ႁူဝ်ၼႃႈၽူႈတွႆႇႁွၵ်ႈ ဢႃးၸၢၼ်ၶိုၼ်းသႂ် တင်းလၢႆၾၢႆႇ လႆႈႁူပ်ႉထူပ်းဢုပ်ႇဢူဝ်းတွင်ႈထၢမ် ၻွၵ်းတိူဝ်ႊ ၶရိတ်ႉ သတဵၼ်ႊ သတူၵ်ႊၶိူဝ်ႊ (Dr.Kristian Stokke) ၸၢဝ်းၼေႃႊဝေႊ၊ တီႈၸၼ်ႉၸွမ် Oslo မိူင်းၼေႃႊ ဝေႊ၊ မႃးယဵမ်ႈဢႅဝ်ႇမိူင်းထႆး ထိုင်ၵဵင်းမႆႇမိူဝ်ႈဝူင်ႈပူၼ်ႉ။ မၼ်း ၸဝ်ႈပိုတ်ႇလၢတ်ႈ ၽႅၼ်ၵၢၼ်မိူင်းၼေႃႊ ဝေႊ မီးၼိူဝ်မိူင်းမၢၼ်ႈလႄႈ ငဝ်းလၢႆးမိူင်းမၢၼ်ႈ မိူၼ်သီရိလင်းၵႃ ၵႃႈပူၼ်ႉမႃးၽွင်ႈ။

မၼ်းၸဝ်ႈလၢတ်ႈဝႃႈ- ငဝ်းလၢႆးမိူင်းသီရိလင်းၵႃ တင်းမိူင်းမၢၼ်ႈၼႆႉ ဢၼ်မိူၼ်ၵၼ်မီးယူႇ 2 လွင်ႈ။ (1) ၼႂ်းၶၵ်ႉၵၢၼ် လွင်ႈငမ်းယဵၼ်ၼႆႉ မီးၼွၵ်ႈမိူင်းၶဝ်ႈပႃးၸွမ်း။ မိူၼ်ၼင်ႇၼေႃႊဝေႊ၊ ၵျပၼ်ႊ၊ ၸၢတ်ႈၸိုင်ႈ ယူႊရွပ်ႊ EU ၊ ၸိုင်ႈမိူင်းဢမႄႊ ရိၵၼ်ႊ USA ၸိူဝ်းၼႆႉ။ (2)ၽႅၼ်တၢင်းၵၢၼ်မိူင်း Roadmap 3 ၶၵ်ႉတွၼ်ႈ 1.ၵိုတ်းယိုဝ်း၊ 2.ပူၵ်းပွင်၊ 3.ဢုပ်ႇဢူဝ်းလွင်ႈ ၵၢၼ်မိူင်း၊ ဢၼ်မိူၼ်ၵၼ်တင်းဢူးဢွင်ႇမိၼ်း (ၽွင်းလူင်ၾၢႆႇ တေႃႉသူင်ႇ လူတ်ႉၾႆး လႄႈၵႅမ်ႁူဝ်ပဝ်ႈၶွမ်ႊမတီႊၶိုင်ပွင် လွင်ႈငမ်းယဵၼ်) ယၢမ်ႈလၢတ်ႈ။

ၼႂ်း 3 ၶၵ်ႉၵၢၼ်လွင်ႈငမ်းယဵၼ်ၼၼ်ႉ ၵူႈၸိုင်ႈမိူင်းမႃးၸွႆႈထႅမ်ပၼ်ၵေႃႈ ဢၼ်ႁဵတ်းမႃး တီႈမိူင်းသီရိလင်း ၵႃ ဢမ်ႇပဵၼ်ၵၢၼ် (ဢမ်ႇဢွင်ႇ)၊ ၵူၺ်းၵႃႈ တီႈၸိုင်ႈမိူင်းႁူမ်ႈတုမ်မၢၼ်ႈတႄႉပႆႇၸၢင်ႈဝႃႈ- ဝႃႈၼႆ။

ပိူဝ်ႈတႃႇလႆႈလွင်ႈငမ်းယဵၼ်ၼၼ်ႉ လူင်ပွင်ၸိုင်ႈသီရိလင်းၵႃ တင်းၸုမ်းယိပ်းၵွင်ႈၵၢင်ႇထမီႊလ် ထႆႊၵိူဝ်ႊ (Tmil Tiger) တင်ႈတႄႇဢုပ်ႇၵၼ်မႃးၸဵမ်မိူဝ်ႈပီ 2002 သေ ထိုင်မႃးပီ 2009 ၸုမ်းထမီႊလ် ထႆႊၵိူဝ်ႊၶဝ် လႆႈပိုၼ်ၽၢဝ်ႇၵၢၼ်ႉသိုၵ်း။

