ႁဝ်းဝႃႈႁဝ်းပဵၼ်တႆးၶိူဝ်းယႂ်ႇ သႂ်ႇၵႂႃႇသႂ်ႇမႃး ပႃးၵၼ်ဢမ်ႇသူင်လၢတ်ႈ ၵႂၢမ်းၸၢတ်ႈပေႃႈမႄႈႁဝ်း ဝႃႈၵဝ်ၼဝ်း ယူႇၼႂ်းတူင်ႇ ထူင်ႇထူၺ်ႈဢမ်ႇၶိုၼ်ႈသင်ႉ ၵၼ်ႉၵုၵ်ႉလၢတ်ႈပဵၼ်ယၢပ်ႇ တၢပ်ႇၵႂၢမ်းပိူၼ်ႈမၼ်းၶိုၵ်ႉ ဝႃႈလိုၵ်ႉလမ်ႇ  လႅတ်းတွၼ်း။ လိၵ်ႈႁဝ်းဝႃႈမၼ်းယုင်ႈယၢင်ႈ ဢၢင်ႈလိၵ်ႈပိူၼ်ႈတၢႆတူဝ် ၵူဝ်ပိူၼ်ႈဝႃႈၵူၼ်းႁူၺ်ႈ လူၺ်ႈဢမ်ႇၶႂ်ႈ သူင်တႅမ်ႈ လၢႆးငၢႆႈငႅမ်ႈၶိုတ်းၸၼ်ႉ ၼၼ်ႉဝႃႈပဵၼ်လိၵ်ႈပိူၼ်ႈၵႂၢမ်းပိူၼ်ႈ။


ပိူဝ်ႈတႃႇတေလၵ်းလႅမ်သႅမ်းၵႃႈ ၵတ်ႉၶႅၼ်ႇလႅၼ်ႇပၢႆးၵူႈလွင်ႈၶွင်ႈၵူႈၾၢႆႇၾၢႆႇၼၼ်ႉ ပိူင်လူင်မၼ်းၵေႃႈပဵၼ်ၵၢၼ် ႁဵၼ်းႁူႉမေႃ ၾိုၵ်းသွၼ်ဢဝ်ပၺ်ၺႃ။ လိူဝ်သေလိၵ်ႈလၢႆးၵႂၢမ်းလၢတ်ႈၽႃသႃတႆးယဝ်ႉ လိၵ်ႈလၢႆးၵႂၢမ်းလၢတ်ႈ တၢင်ႇၸိူဝ်ႉတၢင်ႇၶိူဝ်း ဢၼ်မီးၼႂ်းလူၵ်ႈၼႆႉမေႃလၢတ်ႈတႅမ်ႈလႆႈလၢႆၽႃသႃၼမ်ၵႃႈႁိုဝ်ၶႅၼ်ႇၵႃႈႁိုဝ်လီၵႃႈၼၼ်ႉ။ "ၸိူဝ်ႉဝူင်ႈၵေႃႈဝူင်ႈပႅင်း ၸိူဝ်ႉမႅင်းၵေႃႈမႅင်းႁၵ်ၵ်ႉ" "ၸိူဝ်ႉၽႂ်လႆႈမၼ်းၸိူဝ်ႉမၢၵ်ႇၶိူဝ်ၶၼ်းလႆႈတူၼ်ႈ" ၵႂၢမ်းၾိင်ႈ ပူႇမွၼ်ႇႁဝ်း ပွၼ်ႈသွၼ်ၵၼ်မႃးၼၼ်ႉ လႅပ်ႈၶႂ်ႈပိူင်ႈလွႆးလွႆးယဝ်ႉ။


"ၸိူဝ်ႉဝူင်ႈၵေႃႈဝူင်ႈပႅင်းၸိူဝ်ႉမႅင်းၵေႃႈမႅင်းႁၵ်ႉ" ၼႆၼၼ်ႉတႄႉ ယုမ်ႇယမ်ဝႃႈ တႆးၵူႈၵေႃႉ တိုၼ်းမီးၸႂ်ႁၵ်ႉၶိူဝ်း ႁၵ်ႉၸိူဝ်ႉၸၢတ်ႈၸဝ်ႈၵဝ်ႇဢမ်ႇပိူင်ႈပၢႆႈသင်ၵၼ်။ ၵူၺ်းၵႃႈ တႆးၵူႈၵေႃႉ ဢမ်ႇႁဵတ်းပုၼ်ႈၽွၼ်းၵၢၼ်ၸၼ်ႉပိုၼ်ႉ ထၢၼ်တႆး။ (ၵၢၼ်တႆး - ဢမ်ႇၵွမ်ႉၵႃႈၵၢၼ်ၼႂ်းတွၼ်ႈ ယိပ်းၵွင်ႈၵၢင်ႇ/ၵၢၼ်မိူင်း/ၵၢၼ်ပႃႇတီႇ ၵၢၼ်ၸိူဝ်ႉၸၢတ်ႈ ၸိူဝ်ႉၶိူဝ်းၵူၺ်း။ ၸိူင်ႉၼင်ႇ ၵၢၼ်ယူႇၵိၼ်ၸႂ်ႉတိုဝ်း ႁိတ်ႈႁွႆးၾိင်ႈပိူင်မူႇမွၼ်ႇၼၢႆးယႃႈ ဢွၼ်ႁဵတ်းမႃးၼၼ်ႉ ႁဝ်းလႆႈႁဵတ်းသင်ၽွင်ႈ။ လၵ်းလၵ်းလူင်မၼ်း ၵၢၼ်တူင်ႉတၵ်ႉလၢတ်ႈၸႃတေႃႇၵၼ်လႄႈတႅမ်ႈလိၵ်ႈ ၸူးၵၼ်။ ၼႂ်းတႆးၼင်ႇၵၼ်ဝၼ်းဝၼ်းၼိုင်ႈ ႁဝ်းလၢတ်ႈၵႂၢမ်းတႆးလၢႆၶေႃႈ ဢၢၼ်ႇလိၵ်ႈတႆးလၢႆထႅဝ် တႅမ်ႈလိၵ်ႈတႆးလၢႆ တူဝ် ၼႂ်းၵၢၼ်ယူႇၵိၼ် ၵူႈဝၼ်းဝၼ်းၼႆႉ။


မိူဝ်ႈလဵဝ်ႁူဝ်ၵူၼ်းတႆးၼႂ်းမိူင်းတႆးမီးၵႃႈႁိုဝ် မေႃလိၵ်ႈတႆး ၵႂၢမ်းတႆးမီးၵႃႈႁိုဝ် လၢတ်ႈတႅမ်ႈယူႇၵူႈဝၼ်းမီးၵႃႈႁိုဝ် "ႁၵ်ႉၸိူဝ်ႉၸၢတ်ႈၸိူဝ်ႉၶိူဝ်းတူဝ်ၵဝ်ႇသေ ဢမ်ႇႁဵၼ်းဢမ်ႇသွၼ်လိၵ်ႈပိူၼ်ႈ ဢမ်ႇလၢတ်ႈၵႂၢမ်းပိူၼ်ႈ ဢမ်ႇၼုင်ႈ  ၶူဝ်းပိူၼ်ႈ ဢမ်ႇၸႂ်ႈ - ႁၵ်ႉၸိူဝ်ႉၸၢတ်ႈၸိူဝ်ႉၶိူဝ်းၸဝ်ႈၵဝ်ႇသေဢမ်ႇႁူႉဢမ်ႇမေႃ ဢမ်ႇႁဵၼ်းဢမ်ႇသွၼ်လိၵ်ႈ ၸဝ်ႈၵဝ်ႇ ဢမ်ႇလၢတ်ႈၵႂၢမ်းၸဝ်ႈၵဝ်ႇ ဢမ်ႇၼုင်ႈၶူဝ်းၸဝ်ႈၵဝ်ႇၼၼ်ႉ ဢမ်ႇထုၵ်ႇလီပဵၼ် " ၼႆႉယဝ်ႉပဵၼ်ၸုတ်း ၼဵၼ်သဵၼ်ႈဢဵၼ်လူင်ႁဵတ်းႁႂ်ႈၽႃသႃၵႂၢမ်းလၢတ်ႈလိၵ်ႈလၢႆးၶိူဝ်းႁဝ်းႁၢႆ လိုၼ်းသုတ်း ပေႃးလိၵ်ႈလၢႆးၵႂၢမ်းလၢတ်ႈ ႁဝ်းႁၢႆ  ၵူၼ်းၶိူဝ်းၼၼ်ႉၵေႃႈ တၵ်းတၢႆမူၺ်ႉဝၢႆးဢမ်ႇႁၢင်ႉ။ ႁၵ်ႉၸိူဝ်ႉႁၵ်ႉၸၢတ်ႈ ဢမ်ႇလၢတ်ႈၵႂၢမ်းၸဝ်ႈၵဝ်ႇ ဢမ်ႇတႅမ်ႈလိၵ်ႈၸဝ်ႈၵဝ်ႇတေႃႇၵူၼ်းၶိူဝ်းၸဝ်ႈၵဝ်ႇ ၸွင်ႇၸဝ်ႈၵဝ်ႇဝူၼ်ႉလႆႈဝႃႈ ၵူၼ်းၶိူဝ်းၸဝ်ႈၵဝ်ႇ တေယင်ႇ ၸင်ႈၼမ်ႉၼၵ်းၸဝ်ႈၵဝ်ႇ မီးၵႃႈႁိုဝ် တေၸႂ်ယႂ်ႇ ထၢင်ႇယႂ်ႇၸဝ်ႈၵဝ်ႇလႆႈၸိူင်ႉႁိုဝ်။


ၵၢၼ်ဝၢၼ်ႈၵၢၼ်မိူင်း ၵၢၼ်ၸိူဝ်ႉၵၢၼ်ၶိူဝ်းယႂ်ႇယႂ်ႇလူင်လူင် ပႆႇဝႃႈၵၢၼ်ႁၵ်ႉသႃပႂ်ႉပႃးလိၵ်ႈလၢႆးၵႂၢမ်းလၢတ်ႈၸဝ်ႈ ၵဝ်ႇ ၵူၺ်းၵေႃႈဢမ်ႇပဵၼ်လႆႈၼႆႉ လီယိၼ်းမွင်ၸႂ်သေလၢႆၸွမ်းတႄႉတႄႉ။ ၸဝ်ႈၵဝ်ႇ လၢတ်ႈၵႂၢမ်းပိူၼ်ႈ တႅမ်ႈလိၵ်ႈပိူၼ်ႈ ၵတ်ႉၶႅၼ်ႇလႅၼ်ႇလႅတ်းၽၢႆ ယူႇၸၼ်ႉၼမ်းၼႃႈၶွင်လူၵ်ႈ ယူႇၼႂ်းတူင်ႇဝူင်းၸၼ်ႉသုင် ၵႃႈႁိုဝ် ၵေႃႈယဝ်ႉ ၵႂၢမ်းၶိူဝ်းၸဝ်ႈၵဝ်ႇၸဝ်ႈၵဝ်ႇဢမ်ႇလၢတ်ႈ လိၵ်ႈလၢႆးၶိူဝ်းၸဝ်ႈၵဝ်ႇ ၸဝ်ႈၵဝ်ႇဢမ်ႇတႅမ်ႈ ႁုၼ်ႈသႅၼ်း ပၢၼ်လုၵ်ႈလၢၼ်ၸဝ်ႈၵဝ်ႇႁုၼ်ႈသႅၼ်းလင် တေဝူၼ်ႉၸိူင်ႉႁိုဝ်။


ပၢၼ်ၵူႈပွၵ်ႈတႄႉၶူပ်းယူင်ႉတဵမ်ၶၢပ်ႈ ၵႂၢမ်းလၢတ်ႈလိၵ်ႈလၢႆးၶူဝ်းၼုင်ႈတၢင်းဝႆ ၵၢၼ်ယူႇသဝ်းၵိၼ်သၢင်ႈ တိုၼ်း ဢွၵ်ႇႁၢင်ႈၾၢင်တႆး လိုၼ်းၼႆႉၵွႆႈၵွႆႈပိၼ်ႇၾၢင်ႁၢင်ႈၶူဝ်းၼုင်ႈတၢင်းဝႆဢၼ်ၶိုတ်းၵၢပ်ႈၸွမ်းပၢၼ် ၶေႃႈဢၢင်ႈၸွမ်း ၼႃႈၵၢၼ်လႄႈတႅမ်ႈလိၵ်ႈပိူၼ်ႈ ယူႇၵႂႃႇယူႇမႃးၵူဝ်ပိူၼ်ႈႁူႉငိူၼ်ႈႁဝ်းဢၢႆႈဢီႇဝၢၼ်ႈၼွၵ်ႈ ၵွႆႈၵွႆႈလွၵ်ႈလွၼ်ႉထွတ်ႇ သွတ်ႇယိူင်ႈလၢတ်ႈၵႂၢမ်းပိူၼ်ႈဝႃႈမၼ်းမွၼ်ႈသူပ်း