မေႃသွၼ်လိၵ်ႈတႆး ၼႂ်းဝဵင်းၼမ်ႉၶမ်းၸမ်ပၢၵ်ႇ ၶဝ်ႈပၢင်ၾိုၵ်းၽွၼ်ႉလပ်ႉၼမ်ႉၵတ်ႉ တႃႇတေသွၼ် လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈ ဢၼ်ၵေႃလိၵ်ႈလၢႆးလႄႈၾိင်ႈငႄႈတႆး ပူင်သွၼ်ပၼ်။


ဝၼ်းတီႈ 03-04 /06/2017 ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼမ်ႉၶမ်း ၸတ်းပၢင်ဢုပ်ႇဢူဝ်း ၾိုၵ်းၽွၼ်ႉလပ်ႉၼမ်ႉၵတ်ႉ မေႃသွၼ် Workshop & Training တႃႇသွၼ်လိၵ်ႈတႆးၼႂ်းႁူင်းႁဵၼ်း လူင်ပွင်ၸိုင်ႈ ၼႂ်းပီ2017 – 2018 မီးၽူႈမႃးၶိုၼ်ႈႁဵၼ်း ၸမ်100 ၵေႃႉ ၸတ်းႁဵတ်းၵႂႃႇတီႈ ႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။

ၸၢႆးသၢမ်မူၼ်ႇ ႁူဝ်ပဝ်ႈၵေႃလိၵ်ႈလၢႆးတႆး ၼမ်ႉၶမ်းလၢတ်ႈဝႃႈ- “လွင်ႈလႆႈသွၼ်လိၵ်ႈၼႂ်းႁူင်းႁဵၼ်း လူင်ပွင်ၸိုင်ႈၼႆႉ ႁဝ်းမီးသုၼ်ႇ မီးတိုဝ်ႉတၢင်းယဝ်ႉၼႆလႄႈ ႁႂ်ႈမေႃဢဝ်တိုဝ်ႉတၢင်းၼႆႉသေတႃႇ သွၼ်ပၼ်လုၵ်ႈႁဵၼ်းၼႂ်းႁူင်းႁဵၼ်းလူင်ပွင်ၸိုင်ႈၼႂ်းဝဵင်းၼမ်ႉၶမ်း  ဢိၵ်ႇၵူႈတီႈၵူႈလႅၼ် ၼင်ႇႁိုဝ် ၵူၼ်းၼုမ်ႇပေႃးတေမီးၸႂ်ႁၵ်ႉလိၵ်ႈလၢႆး၊ ၾိင်ႈထုင်း ၸိူဝ်ႉၶိူဝ်း တူဝ်ၸဝ်ႈၵဝ်ႇၵႂႃႇ” ဝႃႈၼႆ။


ၼႂ်းပၢင်ၼႆႉပူင်သွၼ်ပၼ် လၢႆလွင်ႈမိူၼ်ၼင်ႇ လၢႆးသွၼ်လိၵ်ႈတႆး၊ လၢႆးၸႂ်ႉၶေႃႈသဵင်တႅတ်ႈ၊ လၢႆးဝၢင်း ၽႅၼ်ၵၢၼ်သွၼ်ၼႂ်းႁွင်ႈႁဵၼ်းTeaching Method & Classroom Management၊ သုၼ်ႇလႆႈ လုၵ်ႈဢွၼ်ႇ၊ လၢႆးတႅမ်ႈလိၵ်ႈ၊ ဢၢၼ်ႇလိၵ်ႈ၊ လၢႆးလဵၼ်ႈၵဵမ်းသ်ၸိူဝ်းၼႆႉ။ၶူးပူင်သွၼ်ပၼ်ပဵၼ် ၸၢႆးၸၢမ်ႇထုၼ်း၊ ၸၢႆးလႃႉၸူဝ်း၊ ၸၢႆးၼွႆႉ၊ ၸုမ်းမုၼ်းလႅင်း ႁူမ်ႈတင်းမူတ်းမေႃသွၼ်မီး12ၵေႃႉ ဝႃႈၼႆ။


တီႈဝဵင်းၼမ်ႉၶမ်းၼႆႉ ဝၢႆးသေလူင်ပွင်ၸိုင်ႈ ပၼ်ၶႂၢင်ႉယဝ်ႉ ယူႇတီႈ ၵေႃလိၵ်ႈလၢႆးလႄႈၾိင်ႈငႄႈတႆး ၸတ်းႁဵတ်းပၢင်ၾိုၵ်းၽွၼ်ႉမေႃသွၼ်သေ ပူင်သွၼ်ပၼ်လိၵ်ႈတႆးၼႂ်း ႁူင်းႁဵၼ်းလူင် ပွင်ၸိုင်ႈ ပတ်းပိုၼ်ႉၼႂ်းၸႄႈဝဵင်းၼမ်ႉၶမ်းမႃး ၸဵမ်မိူဝ်ႈ ပီ 2014 ။