ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း လူင်ပွင်ၸိုင်ႈမိူင်းထႆး ပိုၼ်ၽၢဝ်ႇႁႂ်ႈပေႃႈလဵင်ႉ၊ မႄႈလဵင်ႉ (ၼၢႆး ၸၢင်ႈ) ၸိူဝ်းမီးလုၵ်ႈလဵင်ႉသေ ဢမ်ႇပႆႇမီးဝတ်းဝႂ်ၼၼ်ႉ ႁႂ်ႈၵႂႃႇတၢင်ႇယိုၼ်ႈယွၼ်းၼႂ်းၶၢဝ်းတၢင်း 24/07/2017 တေႃႇထိုင် 07/08/2017 ။


ဝၼ်းတီႈ 24 /07 /2017 ဝၼ်းမိူဝ်ႈၼႆႉ လူင်ပွင်ၸိုင်ႈမိူင်းထႆး တႄႇႁပ်ႉႁဵတ်းပၼ် ဝတ်းဝႂ်/ၵပ်းတူဝ် ႁႅင်းၵၢၼ်ယၢၼ်မိူင်း (ၵူၼ်းႁဵတ်းၵၢၼ် ဢၼ်လုၵ်ႉမိူင်းမၢၼ်ႈ၊ လၢဝ်း၊ ၶႅမ်ႊၿေႃႊတီႊယိူဝ်ႊ ) ၶဝ်ႈႁဵတ်း ၵၢၼ်ၼႂ်းမိူင်းထႆး။ တိုၵ်းသူၼ်းႁႂ်ႈ ဢွၼ်ဢဝ်လုၵ်ႈလဵင်ႉ ၵႂႃႇတၢင်ႇယွၼ်းႁဵတ်းဝႂ်ၵပ်းတူဝ် တီႈႁွင်ႈ ၵၢၼ်ၾၢႆႇၸတ်းႁႃၵၢၼ်ငၢၼ်း ၸႄႈတွၼ်ႈလႂ် ၸႄႈတွၼ်ႈၼၼ်ႉ မိူၼ်ၼင်ႇ မိူင်းထႆးတွၼ်ႈ ၼိူဝ်ၵေႃႈ လုမ်းၾၢႆႇၸတ်းႁႃၵၢၼ်ၸႄႈတွၼ်ႈၵဵင်းမႆႇ၊ မႄႈႁွင်ႈသွၼ်၊ ၵဵင်းႁၢႆးၸိူဝ်းၼႆႉ။

ႁွင်ႈၵၢၼ်ၾၢႆႇၸတ်းႁႃၵၢၼ် တၢင်းမိူင်းၵွၵ်ႇသမ်ႉ မိူၼ်ၼင်ႇတီႈၶဵတ်ႇၿၢင်းၼႃး၊ ၶဵတ်ႇမိၼ်းၿူးရီး၊ ၶဵတ်ႇၸတူႊၸၵ်ႊၸိူဝ်းၼႆႉ တင်းမူတ်းမီး 11 တီႈလႄႈ ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း ၼႂ်းၸႄႈ တွၼ်ႈၽႂ်မၼ်း ဢၼ်ပိုတ်ႇဝႆႉ မီးယူႇ 101 တီႈ တူဝ်ႈၸိုင်ႈမိူင်းထႆး။


ၽွင်းလူင်ၾၢႆႇႁႅင်းၵၢၼ် မွမ်ႊလူင် ပုၼ်ႊထရိၵ်ႊ သမီႊတီႊ လၢတ်ႈတီႈသိုဝ်ႇၶၢဝ်ႇ  thairath ဝႃႈ- “ မိူဝ်ႈလူင်ပွင်ၸိုင်ႈ ပိုတ်ႇတိုဝ်ႉတၢင်းပၼ်ၼႆႉ ႁႂ်ႈပေႃႈလဵင်ႉ/ မႄႈလဵင်ႉဢွၼ်ၵၼ်ၼႅတ်ႈမႃး ယိုၼ်ႈ ယွၼ်းၸွမ်းၼင်ႇၶၢဝ်းယၢမ်း ဢၼ်မၵ်းမၼ်ႈဝႆႉ ပေႃးပူၼ်ႉဝၼ်းမၼ်း တေဢမ်ႇႁပ်ႉထႅင်ႈယဝ်ႉ” ဝႃႈၼႆ။


ဝၢႆးသေပေႃႈလဵင်ႉ/မႄႈလဵင်ႉလႄႈ ၵူၼ်းႁဵတ်းၵၢၼ် ဢွၼ်ၵၼ်ၵႂႃႇတၢင်ႇယိုၼ်ႈယဝ်ႉ ၼႂ်းဝၼ်းတီႈ 08/08-09/09/2017 ၼႂ်းၶၢဝ်းတၢင်းၼိုင်ႈလိူၼ်ၼၼ်ႉ ၾၢႆႇၸတ်းႁႃၵၢၼ်တေထတ်းထွင်ၶိုၼ်း ၸွင်ႇၸႂ်ႈပေႃႈလဵင်ႉ၊လုၵ်ႈလဵင်ႉၸွမ်းၼင်ႇဢၼ်ယိုၼ်ႈယွၼ်းဝႆႉ ႁႂ်ႈပေႃႈလဵင်ႉတင်းလုၵ်ႈလဵင်ႉ ဢွၼ် ၵၼ်ၵႂႃႇတီႈ ႁွင်ႈၵၢၼ်ၾၢႆႇၸတ်းႁႃၵၢၼ် ၸႄႈဝဵင်းၽႂ်မၼ်း။


ဝၢႆးၼၼ်ႉပေႃးထုၵ်ႇမႅၼ်ႈၸွမ်းၸိုဝ်ႈသဵင်ၵူၼ်းႁဵတ်းၵၢၼ်ပေႃႈလဵင်ႉတီႈယူႇယဝ်ႉ တေလႆႈထတ်းထွင်ၵူၼ်းၵိုၵ်း မိူင်း Certifi cate of identity (CI) ဝႃႈ ၵူၼ်းႁဵတ်းၵၢၼ်ပဵၼ်ၵူၼ်းမိူင်းလႂ်တႄႉတႄႉ တွၼ်ႈတႃႇမိူင်းႁူမ်ႈ တုမ်မၢၼ်ႈလႄႈ မိူင်းၶႅမ်ႊၿေႃႊတီယိူဝ်ႊတႄႉ တေသူင်ႇၸဝ်ႈၼႃႈတီႈ မိူင်းၽႂ်မၼ်းၶဝ်ႈ ႁဵတ်းပၼ်ၼႂ်းမိူင်းထႆး (One Stop Service)  ႁႂ်ႈယဝ်ႉၵမ်းလဵဝ်တီႈလဵဝ်- ဝႃႈၼႆ။

Photo by CM108.com