ၾႆးမႆႈႁိူၼ်း ၼၢႆးသွႆႈငိုၼ်းၶွင်ႇၵေႃႉပဵၼ် ပီႈၼၢင်းၻွၵ်ႊတိူဝ်ႊၸၢႆးမွၵ်ႇၶမ်း တီႈပွၵ်ႉၼိူဝ် ဝဵင်းမူႇၸေႊ ၸဝ်ႈႁိူၼ်းလႄႈလုၵ်ႈယိင်း လူႉတၢႆၸွမ်းၾႆးတင်း 2 ၵေႃႉ။

ဝၼ်းတီႈ 17/05/2017 ယၢမ်းၵၢင်ၼ်ႂ်ၸဝ်ႉ 2:00 မူင်းပၢႆ ၾႆးမႆႈႁိူၼ်းၼၢႆးသွႆႈငိုၼ်းၶွင်ႇ တီႈပွၵ်ႉၼိူဝ် (ႁူဝ်မူၼ်ႇ) ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ။ ၼၢႆးသွႆႈငိုၼ်းၶွင်ႇ ဢႃယု 70 ပၢႆလႄႈ လုၵ်ႈယိင်း မေႃလုမ်းလႃးၵူၼ်းပဵၼ် (Nurse) ၼၢင်းၶမ်းလၢဝ် ဢႃယု 40 ပၢႆ တၢႆၵႂႃႇၸွမ်းၼႂ်းၾႆး တင်း 2 ၵေႃႉမႄႈလုၵ်ႈ ဝႃႈၼႆ။


ၸၢႆးဢွင်ႇ ၵူၼ်းယူႇႁိမ်းၵိၼ်ၸမ် ၽူႈမႃးၸွႆႈၶႄၾႆး လၢတ်ႈဝႃႈ“ ႁိူၼ်းပႃႈသွႆႈငိုၼ်းၶွင်ႇၼႆႉ ပဵၼ်ႁိူၼ်း ဢုတ်ႇ သွင်ၸၼ်ႉ၊ ၾႆးတႄႇမႆႈတီႈၸၼ်ႉၼိူဝ်လူင်း၊ ႁဝ်းၶႃႈ ဢွၼ်ၵၼ် ၼႅတ်ႈ ၵႂႃႇႁွင်ႉ ပူၵ်း ၼၢႆးသွႆႈ ငိုၼ်းၶွင်ႇၶဝ်ယူႇ၊ ၶဝ်ၵေႃႈတိုၼ်ႇယူႇ။ ၵူၺ်းၵႃႈ သွင်ၵေႃႉမႄႈလုၵ်ႈ ဢမ်ႇဢွၵ်ႇႁိူၼ်းလႆႈသေ  လႆႈလူႉတၢႆၵႂႃႇၸွမ်းၼႂ်းၾႆး” ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈၾၢႆႇၸဝ်ႈၼႃႈတီႈပလိၵ်ႈၸႄႈဝဵင်းမူႇၸေႊတႄႉ လၢမ်းၶၢတ်ႈမွၵ်ႇလၢတ်ႈ ဝႃႈ ၾႆးၾႃႉသျွတ်ႉ တူႈယဵၼ်တႂ်ႈလၢင်ႈႁိူၼ်းသေ မႆႈၶိုၼ်ႈၵႂႃႇတၢင်းၼိူဝ် ဝႃႈၼႆ။


ႁိူၼ်းၼၢႆးသွႆႈငိုၼ်းၶွင်ႇၼႆႉ ပဵၼ်ႁိူၼ်း 2 ၸၼ်ႉ၊ ၸၼ်ႉတၢင်းၼိူဝ် ပဵၼ်ၸဝ်ႈ ႁိူၼ်းယူႇ၊ ၸၼ်ႉတႂ်ႈသမ်ႉ ၶၢတ်ႈယိုမ်ပၼ်ယေးငိုၼ်း ၵမ်ႇပေႃးၸ မႃးပိုတ်ႇဝႆႉ ယေးငိုၼ်းဢွၼ်ႇ မီၼီၿၢၼ်ႊ။  ၶိူင်ႈၸၢၵ်ႈၸႂ်ႉၼႂ်းယေးငိုၼ်း မိူၼ်ၼင်ႇ ၶွမ်ႊၽိဝ်ႊတိူဝ်ႊ 2 လုၵ်ႈ၊ ၸၢၵ်ႈၼပ်ႉငိုၼ်း 3 လုၵ်ႈ၊ ၸၢၵ်ႈပေႃႉၽိုၼ်မိူၼ်(လိၵ်ႈ) မဵၵ်ႉတူႇ ၼိုင်ႈလုၵ်ႈ ၸိူဝ်းၼႆႉတႄႉ ၾႆးဢမ်ႇမႆႈပႃး။ ၵူၺ်းၵႃႈ ယမ်းၼမ်ႉမူတ်းယဝ်ႉလႄႈ ၸွင်ႇတေၶိုၼ်းၸႂ်ႉလႆႈတႄႉ ဢမ်ႇႁူႉ။ ၵူၼ်းဝၢၼ်ႈတႄႉဝႃႈ ယွၼ်ႉပိူဝ်ႈပၢႆႉၿၢၼ်ႊဢၼ်တင်ႈဝႆႉၼႃႈႁိူၼ်းၼၼ်ႉ ႁႄႉဝႆႉလႄႈ သိတ်ႇၼမ်ႉၶႄၾႆးၵေႃႈယၢပ်ႇ။ ၾႆးၼၢၼ်းမွတ်ႇ- ဝႃႈၼႆ။


ၼၢင်းၶမ်းလၢဝ် ၵေႃႉပဵၼ်လုၵ်ႈယိင်း ၼၢႆးသွႆႈငိုၼ်းၶွင်ႇၼႆႉ မၼ်းၼၢင်းပဵၼ်ၵူၼ်း တူင်ႉၼိုင်ၼႂ်း ၸုမ်းတူင်ႇဝူင်းတႆး ၼႂ်းၸုမ်းဝူင်းမဵတ်ႉတႃႇ ၸႄႈဝဵင်းမူႇၸေႊ ဝႃႈၼႆ။