ၸၢႆးလႃႉထုၼ်း ဢႃယု 33 ပီ  ၵူၼ်းဝဵင်းသီႇပေႃႉ ၶဝ်ႈႁဵတ်းၵၢၼ်ၼႂ်းၸိုင်ႈထႆး ယိပ်းၺႃးသၢႆၾႆးၾႃႉတီႈႁဵတ်းၵၢၼ် သေ ၺႃးၾႆးၾႃႉသျွၵ်ႊ တေလႆႈတႅပ်ႈပႅတ်ႈၶေႃႈမိုဝ်းတင်း 2 ၶွၼ်  ဝႃႈၼႆ။


ၸၢႆးလႃႉထုၼ်းၼႆႉ   လုၵ်ႉတီႈမိူင်းဢယုထယႃးသေ ႁွတ်ႈမႃးထိုင် ႁူင်းယႃ သူၼ်ၻွၵ်ႊ ၵဵင်းမႆႇ ၸိုင်ႈထႆး။ မိူဝ်ႈဝၼ်းတီႈ 10/08/2017 ယၢမ်းႁူဝ်ၶမ်ႈ မေႃယႃၶဝ် တေၽႃႇတတ်းပႅတ်ႈ ၶေႃႈမိုဝ်း မၼ်းၸၢႆးတင်းသွင်ၶွၼ် ယွၼ်ႉၸဵပ်းၸၢင်ႈလၢမ်း သေၼဝ်ႈပႅတ်ႈတၢင်းၶႅၼ် ဝႃႈၼႆ။

ၸၢႆးဢွင်ႇၺုၼ်ႉ ၵေႃႉပဵၼ်ၼွင်ႉၸၢႆး ၸၢႆးလႃႉထုၼ်း လၢတ်ႈဝႃႈ “ မေႃၶဝ်ဝႃႈ တေၽႃႇတတ်း မိူဝ်ႈၽုၵ်ႈ ယၢမ်းႁူဝ် ၶမ်ႈၼႆၶႃႈ  ။ လွင်ႈတၢင်းမၼ်းပဵၼ်ၸိူင်ႉၼႆၶႃႈဢေႃႈ။ ပီႈဢၢႆႈၶႃႈႁဝ်းၼႆႉ ႁဵတ်းၵၢၼ်တီႈ မိူင်းဢယုထယႃး ။  ၺႃးသၢႆ ၾႆးၾႃႉသျႂၵ်ႊၼႆႉၸဵမ်မိူဝ်ႈဝၼ်းတီႈ 20/07/2017 ယၢမ်းၵၢင်ၶမ်ႈ ။ ပဵၼ်တီႈၶႅမ်ႉပ် (ႁွင်ႈထႅဝ်လိုဝ်ႈသဝ်းၵူၼ်း ႁဵတ်းၵၢၼ်) ။ ဝၢႆးသေၺႃးၾႆးသျႂၵ်ႊယဝ်ႉ  ပီႈၼွင်ႉႁႅင်းၵၢၼ်ၸိူဝ်းယူႇၸမ်ၼၼ်ႉ ဢွၼ်ဢဝ် ပီႈဢၢႆႈ ႁဝ်းၶႃႈၵႂႃႇၶဝ်ႈ ႁူင်းယႃ တီႈဝဵင်းဢယုၵ်ႉထယႃးၵမ်းလဵဝ်။ ယူႇတီႈပေႃႈလဵင်ႉ/မႄႈလဵင်ႉ ၼၢႆးၸၢင်ႈ  လႆႈၵမ်ႉၸွႆႈထႅမ်ပၼ်ငိုၼ်း တႃႇ ယူတ်းယႃ တူဝ် 1 သႅၼ်ဝၢတ်ႇၵေႃႈ မူတ်းၸွမ်းၵႃႈယူတ်းယႃယဝ်ႉ"  - ဝႃႈၼႆ။


