ၵၢၼ်ဢုပ်ႇဢူဝ်း တီႈပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 တီႈၼေႇပျီႇတေႃႇၼၼ်ႉ ၵဵဝ်ႇၵပ်း လွင်ႈႁူမ်ႇလူမ်ႈ ပိူင်လူင်မၼ်း ၾၢႆႇတပ်ႉသိုၵ်းမၢၼ်ႈ ၶႂ်ႈပဵၼ်လၢႆးၼိုင်ႈၸိုင်ႈမိူင်း ၼိုင်ႈတပ်ႉသိုၵ်း၊ ဢမ်ႇလႆႈၸႂ်ၸွမ်းလွင်ႈ ၾၢႆႇၸၢဝ်းၶိူဝ်းယိပ်းၵွင်ႈၵၢင်ႇလုၵ်ႉၽိုၼ်ႉ ၶႂ်ႈပဵၼ်တပ်ႉသိုၵ်းၾႅတ်ႊၻရႄႊ။ လွင်ႈၼႆႉ တိုၵ်ႉသိုပ်ႇဢုပ်ႇဢူဝ်း သဵတ်ႈၵႃႈသဵတ်ႈႁူဝ်ၵၼ်။


တူဝ်တႅၼ်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၶွမ်ႊမတီႊဢုပ်ႇဢူဝ်းလွင်ႈငမ်းယဵၼ် ၸဝ်ႈသိုၵ်းၸၢႆးငိုၼ်း လၢတ်ႈဝႃႈ- "လွင်ႈႁူမ်ႇလူမ်ႈၼႆႉ ပိူင်လူင်မၼ်းဢုပ်ႇဢူဝ်း လွင်ႈႁဝ်းတေတမ်းပိူင်ဢၼ်ဝႃႈ ၸိုင်ႈမိူင်းၼိုင်ႈလုၵ်ႈ တေလႆႈမီးတပ်ႉသိုၵ်းၼိုင်ႈဢၼ်။ ၵူၺ်းၵႃႈ မၼ်းတူၵ်းလူင်းၵၼ်ပႆႇလႆႈ၊ ဢုပ်ႇၵၼ်ၵႂႃႇ ဢုပ်ႇၵၼ်မႃး ပၢင်မၼ်းပေႃးၶႂ်ႈယၢႆႈ၊ ၵူၺ်းၵႃႈ မၼ်းၵေႃႈၶိုၼ်းလီယူႇ။ မၼ်းမႃးပိူင်ႈၵၼ်တီႈ ပေႃးၾၢႆႇလူင်ပွင်ၸိုင်ႈ ၾၢႆႇတပ်ႉမၢၼ်ႈၶဝ်တႄႉ ၶႂ်ႈႁႂ်ႈပဵၼ်တပ်ႉမတေႃႇၼႆၵူၺ်း။ ၵူၺ်းၵႃႈ တၢင်းၾၢႆႇၸၢဝ်းၶိူဝ်း EAO သမ်ႉဝႃႈ ၶႂ်ႈႁႂ်ႈပဵၼ်တပ်ႉသိုၵ်းၾႅတ်ႊၻရႄႊ (Federal Army) "-ဝႃႈၼႆ။

ၸဝ်ႈသိုၵ်းၸၢႆးငိုၼ်း ၶွမ်ႊမတီႊဢုပ်ႇဢူဝ်းလွင်ႈငမ်းယဵၼ် RCSS/SSA

တူဝ်တႅၼ်းၾၢႆႇတပ်ႉမတေႃႇၵေႃႉၼိုင်ႈ

မိူဝ်ႈဝႃးၼႆႉ လႆႈဝႃႈဢုပ်ႇဢူဝ်း လႆႈထဵင်ၵၼ်တႄႉတႄႉဝႃႈဝႃႈ။ ပႆႇတူၵ်းလူင်းၵၼ်လႆႈ၊ မိူဝ်ႈၼႆႉ တေၶိုၼ်းတႄႇသိုပ်ႇဢုပ်ႇၵၼ်ထႅင်ႈ- ၼႆယဝ်ႉ။


