ၸုမ်းမိူင်းလႃး ဢၼ်ၸဝ်ႈၸၢႆးလိုၼ်းဢွၼ်ႁူဝ်၊ ၸတ်းပၢင် ပွႆးၶုၵ်းထူပ်းဝၼ်းငမ်းယဵၼ် ၶွပ်ႈၶူပ်ႇ 23 ပီတဵမ်၊ ၼႂ်းၼႃႈ လိၼ်ၶိုၵ်ႉတွၼ်းမၢႆ 4 ၊ မီးၵူၼ်းမိူင်းၵူၼ်းသိုၵ်းၶဝ်ႈႁူမ်ႈ ၼပ်ႉႁူဝ်ႁဵင်။

ပူၼ်ႉမႃးမိူဝ်ႈဝၼ်းထိ 30/06/12 ၸုမ်းမိူင်းလႃး (တပ်ႉသိုၵ်းဢူၺ်းလီၻီႊမွၵ်းၶရႅတ်ႉတိၵ်ႉၸိူဝ်ႉၸၢတ်ႈ) NDAA ၸတ်းပၢင် ပွႆးၶုၵ်းထူပ်း ဝၼ်းငမ်းယဵၼ်ၶွပ်ႈၶူပ်ႇ 23 ပီတဵမ် ၼႂ်းၼႃႈလိၼ်ၶိုၵ်ႉတွၼ်းမၢႆ 4 တင်းမူတ်း 3 တီႈ။ 1.တီႈငဝ်ႈငုၼ်းဝဵင်း မိူင်းလႃး၊ 2.တီႈဝဵင်းသိုဝ်လိုဝ်း၊ 3.တီႈဝဵင်းၼမ်ႉပၢၼ်း။ ၶပ်းမၢႆပၢင်ပွႆး တင်း 3 တီႈၼၼ်ႉ ယၢမ်းၵၢင်ၼႂ် 8 မူင်း၊ မီးၵၢၼ်ၵႂႃႇ ၶွၼ်ႈတုမ်ၵၼ်တီႈဢွင်ႈပၢင်ပွႆးသေ ယၢမ်း 9 မူင်း တၢင်ႇတုင်းၸိူဝ်ႉၸၢတ်ႈ၊ ဝၢႆးၼၼ်ႉ ၽူႈဢွၼ်ႁူဝ်ၼႂ်းပၢင်ပွႆးတီႈလႂ်တီႈ ၼၼ်ႈမွၵ်ႇလၢတ်ႈၶေႃႈၵႂၢမ်း။

တီႈဝဵင်းမိူင်းလႃးၼၼ်ႉ ၽူႈၼမ်းၼႂ်းၸဝ်ႈသႅင်လႃးပဵၼ်ႁူဝ်ပဝ်ႈဢွၼ်ႁူဝ်ပၢင်ပွႆး၊ မီးၵူၼ်းမိူင်းလႃး၊ တပ်ႉသိုၵ်းမိူင်းလႃး ပႃးၸဵမ်ၶႃႈႁၢပ်ႇၵၢၼ်ၶုၼ်မၢၼ်ႈ ၾၢႆႇၵူတ်ႇၵူၼ်းၶဝ်ႈမိူင်း(လဝၵ)၊ ၾၢႆႇပူၵ်းပွင်ၸၢဝ်းၶိူဝ်း ၸိူဝ်းယူႇသဝ်းၸွမ်းလႅၼ်လိၼ် (ၼတလ)ၵႂႃႇၶဝ်ႈႁူမ်ႈမီးၵူၼ်းႁဵင်ပၢႆ။ တီႈဝဵင်းသိုဝ်လိုဝ်း ၸဝ်ႈၸၢႆးတိပ်ႉ ပဵၼ်ၽူႈဢွၼ်ႁူဝ်ပၢင်ပွႆး၊ မီးၵူၼ်းမိူင်းၵူၼ်းသိုၵ်းၶဝ်ႈ ႁူမ်ႈ 2 ႁဵင်ပၢႆ။ တီႈဝဵင်းၼမ်ႉပၢၼ်း၊ ၸဝ်ႈၶမ်းမွင်ႇ ဢွၼ်ႁူဝ်ၼမ်းၼႃႈပၢင်ပွႆး၊ မီးၵူၼ်းမိူင်းၵူၼ်းသိုၵ်းၶဝ်ႈႁူမ်ႈႁဵင်ပၢႆ- ၼႆယဝ်ႉ။

