သိုၵ်းမၢၼ်ႈတင်းပလိၵ်ႈ ဢၼ်ဢွၵ်ႇပၢႆႈတပ်ႉၼင်ႇၵၼ် ၶဝ်ႈၵိၼ်လဝ်ႈၼႂ်းႁၢၼ်ႉလဵဝ်ၵၼ်သေ ၾၢႆႇလႂ်ၵေႃႈ ၶႂ်ႈဢဝ်ၼၢင်းယိင်း ဢွၼ်တၢင်းလႄႈ ၽိတ်းမေႃးယိုဝ်းၵၼ်။

ပူၼ်ႉမႃးမိူဝ်ႈဝၼ်းထိ 03/07/12 ၵၢင်ၶမ်ႈ၊ သိုၵ်းမၢၼ်ႈၸၼ်ႉၶုၼ်ႁၢၼ် ၸိုဝ်ႈၶျၢၼ်းမျိၼ်ႉဢွင်ႇ၊ တပ်ႉၶလယ 291 (ၼမ်ႉပွင်ႈ) တင်းပလိၵ်ႈၵေႃႉၼိုင်ႈ ၸၼ်ႉႁူဝ်သိုၵ်းလူင် ၸိုဝ်ႈဢွင်ႇၸူဝ်းလိၼ်း ၵႂႃႇၵိၼ်လဝ်ႈၼႂ်းႁၢၼ်ႉ တီႈလဵဝ်ၵၼ်သေ မီးၵၢၼ်ႁိမ်ၼၢင်းယိင်း(မႄႈမွၵ်ႇယႃႈ)ၵၼ်၊ ယွၼ်ႉၽႂ်လႂ်ၵေႃႈၶႂ်ႈလႆႈဢွၼ်တၢင်း၊ ၾၢႆႇသိုၵ်းဢဝ်ၵွင်ႈယိုဝ်းသႂ်ႇၶႃၾၢႆႇၶႂႃၶွင် ပလိၵ်ႈတိူဝ်ႉတီႈႁူဝ်ၶဝ်ႇဝၢတ်ႇၸဵပ်းလိူဝ်ႁႅင်း၊ မိူဝ်ႈလဵဝ်ၵႂႃႇၶဝ်ႈႁူင်းယႃ လႃႈသဵဝ်ႈလူင်ဝႆႉ၊ လႆႈႁူႉဝႃႈ ၶႃမၼ်းၸၢႆးၼၼ်ႉ လႅပ်ႈတေ ဢမ်ႇလႆႈယဝ်ႉ- ဝႃႈၼႆ။

ၶျၢၼ်းမျိၼ်ႉဢွင်ႇ ပဵၼ်သိုၵ်းမၢၼ်ႈတပ်ႉၼမ်ႉပွင်ႈ ပၢႆႈတပ်ႉလၵ်ႉမႃးလႃႈသဵဝ်ႈ၊ ပလိၵ်ႈဢွင်ႇၸူဝ်းလိၼ်းသမ်ႉ လုၵ်ႉတီႈသူၺ်ႇ ၸႃႇယၢၼ်ႇ တီႈဝဵင်းလိူဝ်ႇ ပၢႆႈတပ်ႉသေမႃးလၵ်ႉၵႃႉလူတ်ႉၶိူင်ႈတၢင်းမူႇၸႄႈ တေႃႉလူင်း ၵႂႃႇၶၢႆတၢင်းဝဵင်းလိူဝ်ႇသေ မႃးၺႃး ၵၼ်ၼႂ်းႁၢၼ်ႉလဝ်ႈ။

ဝၢႆးၵိူတ်ႇလိူင်ႈယဝ်ႉ ၾၢႆႇပလိၵ်ႈတိၺွပ်းဢဝ်ၶျၢၼ်းမျိၼ်ႉဢွင်ႇၵႂႃႇၵုမ်းတူဝ်ဝႆႉ တီႈၶွၵ်ႈမၢႆ 1 လႃႈသဵဝ်ႈ။ ၵပ်းၵၢႆႇလွင်ႈၼႆႉ ပေႃးပဵၼ်သိုၵ်း တေလႆႈၸွမ်းပိူင်ငဝ်ႈပိုင်းမိူင်း 2008 မတ်ႉတႃ 319 သေထတ်းသၢင်၊ တၵ်းလႆႈႁပ်ႉထတ်းသၢင်ပႃႈတႂ်ႈမၢႆမီႈ တပ်ႉသိုၵ်းသေတႃႉ ၽူႈၵွၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ(လႃႈသဵဝ်ႈ) ၵေႃႈ ဢမ်ႇၶႂ်ႈသုၵ်ႉသၵ်ႉၸွမ်း၊ ယွၼ်ႉၶႃပဵၼ်ၵူၼ်း လၵ်ႉဢွၵ်ႇတပ်ႉၼင်ႇၵၼ်၊ ၾၢႆႇသိုၵ်းၵေႃႈယွၼ်ႉပိူဝ်ႈ မၼ်းၸၢႆးလၵ်ႉပၢႆႈတပ်ႉ ၼႆသေပွႆႇႁႂ်ႈပလိၵ်ႈၶဝ်ၶင်ဝႆႉၵွၼ်ႇ၊ ပေႃးဝႃႈ ဢမု(ၶၻီး)တီႈပလိၵ်ႈယဝ်ႉတူဝ်ႈၸင်ႇၵွႆႈ ဢဝ်ၵႂႃႇၸူးၾၢႆႇသိုၵ်း- လႆႈႁူႉၼင်ႇၼႆ။