ၸၢႆးလႃႉထုၼ်းၼႆႉ လႆႈယူတ်းယႃတူဝ်ဝႆႉ တီႈဝဵင်းဢယုၵ်ႉထယႃး ၶၢဝ်းတၢင်း 20 ဝၼ်းပၢႆ ။  ငိုၼ်းၵႃႈယူတ်းယႃၵေႃႈ  မူတ်းယဝ်ႉ။ ယွၼ်ႉပိူဝ်ႈၵေႃႉပဵၼ်ၼွင်ႉၸၢႆးႁဵတ်းၵၢၼ်ယူႇဝႆႉတီႈၵဵင်းမႆႇလႄႈ ၼင်ႇႁိုဝ်တေၸၢင်ႈ လုမ်းလႃးၵၼ်ငၢႆႈ ၼၼ်ႉ ယၢမ်းလဵဝ်ဢဝ်တူဝ်ၸၢႆးလႃႉထုၼ်းမႃးယူတ်းယႃတူဝ်တီႈႁူင်းယႃသူၼ်တွၵ်ႊ ဝဵင်းၵဵင်းမႆႇ -ဝႃႈၼႆ။


ၸၢႆးဢွင်ႇၺုၼ်ႉ ၼွင်ႉၸၢႆးၸၢႆးလႃႉထုၼ်းလၢတ်ႈဝႃႈ- " ထႅင်ႈၾၢႆႇၼိုင်ႈၵေႃႈ ႁဝ်းၶႃႈ လႆႈထၢမ်တီႈမေႃယႃ ၶဝ်တီႈ ၼႆႈၼႆႉ လႆႈငိၼ်းဝႃႈတေသဵင်ႈငိုၼ်းထႅင်ႈၼမ်ၼႆလႄႈႁဝ်းၶႃႈ ၵေႃႈပဵၼ်ဢၼ်မႆႈၸႂ် လွင်ႈငိုၼ်းတွင်းတႄႉတႄႉ။ ယွၼ်ႉဝႃႈ ပီႈဢၢႆႈၶႃႈႁဝ်းၼႆႉ ဢမ်ႇမီးဝႂ်ႁပ်ႉႁွင်းပၢႆးယူႇလီသင်သေၸိူဝ်ႉသေပိူင် ” ဝႃႈၼႆ။


ၵဵဝ်ႇၵပ်းလွင်ႈၼႆႉ ပိူင်တုမ်းတူၼ်ႈတႆး ၵဵင်းမႆႇ ၵေႃႈၸွႆႈထႅမ်ၶိုင်ပွင်တႃႇလႆႈယူတ်းယႃတူဝ်တီႈႁူင်းယႃ ၵဵင်းမႆႇ။ သင်ဝႃႈမီးပီႈၼွင်ႉတီႈၸမ်တီႈၵႆၶႆႈၸွႆႈထႅမ်ၵႃႈယူတ်းယႃပီႈၼွင်ႉတႆးၼင်ႇၵၼ်ၸိုင် ၵပ်းသိုပ်ႇလႆႈတီႈ ၸၢႆးဢွင်ႇၺုၼ်ႉ ၼွင်ႉၸၢႆး ၸၢႆးလႃႉထုၼ်း မၢႆၾူၼ်း 094-7351314 ဢမ်ႇၼၼ်  ၸၢႆးၶိူဝ်းသုင် ၽူႈဢွၼ်ႁူဝ် ပိူင်တုမ်းတူၼ်ႈတႆး ၵဵင်းမႆႇ 084-6759039 ၵေႃႈလႆႈ- ဝႃႈၼႆ။


ၸၢႆးလႃႉထုၼ်းၼႆႉပဵၼ်လုၵ်ႈၸၢႆးလုင်းၸိင်ႇတႃႇ ပႃႈၺုၼ်ႉ ယူႇဝၢၼ်ႈပၢင်ၶႄႇ ဢိူင်ႇသူပ်းတုင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ မီးပီႈၼွင်ႉ 4 ၵေႃႉ၊ မၼ်းၸၢႆးပဵၼ်ၵေႃႉတီႈ 2  ။