ပၢင်ပိုတ်ႇႁူင်းႁဵၼ်းၸိူဝ်ႉၸၢတ်ႈတႆး (ၸၼ်ႉၵၢင်) လႄႈ ပၢင်လိုဝ်ႈၵၢၼ်သွၼ်လိၵ်ႈဢင်းၵိတ်ႉ (ၸုပ်ႈသွင်)၊ တီႈၼွင်ပိင်ဢွၼ်ႇ ၸႄႈဝဵင်းၵျွၵ်ႉမႄး၊ မီးသင်ၶၸဝ်ႈလႄႈ ပေႃႈမႄႈၵူၼ်းမိူင်း ၶဝ်ႈႁူမ်ႈပၢၵ်ႇပၢႆ။


မိူဝ်ႈဝၼ်းတီႈ 03/06/2017 တီႈဝတ်ႉၸေႇယသုၶ တီႈၼွင်ပိင်ဢွၼ်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ၸုမ်း TKO (Tai Kids Organization) ဢွၼ်ႁူဝ်ၼမ်းၼႃႈသေ ၸတ်းႁဵတ်းပဵၼ် ပၢင်ၵႅဝ်ႈပိုတ်ႇၽုၺ်ႇ ႁူင်းႁဵၼ်း ၸိူဝ်ႉၸၢတ်ႈတႆး (ၸၼ်ႉၵၢင်) လႄႈ ႁူမ်ႈၵိုၵ်းပၢင်လိုဝ်ႈ ၵၢၼ်သွၼ်လိၵ်ႈဢင်းၵိတ်ႉ (ဢိင်းၵလဵတ်ႈ) ၶၢဝ်းတၢင်း 5 လိူၼ် (ၸုပ်ႈ 2)၊ မီးဢဵၼ်ႁႅင်းၵူၼ်းဝၢၼ်ႈၵူၼ်းမိူင်း တၵ်ႉၵႃႇသတ်ႉထႃး ၶဝ်ႈႁူမ်ႈတင်းမူတ်း 96 ၵေႃႉ၊ ႁူမ်ႈတင်းသင်ၶၸဝ်ႈ တင်းမူတ်းမီး 100 ပၢႆ-ၼႆယဝ်ႉ။

ၸဝ်ႈတူၼ်ၶူးသေႇၵိင်ႇတ ၸဝ်ႈၵွၼ်းဝတ်ႉၼွင်ပိင်ဢွၼ်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ- "ပၢင်သွၼ်လိၵ်ႈဢင်းၵိတ်ႉၼႆႉ တႄႇပိုတ်ႇမႃးမိူဝ်ႈလိူၼ်ၵျႅၼ်ႊၼိဝ်ႊရီႊ တေႃႇထိုင်လိူၼ်မေႊသဵင်ႈ၊ ၶၢဝ်းတၢင်း 5 လိူၼ်၊ လုၵ်ႈႁဵၼ်းၸိူဝ်းမႃးၶိုၼ်ႈႁဵၼ်းဢဝ်ပွၵ်ႈၵမ်းၼႆႉ တင်းမူတ်းမီး 17 ၵေႃႉ၊ ဢဝ်လိၵ်ႈဢင်းၵိတ်ႉ ပဵၼ်လၵ်းသုတ်ႇပိူင်လူင် ၵၢၼ်ႁဵၼ်းၵၢၼ်သွၼ်။ ပူင်သွၼ်ပၼ်ၵၢၼ်ပူၵ်းပွင်ၵူၼ်းၼုမ်ႇ၊ ၽိူမ်ႉထႅမ်ပၼ်ၼမ်ႉၵတ်ႉၵူၼ်းၼုမ်ႇ၊ ၵၢၼ်ႁဵၼ်းၵၢၼ်သွၼ်ၼႆႉ မီးၵူႈပၢႆးပၢႆး"- ဝႃႈၼႆ။


ပၢင်သွၼ်ဢင်းၵိတ်ႉ ဢၼ်ပိုတ်ႇဝႆႉတီႈႁူင်းႁဵၼ်း TKO (Tai Kids Organization) ၾၢႆႇပူၵ်းပွင်ၼမ်ႉၵတ်ႉ ၵူၼ်းၼုမ်ႇၼႆႉ ၼိုင်ႈၶူပ်ႇပီ ပိုတ်ႇႁပ်ႉလုၵ်ႈႁဵၼ်းၼိုင်ႈၸုပ်ႈ၊ ၵၢၼ်သွၼ်ႁဵၼ်းမီးၶၢဝ်းတၢင်း 5 လိူၼ်၊ ပေႃးႁႃႈလိူၼ်ယဝ်ႉၵႂႃႇ ယင်ႉလိုဝ်ႈၶၢဝ်းတၢင်း 2 လိူၼ်၊ ပေႃးယဝ်ႉႁႃႈလိူၼ် ပိုတ်ႇသွၼ်ႁဵၼ်းၶိုၼ်း-ၼႆယဝ်ႉ။


