ၸုမ်းႁႅင်းၵၢၼ်ၽွမ်ႉႁူမ်ႈ WSA ႁဵတ်းပၢင်ၶုၵ်းထူပ်းဝၼ်း ၵိူတ်ႇ ၶွပ်ႈတဵမ် 5 ပီ ၼႂ်းၵဵင်းမႆႇတီႈၼိုင်ႈ၊ မီးၵူၼ်း ၶဝ်ႈႁူမ်ႈ ၼပ်ႉႁူဝ်ပၢၵ်ႇ၊ ႁူဝ်ပဝ်ႈမူႇၸုမ်းတိုၵ်းသူၼ်းႁႅင်းၵၢၼ် ႁႂ်ႈႁတ်းႁၢၼ်တေႃႇသူႈ သုၼ်ႇလႆႈ လွင်ႈပဵၼ်ထမ်း။

ၼၢင်းထွင်းၶမ်း ႁူဝ်ပဝ်ႈမူႇၸုမ်းႁႅင်းၵၢၼ်ၽွမ်ႉႁူမ်ႈ WSA မွၵ်ႇလၢတ်ႈၵႂၢမ်းတီႈပၢင်ၶုၵ်းထူပ်းဝႃႈ- မူႇၸုမ်း ႁဝ်းၶႃႈၼႆႉ ဢဝ်ၼမ်ႉၸႂ်သေၶွတ်ႇၽွတ်ႈဝႆႉ၊ ၵူၼ်းၼႂ်းမူႇၸုမ်းၵေႃႈဢမ်ႇမီးငိုၼ်းလိူၼ်ၵၼ်သေၵေႃႉ၊ ပိူဝ်ႈတႃႇ ၶွၼ်ႈတုမ်ၵၼ်ၼႆသေ ပိုတ်ႇလုမ်းဝႆႉတီႈၼိုင်ႈ။ မူႇၸုမ်းၼႆႉ ပိူဝ်ႈတႃႇသၢၼ်မိုဝ်းၵၼ်တေႃႇသူႈ လွင်ႈႁႅင်းၵၢၼ်ဢမ်ႇလႆႈၵႃႈႁႅင်းၸွမ်းပၵ်းၸွမ်းပိူင်။ ၵွပ်ႈၼၼ်လႄႈ ႁႅင်းၵၢၼ်ယၢၼ်မိူင်း ၸိူဝ်းတူၵ်းႁွတ်ႈ မိူင်းထႆး ၵိုင်ႇထုၵ်ႇလႆႈႁတ်းႁၢၼ် ပိူဝ်ႈတႃႇသုၼ်ႇလႆႈသုၼ်ႇပဵၼ်ႁဝ်း။ ၸိူင်ႉႁိုဝ်ၵေႃႈယဝ်ႉ ပေႃးမီးပၼ်ႁႃ တိတ်းတေႃႇတီႈၸုမ်းႁႅင်းၵၢၼ်သေ ႁႃတၢင်းသၢၼ်မိုဝ်းၵၼ်တုၵ်းယွၼ်းသုၼ်ႇလႆႈၵေႃႈ လႆႈ- ဝႃႈၼႆ။

ဝၼ်းထိ 22/07/12 (မိူဝ်ႈဝႃး) ၸုမ်းႁႅင်းၵၢၼ်ၽွမ်ႉႁူမ်ႈ WSA (Worker Solitary Association) ၵေႃႇတင်ႈ ၶွတ်ႇၽွတ်ႈ မူႇၸုမ်းမႃး ၶွပ်ႈတဵမ် 5 ပီလႄႈ ႁဵတ်းပၢင်ပွႆးၶုၵ်းထူပ်းၼႂ်းၵဵင်းမႆႇ၊ တီႈပၢင်ပွႆးၼၼ်ႉ မီးၸုမ်းၶူင်း ၵၢၼ်ပၢႆးယူႇလီ MAP ၊ ၸုမ်းၵပ်းသၢၼ်လွင်ႈၼၢင်းယိင်းတႆး SWAN ၊ ၸုမ်းၵူၼ်းၼုမ်ႇတႆးၵဵင်းမႆႇ ဢိၵ်ႇၸုမ်းႁႅင်းၵၢၼ်လၢႆၸုမ်းၵႂႃႇၶဝ်ႈႁူမ်ႈတင်း မူတ်းမွၵ်ႈ 200 ၵေႃႉ။

