ၸုမ်းသိုဝ်ႇႁႅင်းၼုမ်ႇ Shan Youth Power ၸတ်းႁဵတ်း ဝၼ်းၵိူတ်ႇမူႇၸုမ်း ၶွပ်ႇတဵမ်15 ပီ တီႈၼႂ်းဝၢင်း ၸၼ်ႉၸွမ် ၽႃးယပ်း ၵဵင်းမႆႇမီးႁႅင်းၵၢၼ်တႆး၊ ၸုမ်းတူင်ႉၼိုင်တူင်ႇဝူင်းတႆးလႄႈ လုၵ်ႈႁဵၼ်းတႆး ၶဝ်ႈႁူမ်ႈၼပ်ႉပၢၵ်ႇ။


ဝၼ်းတီႈ 05/08/2017 ယၢမ်းႁူဝ်ၶမ်ႈ 5:30 မူင်းထိုင် 9 မူင်းၵၢင်ၶမ်ႈ ၸုမ်းသိုဝ်ႇႁႅင်းၼုမ်ႇ SYP ၸတ်းပၢင်ပွႆးဝၼ်း ၵေႃႇတင်ႈမူႇၸုမ်း ၶွပ်ႈတဵမ် 15 ပီ လႄႈ ၼႄပႃးၵၢၼ်သွၼ်ၵၢၼ်ႁဵၼ်း လုၵ်ႈႁဵၼ်းတႆး ၸိူဝ်းဢၼ်လႆႈႁပ်ႉငိုၼ်းထုၼ်း (ငိုၼ်းတိုၼ်း) ၵမ်ႉၸွႆႈတီႈ ၸုမ်း သိုဝ်ႇႁႅင်းၼုမ်ႇ ဢၼ်ၵႂႃႇၶိုၼ်ႈႁဵၼ်း ၸိူဝ်းၼၼ်ႉ။ ပၢင်ၶွပ်ႈၶူပ်ႇ 15 ပီတဵမ်ၼႆႉ ၸတ်းႁဵတ်းတီႈ ၸၼ်ႉၸွမ်ၽႃးယပ်း ဝဵင်းၵဵင်းမႆႇ ၸိုင်ႈထႆး ဝႃႈၼႆ။

ၼၢင်းဢွမ်ၾူၼ် ၽူႈၸတ်းၵၢၼ် ၾၢႆႇၸွႆႈထႅမ်ငိုၼ်းၵမ်ႉၸွႆႈ ပၢႆးပၺ်ၺႃ လုၵ်ႈဢွၼ်ႇတႆး လၢတ်ႈဝႃႈ “ မိူဝ်ႈၼႆႉ ပဵၼ် ဝၼ်းသိုဝ်ႇႁႅင်းၼုမ်ႇ တဵမ် 15 ပီ ႁဝ်းၶႃႈ လႆႈၸတ်းပၢင်ပွႆး မိူဝ်ႈတႄႇမၼ်းတႄႉၵေႃႈ ဢၢၼ်းဝႃႈ တေ ၸတ်းပၢင်ပွႆး ႁဵတ်းၵုသူလ်ၸွမ်းၵၼ်သေ မွၵ်ႇထိုင် ပီႈၼွင်ႉႁဝ်းၶႃႈ ၼႂ်းၶႅမ်ႉ(ႁွင်ႈထႅဝ်တီႈၵူၼ်းႁဵတ်းၵၢၼ်ယူႇ) သမ်ႉတင်းၵူၼ်း ႁဵတ်းၵၢၼ်တူင်ႇဝူင်း မႃး ၶဝ်ႈ ႁူမ်ႈပၢင်ပွႆးမိူၼ်ၵူႈပီ။ ၵူၺ်းၼႃႇ ပီၼႆႉသမ်ႉ တေမီးလုၵ်ႈဢွၼ်ႇ ဢၼ်ႁဝ်းၶႃႈ ပၼ်ထုၼ်းဝႆႉ ၸဵမ်မိူဝ်ႈလၢႆပီ ပူၼ်ႉမႃး၊ ယဝ်ႉၵေႃႈ တေႃႈလဵဝ်ၼႆႉ ၶဝ်သမ်ႉၶိုၼ်ႈႁူင်းႁဵၼ်းၸၼ်ႉသုင် ၵမ်ႈၽွင်ႈ ၵေႃႈႁဵၼ်းၾၢႆႇ ၵၢၼ်ႁႃၵိၼ် လဵင်ႉတွင်ႉ မိူၼ်ၼင်ႇ ၵၢၼ်ၵေႃႇသၢင်ႈ၊ ၵၢၼ်မႄးလူတ်ႉၶိူင်ႈ၊ ၵၢၼ်ႁူင်းသဝ်း/ ရူင်းရႅမ်း(ႁူင်းႁႅမ်း) ၸဵမ်ၸိူဝ်းၼႆႉ။ ယွၼ်ႉဝႃႈ လုၵ်ႈဢွၼ်ႇ ၶဝ်ၵေႃႈ သမ်ႉၶႂ်ႈၼႄလွင်ႈၼမ်ႉၵတ်ႉၶဝ် တီႈၶဝ် လႆႈၵႂႃႇႁဵၼ်းမႃး ၼႂ်းၶၢဝ်းတၢင်း 1 ပီ 2 ပီ မႃးၼႆႉသေ ယွၼ်ႉၼၼ် ပၢင်ပွႆးႁဝ်းၶႃႈၵေႃႈ ၸင်ႇဢွၵ်ႇမႃး ပဵၼ်ၵၢၼ် ႁဵၼ်းႁူႉ” ဝႃႈၼႆ။


