ၵူၼ်းၼုမ်ႇဝဵင်းလၢႆးၶႃႈ တိုၵ်းသူၼ်းၵူၼ်းမိူင်းဝဵင်းလၢႆးၶႃႈ ႁူမ်ႈၵၼ်ၽုၵ်ႇတူၼ်ႈမႆႉ လႄႈလုမ်း လႃးၶိုၼ်း တူၼ်ႈမႆႉဢၼ်ၽုၵ်ႇဝႆႉမိူဝ်ႈပီၵၢႆ ။


ဝၼ်းတီႈ 04/06/2017တေမႃးၼႆႉ ၸုမ်းၵူၼ်းၼုမ်ႇ ဝဵင်းလၢႆးၶႃႈ တေဢွၼ်ၵၼ်ၶုတ်းလုၵ်းလိၼ် တႃႇၽုၵ်ႇတူၼ်ႈမႆႉ 500 တူၼ်ႈ တီႈၵျွင်းႁူင်းႁဵၼ်း (ပၵ်ႉၵႃႉ) ၵွင်းမႆႉႁုင်းၵၢင်ၵွင်း ဢၼ်မီးၾၢႆႇဢွၵ်ႇ ဝဵင်းလၢႆးၶႃႈ ယၢၼ်ၵႆမွၵ်ႈ 3 လၵ်းလႄႈ တေၶိုၼ်းဢွၼ်ၵၼ် မႄးလုမ်းလႃး တူၼ်ႈမႆႉ ၸိူဝ်းဢၼ် ၽုၵ်ႇမႃး မိူဝ်ႈပီၵၢႆ ၸိူဝ်းၼၼ်ႉဝႃႈၼႆ။

Photo : Sai Lang Herng LaiKha

ၸၢႆးလႅင်းႁိူင်း ႁူဝ်ၼႃႈၵူၼ်းၼုမ်ႇလၢႆးၶႃႈ လၢတ်ႈဝႃႈ- “ ဝၼ်းတီႈ 04/06/2017 ၼႆႉႁဝ်းၶႃႈတေဢွၼ် ၵၼ် ၶုတ်းလုၵ်းတႃႇတေၽုၵ်ႇတူၼ်ႈမႆႉ 500 ။ ဢမ်ႇႁူႉလႆႈပေႃးထိုင်ဝၼ်းၽုၵ်ႇတူၼ်ႈမႆႉယဝ်ႉ လႅပ်ႈတေမီးထိုင်1,000 ၵေႃႈပဵၼ်လႆႈ ။ ယွၼ်းႁႂ်ႈၵူၼ်းၼုမ်ႇဢွၼ်ၵၼ် မႃးၸွႆႈၵၼ်ၼမ်ၼမ် သေၵမ်း ႁဝ်းၶႃႈႁူမ်ႈၵၼ်ၽုၵ်ႇတူၼ်ႈမႆႉၵႂႃႇ” - ဝႃႈၼႆ။


လိူဝ်ၼၼ်ႉ မိူဝ်ႈဝၼ်းတီႈ 07/07/2016 ၼၼ်ႉၵေႃႈ ၸုမ်းၵူၼ်းၼုမ်ႇ၊ပႃႇတီႇၵၢၼ်မိူင်း ၊ ၶႃႈႁၢပ်ႇ ၵၢၼ်ၶုၼ်၊ ၽူႈၵွၼ်း ပွၵ်ႉဢိူင်ႇလႄႈ ပေႃႈမႄႈပီႈၼွင်ႉၵူၼ်းမိူင်းဝဵင်း လၢႆးၶႃႈ ႁူမ်ႈၵၼ် 100 ၵေႃႉ ပၢႆသေ ၽုၵ်ႇတူၼ်ႈမႆႉ တႃႇ 1111 တူၼ်ႈ တီႈၼွင်ပၢင်ႇ ဢၼ်ပဵၼ်လိၼ်ၵိူတ်ႇၸဝ်ႈတူၼ်ၶူး Dr.ၶမ်းမၢႆ ထမ်မသႃႇမိ ဝဵင်းလၢႆးၶႃႈ ၸိုင်ႈတႆးပွတ်းၸၢၼ်း။


တူၼ်ႈမႆႉဢၼ်ၽုၵ်ႇၵႂႃႇ မီး 14 ၸိူဝ်ႉၽၼ်း – မိူၼ်ၼင်ႇ တူၼ်ႈမွၵ်ႇၵွၼ် ၊ တူၼ်ႈၶိတ်ႉလႃး ၊ တူၼ်ႈ ၵမ်ႉၵေႃႇ၊ မႆႉသၵ်း ၊ မႆႉသေႃႉ ၊ တူၼ်ႈ မၢၵ်ႇမူင်ႈ၊ မၢၵ်ႇလၢင်း၊ မၢၵ်ႇဝၢဝ်း၊ မႆႉပႅၵ်ႇ ၸဵမ်ၸိူဝ်းၼႆႉ တူၼ်ႈမႆႉဢၼ်ၽုၵ်ႇမႃး ၸိူဝ်းၼႆႉဢၼ်ၸပ်း မၼ်းမီးမွၵ်ႈ 60% ဢၼ်တၢႆၵႂႃႇမီးမွၵ်ႈ 40% ဝႃႈၼႆ။