သၢႆလူတ်ႉၵႃးသိုၵ်းမၢၼ်ႈ ၺႃးသိုၵ်းၶၢင်ဝၢင်းမၢၵ်ႇ ယိုဝ်းပွတ်းၸႄႈလၢၼ်ႉ ၸိုင်ႈတႆးပွတ်းႁွင်ႇ။ ၾၢႆႇသိုၵ်း မၢၼ်ႈ လုတၢႆ ဢမ်ႇႁၢၼ်ႉၸႂ်၊ ၸႂ်ႉႁႅင်းသိုၵ်းႁွၼ်ႈထဝ်ႇ ပဵၼ်ပၢင်တိုၵ်းၵၼ်တင်းသိုၵ်းၶၢင် ၼႂ်းဝၢၼ်ႈဢိူင်ႇ ထႅင်ႈ။

တိၼ်လွႆၸႄႈလၢၼ်ႉ ဢွင်ႈတီႈထုၵ်ႇဝၢင်းမၢၵ်ႇ Photo: www.kawli.info

ဝၼ်းထိ 08/07/12 (မိူဝ်ႈဝႃး)ပွတ်းၼႂ်ယၢမ်း 11:00 မူင်း၊ သၢႆလူတ်ႉၵႃးသိုၵ်းမၢၼ်ႈ ၺႃးတပ်ႉသိုၵ်းၶၢင် လွတ်ႈလႅဝ်း KIA ဝၢင်းမၢၵ်ႇတႅၵ်ႇတီႈတိၼ်လွႆၸႄႈလၢၼ်ႉ၊ ဢိူင်ႇၸႄႈလၢၼ်ႉ ၸႄႈဝဵင်းမူႇၸႄႈ။ ဝူင်ႈၵၢင် မူႇၸႄႈလႄႈၼမ်ႉၶမ်း။ ၵၢၼ်ဝၢင်း မၢၵ်ႇၼႆႉ သိုၵ်းၶၢင်ၶုတ်းၾင်ႁၢင်ႈၵၢင်ဝႆႉဢွၼ်တၢင်းသေ ပေႃးလူတ်ႉ ၵႃး သိုၵ်းမၢၼ်ႈမႃးထိုင်ၵေႃႈ တဵၵ်းၼဵၼ်ထၢတ်ႈ (Remote)သႂ်ႇ- ၼႆယဝ်ႉ။

ယွၼ်ႉၺႃးဝၢင်းမၢၵ်ႇသေ ၾၢႆႇသိုၵ်းမၢၼ်ႈ ၸၼ်ႉႁူဝ်သိုၵ်းလူင်တၢႆထင်တီႈ 1 ၵေႃႉ၊ ဝၢတ်ႇၸဵပ်း 6 ၵေႃႉ။ သိုၵ်းမၢၼ်ႈတိၶၢၼ်း ၵႃးဝႅၼ်ႊလမ်းၼိုင်ႈ ဢၼ်ဢွၵ်ႇတၢင်းႁွတ်ႈထိုင်တီႈၼၼ်ႈ တၢင်ႇၵူၼ်းဝၢတ်ႇၸဵပ်း သူင်ႇ မိူဝ်းတီႈႁူင်းယႃမူႇၸႄႈ၊ ၼႂ်းၵူၼ်း ဝၢတ်ႇၸဵပ်းၼၼ်ႉ မိူဝ်းတၢႆတီႈႁူင်းယႃမူႇၸႄႈထႅင်ႈ 2 ၵေႃႉ၊ ပဵၼ်ၸၼ်ႉၵႅမ်ၶုၼ်ႁၢၼ်ၵေႃႉၼိုင်ႈ၊ သိုၵ်းႁၢၼ်ၵေႃႉၼိုင်ႈ (ႁူမ်ႈတၢႆ 3 ၵေႃႉ)- ၵူၼ်းမူႇၸႄႈၵေႃႉၼိုင်ႈ လၢတ်ႈ။

