ၶွမ်ႊမသျိၼ်ႇလွင်ႈငမ်းယဵၼ် လူင်ပွင်ၸိုင်ႈ  PC လႄႈၸုမ်း DPN ၸုမ်းဢုပ်ႇဢူဝ်း ၵၢၼ်မိူင်းၶွင် UNFC (ၸုမ်းယိပ်းၵွင်ႈၸိူဝ်းပႆႇလူင်းလၢႆးမိုဝ်းNCA ) ဢုပ်ႇဢူဝ်းၵၼ် တီႈဝဵင်းတႃႈၵုင်ႈ။


ပၢင်ဢုပ်ႇဢူဝ်းၸတ်းႁဵတ်းၼႂ်း ဝၼ်းတီႈ 10-11/ 08 / 2017   တီႈလုမ်းၾၢႆႇသၢင်ႈလွင်ႈငမ်းယဵၼ် NRPC ။


ၾၢႆႇတၢင်း DPN ၼႆႉၶူႇဢူးရႄႇ ဢွၼ်ႁူဝ်တူဝ်တႅၼ်း 9 ၵေႃႉ။  ယၢင်းလႅင် KNPP 2 ၵေႃႉ ၊ ၸုမ်း မွၼ်း NMSP 2ၵေႃႉ၊ ၸုမ်းရၶႅင်ႇALP 2ၵေႃႉ ၊ လႃးႁူႇ LDU 1 ၵေႃႉ၊ တပ်ႉသိုၵ်းၸိုင်ႈတႆး SSPP/SSA  2 ၵေႃႉ ပဵၼ်ၸဝ်ႈသိုၵ်းလူင်သိူဝ်ဢွၼ်ႇလႄႈ ၸဝ်ႈႁၢၼ်ႁတ်းႁၢၼ် ။

ၾၢႆႇတၢင်းၶွမ်ႊမသျိၼ်ႇလွင်ႈငမ်းယဵၼ်လူင်ပွင်ၸိုင်ႈသမ်ႉ တွၵ်ႊတိူဝ်ႊ တိၼ်ႇမဵဝ်းဝိၼ်းဢွၼ်ႁူဝ် တူဝ်တႅၼ်း 12 ၵေႃႉ။ ပႃးၵႅမ်ၸွမ်သိုၵ်း ယႃႇပျေႉ၊ ၸွမ်ႁၢၼ်ၶိၼ်ႇၸေႃႇဢူး၊  ဢူးၸေႃႇထေး၊ ဢူးတဵင်းၸေႃႇ၊  ဢူးဢွင်ႇသူဝ်း၊ ဢူးဢွင်ႇၵျီႇၶဝ်ၸိူဝ်းၼႆႉ။


ၾၢႆႇၽူႈလဵပ်ႈႁဵၼ်းထွမ်ႇၸွမ်းမီး ၸုမ်း PPWT ဢၼ်တူဝ်တႅၼ်းၸုမ်းၸၢဝ်းၶိူဝ်းၸိူဝ်းလူင်းလၢႆးမိုဝ်း လိၵ်ႈႁူမ်ႈမၢႆၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၶွတ်ႇၽွတ်ႈဝႆႉ၊ ပႃးၸဝ်ႈသိုၵ်းလူင်ၸၢႆးငိုၼ်း ၽူႈၼမ်းၼႂ်း  3  RCSS/SSA ၊ တွၵ်ႊတိူဝ်ႊသုၺ်းၶႃး  ၵႅမ်ၽူႈၼမ်းၼႂ်းၸုမ်း CNF ၶျၢင်း၊ ၸဝ်ႈႁၢၼ်  တေႃးမၢတ်ႉသ် ၽူႈၼမ်းၼႂ်းၵူႈလွင်ႈလွင်ႈၸုမ်းပဢူဝ်း PNLO  ၶဝ် 3 ၵေႃႉ ၶဝ်ႈႁူမ်ႈ။


တီႈပၢင်ပိုတ်ႇပၢင်ၼၼ် ၶူႇဢူးရႄႇ မွၵ်ႇလၢတ်ႈၶေႃႈၵႂၢမ်းဝႃႈ - လွင်ႈၵေႃႇသၢင်ႈလွင်ႈယုမ်ႇယမ်ၼႆႉ ပဵၼ်ဢၼ်လမ်ႇလွင်ႈယႂ်ႇလူင်တႄႉတႄႉ ယၢမ်းလဵဝ်လွင်ႈၵေႃႇသၢင်ႈလွင်ႈယုမ်ႇ ယမ်ၵၼ်ၼႆႉ တိုၵ်ႉမီးတီႈၸၼ်ႉ 0  ၵူၺ်း - ဝႃႈၼႆ။


သွင်ပႃႈသွင်ၾၢႆႇဢၼ်ဢုပ်ႇဢူဝ်းၵၼ်ၼႆႉတႄႉ ပဵၼ် 9 ၶေႃႈဢၼ်ၾၢႆႇတၢင်းDPN/UNFC  ယွၼ်ႉပႆႇတူၵ်းလူင်းၵၼ်လႆႈလႄႈတေသိုပ်ႇဢုပ်ႇဢူဝ်းၵၼ်ၵႂႃႇၶေႃႈလႂ်ၶေႃႈၼၼ်ႉထႅင်ႈယူႇဝႃႈၼႆ။