မၼ်းၸဝ်ႈသပ်းလႅင်းၼႄ လွင်ႈၶၵ်ႉၵၢၼ်တီႈမိူင်းသီရိလင်းၵႃ မၼ်းဢမ်ႇဢွင်ႇဝႃႈ-
(1)ၽႅၼ်တၢင်းလွင်ႈငမ်းယဵၼ် ဢမ်ႇႁူမ်ႈၵၼ်၊ ပဵၼ်ၶွင်ၽႂ်ၶွင်မၼ်း၊ တၢင်းလူင်ပွင်ၸိုင်ႈဝႃႈလၢႆးၼိုင်ႈ တၢင်းၸုမ်းထမီႊလ် ထႆႊၵိူဝ်ႊသမ်ႉလၢတ်ႈလၢႆးၼိုင်ႈ။ ပေႃးတၢင်းလူင်ပွင်ၸိုင်ႈဝႃႈ ၸုမ်းထမီႊလ် ထႆႊၵိူဝ်ႊ သူၼႆႉၶႂ်ႈၽၢတ်ႇဢွၵ်ႇ၊ တၢင်းၾၢႆႇ ထမီႊလ်ၵေႃႈဝႃႈ သူၼႆႉၵုမ်ႇၶႂ်ႈႁဵတ်းလွၵ်းပိူင်ၸိုင်ႈမိူင်းလဵဝ်၊ သွင်ၾၢႆႇ သမ်ႉၶဵင်ႇၼႄးၵၼ်တိၵ်းတိၵ်း။ ၵွပ်ႈၼၼ် ၵူႈၸိုင်ႈမိူင်း ၸွႆႈထႅမ်ႁဵတ်းသၢင်ႈယူႇၵေႃႈ ၺႃးတၢင်းယၢပ်ႇ ၽိုတ်ႇၵူႈၶၵ်ႉတွၼ်ႈ- ဝႃႈၼႆ။

(2)ၼႂ်းၶၵ်ႉၵၢၼ်လွင်ႈငမ်းယဵၼ်ၼႆႉ တေပႃးၽႂ်လၢႆလၢႆဢမ်ႇမီးဝႆႉတႅတ်ႈတေႃး။ ၼႂ်းသီရိလင်းၵႃသမ်ႉမီး ပႃႇတီႇၵၢၼ်မိူင်း လၢႆပႃႇတီႇ။ ၵွပ်ႈၼႂ်းၶၵ်ႉၵၢၼ်လွင်ႈငမ်းယဵၼ်ၼၼ်ႉ ပႃးၽႂ်ၽွင်ႈဢမ်ႇတႅတ်ႈတေႃးလႄႈ ဢၼ်လူင်ပွင်ၸိုင်ႈတင်းထမီႊလ် ထႆႊၵိူဝ်ႊဢုပ်ႇၵၼ်ၵူၺ်းၼၼ်ႉ ပႃႇတီႇၵၢၼ်မိူင်းၶဝ်ၸိူဝ်းဢမ်ႇလႆႈၶဝ်ႈ ႁူမ်ႈၸွမ်းမႃးႁဵတ်းမၢၵ်ႇၵၢတ်ႈၼႂ်းၶၵ်ႉၵၢၼ်လွင်ႈငမ်း ယဵၼ်တိၵ်းတိၵ်း ၵေႃႈပိူင်ၼိုင်ႈ- ဝႃႈၼႆ။

(3)ၼႂ်းတိုဝ်ႉတၢင်းၶၵ်ႉၵၢၼ်ပူၵ်းပွင်ၵေႃႈ ဢမ်ႇၵိူတ်ႇၶိုၼ်ႈမႃးလွင်ႈယုမ်ႇယမ်ၵၼ်၊ ၵွပ်ႈဝႃႈ လူင်ပွင်ၸိုင်ႈ ၶႂ်ႈပၼ်ၸိူင်ႉႁိုဝ် ၵေႃႈပၼ်။ မိူၼ်ၼင်ႇၼေႃႊဝေႊၶဝ်ႈၸွႆႈၵေႃႈ ၵမ်ႈၼမ်ႁဵတ်းၸွမ်းၵႂၢမ်း လူင်ပွင်ၸိုင်ႈ ၵူၺ်း။ တီႈတႄႉမၼ်း ၼႂ်းတိုဝ်ႉတၢင်း ၶၵ်ႉၵၢၼ်ပူၵ်းပွင်ၼႆႉ ပဵၼ်ႁိုဝ်မီးႁိုဝ်ၵေႃႈ ထုၵ်ႇလီဢုပ်ႇဢူဝ်းၵၼ် ႁႂ်ႈမီးလွင်ႈ လူင်ႉလႅင်းပွင်ႇပိုင်ႈၵၼ်။ ၵွပ်ႈဢမ်ႇမီးလႄႈ လွင်ႈယုမ်ႇယမ်ၵၼ်ဢမ်ႇၵိူတ်ႇဢွၵ်ႇမႃး- ဝႃႈၼႆ။

