ဝတ်ႉဝိႁၢရ်ဝၢၼ်ႈၼမ်ႉပႅၼ်ႈ ၸႄႈဝဵင်းၵျွၵ်ႉမႄး ၾႆးမႆႈ တင်းလင်၊ လွင်ႈၶိူင်ႈၸႂ်ႉၶူဝ်းၶွင် ဢမ်ႇတၼ်းလႆႈ ထုၵ်ႇမႆႈပႃးၵႂႃႇၸွမ်းၾႆး တင်းၼမ်သေတႃႉ လွင်ႈလူႉတၢႆ မၢတ်ႇၸဵပ်းဢမ်ႇမီး။


ဝၼ်းတီႈ 26/05/2017 ယၢမ်းၵၢင်ၶိုၼ်း 10:00 မူင်း ၾႆးမႆႈဝတ်ႉဝိႁၢရ်ဝၢၼ်ႈၼမ်ႉပႅၼ်ႈ ဢိူင်ႇပၢင်ႇလေႃႉ ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၶိူင်ႈၶူဝ်းၶွင် ၼႂ်းဝတ်ႉဢမ်ႇတၼ်းလႆႈသင် လူႉသုမ်းၵႂႃႇၸွမ်းၾႆးမူတ်း ဝႃႈၼႆ။

ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(2) ၸႄႈဝဵင်းၵျွၵ်ႉမႄး လၢတ်ႈဝႃႈ “ လႅပ်ႈ တႆႈၾႆးတဵၼ်း တီႈၽြႃးသေ  ၾႆးတဵၼ်းသမ်ႉလူမ်ႉသႂ်ႇတီႈၵျွင်းၽြႃးႁဵတ်းၼၼ်သေ ဢဝ်မႆႈၵႂႃႇ။ တီႈဝတ်ႉၼမ်ႉပႅၼ်ႈ ဝဵင်းၵျွၵ်ႉမႄးႁဝ်းၶႃႈ ဢၼ်ထုၵ်ႇၾႆးမႆႈၵႂႃႇၼႆႉ မီးသွင်ပွၵ်ႈ ပႃးပွၵ်ႈၼႆႉယဝ်ႉ။ မိူဝ်ႈပူၼ်ႉမႃး ၶၢဝ်းတၢင်း 9-10 ပီၼၼ်ႉ ၵေႃႈမႆႈၵႂႃႇယဝ်ႉပွၵ်ႈၼိုင်ႈ၊ ႁဵတ်းၼၼ်သေ ယူႇတီႈသင်ၶၸဝ်ႈ ပေႃႈမႄႈပီႈၼွင်ႉတၵ်ႉၵႃႇသတ်ႉထႃး ၶဝ် ဢွၼ်ၵၼ်မႃးမႄးၵုမ်းၵေႃႇသၢင်ႈဝိႁၢရ်မႂ်ႇၶိုၼ်း တၼ်းယဝ်ႉၵႂႃႇ ၼႂ်းၶၢဝ်းတၢင်း 2-3 ပီ ၼႆႉၵူၺ်း သမ်ႉပဵၼ်ထႅင်ႈ ၾႆးမႆႈ တေလႆႈဝႃႈ ပဵၼ်ပွၵ်ႈၵမ်းတီႈသွင်ယဝ်ႉ” ဝႃႈၼႆ။


ၵဵဝ်ႇၵပ်းလွင်ႈၼႆႉယူႇတီႈသင်ၶၸဝ်ႈတင်း ပေႃႈမႄႈပီႈၼွင်ႉတၵ်ႉၵႃႇသတ်ႉထႃး ၼ်ႂ်းၸႄႈဝဵင်းၵျွၵ်ႉမႄး ဢုပ်ႇဢူဝ်း ၵၼ်သေ လွင်ႈတႃႇတေၵေႃႇသၢင်ႈၶိုၼ်း ဝႃႈၼႆ။


ၸၢႆးထုၼ်းၺၢၼ်ႇ လၢတ်ႈဝႃႈ မိူဝ်ႈဝႃး ဝၼ်းတီႈ 29 တႄႉ သင်ၶၸဝ်ႈတင်းပီႈၼွင်ႉၵူၼ်းမိူင်း ဢုပ်ႇဢူဝ်းၵၼ် တႃႇတေႁဵတ်းသၢင်ႈၶိုၼ်း ဝတ်ႉဝိႁၢရ်ဢၼ်ၾႆးမႆႈၵႂႃႇၼၼ်ႉ။ ၵူၺ်းၵႃႈ တႃႇတေၵေႃႇသၢင်ႈၶိုၼ်းဝိႁၢရ်ဢၼ်မႂ်ႇၼႆႉ တေလႆႈဝႃႈၶႂ်ႈယၢပ်ႇဝႆႉ ယွၼ်ႉဝႃႈ တေႃႈလဵဝ် ႁႅင်းငိုၼ်းဢေႇ တႃႇတေၵေႃႇသၢင်ႈၶိုၼ်ႈမႃး။ ၵွပ်ႈၼႆလႄႈ မိူဝ်ႈဝႃးၵေႃႈ တိုၵ်ႉဢုပ်ႇၵၼ်ယူႇ ဝႃႈတေႁဵတ်းၸိူင်ႉႁိုဝ် ဝႃႈၼႆ။


တေႃႈလဵဝ် ဝတ်ႉဝိႁၢရ်ဝၢၼ်ႈၼမ်ႉပႅၼ်ႈ ဝဵင်းၵျွၵ်ႉမႄးၼႆႉ တေၵေႃႇသၢင်ႈမႂ်ႇၶိုၼ်းၼႆလႄႈ သင်ဝႃႈ ၽူႈမီးၼမ်ႉ ၸႂ်ၸေႇတၼႃႇ တၵ်ႉၵႃႇသတ်ႉထႃး ၼွၵ်ႈမိူင်း/ ၼႂ်းမိူင်း တီႈၸမ်ၵႆ ဢမ်ႇဝႃႈ သင်ၶႂ်ႈႁူမ်ႈလူႇ ၵမ်ႉထႅမ် ၸွမ်းၼင်ႇ ပွင်ပဵၼ်လႆႈ ၵေႃႉဢိတ်းၵေႃႉၼွႆႉလႄႈ ႁဵတ်းပဵၼ်ၸဝ်ႈတႃႇၼလူင်လႄႈသင် ၵပ်းသိုပ်ႇလႆႈတီႈ မၢႆၾူၼ်း(မၢၼ်ႈ) 0947306008 ဝႃႈၼႆ။