ၶွင်ႊသီႊဢဝ်ၶိုၼ်းၸိုင်ႈတႆးတႅမ်ႈလိၵ်ႈထိုင် ၸွမ်သိုၵ်း လူင်ၸူဝ်းဝိၼ်း ႁႂ်ႈထတ်းသၢင်ၶိုၼ်းလွင်ႈတူၵ်း လူင်း ၵိုတ်းယိုဝ်းဢဝ်လွင်ႈငမ်းယဵၼ်၊ ၵွပ်ႈဝႃႈ ဝၢႆးလူင်းလၢႆး မိုဝ်းၸၼ်ႉၸိုင်ႈမိူင်းႁူမ်ႈတုမ်ပွၵ်ႈၵမ်း 2 တီႈၵဵင်းတုင် ယဝ်ႉၵေႃႈ သိုၵ်းမၢၼ်ႈတိုၵ်ႉႁၢင်ႈသိုၵ်းတိုၵ်းတပ်ႉတႆး SSA ယူႇၶိူဝ်းယႂ်း။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸဝ်ႈယွတ်ႈသိုၵ်း လၢတ်ႈဝႃႈ- ႁဝ်းၶႃႈ RCSS/SSA တင်းတပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ ဢုပ်ႇဢူဝ်းတူၵ်းလူင်းၵိုတ်းယိုဝ်း ဢဝ်လွင်ႈငမ်းယဵၼ်ၵၼ်ဝႆႉၵူၺ်း ပႆႇပေႃး၊ မိူဝ်ႈဝၼ်းထိ 19/05/12 မိူဝ်ႈႁူပ်ႉဢုပ်ႇၵၼ်ၸၼ်ႉၸိုင်ႈမိူင်း ႁူမ်ႈတုမ် ပွၵ်ႈၵမ်း 2 တီႈၵဵင်းတုင်ယဝ်ႉၵေႃႈ လႆႈလူင်း လၢႆးမိုဝ်းထႅင်ႈ၊ ၵူၺ်းၵႃႈ ယင်းတိုၵ်ႉပဵၼ်ပၢင်တိုၵ်း ယူႇ ထႅင်ႈလၢႆလၢႆၵမ်း။ ဢၼ်ပဵၼ်ပၢင်တိုၵ်းၵၼ်မႃးၸိူဝ်းၼႆႉ ပဵၼ်ၾၢႆႇ သိုၵ်းမၢၼ်ႈတႄႇယိုဝ်းဢွၼ်တၢင်း မႃးတႃႇသေႇ- ဝႃႈၼႆ။

ဝၼ်းထိ 28/06/12 ၵႅမ်ၸွမ်ႁၢၼ်ၸၢႆးလူး တူဝ်တႅၼ်း RCSS/SSA တႅမ်ႈလိၵ်ႈထိုင်ၵႅမ်ႁူဝ်ပဝ်ႈထိ 3 ၶွမ်ႊမတီႊၾၢႆႇၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် လႄႈပဵၼ်ပႃးၵႅမ်ၽူႈၵွၼ်းသိုၵ်းသုင်သုတ်း ၸွမ်သိုၵ်းလူင်ၸူဝ်းဝိၼ်း။ ၼႂ်းလိၵ်ႈ တႅမ်ႈဝႃႈ- RCSS/SSA တင်းလူင်ပွင်ၸိုင်ႈလႆႈၵိုတ်းယိုဝ်းဢဝ်လွင်ႈ ငမ်းယဵၼ်ၵၼ်ဝႆႉ၊ ၵူၺ်းၵႃႈ ၾၢႆႇသိုၵ်းမၢၼ်ႈယင်းတိုၵ်ႉ ႁၢင်ႈႁႅၼ်းသိုၵ်း ႁႃတၢင်းၽိတ်းသေမႃးတိုၵ်း တပ်ႉသိုၵ်းတႆး SSA ယူႇလၢႆလၢႆပွၵ်ႈ။ ၾၢႆႇၼိုင်ႈၵေႃႈ ၸုမ်းၵိုတ်းယိုဝ်းမိူၼ်ၵၼ် သေတႃႉ သုၼ်ႇလႆႈတိုဝ်ႉ တၢင်း ၵႂႃႇမႃးၸုမ်းၼိုင်ႈလႄႈၸုမ်းၼိုင်ႈဢမ်ႇမိူၼ်ၵၼ်၊ ၵွပ်ႈၼၼ်လႄႈ ႁႂ်ႈထတ်းသၢင်ပၼ်ၶိုၼ်း ၽွင်ႈ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၸဝ်ႈၸၢႆးလူးတႅမ်ႈဝႆႉဝႃႈ- ပူၼ်ႉမႃးမိူဝ်ႈဝၼ်းထိ 27/06/12 ၼႆႉ သိုၵ်းမၢၼ်ႈတပ်ႉ ၶလယ 64 လၢႆးၶႃႈ ယင်းတိုၵ်ႉမႃးလေႃႇတိုၵ်းတီႈတပ်ႉပၢင်သဝ်းလွႆမၢၵ်ႇၶီႈၼူ ႁိမ်းဝၢၼ်ႈယိူင်းလူးၵွၼ်ႇ၊ ၼႂ်းလိူၼ်ၼႆႉၵူၺ်း ပဵၼ်ပၢင်တိုၵ်းၵၼ် 6 ပွၵ်ႈ၊ လွင်ႈၸိူဝ်းၼႆႉႁဵတ်းႁႂ်ႈတုမ်ႉတိူဝ်ႉလွင်ႈယုမ်ႇယမ်ၵၼ်။ ၾၢႆႇၼိုင်ႈၵေႃႈ မိူင်းထႃးၼႆႉပၼ်ဝႆႉႁႂ်ႈပဵၼ်တီႈပၵ်းငဝ်ႈငုၼ်း RCSS/SSA ၊ ၵူၺ်းၵႃႈ သုၼ်ႇလႆႈတူင်ႉၼိုင် ၵႂႃႇမႃး သမ်ႉဢမ်ႇမိူၼ်ၵၼ်၊ မၢင်ၸုမ်းၼႆႉ ပႃးၵွင်ႈၵႂႃႇမႃးလႆႈလွတ်ႈလႅဝ်း၊ RCSS/SSA ၵေႃႈ ပဵၼ်ၸုမ်းၵိုတ်း ယိုဝ်းယူႇ ယိပ်းၵွင်ႈၵႂႃႇမႃးၸိူင်ႉၼၼ်ဢမ်ႇလႆႈ၊ ၼႆႉပဵၼ်လွင်ႈဝႆႉၸႂ်ဢမ်ႇၽဵင်ႇပဵင်းၵၼ်- ႁၼ်ထိုင် ၼင်ႇၼႆ။

ၸုမ်းလွႆတႆးလႅင်း RCSS/SSA တင်းသိုၵ်းမၢၼ်ႈၼႆႉ တင်ႈတႄႇၵိုတ်းယိုဝ်းဢဝ်လွင်ႈငမ်းယဵၼ်ၵၼ် လိူၼ်ၻီႊသႅမ်ႊၿိူဝ်ႊ 2011 မႃးတေႃႇထိုင်ယၢမ်းလဵဝ် ၽွင်းၵၢင်ပီ 2012 ၼႆႉ သွင်ၾၢႆႇပဵၼ်ပၢင်တိုၵ်းၵၼ် တီႈဢေႇသုတ်းဢမ်ႇယွမ်း 24 ပွၵ်ႈ။