(4)ပၼ်ႁႃၵၢၼ်မိူင်းၵေႃႈ ဢမ်ႇၸၢင်ႈဢုပ်ႇဢူဝ်းၵၼ်လီလီ၊ ၵွပ်ႈမီးပၼ်ႁႃ 4 လွင်ႈ- 1.ၽႅၼ်တၢင်းၵၢၼ် မိူင်း Roadmap ဢမ်ႇႁူမ်ႈၵၼ်၊ 2.ၾၢႆႇသၢၼ်ၶတ်းၶဝ်ဢမ်ႇလႆႈၶဝ်ႈႁူမ်ႈၸွမ်း။ 3.တၢင်းႁၼ်ထိုင်ၵၢၼ် ပူၵ်းပွင် ဢမ်ႇမိူၼ်ၵၼ်။ 4.ဢုပ်ႇဢူဝ်း လွင်ႈၵၢၼ်မိူင်းၵေႃႈ လၢႆၾၢႆႇဢမ်ႇပႃးၸေးလႄႈ ႁဵတ်းႁႂ်ႈဢမ်ႇ ပဵၼ်တီႈ ႁၢၼ်ႉၸႂ်ၾၢႆႇလႂ်။ ၵွပ်ႈၼၼ် ၸုမ်းထမီႊလ် ထႆႊၵိူဝ်ႊ လႆႈထွၼ်တူဝ်ဢွၵ်ႇ၊ ႁဵတ်းႁႂ်ႈၵူၼ်းႁူဝ်ၶႅင် လူင်ပွင်ၸိုင်ႈတင်းၸုမ်းထမီႊလ် ထႆႊၵိူဝ်ႊဢႃႇၼႃႇၼမ်မႃး၊ ၶေႃႈတႅပ်းတတ်း ၵေႃႈယဝ်ႉတီႈၵူၼ်းႁူဝ်ၶႅင်၊ ဝၢႆးမႃးၵေႃႈပဵၼ်သိုၵ်းသိူဝ်ၵၼ်တေႃႇၾၢႆႇလႂ်ၾၢႆႇၼိုင်ႈပေႃးၵၢၼ်ႉ-ဝႃႈၼႆ။

မိူဝ်ႈလဵဝ် မိူင်းမၢၼ်ႈၵေႃႈ ၾၢႆႇသၢၼ်ၶတ်းၶဝ်ထုၵ်ႇလႆႈၶဝ်ႈႁူမ်ႈပႃးၵူၺ်းပႆႇပေႃး၊ ၸုမ်းၼၢင်းယိင်းၶဝ်ၵေႃႈ တုၵ်းယွၼ်းႁႂ်ႈလႆႈ ၶဝ်ႈပႃး။ ထုၵ်ႇလီလႆႈဝူၼ်ႉၶွပ်ႈပႃးယူႇ- ဝႃႈၼႆ။

မၼ်းၸဝ်ႈလၢတ်ႈၼႄ ယိူင်းဢၢၼ်းလူင်မိူင်းၼေႃႊဝေႊ ဢၼ်လႆႈၶဝ်ႈၸွႆႈၵမ်ႉထႅမ်ၶၵ်ႉၵၢၼ်လွင်ႈငမ်း ယဵၼ် သီရိလင်းၵႃဝႃႈ- မီး 3 တွၼ်ႈပိူဝ်ႈတႃႇ- 1.peacemaker ၵမ်ႉၸွႆႈလွင်ႈဢုပ်ႇဢူဝ်းၵၼ်၊ 2.peacekeeper ပႂ်ႉတူၺ်းပၼ်လွင်ႈၵိုတ်းယိုဝ်း ၵၼ်၊ 3.peacebuilder ၵမ်ႉၸွႆႈလူႇတၢၼ်းပၼ်ၵၢၼ်ၵေႃႇ သၢင်ႈလွင်ႈငမ်းယဵၼ်- ၸိူဝ်းၼႆႉ။

