လွင်ႈဢၼ်လႆႈလူင်းလၢႆးမိုဝ်းၵႂႃႇတီႈ ပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ်၊ ဢၼ်ပဵၼ်လူင်းလၢႆးမိုဝ်း လိၵ်ႈႁူမ်ႈမၢႆမိူင်းႁူမ်ႈတုမ် ပွတ်းတွၼ်ႈ (1)ၼၼ်ႉ ၸွမ်းလူၺ်ႈပိူင်မၼ်းမီးသေလူင်းလၢႆးမိုဝ်းၵႂႃႇၵူၺ်း။ ၶေႃႈယိူင်းဢၢၼ်း ၶေႃႈၸုၵ်းမၼ်ႈၶွင် RCSS/SSA တႄႉဢမ်ႇလႅၵ်ႈလၢႆႈ - ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းၸၢႆးငိုၼ်း လၢတ်ႈ။

မိူဝ်ႈဝၼ်းတီႈ 29/05/2017 ပွတ်းၼႂ် ပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် ႁိုဝ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ၊ ဝၼ်းလိုၼ်းသုတ်း၊ ဢၼ်ၸတ်းႁဵတ်းတီႈၼေႇပျီႇတေႃႇ တီႈႁူင်းႁေႃလူင် MICC-2 ၼၼ်ႉ ၽူႈၶဝ်ႈႁူမ်ႈပၢင်ၵုမ်ၶဝ် လႆႈႁူမ်ႈၵၼ်လူင်းလၢႆးမိုဝ်း ၶေႃႈလႆႈၸႂ်လိၵ်ႈႁူမ်ႈမၢႆမိူင်းႁူမ်ႈတုမ် ပွတ်းတွၼ်ႈ 1 ဢၼ်ၽူႈၶဝ်ႈႁူမ်ႈပၢင်ၵုမ်လူင်တင်းမူတ်းတင်းသဵင်ႈ ဢုပ်ႇဢူဝ်းၵၼ်သေ ႁပ်ႉႁွင်းမၵ်းမၼ်ႈဝႆႉၼၼ်ႉ- ၼႆယဝ်ႉ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸဝ်ႈသိုၵ်း ၸၢႆးငိုၼ်း လၢတ်ႈဝႃႈ- မိူၼ်ၼင်ႇဢၼ်ၵူႈၵေႃႉႁူႉၵၼ်ယူႇၼၼ်ႉယဝ်ႉ။ ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်လူင်းလၢႆးမိုဝ်းၵိုတ်းတိုၵ်းယဝ်ႉၼၼ်ႉ မီးယူႇ 8 ၸုမ်း။ ၵူၺ်းၵႃႈ ပေႃးၵႂႃႇထၢမ်တူၺ်းၶဝ်ၸဝ်ႈဝႃႈ ဢၼ်လူင်းလၢႆးမိုဝ်းၵႂႃႇတီႈ ၶေႃႈလႆႈၸႂ် လိၵ်ႈႁူမ်ႈမၢႆမိူင်းႁူမ်ႈတုမ်ၼႆႉ ၸွင်ႇၽွမ်ႉၸႂ်ၵၼ်လႆႈၸႂ်ၵၼ်ယူႇႁႃႉ ပေႃးဝႃႈၼႆၸိုင် ၶဝ်ၸဝ်ႈၵေႃႈတေဢွၼ်ၵၼ်တွပ်ႇဝႃႈ ဢမ်ႇၽွမ်ႉ ဢမ်ႇလႆႈၸႂ်။ ၵူၺ်းၵႃႈ ပေႃးဝႃႈႁဝ်းၶႃႈဢမ်ႇလူင်း လၢႆးမိုဝ်းၼႆၵေႃႈ ၶူင်းၵၢၼ်လူင် လွင်ႈဢုပ်ႇၵုမ်ၵၼ်ၼႆႉ မၼ်းတေၵိုတ်းၵႂႃႇ။ ၼင်ႇႁိုဝ်လွင်ႈပိူင်ပဵၼ်မၼ်း တေဢမ်ႇၵိုတ်းၵႂႃႇ တေဢမ်ႇၶၢတ်ႇၵႂႃႇၼၼ်ႉ ႁဝ်းၶႃႈၵေႃႈလႆႈဢုပ်ႇၵုမ်ငူပ်ႉငီႉၵၼ်၊ လႆႈဢဝ်ၶေႃႈပွင်ႇၸႂ် ၼိူဝ်ၵၼ်သေ လႆႈလူင်းလၢႆးမိုဝ်းၵႂႃႇၸွမ်းလူၺ်ႈပိူင်ပဵၼ်မၼ်းၵူၺ်း။  ႁဝ်းၶႃႈတၵ်းလႆႈဢုပ်ႇၵုမ်ၵၼ်ထႅင်ႈလႄႈ လွင်ႈယွၼ်ႇယၢၼ်းတေႃႇၵၼ် ၼႂ်းၵႄႈၵၢင်ႁဝ်းၶႃႈၼႆႉ ထုၵ်ႇလီလႆႈမီးယူႇ-ဝႃႈၼႆ။