သႂ်ႇၵႂႃႇသႂ်ႇမႃးထူပ်းပိူၼ်ႈထူပ်းႁဝ်းၵေႃႈမင်ၵႂၢမ်းပိူၼ်ႈသႂ်ႇၵၼ် ၵူၺ်း။ ႁၵ်ႉၸၢတ်ႈႁၵ်ႉၶိူဝ်းသေၾၢႆႇၼိုင်ႈတႄႉၶိုင်သၢင်ႈၼႃႈၵၢၼ်တႆးယူႇၾၢႆႇၼိုင်ႈသမ်ႉ ဢဝ်လိၵ်ႈပိူၼ်ႈၵႂၢမ်း ပိူၼ်ႈပဵၼ်ယႂ်ႇ မၼ်းဢမ်ႇမိူၼ်တင်းႁဝ်းၵေႃႇထၢတ်ႈၵွင်သၢႆး(ၵွင်းမူးသၢႆး)သမ်ႉႁဵတ်းႁွင်ႈၼမ်ႉလႆလေႃႇတွင်ႈ ပိုၼ်ႉမၼ်းယူႇႁိုဝ်။


ငဝ်းလၢႆးဢၼ်ပဵၼ်ယူႇဝၼ်းမိူဝ်ႈၼႆႉ ၵူႈၵေႃႉႁူႉၵၼ်လီ လွင်ႈၶႂ်ႈလႆႈၶႂ်ႈပဵၼ်တႃႇၸိူဝ်ႉၸၢတ်ႈဝၢၼ်ႈမိူင်းၸိူဝ်ႉၶိူဝ်း ႁဝ်းလႄႈလွင်ႈၶွင်ႉၶမ် ပၼ်ႁႃလၢႆလိူင်ႈလၢႆသမ်ႇသႅၼ်ပိူင်။ ႁူမ်ႈဝႃႈတၢင်းႁဵတ်းလၢႆးႁဵတ်းပိူင်ႈၵၼ်ၵေႃႈ ယိူင်း ဢၢၼ်းၵူႈၵေႃႉတႄႉတေဢမ်ႇပိူင်ႈသင်ၵႃႈႁိုဝ်သေတႃႉ ပေႃးပၢႆးဝူၼ်ႉႁဝ်းၽိတ်းၽူလ် ၵၢဝ်ႉယၢင်ႈတိၼ်ဢၼ်ပႆ ၵႂႃႇၼႃႈလႄႈၵၢဝ်ႉယၢင်ႈတိၼ်ဢၼ်ႁူၼ်လင်ပဵင်းၵၼ်ႁိုဝ် ၵၢဝ်ႉယၢင်ႈတိၼ်ႁူၼ်လင် ဢၼ်ၵၢဝ်ႉယၢင်ႈမၼ်း ယၢဝ်းလိူဝ်ၼႆၸိုင်  တေႁဵတ်းႁိုဝ်ထိုင်တီႈယိူင်းဢၢၼ်းလႆႈ။ ၵၢၼ်လူင်ပိုၼ်ႉထၢၼ်ၶွင်တႆးႁဝ်းၵူႈၵေႃႉ တၵ်းထုၵ်ႇ လႆႈပႂ်ႉပႃးၽႃသႃလိၵ်ႈလၢႆးၵႂၢမ်းလၢတ်ႈ ပဵၼ်ပိူင်လူင်မၼ်းယဝ်ႉ ပေႃးႁဝ်းတေပွႆႇပႅတ်ႈပုၼ်ႈၽွၼ်းပိုၼ်ႉထၢၼ် ငဝ်ႈႁၢၵ်ႈႁူဝ်တီး လၵ်းသဝ်လူင်မၼ်းၸိုင် လိူဝ်သေဢမ်ႇထိုင်တီႈယိူင်းဢၢၼ်း ယိင်ႈၶႅၼ်းတေႁဵတ်းႁႂ်ႈလိၵ်ႈတႆး ၵႂၢမ်းတႆး ဝွတ်ႈဝၢႆးတၢႆ  ၸိူဝ်ႉၶိူဝ်းၵူၼ်းတႆးၸဵဝ်းမူၺ်ႉၸိပ်းႁၢႆဝႆးယဝ်ႉ။