လႅၼ်လိၼ်တႆး- ၶၢင်- ၶႄႇထုင်ႉမိူင်းဝၼ်း ၸႄႈဝဵင်းၼမ်ႉၶမ်းၼၼ်ႉ သင်ၶၸဝ်ႈလႄႈ ၵူၼ်းမိူင်း ႁူမ်ႈၵၼ်ၸတ်းႁဵတ်း ပၢင်သွၼ်ၾိင်ႈငႄႈပုတ်ႉထ လိၵ်ႈလၢႆးတႆး ယဝ်ႉတူဝ်ႈသေ ၸတ်းပွႆးလူင်း ပၢင်သွၼ်ပွၵ်ႈႁႅၵ်ႈ။

ဝၼ်းတီႈ 13/05/2017 ၸဝ်ႈသြႃႇပုင်ႇၺဝမ်ႇသ ၸဝ်ႈၵွၼ်း ဝတ်ႉၸႂ်ၵတ်းယဵၼ် တင်းၽူႈယႂ်ႇၵူၼ်း လူင် ႁူမ်ႈၵၼ်သေ ၸတ်းႁဵတ်းပွႆးလူင်းပၢင်သွၼ်ၾိင်ႈငႄႈပုတ်ႉထလႄႈ လိၵ်ႈလၢႆးတႆး ပွၵ်ႈၵမ်းႁႅၵ်ႈ တီႈ ဝတ်ႉၸႂ်ၵတ်းယဵၼ် မၢၼ်ႈၵွင်း မိူင်းဝၼ်း မီးၽူႈၶဝ်ႈႁူမ်ႈတင်းၼမ် ။


ပၢင်သွၼ်ၼႆႉတႄႇပိုတ်ႇမႃးမိူဝ်ႈဝၼ်းတီႈ 21/03/2017 – 03/05/2017 ။ တီႈဝတ်ႉၸႂ်ၵတ်းယဵၼ် ၼႆႉ ပေႃးဝႃႈထိုင်ၶၢဝ်းဢိုတ်းႁဵၼ်းႁူင်းႁဵၼ်းလူင်ပွင်ၸိုင်ႈၼႆ တႃႇသွင်လိူၼ်- သၢမ်လိူၼ် တေပိုတ်ႇ ပၢင်သွၼ်လိၵ်ႈတႆးၶၢဝ်းမႆႈ ၾိင်ႈငႄႈပုတ်ႉထ ၸိူဝ်းၼႆႉ။


ၼႂ်းပၢင်သွၼ်ၼႆႉ မီးသင်ၶၸဝ်ႈ ၽူႈယႂ်ႇၵူၼ်းလူင်လၢႆတီႈ မိူၼ်ၼင်ႇထုင်ႉမိူင်းဝၼ်း၊ ဝဵင်းမူႇၸေႊ၊ ဝဵင်းၼမ်ႉၶမ်းလႄႈ ႁူင်းႁဵၼ်းၽေႃးထိ ၸိူဝ်းၼႆႉ ႁူမ်ႈတင်းၽူႈယႂ်ႇၵူၼ်းလူင်ၶဝ်ႈႁူမ်ႈ မိူၼ်ၼင်ႇၸဝ်ႈ သြႃႇလူင်ဝိသုတ်ႉထ ၽူႈၵေႃႇတင်ႈၸၼ်ႉၸွမ် (ၶေႃႊလဵၵ်ႊ) သႃႇရိပုတ်ႉတ  ဝတ်ႉၼၼ်ႇတဝၼ်ႇ ၊ ဝဵင်းမူႇၸေႊ၊ ၸဝ်ႈသြႃႇလူင်ၼႃႇရၼႃႇထ  ဝတ်ႉမႁႃႇဝၼ်ႇ ဝဵင်းမူႇၸေႊ ၊ ၸဝ်ႈသြႃႇလူင်သေႃးၽၼ ဝတ်ႉၸေႇတဝၼ်ႇ ဝဵင်းမူႇၸေႊ၊ ၸဝ်ႈသြႃႇလူင်ဝိသုတ်ႉထိၺႃႇၼ (ၸဝ်ႈတိုၼ်းတႆး) ႁူင်းႁဵၼ်း ၽေႃးထိလႄႈ ၸဝ်ႈၶူးပၼ်ႇတိတ(B.A, M,A ) သီႇရိလင်းၵႃ ၸိူဝ်းၼႆႉ လိူဝ်သေၼၼ်ႉလႆႈၽိတ်ႈ မွၵ်ႇၽူႈယႂ်ႇၵူၼ်းလူင်ၼႂ်းမိူင်းဝၼ်း၊ ၸုမ်းဝူင်းမဵတ်ႉတႃႇမူႇၸေႊ၊ ၼမ်ႉၶမ်းလႄႈၸုမ်းၵေႃလိၵ်ႈ လၢႆးလႄႈ ၾိင်ႈငႄႈတႆးမူႇၸေႊ ၼမ်ႉၶမ်းမႃး ၶဝ်ႈႁူမ်ႈၸွမ်းတင်းၼမ်။


ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ10/05/2017ၼၼ်ႉၵေႃႈ သင်ၶၸဝ်ႈလႄႈ ၸုမ်းပွင်ၵၢၼ် ၾိင်ႈ ငႄႈလႄႈ လိၵ်ႈလၢႆးတႆးၶၢဝ်းမႆႈၸတ်းႁဵတ်းပွႆးလူင်း ပၢင်သွၼ်ၾိင်ႈငႄႈလိၵ်ႈလၢႆးတႆး တီႈဝၢၼ်ႈၶိူဝ်း ၼိမ် လွႆၸၢင်ႉ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။ လုၵ်ႈႁဵၼ်းၸိူဝ်းယူႇ ဝၢၼ်ႈၶိူဝ်းၼိမ်းလႄႈ ဝၢၼ်ႈ ၶိူဝ်းၶမ်း ႁူမ်ႈတင်းမူတ်း150 ၵေႃႉမႃးႁဵၼ်းဢဝ် တီႈပၢင်သွၼ်ၼၼ်ႉမီး မေႃသွၼ်ၸၢႆးမီး(3) ၵေႃႉ မေႃသွၼ်ယိင်း (3) ၵေႃႉ။