ယွၼ်ႉၼၼ်လႄႈ ဢၼ်လူင်းလၢႆးမိုဝ်းၵႂႃႇၸွမ်းလူၺ်ႈပိူင်ပဵၼ်မၼ်းမီးၼႆႉ မၼ်းၵေႃႈတေဢမ်ႇတုမ်ႉတိူဝ်ႉၼိူဝ် ၶေႃႈယိူင်းဢၢၼ်းႁဝ်းၶႃႈ၊ ၶေႃႈၸုၵ်းမၼ်ႈႁဝ်းၶႃႈၼႆလႄႈ ႁဝ်းၶႃႈလႆႈလူင်းလၢႆးမိုဝ်းၵႂႃႇၵူၺ်း။ ပၢင်ၵုမ်လူင် ပွၵ်ႈၵမ်းၼႆႉ ၶေႃႈလႆႈၸႂ်၊ ၶေႃႈတႅပ်းတတ်း မိူဝ်ႈပၢင်ၵုမ်လူင်ပူၼ်ႉမႃးၼၼ်ႉ မၼ်းဢမ်ႇပႃးမႃးၸွမ်း။ ၼင်ႇႁိုဝ်တေလႆႈၶေႃႈတႅပ်းတတ်းသေဢၼ်ဢၼ်ၼၼ်ႉ ၾၢႆႇတၢင်းလူင်ပွင်ၸိုင်ႈ ပႃးၸဵမ်တင်းတူဝ်ၸွမ်ၸိုင်ႈ လႄႈၵူႈမူႇၵူႈၸုမ်းၶဝ်ၵေႃႈ ဢွၼ်ၵၼ်ဢုပ်ႇဢူဝ်းငူပ်ႉငီႉၵၼ်ယူႇ။


ၸဝ်ႈသိုၵ်းၸၢႆးငိုၼ်း သိုပ်ႇလၢတ်ႈဝႃႈ- ၼင်ႇႁိုဝ်တေသိုပ်ႇၵႂႃႇလႆႈထႅင်ႈမိူဝ်းၼႃႈၼၼ်ႉ တီႈၽူႈၵိူဝ်းၵုမ်ၸိုင်ႈမိူင်းၵေႃႈ လႆႈလၢတ်ႈၵႂႃႇဝႃႈ- "ၶူင်းၵၢၼ်လူင်လွင်ႈငမ်းယဵၼ် ဢၼ်ဢုပ်ႇၵုမ်ၵၼ်ယူႇၼႆႉ တၵ်းတေလႆႈသိုပ်ႇတေႃႇၵႂႃႇ မိူဝ်းၼႃႈထႅင်ႈ။ ၼင်ႇႁိုဝ်တေသိုပ်ႇၵႂႃႇမိူဝ်းၼႃႈလႆႈၼၼ်ႉ ဢၼ်ႁဝ်းၶႃႈလႆႈၸတ်းပၢင်ၵုမ်မႃးၸိူဝ်းၼႆႉ တေလႆႈတမ်းဝၢင်းၼႄပၼ် ႁႂ်ႈၵူႈၵေႃႉလႆႈႁူႉၸွမ်း။ ပေႃးဝႃႈလႆႈၶေႃႈတွပ်ႇ ပိူင်ၵၢၼ်ဢၼ်ၼႆႉၼႆၵေႃႈ လႆႈယဝ်ႉ"။ ၵွပ်ႈၼႆလႄႈ ႁဝ်းၶႃႈလႆႈလူင်းလၢႆးမိုဝ်းၵႂႃႇ၊ ဢမ်ႇၸႂ်ႈဝႃႈလႅၵ်ႈလၢႆႈၶေႃႈယိူင်းဢၢၼ်းႁဝ်း ၶေႃႈတႅပ်းတတ်းႁဝ်းသေ ၵႂႃႇလူင်းလၢႆးမိုဝ်း-ဝႃႈၼႆ။


