ၸုမ်းၵူၼ်းၼုမ်ႇတႆး Tai Youth Organization ဢွၼ်ႁူဝ်ၸတ်းႁဵတ်းပၢင်သွၼ်ၽိူမ်ႉထႅမ် ၼမ်ႉၵတ်ႉၵူၼ်းၼုမ်ႇတႆး တႃႇႁႂ်ႈၵူၼ်းၼုမ်ႇမိုတ်ႈၵိုတ်းၸမ်ၸႂ် ၵပ်းသိုပ်ႇၶဝ်ႈဢွၵ်ႇၵၼ်လႄႈ မေႃၸႂ်ႉတိုဝ်းဢၼ်မီးၽွၼ်းလီ ၼႂ်းသိုဝ်ႇၶၢဝ်ႇၼိူဝ် ဢွၼ်ႊလၢႆႊ(Online) တင်းမူတ်းၵူၼ်းၼုမ်ႇမႃးၶဝ်ႈႁူမ်ႈလဵပ်ႈႁဵၼ်း 40 ပၢႆ ။


တႄႇဢဝ် ဝၼ်းတီႈ 20-29/06/2017 ၶၢဝ်းယၢမ်းၵၢင်ၼႂ် ထိုင်တၢမ်းၶမ်ႈ တႃႇၶၢဝ်းတၢင်း 10 ဝၼ်း ၸုမ်းၵူၼ်း ၼုမ်ႇတႆး TYO ဢွၼ်ႁူဝ်ၸတ်းႁဵတ်း ပၢင်ၾိုၵ်းၽွၼ်ႉၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ တီႈလုမ်းၽေငဝ်ႈငုၼ်း ၸုမ်းၵူၼ်းၼုမ်ႇတႆး ပွၵ်ႉ 5 ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။ ပၢင်သွၼ်ၵူၼ်းၼုမ်ႇတႆးၼႆႉ ၸတ်းႁဵတ်း ပဵၼ်ပွၵ်ႈၵမ်းႁႅၵ်ႈ။ ႁူဝ်ၶေႃႈ ဢၼ်ပူင်သွၼ်ၾိုၵ်းပၼ်ၵူၼ်းၼုမ်ႇသမ်ႉ မိူၼ်ၼင်ႇ ပိုၼ်ႉထၢၼ်ႇၶွမ်ႊၽိဝ်ႊတိူဝ်ႊ (Computer) ၊ ၾၢႆႇတူင်ႇဝူင်းၵူၼ်း၊ ၾၢႆႇၵၢၼ်ၵပ်းသိုပ်ႇတိတ်းတေႃႇၼႂ်းတူင်ႇဝူင်းၵူၼ်း ၸဵမ်ၸိူဝ်းၼႆႉ ဝႃႈၼႆ။

ၼၢင်းယိင်းၼွင်ႉ ၵႅမ်ႁူဝ်ပဝ်ႈ ၸုမ်းၵူၼ်းၼုမ်ႇတႆး TYO လၢတ်ႈဝႃႈ “ ယိူင်းဢၢၼ်းဢၼ်ၸတ်းႁဵတ်းၼႆႉ ႁႂ်ႈႁဝ်းလႆႈမီး လွင်ႈၵပ်းသိုပ်ႇတိတ်းတေႃႇၵၼ် ၵူၼ်းၼုမ်ႇႁဝ်းယၢမ်းမိူဝ်ႈလဵဝ်ၼႆႉ ၵမ်ႈၼမ်ဢွၼ်ၵၼ်ၸႂ်ႉတိုဝ်းၶွမ်ႊၽိဝ်ႊတိူဝ်ႊ၊ ၸႂ်ႉၾူၼ်း ၼမ်မႃး။ ၵူၺ်းၵႃႈ လွင်ႈၵၢၼ်ၸႂ်ႉတိုဝ်းၽူၼ်း ၶွမ်ႊၽိဝ်ႊတိူဝ်ႊ ၼိူဝ်ဢွၼ်ႊလၢႆႊၼႆၵေႃႈ ယႃႇပေၸႂ်ႉ တႃႇပျေႃႇမူၼ်ႈဢၼ်လဵဝ်ၵူၺ်း၊ ၶႂ်ႈႁႂ်ႈမေႃၸႂ်ႉတိုဝ်းမီးၽွၼ်းလီလႄႈ ႁူႉပႃး လွင်ႈမေႃၸႂ်ႉ တိုဝ်းၼိူဝ်ဢွၼ်ႊလၢႆႊ။ ၾၢႆႇၼိုင်ႈၵေႃႈ ႁဝ်းၶႃႈတေၵပ်းသိုပ်ႇၵၼ်ၸဵမ်ၸိူဝ်းၼႆႉ  မိူၼ်ၼင်ဝႃႈ ႁဝ်းမီးၶေႃႈမုလ်း ၶၢဝ်ႇသၢရ် ႁႂ်ႈၵူၼ်းၼုမ်ႇႁဝ်း မေႃလၢတ်ႈၼႄၵၼ် မိူင်းၼိုင်ႈလႄႈမိူင်းၼိုင်ႈ ႁႂ်ႈႁဝ်းလႆႈႁူႉၶၢဝ်ႇၵၼ် ၸဵမ်ၸိူဝ်းၼႆႉ” ဝႃႈၼႆ။