ႁူင်းႁဵၼ်းၸိူဝ်ႉၸၢတ်ႈတႆး (ၸၼ်ႉၵၢင်) ဢၼ်တေပိုတ်ႇၶိုၼ်းပီၼႆႉ တေႁပ်ႉလုၵ်ႈႁဵၼ်းဢႃယု 5-6 ၶူပ်ႇၶိုၼ်ႈၼိူဝ် တေႃႇထိုင် 7 ၶူပ်ႇ။ တႄႇႁပ်ႉသဵၼ်ႈမၢႆလုၵ်ႈဢွၼ်ႇႁဵၼ်း တႃႇတေၶိုၼ်ႈႁူင်းႁဵၼ်း တႄႇလိူၼ်ၵျုၼ်ႊၼႆႉ၊ ဝၼ်းတီႈ 7-8 တေပိုတ်ႇၵၢၼ်သွၼ်ၵၢၼ်ႁဵၼ်းၵႂႃႇ-ၼႆယဝ်ႉ။


"ယိူင်းဢၢၼ်းဝႆႉဝႃႈ သင်ၸိူဝ်ႉဝႃႈယဝ်ႉတီႈႁူင်းႁဵၼ်းၸၼ်ႉၵၢင် တီႈဝတ်ႉၸေႇယသုၶ ဝၢၼ်ႈၼွင်ပိင်ဢွၼ်ႇၼႆႉယဝ်ႉ သင်ၶႂ်ႈႁဵၼ်းတေႃႇထႅင်ႈၸိုင် တေလႆႈၶိုၼ်းမိူဝ်းႁဵၼ်းတေႃႇထႅင်ႈ ႁူင်းႁဵၼ်းၸိူဝ်ႉၸၢတ်ႈ (ၸၼ်ႉသုင်) တီႈၼိူဝ်လွႆတႆးလႅင်း၊ သိုပ်ႇတေႃႇထိုင်ၸၼ်ႉၸွမ်။ ပိူင်ၵၢၼ်ႁဵၼ်းၵၢၼ်သွၼ် မိူၼ်ၵၼ်တင်းႁူင်းႁဵၼ်းၸိူဝ်ႉၸၢတ်ႈ ၼိူဝ်လွႆတႆးလႅင်းတင်းမူတ်း။ တေသွၼ်ႁဵၼ်းပႃးလိၵ်ႈၶႄႇ၊ ပႃးလိၵ်ႈမၢၼ်ႈ။ ၵူၺ်းၵႃႈ မိူဝ်ႈလဵဝ်ၶူးသွၼ်လိၵ်ႈၶႄႇ ပႆႇမီးလႄႈတေပႆႇပဵၼ်သွၼ်။ လိူဝ်သေၼၼ်ႉ ဢင်းၵိတ်ႉပိၼ်ႇၾၢႆႇတႆး လွင်ႈပထဝီႇ၊ ၾိင်ႈတိုၼ်းပဵၼ်၊ ပၢႆးၼပ်ႉ၊ ပိုၼ်းတႆး ၸၼ်ႉလႂ်ၸၼ်ႉၼၼ်ႉ ၸိူဝ်းၼႆႉပဵၼ်ၾၢႆႇတႆးမူတ်းမူတ်း"- ၸဝ်ႈတူၼ်ၶူးသေႇၵိင်ႇတ လၢတ်ႈ။


လိူဝ်သေၼၼ်ႉ ဢၼ်လၢၵ်ႇလၢႆးမၼ်းၸမ်း ႁူင်းႁဵၼ်းၸိူဝ်ႉၸၢတ်ႈတႆး (ၸၼ်ႉၵၢင်) တီႈဝတ်ႉၸေႇယသုၶ ဝၢၼ်ႈၼွင်ပိင်ဢွၼ်ႇ ၸႄႈဝဵင်းၵျွၵ်ႉမႄးၼႆႉ လွင်ႈၾၢႆႇပူၵ်းပွင်လုၵ်ႈဢွၼ်ႇၼၼ်ႉ တေဢဝ်ပၢႆးၸႂ်ပဵၼ်ယႂ်ႇ။ တေပူင်သွၼ်ပၼ်လုၵ်ႈႁဵၼ်းၶဝ်လွင်ႈပၢႆးၸႂ်ၵမ်ႈၼမ်၊ ဢမ်ႇၸႂ်ႈၾၢႆႇလိၵ်ႈလၢႆး ပဵၼ်ပိူင်လူင်ယႂ်ႇႁႅင်း-ၼႆယဝ်ႉ။