ၶေႃႈလူင်းလၢႆးမိုဝ်းႁူမ်ႈၵၼ် ဢၼ်ဝႃႈၼႆႉၵေႃႈ ယူႇတီႈၸုမ်းလႂ်ၸုမ်းၼၼ်ႉ လႆႈဢဝ်ၵၢင်ၸႂ်မူႇၸုမ်းသေ ႁဵတ်းသၢင်ႈၵႂႃႇ။ ထႅင်ႈၾၢႆႇၼိုင်ႈၵေႃႈ ၶူင်းၵၢၼ်လူင်ဢၼ်ဢုပ်ႇၵုမ်ၵၼ်ယူႇၼႆႉ ၼင်ႇႁိုဝ်မၼ်းတေဢမ်ႇၵိုတ်း ယိုတ်းၵႂႃႇၼၼ်ႉ တေလႆႈဢုပ်ႇဢူဝ်းၵၼ်ထႅင်ႈ၊ ဢွၼ်ၵၼ်မုင်ႈမွင်းဝႆႉၼင်ႇၼၼ်။ တွၼ်ႈတႃႇၼႂ်းတႆးတႄႉ ယွၼ်ႉပိူဝ်ႈပႆႇလႆႈၸတ်းႁဵတ်း ပၢင်ၵုမ်လူင်ၸၼ်ႉၸိူဝ်ႉၸၢတ်ႈၼႆလႄႈ တႃႇတေဢဝ်ၶေႃႈလႆႈၸႂ်ၶဝ်ႈဢုပ်ႇၵုမ်ၵၼ် ၼႂ်းပၢင်ၵုမ်လူင်ၼၼ်ႉ ဢမ်ႇမီး။ ယွၼ်ႉၼၼ်လႄႈ ၶေႃႈလႆႈၸႂ် ၶေႃႈတႅပ်းတတ်းဢၼ်ဢွၵ်ႇမႃးတီႈ ပၢင်ၵုမ်လူင်ၼႆႉၵေႃႈ တိုၼ်းတေဢမ်ႇလူင်းလၢႆးမိုဝ်း၊ ဢဵၼ်းဢၢၼ်းဝႆႉၼင်ႇၼၼ်ယူႇ- ၸဝ်ႈသိုၵ်းၸၢႆးငိုၼ်း လၢတ်ႈ။


ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ မိူဝ်ႈၸတ်းႁဵတ်းပၢင်ၶုၵ်းထူပ်း ဝၼ်းလုၵ်ႉၽိုၼ်ႉၵႅတ်ႇၶႄဢဝ်ၶိုၼ်း မိူင်းၸိုင်ႈတႆး ၶွပ်ႈၶူပ်ႇ 59 ပီ၊ လိူၼ်မေႊ 21 ဝၼ်း တီႈငဝ်ႈၸိုင်ႈလွႆတႆးလႅင်း ၼၼ်ႉၵေႃႈ လႆႈဢွၵ်ႇလိၵ်ႈၶေႃႈပိုၼ်ၽၢဝ်ႇၽိုၼ်ၼိုင်ႈ။ ၼႂ်းလိၵ်ႈပိုၼ်ၽၢဝ်ႇလၢတ်ႈပႃးဝႃႈ ယွၼ်ႉပိူဝ်ႈဝႃႈ ပႆႇလႆႈၸတ်းႁဵတ်းပၢင်ၵုမ်လူင် ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆးလႄႈ တီႈပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ဢၼ်ၸတ်းႁဵတ်း (24-29/05/2017) တီႈၼေႇပျီႇတေႃႇၼၼ်ႉ တေဢမ်ႇမီးလိၵ်ႈ တၢင်ႇလၢတ်ႈသင်၊ ၼွၵ်ႈသေၼၼ်ႉၵေႃႈ တေဢမ်ႇလူင်းလၢႆးမိုဝ်းၸွမ်း ၶေႃႈလႆႈၸႂ် ဢၼ်ဢွၵ်ႇမႃးတီႈ ပၢင်ၵုမ်လူင်ၼၼ်ႉ။ ယွၼ်ႉပိူဝ်ႈပဵၼ်ၸုမ်းလူင်းလၢႆးမိုဝ်း NCA လႄႈပၢင်ၵုမ်လူင်ၼႆႉ ႁူမ်ၸူမ်းႁပ်ႉတွၼ်ႈလႄႈၵမ်ႉထႅမ်ၸွမ်းသေ တေၶဝ်ႈႁူမ်ႈယူႇ- ၼႆယဝ်ႉ။


