ၸဝ်ႈၶုၼ်ထုၼ်းဢူး (ပႃႇတီႇႁူဝ်သိူဝ်) ဢၼ်ၵႂႃႇယူတ်းယႃႈ တူဝ်မိူင်းထႆး တီႈဝဵင်းလူင်မိူင်းၵွၵ်ႇ (ၵုင်းထဵပ်ႈ) လႆႈဝူင်ႈ ပၢႆၼၼ်ႉ မိူဝ်ႈၼႆႉႁူဝ်ၶမ်ႈတေပွၵ်ႈၶိုၼ်းတႃႈၵုင်ႈ။

ၸၢႆးဢွင်ႇတဵင်း (ၽူႈၵွၼ်းႁွင်ႈၵၢၼ်ၾၢႆႇတိတ်းတေႃႇၵူၼ်းမိူင်း ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး SNLD) ၵေႃႉၸပ်း ၸွမ်းႁွမ်းပႆၸဝ်ႈၶုၼ်ထုၼ်းဢူး မႃးယူတ်းယႃတူဝ်လၢတ်ႈဝႃႈ- လွင်ႈလႆႈမႃးယူတ်းယႃတူဝ်၊ ၵူတ်ႇထတ်းပၢႆးယူႇလီၼႆႉ ႁၢၼ်ႉ ၸႂ်ၵူႈပိူင်၊ လွင်ႈလီမႆႈၸႂ်ၸွမ်း ဢမ်ႇမီးသင်၊ ပိူင်လူင်မၼ်း လွင်ႈဢႅဝ်ၸဵပ်း ၶႃၶိုၼ်ႈၸိူဝ်းၼႆႉ ယၢမ်းလဵဝ် မေႃယႃၶဝ်ၵေႃႈပၼ် ယႃႈယႃမိူဝ်းၵိၼ်တႃႇလိူၼ်ၼိုင်ႈ၊ မေႃယႃၶဝ်လႆႈၼတ်ႉ/ ၽတ်းဝႆႉထႅင်ႈလိူၼ်ၼိုင်ႈ ႁႂ်ႈပွၵ်ႈမႃးၶိုၼ်း- ဝႃႈၼႆ။

ၸဝ်ႈၶုၼ်ထုၼ်းဢူး ႁွတ်ႈၽႅဝ်မိူင်းၵွၵ်ႇ ၶိုၼ်းဝၼ်းထိ 02/07/12 ပိူဝ်ႈတႃႇၵူတ်ႇထတ်းပၢႆးယူႇလီ မိူၼ်ၼင်ႇဢႅဝ်ၸဵပ်း၊ မူၺ်ႈၸွမ်းလုပ်ႇၵပ်းလုပ်ႇတေႃႇ ႁူဝ်ၶဝ်ႇ၊ တွမ်ႇယဵဝ်ႈၵႂ်ႈ၊ ႁူင်းၶဝ်ႈၸဵပ်းၸိူဝ်းၼႆႉ။ ၾၢႆႇၼိုင်ႈၵေႃႈ မႃးၵူတ်ႇထတ်းပႃးလွင်ႈ ပီးလိူဝ်၊ ၼမ်ႉၼၵ်းၶိုၼ်ႈလိူဝ်ႁႅင်း-ၸိူဝ်းၼႆႉ။ မေႃယႃၶဝ်တီႈမိူင်းၵွၵ်ႇ ၼႄႉၼမ်းဝႃႈ- ႁႂ်ႈလူတ်းယွမ်းၼမ်ႉၼၵ်းတူဝ်၊ ႁႂ်ႈဝႄႈ တၢင်းၵိၼ်ဢၼ်မီးၶႆမၼ်းၸိူဝ်းၼႆႉ။