ၸုမ်းသိုဝ်ႇႁႅင်းၼုမ်ႇ SYP ၼႆႉၸုမ်း Child dream Foundation ႁူမ်ႈၵၼ်သေၵမ်ႉၸွႆႈဝႆႉ၊ လုၵ်ႈဢွၼ်ႇႁႅင်းၵၢၼ် တႆး ၸိူဝ်းပေႃႈမႄႈဢမ်ႇပွင်ပဵၼ်လႆႈ မိူၼ်ၼင်ႇ ၸၼ်ႉသုင် မေႃး 4 ထိုင် မေႃး 6 ၶၢဝ်းတၢင်း ၼိုင်ႈပီ တေႃႇၵေႃႉ လႆႈငိုၼ်းထုၼ်း ႁိမ်း 2 မိုၼ်ႇဝၢတ်ႇ၊ ၸၼ်ႉသုင် ၾၢႆႇၵၢၼ်ႁဵၼ်း လွင်ႈၵၢၼ်ႁႃၵိၼ်လဵင်ႉတွင်ႉ ป.ว.ช 1 – ป.ว.ช 3 ၶၢဝ်းတၢင်း ၼိုင်ႈပီ တေႃႇၵေႃႉ 2 မိုၼ်ႇဝၢတ်ႇပၢႆ။ ၵူၺ်းၵႃႈ လွင်ႈၵမ်ႉထႅမ်ပၼ်လုၵ်ႈဢွၼ်ႇ ႁႅင်း ၵၢၼ်တႆး ၼိုင်ႈပီလႂ် တေၶတ်းလိူၵ်ႈဢဝ် 20 ၵေႃႉ။ ငိုၼ်းၵမ်ႉထႅမ်ပၼ် လွင်ႈပၢႆးပၺ်ၺႃၼႆႉ ၸုမ်းသိုဝ်ႇႁႅင်းၼုမ်ႇ တင်း ၸုမ်း Child dream Foundation ႁူမ်ႈၵၼ်ၸွႆႈ ပၼ်လုၵ်ႈႁဵၼ်းတႆး တႃႇ5 ႁူင်းႁဵၼ်း ၼႂ်းၵဵင်းမႆႇ ဝႃႈၼႆ။


ၸုမ်းသိုဝ်ႇႁႅင်းၼုမ်ႇ SYP ၼႆႉ ၵေႃႇတင်ႈမႃး တီႈဝဵင်းၵဵင်းမႆႇ ၸိုင်ႈထႆး မိူဝ်ႈပီ 2002 လိူၼ်ဢေႃႊၵတ်ႉသ် ဝၼ်းတီႈ 5  ယိူင်းဢၢၼ်း ႁႂ်ႈပဵၼ်သိုဝ်ႇၵႄႈၵၢင်ၵူၼ်းၼုမ်ႇလႄႈ  ႁူမ်ႈၵၼ်ပွင်သၢင်ႈ လွင်ႈထၢင်ႇႁၢင်ႈ ၵူၼ်းၼုမ်ႇ ဝႃႈၼႆ။