ၸုမ်းၸၢဝ်းၶိူဝ်းၸိုင်ႈထႆးလႄႈ ၸၼ်ႉၸွမ်ၵဵင်းမႆႇ ႁူမ်ႈလၢႆမူႇၸုမ်း ၸတ်းႁဵတ်းပၢင်ႁူပ်ႉထူပ်း ၸၢဝ်းၶိူဝ်းပို်ၼ်ႉမိူင်း ပိူဝ်ႈႁႂ်ႈၸၢဝ်းၶိူဝ်း မီးသုၼ်ႇလႆႈၽဵင်ႇပဵင်းလႄႈ မီးၵုင်ႇသိၵ်ႈၶႃႇ။


ဝၼ်းတီႈ 08-09/08/2017 ၸၼ်ႉၸွမ်ၵဵင်းမႆႇ၊ ၸုမ်းၸၢဝ်းၶိူဝ်းၼႂ်းမိူင်းထႆးလႄႈ လၢႆမူႇၸုမ်း ႁူမ်ႈၵၼ်ၸတ်း ႁဵတ်းပၢင်ႁူပ်ႉထူပ်းလႅၵ်ႈလၢႆႈ လွင်ႈၸၢဝ်းၶိူဝ်း တီႈၸၼ်ႉၸွမ်ၵဵင်းမႆႇ ၸိုင်ႈထႆး ။ မီးၽူႈယႂ်ႇၵူၼ်းလူင်၊ ၽူႈလူင်ႉ လႅၼ်ႇ၊ ၽူႈၶူၼ်ႉၶႂႃႉလႄႈ လၢႆၸၢဝ်းၶိူဝ်းမိူၼ်ၼင်ႇထႆး၊ ယူၼ်း၊ တႆးလိုဝ်ႉ၊ တႆးၶိုၼ်၊ တႆးဢႁူမ်ႇ၊ တႆးယွင်း၊ တႆးလမ်၊ ဢႃးၶႃႇ၊ မူးသိူဝ်း၊ လီႇသူး၊ တဢၢင်း၊ ပဢူဝ်း၊ ယၢင်းလႅင်၊ ယၢင်းၽိူၵ်ႇ၊ မူင်ႉၸိူဝ်းၼႆႉ 38 ၸုမ်း ဢိၵ်ႇၽူႈ သူၼ်ၸႂ် ၶဝ်ႈႁူမ်ႈမီး 500 ပၢႆ။

ၼႂ်းပၢင်ၼႆႉဢုပ်ႇဢူဝ်းလႅၵ်ႈလၢႆႈ ထတ်းထွင်လွင်ႈပၵ်းပိူင်၊ လွင်ႈတီႈယူႇတီႈၵိၼ်၊ လွင်ႈၼမ်ႉလိၼ်ႁိၼ်ၽႃ၊ လွင်ႈၽႃႇသႃႇ၊ ၾိင်ႈႁိတ်ႈႁွႆး ႁႂ်ႈလူင်ပွင်ၸိုင်ႈတၵ်းမၵ်းပၵ်းပိူင်တႃႇတူၺ်းလွမ်  ႁႂ်ႈပေႃးမီးသုၼ်ႇလႆႈၽဵင်ႇပဵင်း ၊ ႁႂ်ႈမီးလွင်ႈယူႇသဝ်းထၢင်ႇႁၢင်ႈလႄႈ မီးၵုင်ႇသိၵ်ႈၶႃႇ၊  မီးသုၼ်ႇလႆႈသုၼ်ႇပဵၼ်ၽဵင်ႇပဵင်း ႁႂ်ႈသႅၼ်းႁုၼ်ႈမႂ်ႇႁူႉ ၸၵ်းၸၢဝ်းၶိူဝ်းပိုၼ်ႉမိူင်းၼႂ်းမိူင်းထႆးလႄႈ ႁႂ်ႈမေႃဝူၼ်ႉႁၼ်တႃႇမိူဝ်းၼႃႈ  ၸၢဝ်းၶိူဝ်း ပိုၼ်ႉမိူင်းၼႂ်းမိူင်းထႆး ၸိူဝ်းၼႆႉ။


ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99 Mhz လၢတ်ႈဝႃႈ - “ပီႈၼွင်ႉတႆးႁဝ်း ယႃႇသွၼ်ႇဝႃႈ ႁဝ်းပဵၼ်တႆးၶိူဝ်းယႂ်ႇသေ ဢမ်ႇၶႂ်ႈႁူမ်ႈပိူၼ်ႈ ၽွင်းႁဝ်းမႃးယူႇမိူင်းပိူၼ်ႈၼႆႉ ႁဝ်းလူဝ်ႇမေႃၼွမ်းတူဝ်သေ ၶဝ်ႈႁူမ်ႈၸွမ်းပိူၼ်ႈ ၼင်ႇႁိုဝ်ႁဝ်းပေႃးတေမီးသုၼ်ႇလႆႈ ” ဝႃႈၼႆ။


ၼႂ်းပၢင်ပွႆးၼႆႉမီးလွင်ႈၼႄၶႅပ်းႁၢင်ႈ၊ ၶၢႆတၢင်းၵိၼ်၊ ၼႄတၢင်းၵႃႈ၊ ႁွင်ႉၽဵင်းၵႂၢမ်း၊ ၼႄၾိင်ႈႁိတ်ႈႁွႆး ၸၢဝ်းၶိူဝ်း ၽႂ်မၼ်း။


ၼၢင်းၸၢမ်ပဝ်း ၽူႈၶဝ်ႈႁူမ်ႈပၢင်ပွႆး လၢတ်ႈဝႃႈ- “ ဢၼ်လႆႈၶဝ်ႈႁူမ်ႈၼႆႉ မီးတၢင်းသိူဝ်းလႆႈတၢင်းႁူႉၼမ် လႆႈႁူႉ ၸၵ်းၵၼ်တင်းတၢင်ႇၸၢဝ်းၶိူဝ်း၊ လႆႈႁူႉသုၼ်ႇလႆႈ ၸိူဝ်းၼႆႉ ။ ပေႃးပီၼႃႈမႃးပေႃးပိူၼ်ႈ ၸတ်း ထႅင်ႈၶႂ်ႈႁႂ်ႈပီႈ ၼွင်ႉတႆးႁဝ်း ဢွၼ်ၵၼ်မႃး ၶဝ်ႈႁူမ်ႈၼမ်ၼမ်သေၵမ်း” ဝႃႈၼႆ။


ပၢင်ဢုပ်ႇဢူဝ်းလွင်ႈၸၢဝ်းၶိူဝ်းၼႆႉ ၸတ်းႁဵတ်းၼႂ်းလိူၼ်ဢေႃႊၵတ်ႊသ်ၵူႈပီ တႄႇၸတ်းမႃးၸဵမ်မိူဝ်ႈ 2550 (2007) ယိူင်းဢၢၼ်းၼင်ႇႁိုဝ်ၸၢဝ်းၶိူဝ်းလၢႆတီႈ လႆႈမႃးႁူပ်ႉထူပ်းၵၼ်၊ ဢုပ်ႇဢူဝ်းလႅၵ်ႈလၢႆႈ ႁႃသဵၼ်ႈတၢင်း ႁႂ်ႈၸၢဝ်းၶိူဝ်းမီးသုၼ်ႇလႆႈထၢင်ႇႁၢင်ႈၶိုၼ်ႈယႂ်ႇ။