ပၢင်ၵုမ်လူင်လွင်ႈငမ်းယဵၼ်မိူင်းႁူမ်ႈတုမ် ဢၼ်ၸတ်းႁဵတ်းတီႈၼေႇပျီႇတေႃႇ ၶၢဝ်းတၢင်း 5 ဝၼ်းၼႆႉ ထိုင်မႃးဝၼ်းလိုၼ်းသုတ်း ဝၼ်းတီႈ 29/05/2017 ၼၼ်ႉ ၽူႈၶဝ်ႈႁူမ်ႈဢုပ်ႇဢူဝ်းၶဝ်၊ ဢမ်ႇဝႃႈၾၢႆႇလူင်ပွင်ၸိုင်ႈ၊ ၾၢႆႇတပ်ႉသိုၵ်းတပ်ႉမတေႃႇ၊ ၾၢႆႇပႃႇတီႇၵၢၼ်မိူင်း၊ ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢွၼ်ၵၼ်လူင်းလၢႆးမိုဝ်း လိၵ်ႈႁူမ်ႈမၢႆမိူင်းႁူမ်ႈတုမ် တွၼ်ႈ 1 ။ ၼႂ်းလိၵ်ႈႁူမ်ႈမၢႆၼၼ်ႉ ပႃးၶေႃႈလႆႈၸႂ်လူင်းလၢႆးမိုဝ်း 39 ၶေႃႈ။ ၼႂ်းၼၼ်ႉပႃးမိူၼ်ၼင်ႇ ၾၢႆႇၵၢၼ်မိူင်း မီးၶေႃႈတူၵ်းလူင်းၵၼ် 12 ၶေႃႈ၊ ၾၢႆႇပၢႆးမၢၵ်ႈမီး 11 ၶေႃႈ၊ ပၢႆးပိူင်ၵူၼ်း 4 ၶေႃႈ။ လွင်ႈတီႈလိၼ်လႄႈသၽႃႇဝသိင်ႇဝႅတ်ႉလွမ်ႉ ၶူဝ်းႁႄႈၶူဝ်းတိုၼ်း 10 ၶေႃႈ၊ တင်းမူတ်း ႁူမ်ႈ 37 ၶေႃႈ။


ၵူၺ်းၵႃႈ ထႅင်ႈ 2 ၶေႃႈ မိူၼ်ၼင်ႇလွင်ႈႁူမ်ႈလူမ်ႈဝၢၼ်ႈမိူင်း ၸိုင်ႈမိူင်းႁူမ်ႈတုမ်ၼၼ်ႉ ဢိင်ၼိူဝ်ၾၢႆႇ လူင်ပွင်ၸိုင်ႈမၢၼ်ႈ၊ တပ်ႉမတေႃႇ ၶႂ်ႈႁႂ်ႈပဵၼ်လၢႆးပိူင် ၸိုင်ႈမိူင်းလဵဝ်-တပ်ႉသိုၵ်းလဵဝ်၊ ၸုမ်းၸၢဝ်းၶိူဝ်းသမ်ႉ ၶႂ်ႈမီးၶႂ်ႈပဵၼ်လၢႆးတပ်ႉသိုၵ်းၾႅတ်ႊၻရႄႊၸိူဝ်းၼႆႉလႄႈ ဢုပ်ႇဢူဝ်းၵၼ်၊ လႆႈထဵင်ထွင်ၵၼ်ဢမ်ႇယဝ်ႉဢမ်ႇတူဝ်ႈ၊ ပႆႇမီးၶေႃႈလႆႈၸႂ်၊ ပႆႇလႆႈၶေႃႈတႅပ်းတတ်း။ လွင်ႈႁူမ်ႇလူမ်ႈၼႆႉ တေသိုပ်ႇဢုပ်ႇဢူဝ်းၵၼ်ၵႂႃႇထႅင်ႈတၢင်းၼႃႈ- ၼႆယဝ်ႉ။