လွင်ႈငမ်းယဵၼ် 3 တွၼ်ႈၼႆႉ ႁဵတ်းတီႈသီရိလင်းၵႃ။ မိူင်းမၢၼ်ႈ၊ ၼီႊပေႃႊလ် တင်းဢႃႊၵျေႊ (မိူင်းဢိၼ်ႊ ၻူဝ်ႊၼီႊသျိူဝ်ႊ) ၸိူဝ်းၼႆႉ ႁဵတ်းသၢင်ႈၶေႃႈထိ 1 ၵမ်ႉၸွႆႈလွင်ႈဢုပ်ႇဢူဝ်းပိူင်လဵဝ်- ဝႃႈၼႆ။

ဢၼ်လၢႆၾၢႆႇၸိၼႄးဝႃႈ ၼေႃႊဝေႊ တႃႁၼ်ပၢႆးမၢၵ်ႈမီးၼႂ်းမိူင်းမၢၼ်ႈသေမႃးၵမ်ႉၸွႆႈမိူင်းမၢၼ်ႈ ၼႆၼၼ်ႉ ယူႇတီႈလူင်ပွင် ၸိုင်ႈၼေႃႊဝေႊတႄႉဝႃႈ- ႁဝ်းၶႂ်ႈႁဵတ်းပၼ်ၽွၼ်းလီ ၵူၼ်းတင်းၼမ်၊ ႁႂ်ႈၵူႈ ၸိုင်ႈမိူင်းမီး ၻီႊမွၵ်းၶရေႊသီႊ၊ ႁႂ်ႈၵူႈၸိုင်ႈ မိူင်းမီးလွင်ႈငမ်းယဵၼ်လႄႈၸွႆႈပၼ်ၵူၺ်း။ ၵူၺ်းၵႃႈ မၼ်းၸဝ်ႈ (Dr.Kristian Stokke) ဝႃႈ- တူဝ်ၵဝ်ၶႃႈၼႆႉ ၵူၼ်းလူင် ပွင်ၸိုင်ႈၵေႃႈဢမ်ႇၸႂ်ႈ၊ လူင်ပွင်ၸိုင်ႈ ၵေႃႈဢမ်ႇပၼ်ငိုၼ်းၵဝ်ၶႃႈ၊ ယူႇတီႈၵဝ်ၶႃႈႁၼ်ထိုင်တႄႉ လူင်ပွင်ၸိုင်ႈၼေႃႊဝေႊ ႁၼ်ထိုင်ဝႃႈ- ပေႃးႁဵတ်းၵၢၼ်လီပၼ်ပုၼ်ႈတႃႇၵူၼ်း တင်းၼမ်ၼႆ မိူင်းႁဝ်းၵေႃႈတေလႆႈၽွၼ်းလီ၊ ႁဵတ်းၵၢၼ်ပၼ် တၢင်း လီၵူၼ်းတင်းၼမ်ၼႆႉ မၼ်းတေၵမ်ႉၸွႆႈ ပၼ်တၢင်းလီ လွင်ႈယူႇလီၵိၼ်လီၶွင်မိူင်းၼေႃႊဝေႊ ၶိုၼ်း၊ ႁၼ်ထိုင်ၼင်ႇၼႆ သေၸင်ႇႁဵတ်း- ဝႃႈၼႆ။

ၵူၺ်းၵႃႈ တူဝ်ထူပ်းၼႂ်းၵၢၼ်ႁဵတ်းၼၼ်ႉ တၢင်းႁဵတ်းလႄႈတၢင်းလၢတ်ႈၸၢင်ႈပိူင်ႈၵၼ်၊ မိူၼ်ၼင်ႇတီႈသီရိ လင်းၵႃၼႆႉ လၢတ်ႈဝႃႈၶဝ်ဢမ်ႇယူႇၾၢႆႇလႂ်၊ ၶႂ်ႈလႆႈလွင်ႈငမ်းယဵၼ်ၼႂ်းသီရိလင်းၵႃ ၼႆၵူၺ်း။ ၵူၺ်းၵႃႈ သူပ်းတႄႉလၢတ်ႈဝႃႈဢမ်ႇ ယူႇၾၢႆႇလႂ်သေတႃႉ တူဝ်ထူပ်းတႄႉၶဝ်တိုၼ်းယူႇၾၢႆႇလူင်ပွင်ၸိုင်ႈသီရိ လင်းၵႃ။ တီႈမိူင်းမၢၼ်ႈၼႆႉတႄႉ ၶဝ်ယူႇၾၢႆႇလႂ်ဢၼ် ဝႃႈၼၼ်ႉ ၶဝ်ဢမ်ႇႁဵတ်းၵႅင်ႈလႃးလႃးယဝ်ႉ- ဝႃႈၼႆ။