လူတ်ႉၵႃးသိုၵ်းမၢၼ်ႈဢၼ်ၺႃးသိုၵ်းၶၢင်ဝၢင်းမၢၵ်ႇၼႆႉ ပဵၼ်လူတ်ႉၵႃးသိုၵ်းမၢၼ်ႈ 2 လမ်း ဢၼ်လုၵ်ႉ တၢင်းမူႇၸႄႈ ဢွၵ်ႇတၢင်းမုင်ႈၼႃႈၵႂႃႇၼမ်ႉၶမ်း။ လမ်းၼိုင်ႈတၢင်ႇသိုၵ်းၼမ်းၼႃႈၵႂႃႇဢွၼ်တၢင်း၊ ထႅင်ႈလမ်းၼိုင်ႈ တၢင်ႇၶဝ်ႈၼမ်ႉတၢင်း ၵိၼ်(ၸလိပ်ႈ)ၸွမ်းၵႂႃႇတၢင်းလင်။ လႆႈငိၼ်းဝႃႈ ပႃးတူဝ်ပိဝ်ႇႁႃႇ မူးၵူတ်ႉၶၢႆ ဢၢင်ႈၵႂႃႇ ၵူတ်ႇထတ်းၼႃႈသိုၵ်းပွတ်းၼမ်ႉၶမ်း တၢင်းလႅၼ်လိၼ်မိူင်းၶၢင်။ ၵႃးလမ်းဢၼ် ၺႃးဝၢင်းမၢၵ်ႇၵွႆ ပဵၼ်လမ်း ဢၼ်တၢင်ႇၶဝ်ႈၼမ်ႉတၢင်းၵိၼ်လႄႈၵူၼ်းသိုၵ်း၊ လမ်းဢၼ်ၵႂႃႇဢွၼ်တၢင်း လွတ်ႈပႅတ်ႈ။ ႁၢၼ်ႉတေႃႇထိုင် မိူဝ်ႈဝႃးၵၢင်ၶမ်ႈ ၾၢႆႇသိုၵ်းမၢၼ်ႈတိုၵ်ႉပိၵ်ႉဢိုတ်းဝႆႉသဵၼ်ႈတၢင်း ဢမ်ႇပၼ် လူတ်ႉၵႃးၵႂႃႇမႃး၊ မိူဝ်ႈၼႆႉ ၵႂႃႇမႃးလႆႈမိူၼ်ၵဝ်ႇသေတႃႉ သိုၵ်းမၢၼ်ႈဢဝ်ႁူမ်ႇလူမ်ႈၼႅၼ်ႈၼႃ -ၵူၼ်းၼႂ်း ပိုၼ်ႉတီႈပွတ်းၼမ်ႉၶမ်း လၢတ်ႈၼႄၼင်ႇၼႆ။

ယွၼ်ႉထုၵ်ႇဝၢင်းမၢၵ်ႇ မီးၵၢၼ်လုတၢႆသေ သိုၵ်းမၢၼ်ႈဢမ်ႇႁၢၼ်ႉၸႂ်၊ ၸႂ်ႉႁႅင်းသိုၵ်းဢွၵ်ႇၶူၼ်ႉသွၵ်ႈတဝ် ၸွမ်း ဝၢၼ်ႈဢိူင်ႇ ပွတ်းတွၼ်ႈၼၼ်ႉ မိူၼ်ၼင်ႇဝၢၼ်ႈၼမ်ႉလႅင်၊ ၼမ်ႉၸၢင်ႉ၊ ၼမ်ႉလွင်း၊ မၢၼ်ႈၼိမ်၊ ၼွင်ၼွင်း (ပေႃးၶၢမ်ႈၶူဝ်ၼမ်ႉပေႃႈ ထိုင်ၼမ်ႉၶမ်း)ၸိူဝ်းၼႆႉလႄႈ ၼႂ်ၼႆႉ ပဵၼ်ပၢင်တိုၵ်းၵၼ်တင်းသိုၵ်း ၶၢင် KIA တီႈဝၢၼ်ႈၼမ်ႉလႅင်၊ ၼွၵ်ႈသေၼၼ်ႉ ၸုမ်းပီႇတုၸိတ်ႉဢၼ်ပၵ်းတီႈဝၢၼ်ႈၼမ်ႉၸၢင်ႉၵေႃႈ ၺႃးသိုၵ်း ဢမ်ႇႁူႉၸၵ်းၸုမ်းၼိုင်ႈယိုဝ်းသႂ်ႇ- ၼႆယဝ်ႉ။

ၵူၼ်းၼႂ်းဝၢၼ်ႈၼွင်လႅင်ၵေႃႉၼိုင်ႈလၢတ်ႈဝႃႈ- မိူဝ်ႈဝႃးပွတ်းၶမ်ႈ သိုၵ်းမၢၼ်ႈထႅမ်ႁႅင်းသိုၵ်းမႃးႁွတ်ႈၽႅဝ် ပွတ်းၼွင်လႅင် ၼမ်ဝႆႉ။ ၼႂ်ၼႆႉသမ်ႉပဵၼ်ပၢင်တိုၵ်းၵၼ်လႄႈ သိုၵ်းမၢၼ်ႈငိၼ်းသဵင်ၵွင်ႈတၢင်းလႂ်ၵေႃႈ ဢဝ်ၵွင်ႈလၢမ်းယိုဝ်းႁၢတ်ႇလူင်ၵႂႃႇတိၵ်းတိၵ်း။ ယွၼ်ႉယိုဝ်းၵၼ်ၺႃးၽွင်းလုၵ်ႈႁဵၼ်းၶဝ်ၵႂႃႇႁူင်းႁဵၼ်းလႄႈ လီမႆႈၸႂ်ၵူဝ်မၢၵ်ႇၵွင်ႈတိူဝ်ႉလုၵ်ႈႁဵၼ်းၶဝ်တႄႉတႄႉ- ဝႃႈၼႆ။

ဢၼ်ယိုဝ်းၵၼ်တီႈၼမ်ႉလႅင် ဢိူင်ႇၸႄႈလၢၼ်ႉၼႆႉ ၶၢဝ်ႇပႆႇယိုၼ်ယၼ်လၢတ်ႈဝႃႈ- မၢၵ်ႇၵွင်ႈသိုၵ်းမၢၼ်ႈ တိူဝ်ႉၺႃးလုၵ်ႈ ဢွၼ်ႇႁူင်းႁဵၼ်း (ၸၼ်ႉဢွၼ်ႁဵၼ်း) တၢႆၵေႃႉၼိုင်ႈ- ဝႃႈၼႆ။