႈ- ဢွၼ်ၼႃႈတေၵႂႃႇသွၵ်ႈၼၼ်ႉ တၢင်းပူႇၼႃးၵူဝ်လႆႈႁပ်ႉၶေႃႈ တိူၼ်ဝႆႉ လူင်ႈၼႃႈ 2-3 ဝၼ်းဝႃႈ ဢမ်ႇႁိုင်သင်ၼႆႉ ၾူၼ်တေတူၵ်းယဝ်ႉ၊ ပေႃးၾူၼ်တူၵ်း ထူဝ်ႇသူငႃးသူ ၸၢင်ႈယမ်းၾူၼ်လႄႈ ႁႂ်ႈၸဵဝ်းၵဵပ်းၸဵဝ်းၵူႈဝႆႉထႃႈ။ ၵွပ်ႈၼၼ် ၽိူဝ်ႇၵႂႃႇသွၵ်ႈၵေႃႈဢမ်ႇၺႃးသင်၊ ပိူၼ်ႈၵေႃႈ လဵင်ႉၶဝ်ႈၶဝ်သေ ၶဝ်ၵေႃႈပွၵ်ႈၶိုၼ်း- ဝႃႈၼႆ။