ၶိူင်ႈၵွင်ႈၵၢင်ႇတင်းၼမ်ၼပ်ႉသိပ်း ဢၼ်ၺႃးတိတီႈမႄႈ သၢႆၼၼ်ႉ ဢိင်ၼိူဝ်ၶၢဝ်ႇထႆးၻေႊလိၼိဝ်ႊတႅမ်ႈ ဢွၵ်ႇဝႃႈ ပဵၼ်ၶွင်တပ်ႉသိုၵ်းၸိုင်ႈတႆးၼႆလႄႈ ၾၢႆႇၸဝ်ႈ ယွတ်ႈသိုၵ်းဝႃႈဢမ်ႇၸႂ်ႈ။ လၢႆၾၢႆႇၵေႃႈဝႃႈ တေသူင်ႇၸူး ၸုမ်းပီႇတုၸိတ်ႉ။

မိူဝ်ႈဝၼ်းထိ 26/06/12 ယၢမ်းၵၢင်ဝၼ်း၊ ၸဝ်ႈၼႃႈတီႈထႆးၾၢႆႇပလိၵ်ႈတင်းၾၢႆႇသိုၵ်း ႁူမ်ႈၵၼ်ၵႂႃႇၵူတ်ႇ သွၵ်ႈတီႈႁိူၼ်း ၸၢႆးသဝၢင်ႇ ၵျႆၵႅဝ်ႈ (ၸႂ်ၵႅဝ်ႈ) တီႈမႄႈသၢႆ (တေႃႇၼႃႈတႃႈၶီႈလဵၵ်း) တိလႆႈၶိူင်ႈၵွင်ႈၵၢင်ႇ တင်းမူတ်း 47 လဝ်း၊ ပႃးၸဵမ်ၶိူင်ႈ ၸၢၵ်ႈလၢတ်ႈၽွင်ႈ။ ၵွင်ႈၵၢင်ႇၸိူဝ်းၼၼ်ႉပဵၼ် RPG 12 လဝ်း၊ M79 12 လဝ်း၊ ၵွင်ႈသႅၼ်း AK47 (မႅၵ်ႉၵူတ်ႉ) 17 လဝ်း၊ ၵွင်ႈ M16 ႁူၵ်း (6) လဝ်း။ ၸၢႆးသဝၢင်ႇယွမ်းႁပ်ႉဝႃႈ ပဵၼ်ၵူၼ်းၵိၼ်ၸၢင်ႈ တေႃႉသူင်ႇၵူၺ်း။ ၵူၼ်းၵမ်ၵုမ်းၸတ်းၵၢၼ် ပဵၼ်ၸၢႆးၶမ်း- ၼႆယဝ်ႉ။

ထိုင်ၵၢင်ၶမ်ႈမႃး ၸဝ်ႈၼႃႈတီႈထႆး သိုပ်ႇၵႂႃႇၶူၼ်ႉသွၵ်ႈၵူတ်ႇထတ်းထႅင်ႈတီႈႁိူၼ်း ၸၢႆးၶမ်း (ႁိုဝ်) ပရတ်ႇ ယႃး ၶိူၼ်ႇၶမ်း၊ ဢမ်ႇၺႃးတူဝ်ၸဝ်ႈမၼ်းသေတႃႉ သွၵ်ႈ ႁၼ်ႁၢင်ႈထၢႆႇ ဢၼ်ၸၢႆးၶမ်းတင်းၸဝ်ႈယွတ်ႈ သိုၵ်း (ႁူဝ်ပဝ်ႈ RCSS/SSA) ထၢႆႇၵိုၵ်း ၵၼ်လႄႈ ၽိုၼ်ၶၢဝ်ႇထႆးၻေႊလီႊၼိဝ်ႊသ် (Daily News) ဢဝ်ၵဵပ်းတႅမ်ႈဢွၵ်ႇၶၢဝ်ႇဝႃႈ ၸၢႆးၶမ်းတင်းၸဝ်ႈယွတ်ႈသိုၵ်း ပဵၼ်ဢူၺ်းၵေႃႉၸမ်ၸႂ်ၵၼ်၊ ၶိူင်ႈၵွင်ႈၵၢင်ႇ ၸိူဝ်းၼႆႉ ၵေႃႈ တေသူင်ႇပၼ်ၸဝ်ႈယွတ်ႈသိုၵ်း။ ႁဵတ်းႁႂ်ႈပဵၼ်ၶၢဝ်ႇလိုဝ်းလင်မႃး ၼႂ်းၸူဝ်ႈ 2-3 ဝၼ်းပူၼ်ႉမႃးၼႆႉ။

ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၸၼ်ႉသုင်ၼႂ်း SSA ၵေႃႉၼိုင်ႈတွပ်ႇၵႄႈဝႃႈဢမ်ႇၸႂ်ႈ၊ ၵူၼ်းၵေႃႉၼႆႉ (ၸၢႆးၶမ်း) တင်းႁူဝ် ပဝ်ႈလူင်ၸဝ်ႈယွတ်ႈသိုၵ်းဢမ်ႇလႆႈပဵၼ်သင်ၵၼ်။ ႁူဝ်ပဝ်ႈလူင်ႁဝ်းၼႆႉ မၼ်းၸဝ်ႈ ပဵၼ်ၵူၼ်းၶွင် ၵူၼ်းမိူင်း၊ ၵွပ်ႈပိူဝ်ႈၼၼ် ၽႂ်ဢမ်ႇၽႂ်ၵေႃႈပေႃးမီးတိုဝ်ႉတၢင်း ၶႂ်ႈထၢႆႇႁၢင်ႈၵိုၵ်းၸွမ်းမၼ်း ၸဝ်ႈ၊ ၵွပ်ႈထၢႆႇႁၢင်ႈၵိုၵ်းၵၼ်ၵူၺ်းလႄႈ ပဵၼ်တႆးၵေႃႉၸမ် ၸႂ်ၵၼ်ၼႆ ဢမ်ႇၸႂ်ႈပိူင်မၼ်း- ဝႃႈၼႆ။

ၼွၵ်ႈသေၼၼ်ႉ ၵူၼ်းၸမ်ၸႂ်တင်း SSA ၵေႃႉၼိုင်ႈၵေႃႈလၢတ်ႈၵမ်ႉထႅမ်ၶေႃႈၵႂၢမ်းၼႆႉ၊ လူၺ်ႈလၢတ်ႈဝႃႈ- ၵႃႈပူၼ်ႉမႃး တူဝ်ၵဝ်ၶႃႈ တင်းလႆႈၸုၵ်းထၢႆႇႁၢင်ႈၵိုၵ်းၵၼ်တင်းၸွမ်ၽွင်းလူင်ထႆး ၼၢင်းယိင်ႈရၵ်း ၶျိၼ်းၼဝတ်းၵွၼ်ႇ၊ ၵူၺ်းၵႃႈ ပေႃးႁဝ်း ၺႃးၵၼ်ၶိုၼ်း ၸွင်ႇမၼ်းၼၢင်းတေတွင်းႁဝ်း ဢမ်ႇတွင်းႁဝ်း ယင်းဢမ်ႇႁူႉ၊ ၵွပ်ႈဝႃႈၵူၼ်း ထၢႆႇၵိုၵ်းမၼ်းၼၢင်းမီးၼပ်ႉႁဵင် ၼပ်ႉမိုၼ်ႇမၼ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၾၢႆႇၸဝ်ႈၼႃႈတီႈၾၢႆႇႁူမ်ႇလူမ်ႈထႆးၵေႃႈယုမ်ႇယမ်ဝႃႈ ၵွင်ႈၵၢင်ႇၸိူဝ်းၼႆႉ တေ ဢမ်ႇၵႂႃႇ ၸူးတီႈ SSA ၊ ဢိင်ၼိူဝ်ဢၼ်လႆႈတွင်ႈထၢမ်တီႈ ၸၢႆးသဝၢင်ႇ ၵျႆၵႅဝ်ႈၼႆႉ မၼ်းဢၢၼ်းၶၢမ်ႈၼမ်ႉ သၢႆသေ ၵႂႃႇသူင်ႇပၼ်တၢင်းတႃႈၶီႈလဵၵ်း (တႃႈဢၼ်မီးဝၼ်းဢွၵ်ႇမႄႈသၢႆ) ၊ ပိုၼ်ႉတီႈပွတ်းသၢႆၼၼ်ႉ ဢမ်ႇမီး SSA တူင်ႉၼိုင်၊ ၵမ်ႈၼမ် တေၵႂႃႇၸူးၸုမ်းပီႇတုၸိတ်ႉ ၶဝ်ၵူၺ်း၊ ၵွပ်ႈဝႃႈၵႂႃႇၸူး SSA တေၵႂႃႇ တၢင်းၸႄႈဝဵင်း မႄႈၾႃႉလူင် ဢၼ်တေႃႇၼႃႈလွႆၵေႃႇဝၼ်း- ဝႃႈၼႆ။

ဢွၼ်ၼႃႈၼႆႉ ၵူၼ်းၵႃႉၼႂ်းၸိုင်ႈတႆးပွတ်းဢွၵ်ႇၶူင်းၵေႃႉၼိုင်ႈၵေႃႈ ယၢမ်ႈလၢတ်ႈဝႃႈ- ၵူၼ်းၵႃႉၵွင်ႈၸိူဝ်း ၼႆႉ ၶဝ်မိုတ်ႈႁုမ်ၸုမ်း ပီႇတုၸိတ်ႉၶဝ် ၼမ်လိူဝ်ၸုမ်းတႆး SSA ၊ ၸုမ်းဝႃႉ UWSA ၊ ၵွပ်ႈဝႃႈၸုမ်း SSA ၸုမ်းဝႃႉ UWSA ၶဝ်ၼႆႉ ပေႃးၶဝ်သင်ႇသိုဝ်ႉ ၶိူင်ႈၵွင်ႈၵၢင်ႇၵႆႉသင်ႇၼမ်၊ ဢမ်ႇသင်ႇယွႆႈသင်ႇယႅမ်း။ ပေႃး SSA သမ်ႉသဵတ်ႈၵႃႈမၼ်းႁႅင်း၊ ၸုမ်းပီႇတုၸိတ်ႉၶဝ်တႄႉ ပိူၼ်ႈယွၼ်းၵႃႈႁိုဝ်ၵေႃႈပၼ်တိၵ်းတိၵ်း၊ ၵွပ်ႈၶဝ်မီး ငိုၼ်းၼမ်- ၼႆယူႇ။