ၼၢင်းထွင်းၶမ်းသိုပ်ႇလၢတ်ႈထႅင်ႈဝႃႈ- ဢၼ်ပဵၼ်လိူင်ႈပဵၼ်လၢဝ်းသေတၢင်ႇလၢတ်ႈမႃးထိုင်တီႈႁဝ်း ဢမု/ၶၻီး မၼ်းမီး 80 ပၢႆ၊ ဢၼ်ႁဝ်းၶႃႈၸွႆႈၵႄႈလိတ်ႈပၼ် မီး 20 ပၢႆ၊ မိူၼ်ၼင်ႇမိူဝ်ႈလဵဝ် ၵႃႈႁႅင်းငၢၼ်း ၸၼ်ႉတႅမ်ႇၼႂ်းၵဵင်းမႆႇ ၼိုင်ႈဝၼ်း 251 ဝၢတ်ႇ၊ ၵူၺ်းၵႃႈ ပေႃးဢမ်ႇလႆႈၸွမ်းၼင်ႇဝႃႈမႃးၼႆႉၸိုင် မႃးတၢင်ႇ လၢတ်ႈႁဝ်း၊ ၼင်ႇႁိုဝ်ႁႂ်ႈပေႃးတေလႆႈၸွမ်းၵႃႈႁႅင်းႁဝ်း ႁႂ်ႈၽဵင်ႇပဵင်းပဵၼ်ထမ်း ဢၼ်ၵိုင်ႇထုၵ်ႇလႆႈၼၼ်ႉ တေၸွႆႈၶိုင်ပွင်ပၼ်- ဝႃႈၼႆ။

ပူၼ်ႉမႃးမိူဝ်ႈပီ 2007 ဢိင်ၼိူဝ်လူင်ပွင်ၸိုင်ႈထႆး တမ်းမၢႆမီႈဝႆႉဝႃႈ- ၵူၼ်းႁႅင်းၵၢၼ်တေဢမ်ႇၶွၼ်ႈတုမ်ၵၼ် 5 ၵေႃႉၶိုၼ်ႈၼိူဝ်၊ ဢမ်ႇလႆႈၶီႇလူတ်ႉၶိူင်ႈ၊ ဢမ်ႇလႆႈယိပ်းၶိူင်ႈၾူၼ်ႊ/မိုဝ်းထိုဝ် ၸိူဝ်းၼႆႉသေ လႆႈၶွတ်ႇ ၽွတ်ႈ ပဵၼ်မူႇၸုမ်းမႃး ပိူဝ်ႈတႃႇတေႃႇသူႈ ၶိုၼ်းသုၼ်ႇလႆႈလွင်ႈပဵၼ်ထမ်း။ ၸုမ်းႁႅင်းၵၢၼ်ၽွမ်ႉႁူမ်ႈ WSA ၼႆႉ မိူဝ်ႈလဵဝ်လုၵ်ႈၸုမ်းမီး 300 ပၢႆ ၊ ပေႃးဝႃႈမႃးၶဝ်ႈၼႂ်းမူႇ ၸုမ်း ၵဵပ်းၵႃႈႁဵတ်းဝႂ်လုၵ်ႈၸုမ်း 50 ဝၢတ်ႇ၊ ဢၼ်လိူဝ်မၼ်းၵေႃႈဢဝ်ႁဵတ်းငိုၼ်းၵွင်ၵၢင်။ ပေႃးဝႃႈ ၵူၼ်းၼႂ်းမူႇၸုမ်းပဵၼ်ၶိုၵ်ႉ ၶၵ်ႉၼႂ်းၵၢၼ်ငၢၼ်းမႃး လႄႈ ယူႇတီႈမူႇၸုမ်း ဢမ်ႇမီးငိုၼ်းၸွႆႈထႅမ်ၸိူဝ်းၼႆႉၵေႃႈ ၸွႆႈၵပ်းသၢၼ်ၸုမ်းမႅပ်ႊလႄႈ ၸုမ်းၸွႆႈထႅမ် တၢင်ႇမူႇၸုမ်း၊ ၼႂ်းတူင်ႇဝူင်းတႆးၸိူဝ်းၼႆႉသေ ယွၼ်းတၢင်းၸွႆႈထႅမ်ငိုၼ်းတွင်း ပႃးၸဵမ်ၵႃႈယူတ်းယႃ ၸိူဝ်းၼႆႉ။

ၸုမ်းႁႅင်းၵၢၼ်ၽွမ်ႉႁူမ်ႈ WSA ၼႆႉ တိတ်းတေႃႇလႆႈတီႈဝိူဝ်ႊ 087-5767412 ၊ ဢီႊမေႊလ် workersa.cm@gmail.com