ၵွပ်ႈသင် ယူႇၾၢႆႇလူင်ပွင်ၸိုင်ႈၼၼ်ႉ လၢတ်ႈၼႄပႃးဝႃႈ- 1.ဝၢႆး 9/11 တိူၵ်ႈလူင်သုၼ်ၵၢင်ၵၢၼ်ၵႃႉ (World Trade Center) တီႈဝဵင်းလူင်ၼိဝ်ႊယွၵ်ႊ မိူင်းဢမႄႊရိၵၼ်ႊ ထုၵ်ႇၸုမ်းၵူၼ်းႁၢႆႉၶဝ် ၸူၼ်ႁိမ်ဢဝ်ႁိူဝ်း ဝိၼ်လေႃႇၽႃႇသႂ်ႇပုတ်း ပင်းၽူႈၵူၼ်းလုယႂ်ႇတၢႆၼမ်ၼႆႉ 1.မိူင်းဝၼ်းတူၵ်းၵမ်ႈၼမ်သႂ်ႇၸႂ်လွင်ႈဝၢၼ်ႈမိူင်း ပဵၼ်ၵွၼ်ႈပဵၼ်လုင်း ပဵၼ်ပၵ်းၼိုင်ႈ ၸိုင်ႈလဵဝ်၊ ယႃႇႁႂ်ႈတႅၵ်ႇယၢႆႈၵၼ်။ ၸိူဝ်းၼႆႉၶဝ်သႂ်ႇၸႂ်မႃးၼမ်။ 2.ၶႂ်ႈ ၵႅတ်ႇၶႄႁႄႉၵင်ႈဢေႃးၸႃႇၶႄႇ။ ယွၼ်ႉၼၼ်လႄႈ ဢၼ်ၶဝ်ယူႇၾၢႆႇလူင်ပွင်ၸိုင်ႈမၢၼ်ႈၼႆႉ ၶဝ်ႁၼ်ဝႃႈ ပေႃးမီးဝႆႉလူင်ပွင်ၸိုင်ႈမၢၼ်ႈဝၢၼ်ႈမိူင်းတေဢမ်ႇတႅၵ်ႇယႆႈ၊ ပိူဝ်ႈတႃႇ ၵႅတ်ႇၶႄႁႄႉၵင်ႈလႆႈဢေႃးၸႃႇၶႄႇ ၼၼ်ႉ ႁၼ်ဝႃႈထုၵ်ႇလႆႈၵမ်ႉၸွႆႈပၼ်တီႈလူင်ပွင်ၸိုင်ႈမၢၼ်ႈ- ဝႃႈၼႆ။

လၢႆၾၢႆႇထၢမ်ဝႃႈ- လွင်ႈၼႆႉပဵၼ်ပေႃႇလသီႇဢမႄႊရိၵႃႊၵူၺ်းဢမ်ႇၸႂ်ႈႁိုဝ်၊ ၼေႃႊဝေႊ သမ်ႉၵဵဝ်ႇၶွင်ႈၸွမ်း ၸိူင်ႉႁိုဝ်ၼႆၼၼ်ႉ မၼ်းၸဝ်ႈတွပ်ႇဝႃႈ- ၼေႃႊဝေႊၶဝ်တိုၼ်းပိုၼ်ၽၢဝ်ႇတႃႇသေႇဝႃႈဢမ်ႇယူႇၾၢႆႇလႂ်။ ၵူၺ်းၵႃႈတူဝ်ထူပ်းဢၼ်တႄႉ ပဵၼ်ဢူၺ်း လီဢၼ်မီးသၸ်ႉၸႃႇတေႃႇၸိုင်ႈမိူင်းဢမႄႊရိၶိူဝ်ႊ- ဝႃႈၼႆ။