ၸဝ်ႈသႅင်လႃး မွၵ်ႇလၢတ်ႈၵႂၢမ်းလွင်ႈပိုၼ်းပဵၼ်မႃးၸုမ်းမိူင်းလႃး NDAA ၊ လွင်ႈလႆႈဢဝ်လွင်ႈငမ်းယဵၼ် ၵၼ်တင်းၸုမ်းသိုၵ်း မၢၼ်ႈ မိူဝ်ႈပီ 1989 သေပူၵ်းတင်ႈပဵၼ်မႃးၼႃႈလိၼ်ၶိုၵ်ႉ တွၼ်းမၢႆ 4 ၶွပ်ႈတဵမ် 23 ပီ။ ပိုၼ်ၽၢဝ်ႇပႃးဝႃႈ- ၸုမ်းမိူင်းလႃး တေသိုပ်ႇၽဵဝ်ႈမူၺ်ႉယႃႈမဝ်းၵမ်၊ တေႁူမ်ႈမိုဝ်းတၢင်ႇမူႇတၢင်ႇၸုမ်း တင်းမိူင်းႁိမ်းႁွမ်း တေႃႇသူႈၽဵဝ်ႈမူၺ်ႉယႃႈမဝ်းၵမ်ၵႂႃႇ။ ၼွၵ်ႈသေၼၼ်ႉ တေသိုပ်ႇပူၵ်းပွင်ၼႃႈလိၼ် ႁႂ်ႈၶိုၼ်ႈယႂ်ႇမႂ်ႇသုင်ၵႂႃႇလႄႈ ႁႂ်ႈမီးလွင်ႈငမ်းယဵၼ်သိုပ်ႇၵႂႃႇမိူဝ်းၼႃႈ- ၼႆယဝ်ႉ။

ဝၢႆးမွၵ်ႇလၢတ်ႈၶေႃႈၵႂၢမ်းၶုၵ်းထူပ်းဝၼ်းဢဝ်ငမ်းယဵၼ်ၶွပ်ႈ 23 ပီယဝ်ႉ မီးပၢင်ၵိၼ်ၶဝ်ႈႁူမ်ႈမူႇၵၼ်၊ ၵၢင်ၶမ်ႈမႃးမီးပၢင်မူၼ်ႈ သိူဝ်းလဝ်ႇမူၼ်ႈတူၼ်ႈၸႂ် ႁွင်ႉၵႂၢမ်း- ဝႃႈၼႆ။

ၸုမ်းမိူင်းလႃး NDAA ၼႆႉ တႄႇဢဝ်ငမ်းယဵၼ်တင်းၸုမ်းသိုၵ်းမၢၼ်ႈမႃးမိူဝ်ႈပီ 1989 ၊ ဝၢႆးဢဝ်ငမ်းယဵၼ် ယဝ်ႉ တၢင်းမၢၼ်ႈ တတ်းမၵ်းပၼ် ၼႃႈလိၼ်ၶိုၵ်ႉတွၼ်းမၢႆ 4 ဢၼ်ငဝ်ႈငုၼ်းပဵၼ်မိူင်းလႃး မီးၸဝ်ႈၸၢႆး လိုၼ်း ပဵၼ်ၽူႈဢွၼ်ႁူဝ်။ ၼႂ်းၼႃႈ လိၼ်ၽွင်းငမ်းၸုမ်းမိူင်းလႃး မီးမိူင်းၵႅမ်ႁွင်းထႅင်ႈ 2 မိူင်း မိူၼ်ၼင်ႇ မိူင်းသိုဝ်လိုဝ်း လႄႈမိူင်းၼမ်ႉပၢၼ်း။ မိူင်းလႃး ယူႇၼႂ်းၸိုင်ႈတႆးပွတ်းဢွၵ်ႇၶူင်း၊ တိတ်းၸပ်းလႅၼ် လိၼ်မိူင်းၶႄႇ။