ၸဝ်ႈၶုၼ်ထုၼ်းဢူး လုၵ်ႉတႃႈၵုင်ႈၸွမ်းသၢႆၵၢၼ်ဝိၼ်ထႆး TG306 ႁွတ်ႈၽႅဝ်မိူင်းထႆး ဝဵင်းလူင်မိူင်းၵွၵ်ႇ (ၵုင်းထဵပ်ႈ) ယၢမ်း 22:30 မူင်း၊ ဝၼ်းထိ 02/07/12 (ၶမ်ႈဝႃး)၊ ပီႈၼွင်ႉတႆးၸိူဝ်းႁွတ်ႈမိူင်းထႆး ႁူမ်ၸူမ်းႁပ်ႉတွၼ်ႈ။

ၸၢႆးသၵ်းလၢတ်ႈဝႃႈ - “ၸဝ်ႈၶုၼ်ထုၼ်းဢူး တေမႃး ၵုင်းထဵပ်ႈ(မိူင်းၵွၵ်ႇ) ၼႆဢမ်ႇလႆႈႁူႉၸဵမ်လႂ်ၶႃႈလူး။ သင်ဢမ်ႇၼၼ် ၵူၼ်းတေယင်ႉၵၢၼ်ယင်ႉငၢၼ်းၵၼ်သေ တေပႂ်ႉႁပ်ႉတွၼ်ႈၼမ်ၵျႃႉၶႃႈ။ ၶႃႈတႄႉ ယွၼ်ႉၶႂ်ႈႁၼ်ၽူႈယႂ်ႇၵူၼ်းလူင်ႁဝ်းၼႅၼ်ႇ လႄႈ ဢမ်ႇသိုပ်ႇႁဵတ်းၵၢၼ်ၵၢင်ၶိုၼ်းသေ မႃးပႂ်ႉႁပ်ႉၸဵမ်မိူဝ်ႈ ႁူဝ်ၶမ်ႈပုၼ်ႉၶႃႈဢေႃႈ” - ဝႃႈၼႆ။

ၽူႈၶၢၼ်ပၢၵ်ႇပႃႇတီႇႁူဝ်သိူဝ် ႁိုဝ်ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး SNLD ၸၢႆးလဵၵ်ႉ လၢတ်ႈဝႃႈ - ၸဝ်ႈၶုၼ်ထုၼ်းဢူး ဢွၵ်ႇၶၢဝ်းတၢင်းမိူင်းထႆးၵမ်းၼႆႉ ဢမ်ႇၸႂ်ႈၶၢဝ်း တၢင်းၵၢၼ်မိူင်း၊ ပဵၼ်ၶၢဝ်းတၢင်း တႃႇၵူတ်ႇထတ်းပၢႆးယူႇလီ၊ ယူတ်းယႃတူဝ် ၶိင်းၵူၺ်း - ဝႃႈၼႆ။

ၽူႈထတ်းထွင်လိၵ်ႈၶၢဝ်ႇတႆး ပၢင်လူင် ၸၢႆးသႅင်ယ တၢမ်တူဝ်ၵႂႃႇပႂ်ႉႁပ်ႉၼၼ်ႉလၢတ်ႈဝႃႈ -“တူဝ်ၵဝ်ၶႃႈ ႁွတ်ႈၶူင်ႇႁိူဝ်းဝိၼ် သုဝၼ်ၼၽုမ်း ၸဵမ်မိူဝ်ႈပႆႇထိုင်ပႅတ်ႇမူင်း၊ 10 မူင်းၸမ်ၶိုင်ႈ ၸဝ်ႈၶုၼ်ထုၼ်းဢူး ၸင်ႇထိုင်ဢေႃႈ။ ဢၼ်သႂ်ႇသိူဝ်ႈၶူဝ်းတႆး သေပႂ်ႉႁပ်ႉတွၼ်ႈ ဢမ်ႇယွမ်းပၢၵ်ႇၵေႃႉ” - ဝႃႈၼႆ။

ႁူဝ်ပဝ်ႈပႃႇတီႇႁူဝ်သိူဝ် SNLD ၸဝ်ႈၶုၼ်ထုၼ်းဢူးၼႆႉ မီးတၢင်းပဵၼ်လုပ်ႇၵပ်းလုပ်ႇတေႃႇၸဵပ်း၊ ဢႅဝ်ၶိုၼ်ႈမူၺ်ႈၶတ်း၊ ႁူဝ်ၶဝ်ႇဢမ်ႇလီ ၸဵမ်မိူဝ်ႈလူမ်ႉၼႂ်းၶွၵ်ႈ (တီႈပူႇတႃႇဢူဝ်ႇ)၊ လိူဝ်ၼၼ်ႉ မီးတၢင်းပဵၼ် ၼဵင်ၶဝ်ႈၸဵပ်း၊ တွမ်ႇယဵဝ်ႈၵႂ်ႈ ၸိူဝ်းၼႆႉ။

ၸဝ်ႈၶုၼ်ထုၼ်းဢူးၼႆႉ ဢိင်ၼိူဝ်ဢမ်ႇႁပ်ႉပၢင်ၵုမ်လူင်ၸိူဝ်ႉၸၢတ်ႈ NC (ႁုင်းသွင်တူၼ်ႈ) ဢၼ်ႁၼ်ဝႃႈ ဢမ်ႇမီးလွင်ႈ ၽဵင်ႇပဵင်းၼိူဝ်ၸၢဝ်းၶိူဝ်းၼၼ်ႉသေ ၸဝ်ႈဢႃႇၼႃႇသိုၵ်းမၢၼ်ႈ ၸုမ်းတၢၼ်းသူၺ်ႇ တိၶဝ်ၸဝ်ႈၵဝ်ႈၵေႃႉ(ၽူႈၼမ်းတႆး) ပၼ်တူတ်ႈတၢမ်ႇၶွၵ်ႈ 79-106 ပီ သူင်ႇၶင် ပိၵ်ႇဝၢၼ်ႈလႅၼ်မိူင်း။ ပိူဝ်ႈတႃႇမႄးလီၶိုၼ်းၼႂ်းၸၢတ်ႈၼႆသေ ၸွမ်ၸိုင်ႈမႂ်ႇ တဵင်းၸဵင်ႇ လူတ်းယွၼ်ႇပွႆႇၽႃႇတူတ်ႈၶွၵ်ႈလႄႈ ပူၼ်ႉလွတ်ႈၶွၵ်ႈမႃးမိူဝ်ႈႁူဝ်ပီၼႆႉ။ ယၢမ်းလဵဝ်ယိုၼ်ႈယွၼ်းမၢႆၾၢင်သေ ၵေႃႇတင်ႈပႃႇတီႇၵၢၼ်မိူင်း ၶိုၼ်းပဵၼ်တၢင်းၵၢၼ်။