ဢၼ်ၻွၵ်းတိူဝ်ႊ (Dr.Kristian Stokke) မႃးႁူပ်ႉလၢႆၾၢႆႇၼႆႉ ပဵၼ်ဝၢႆးသေထေႃႊၵျီႊယိူဝ်ႊ ၵႅမ်ၽွင်းလူင် ၾၢႆႇၼွၵ်ႈမိူင်းၼေႃးဝေး မႃးယဵမ်ႈမိူင်းထႆး ၵဵင်းမႆႇ မိူဝ်ႈဝၼ်းထိ 30/05/12 ။ ၽွင်းမၼ်းၸဝ်ႈမႃးတီႈၵဵင်း မႆႇၼၼ်ႉ ၸုမ်းတူင်ႉၼိုင်ၼႂ်းၵဵင်း မႆႇၵမ်ႈၼမ်ဢွၼ်ၵၼ်သၢၼ်ၶတ်း လၢႆးႁဵတ်းလၢႆးသၢင်ႈၼေႃႊဝေႊ တေႃႇမိူင်းမၢၼ်ႈ။ ၵပ်းၵၢႆႇလွင်ႈၼႆႉသေ မိူဝ်ႈလဵဝ် လုမ်းၽွင်းတၢင်မိူင်းၼေႃႊဝေႊ ဢၼ်ပၵ်းတီႈၵုင်းထဵပ်ႈ လႆႈႁဵတ်းဢွၵ်ႇဝႆႉ ဝႅပ်ႉၽဵၵ်ႉၶျ် (Webpage) ႁင်းၵူၺ်း။ Webpage ပိုတ်ႇလၢတ်ႈၼႄလွင်ႈၼေႃႊဝေႊ ၶတ်းၸႂ်ပိူဝ်ႈတႃႇႁႂ်ႈ မိူင်းမၢၼ်ႈ လႆႈလွင်ႈငမ်းယဵၼ်၊ ၶဝ်ႈတူၺ်းလႆႈတီႈ (Norwegian Embassy) ၊ လၢတ်ႈပႃးဝႃႈ ဢၼ်ႁဵတ်းယူႇဢမ်ႇမီး လွင်ႈလပ်ႉသေပိူင်- ၼႆယဝ်ႉ။ သူၸဝ်ႈၶႂ်ႈႁူႉၵေႃႈပိုတ်ႇတူၺ်း၊ ၼွၵ်ႈသေၼၼ်ႉၵေႃႈ ထၢမ်ႁဝ်းလႆႈ- ဝႃႈၼႆ။

ႁူဝ်ၼႃႈၽူႈတွႆႇႁွၵ်ႈဝႃႈ- ၵပ်းၵၢႆႇလွင်ႈၼႆႉ ႁဝ်းဢမ်ႇထုၵ်ႇလႆႈယုမ်ႇယမ်ၽႂ်၊ ႁဝ်းတၵ်းလႆႈယုမ်ႇယမ်တူဝ် ႁဝ်း၊ ႁဝ်းတႆး/မၢၼ်ႈ ၸိူဝ်းၼႆႉ ၵႆႉၵႂႃႇပိုင်ႈဢိင်ၸႂ်ယႂ်ႇပိူၼ်ႈပူၼ်ႉတီႈၽႅဝ်၊ ႁဝ်းဢမ်ႇလႆႈပိုင်ႈပိူၼ်ႈလႃးလႃး ႁႃႉ တႄႉဢမ်ႇၸႂ်ႈ၊ ၵူၺ်းၵႃႈ ယႃႇပေၵႂႃႇ ယုမ်ႇယမ်ပိူၼ်ႈပူၼ်ႉတီႈ။ ၵွပ်ႈဝႃႈဢၼ်ႁဝ်းၶႂ်ႈလႆႈၶႂ်ႈပဵၼ်ၼၼ်ႉ ပိူၼ်ႈဢမ်ႇႁဵတ်းပၼ်ႁဝ်းလႆႈမူတ်း၊ ႁဝ်းထုၵ်ႇလႆႈပိုင်ႈတူဝ် ႁဝ်းၼမ်ၼမ်၊ ႁဝ်းတၵ်းလႆႈသႂ်ႇၸႂ်ဝႃႈ ၵူၼ်းပိုင်ႈ တူဝ်ၵဝ်ႇၼႆႉ ၸၢင်ႈလႆႈတၢင်းၵမ်ႉၸွႆႈတီႈပိူၼ်ႈ၊ ပေႃးဢမ်ႇမေႃပိုင်ႈတူဝ်ၵဝ်ႇ ပိူၼ်ႈဢမ်ႇၸၢင်ႈ ၸွႆႈ- ဝႃႈၼႆ။