ၵဵဝ်ႇၵပ်းလွင်ႈႁူမ်ႇလူမ်ႈၼႆႉ ပေႃးဢဝ်လၵ်းၵၢၼ် (မူႇ)မၼ်းဝႃႈ မိူင်းၼိုင်ႈလုၵ်ႈၼႆႉ တေလႆႈမီးတပ်ႉသိုၵ်း ၼိုင်ႈဢၼ်ၵူၺ်း။ တပ်ႉသိုၵ်းၼႆႉ လွင်ႈဝႃႈတေၶွတ်ႇၽွတ်ႈၸိူင်ႉႁိုဝ် လွင်ႈႁူဝ်ယွႆႈႁူဝ်ယႅမ်းမၼ်းၸိူဝ်းၼႆႉ တေပဵၼ်ထႅင်ႈၶၵ်ႉတွၼ်ႈၼိုင်ႈ၊ မိူဝ်ႈလဵဝ် တိုၵ်ႉၵႆသေၵႆယူႇ၊ တေလႆႈဢုပ်ႇၵၼ်တႄႉတႄႉဝႃႈဝႃႈ။ မၼ်းမႃးၶွင်ႉၶမ်တီႈ ၾၢႆႇၸၢဝ်းၶိူဝ်းၶႂ်ႈပဵၼ် တပ်ႉသိုၵ်းၾႅတ်ႊၻရႄႊ၊ ၾၢႆႇတပ်ႉသိုၵ်းမၢၼ်ႈ ၶႂ်ႈပဵၼ်တပ်ႉသိုၵ်း မိူင်းႁူမ်ႈတုမ်၊ လွင်ႈၼႆႉ ၶဝ်တိုၵ်ႉသဵတ်ႈၵႃႈသဵတ်ႈႁူဝ်ၵၼ်ယူႇ၊ တေသိုပ်ႇဢုပ်ႇၵၼ်ထႅင်ႈမိူဝ်ႈၼႆႉ- ၸဝ်ႈသိုၵ်းၸၢႆးငိုၼ်းလၢတ်ႈ။


ၵဵဝ်ႇၵပ်းလွင်ႈႁူမ်ႇလူမ်ႈၼႆႉ တူဝ်တႅၼ်းတပ်ႉသိုၵ်း ၵေႃႉၼိုင်ႈလၢတ်ႈဝႃႈ- "ၼႂ်းလုမ်ႈၾႃႉၼႆႉ မိူင်းလႂ်သေဢမ်ႇဝႃႈ One Country One Army ၼိုင်ႈမိူင်း တပ်ႉသိုၵ်းၼိုင်ႈဢၼ်ၵူၺ်း။  မၢင်ၸုမ်းၼႆႉသမ်ႉ ၶႆႈပူၼ်ႉပႅၼ်လုမ်ႈၾႃႉသေ ဢမ်ႇယွမ်းႁပ်ႉ ဢမ်ႇၶႂ်ႈႁဵတ်းၸိူင်ႉပိူၼ်ႈ ။ ၶဝ်မီးယိူင်းဢၢၼ်းၸိူင်ႉႁိုဝ် ပဵၼ်တီႈလီဝူၼ်ႉဢမ်ႇၸႂ်ႈႁို်ဝ်။ ယၢပ်ႇၵေႃႈယဝ်ႉ တၵ်းတေလႆႈဝႆႉတပ်ႉသိုၵ်းၼိုင်ႈဢၼ်ၵူၺ်း။ တူၺ်းလႄႈ ၼႂ်းလုမ်ႈၾႃႉၼႆႉ ပိူၼ်ႈၵေႃႈၸႂ်ႉ US Army, India Army, British Army ၼႆၵူၺ်း၊ ၸွင်ႇယၢမ်ႈႁၼ် ပိူၼ်ႈၸႂ်ႉၸိုဝ်ႈဝႃႈ Federal Army ၼႆႁိုဝ်"- ဝႃႈၼႆ။