ပၢင်ၾိုၵ်းၽွၼ်ႉၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇတႆး TYO တီႈဝဵင်းလႃႈသဵဝ်ႈ ပွၵ်ႈၵမ်းႁႅၵ်ႈၼႆႉ မီးၵူၼ်းၼုမ်ႇ မႃးၶဝ်ႈႁူမ်ႈလဵပ်ႈႁဵၼ်းသွၼ်ဢဝ် တင်းမူတ်း 42 ၵေႃႉ၊ ပဵၼ်ၵူၼ်းၼုမ်ႇ တၢင်းပွတ်း ပၢင်လူင်၊ ၼမ်ႉတူႈ၊ သႅၼ်ဝီ၊ ပၢင်ႇဢူႈ၊ ၵျွၵ်ႉမႄး၊ မူႇၸေႊ၊ ၼမ်ႉၶမ်း ဢိၵ်ႇထႅင်ႈ လၢႆလၢႆၸႄႈဝဵင်း ၸဵမ်ၸိူဝ်းၼႆႉ ဝႃႈၼႆ။


ပူၼ်ႉမႃး မိူဝ်ႈဝၼ်းတီႈ 13-14/06/2017 ၼၼ်ႉၵေႃႈ ယူႇတီႈၸုမ်းၵူၼ်းၼုမ်ႇတႆး TYO ၸုမ်းၼေႃႇတႅၼ်း ၶိူဝ်းလႄႈ ႁူမ်ႈပႃး ၸုမ်းၼႅင်ႈသၢၼ်ၼၢင်းယိင်း ၼႂ်းမိူင်းတႆး ႁူမ်ႈၵၼ်ၸတ်းႁဵတ်းပၢင်သွၼ်ပိုတ်ႇႁူ ပိုတ်ႇတႃ ၵဵဝ်ႇၵပ်း လွင်ႈ ႁူမ်ႇလူမ်ႈ၊ လွင်ႈၽဵင်ႇပဵင်းယိင်း/ၸၢႆးလႄႈ လွင်ႈငမ်းယဵၼ်ၼၢင်းယိင်း ၸဵမ်ၸိူဝ်းၼႆႉ။ ပၢင်သွၼ်ၼႆႉ ၸတ်းႁဵတ်း တီႈဝတ်ႉသုဝၼ်ႇၼသီရိ ၵျွင်းၶမ်း ပွၵ်ႉၵၢင်ပၢင်ႇ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။ ၼင်ႇႁိုဝ် ၼၢင်းယိင်းပေႃး တေလႆႈႁပ်ႉႁူႉလွင်ႈငဝ်းလၢႆး ဢၼ်ပဵၼ်ယူႇယၢမ်းလဵဝ်လႄႈ ႁႂ်ႈလႆႈၶဝ်ႈပႃး ၼႂ်းၶၵ်ႉ ၵၢၼ်လွင်ႈငမ်းယဵၼ်။