ၸၢႆးဢွင်ႇတဵင်းလၢတ်ႈပႃးဝႃႈ- တေပွၵ်ႈမိူဝ်းၵိၼ်တူၺ်းယႃႈယႃ၊ တၢင်းပဵၼ်ၶႅၼ်းၸႂ်လူတ်းယွမ်းလူင်းၸိူင်ႉႁိုဝ် ၼႆၵေႃႈ တေပွင်ႇၶၢဝ်ႇၸူးမေႃယႃၶဝ်၊ ပေႃးၵိုင်ႇလီမႃးၶိုၼ်းၵေႃႈၸင်ႇၵွႆႈမႃးထႅင်ႈ- ဝႃႈၼႆ။

ဢွၼ်ၼႃႈတေပွၵ်ႈမိူဝ်းမိူဝ်ႈၼႆႉ (10/07/12)ပွတ်းၼႂ် မၼ်းၸဝ်ႈတေၵႂႃႇလမ်ႁူဝ် (ၵႃရဝ)ၸဝ်ႈတူၼ်ၶူး ၸဝ်ႈၵွၼ်းဝတ်ႉ တီႈဝတ်ႉမႂ်ႇ (သႃထုပရႃႇတိတ်ႇ) ။ ၼွၵ်ႈသေၼၼ်ႉ တေဢႅဝ်ႇယဵမ်ႈပႃးပီႈၼွင်ႉတႆး ၸိူဝ်းႁွတ်ႈၽႅဝ်တီႈဝတ်ႉမႂ်ႇ၊ တေမွၵ်ႇ လၢတ်ႈၵႂၢမ်း ယိၼ်းၸူမ်းၶွပ်ႈၸႂ်ထိုင်ပီႈၼွင်ႉတႆး ၸိူဝ်းယွၼ်းသူး ပၼ်ႁႂ်ႈယူႇလီၵိၼ်ဝၢၼ်လႄႈ ပီႈၼွင်ႉတႆးၸိူဝ်းတူၵ်းႁွတ်ႈ မိူင်ထႆးၵူႈတီႈၵူႈလႅၼ်- ၼႆယဝ်ႉ။

ၸဝ်ႈၶုၼ်ထုၼ်းဢူးၼႆႉ ယၢမ်းလဵဝ်လႆႈထုၵ်ႇယုၵ်ႉယွင်ႈ/လိူၵ်ႈတင်ႈဝႆႉ ပဵၼ်ၽူႈၼမ်း မၢႆ1 ၶွင်ပႃႇတီႇ SNLD ၊ ၸၢႆးၼုတ်း ပဵၼ်ၽူႈၼမ်းမၢႆ 2 ။ ယၢမ်းလဵဝ်ပႃႇတီႇ SNLD ယင်းပႆႇမီးႁူဝ်ပဝ်ႈ၊ ၵွပ်ႈဝႃႈဝၢႆးထုၵ်ႇပူတ်းသေ တၢင်ႇယွၼ်းၶိုၼ်းလႆႈမၢႆၾၢင် ၶိုၼ်းပဵၼ်ပႃႇတီႇၵၢၼ်မိူင်းပဵၼ်တၢင်းၵၢၼ်ၼႆႉ ယင်းပႆႇလႆႈလိူၵ်ႈႁူဝ်ပဝ်ႈ။

ဢၼ်ၸပ်းၸွမ်းႁွမ်းပႆ ၸဝ်ႈၶုၼ်ထုၼ်းဢူး ၶၢဝ်းတၢင်းယူတ်းယႃတူဝ်မိူင်းထႆးပွၵ်ႈၼႆႉ မီးလုၵ်ႈယိင်းမၼ်းၸဝ်ႈ ၼၢင်းဢႄႊလ်ၵီႇ တင်းၸၢႆးဢွင်ႇတဵင်း။ မိူဝ်ႈမၼ်းၸဝ်ႈ ႁွတ်ႈၽႅဝ်ၶူင်ႇႁိူဝ်းဝိၼ်သုဝၼ်းၼၽုမ်း မိူင်းၵွၵ်ႇ ၶိုၼ်းဝၼ်းထိ 02/07/12 ၼၼ်ႉ မီးပီႈၼွင်ႉတႆးၵႂႃႇႁပ်ႉႁူမ်ၸူမ်း တွၼ်ႈတင်းၼမ်။