"မၼ်းဢိင်ၼိူဝ် ႁဝ်းမေႃယွၼ်ႇယၢၼ်းတေႃႇၵၼ်လႆႈမွၵ်ႈၵႃႈႁိုဝ်၊ ႁဝ်းယုမ်ႇယမ်ၵၼ်၊ ႁဝ်းၸႂ်ၵႂၢင်ႈ၊ ႁဝ်းမီးၼမ်ႉၸႂ်၊ ႁဝ်းမၵ်းမၼ်ႈၵၼ်လႆႈမွၵ်ႈၵႃႈႁိုဝ် ၸိူဝ်းၼႆႉ။ မၼ်းယူႇတီႈ ႁဝ်းမီးၵၢင်ၸႂ် ၶႂ်ႈႁႂ်ႈဝၢၼ်ႈမိူင်းႁဝ်းၶိုၼ်ႈယႂ်ႇမႂ်ႇသုင်၊ ၶႂ်ႈႁႂ်ႈဝၢၼ်ႈမိူင်းႁဝ်းၵတ်းယဵၼ်သိူဝ်းသႃႇ။


ပေႃးတေယူႇတၢင်းၼိူဝ်သေတဵၵ်းၵၼ်ဝႃႈ သူတေလႆႈႁဵတ်းၸွမ်းဢၼ်ၼႆႉ ယူႇၸွမ်းဢၼ်ၼႆႉၼႆတႄႉ မၼ်းဢမ်ႇပဵၼ်ၵၢၼ်၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လၢႆၾၢႆႇလၢႆၸုမ်းၵေႃႈ တေဢမ်ႇယွမ်းႁပ်ႉ ႁဝ်းၶႃႈႁၼ်ထိုင်ၸိူင်ႉၼႆ"- ၸဝ်ႈသိုၵ်းၸၢႆးငိုၼ်းလၢတ်ႈ။


မိူဝ်ႈဝၼ်းပိုတ်ႇပၢင်ၼၼ်ႉ တီႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ၵေႃႈလၢတ်ႈပႃးဝႃႈ-  ဢၼ်ႁဝ်းတေ ႁဵတ်းၵၢၼ်ငမ်းယဵၼ်ၼႆႉ ဢမ်ႇၸႂ်ႈႁဝ်းၶႃႈတေမႃးတဵၵ်းၵၼ်သေႁဵတ်း၊ ႁဝ်းတေၸႂ်ႉလၢႆးဢုပ်ႇဢူဝ်းငူပ်ႉငီႉၵၼ်သေ ဢဝ်ၶေႃႈလႆႈၸႂ်တင်းမူတ်းတင်းသဵင်ႈယဝ်ႉ ၸင်ႇၵွႆႈႁဵတ်း- ၼႆယဝ်ႉ။


ပၢင်ၵုမ်လူင်လွင်ႈငမ်းယဵၼ် ၸိုင်ႈမိူင်းႁူမ်ႈတုမ် ႁိုဝ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ပွၵ်ႈၵမ်းၼႆႉ တႄႇၸတ်းႁဵတ်းမိူဝ်ႈ ဝၼ်းတီႈ 24-28/05/2017 တီႈၼေႇပျီႇတေႃႇ၊ ၶၢဝ်းတၢင်းႁႃႈဝၼ်း။ ၽူႈၶိုၼ်ႈႁွတ်ႈၶဝ်ႈႁူမ်ႈ ပၢင်ၵုမ်လူင် မီးမိူၼ်ၼင်ႇ ၸုမ်းလူင်ပွင်ၸိုင်ႈ၊ တပ်ႉမတေႃႇသိုၵ်းမၢၼ်ႈ။ ၸုမ်းၸၢဝ်းၶိူဝ်း ယိပ်းၵွင်ႈၵၢင်ႇလုၵ်ႉၽိုၼ်ႉ ပႃးၸဵမ်ၸုမ်းလူင်းလၢႆးမိုဝ်း ၵၢၼ်ၵိုတ်းတိုၵ်းတူဝ်ႈမိူင်း NCA လႄႈ ပႆႇလူင်းလၢႆးမိုဝ်းၵမ်ႈၽွင်ႈ၊ ၸုမ်းပႃႇတီႇၵၢၼ်မိူင်း၊ ၸုမ်းတူင်ႉၼိုင်တူင်ႇဝူင်းၵူၼ်း၊ ၽူႈထုၵ်ႇလီၶဝ်ႈႁူမ်ႈပႃးၸိူဝ်းၼႆႉ။


01-
02-