ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ယေႃးတူဝ်ႁွတ်ႈထိုင်သိုဝ်လိုဝ်း ၸႄႈဝဵင်းမိူင်းလႃး၊ မဵတ်ႉတႃႇထမ်းပၼ် ပေႃႈမႄႈၵူၼ်းမိူင်း ႁႂ်ႈယူႇလီၵိၼ်ဝၢၼ် ႁဵတ်းၵၢၼ်ၶိုၼ်ႈယႂ်ႇ၊ ၵူၼ်းမိူင်းဢိၵ်ႇ ၸဝ်ႈၼႃႈတီႈတပ်ႉသိုၵ်း ႁူမ်ၸူမ်းႁပ်ႉတွၼ်ႈ။

မိူဝ်ႈဝၼ်းတီႈ 01/05/2017 ၸဝ်ႈပေႃႈသိလ်ထမ်း ၶူးဝႃးဝုၼ်းၸုမ်ႉ ယေႃးတူဝ်ႁွတ်ႈထိုင် ဢိူင်ႇမိူင်းသိုဝ်လိုဝ်း ၼႃႈလိၼ်မိူင်းလႃး ၸိုင်ႈတႆးပွတ်းဢွၵ်ႇသေ မဵတ်ႉတႃႇႁေႃးထမ်းသွၼ်းယမ်းပၼ် ပေႃႈမေႈၵူၼ်းမိူင်း၊ ၸဝ်ႈၼႃႈတီႈ ၼႂ်းတပ်ႉသိုၵ်း ဢိၵ်ႇၾၢႆႇၽွင်းငမ်း ဝဵင်းသိုဝ်လိုဝ်း  ႁႂ်ႈယူႇလီၵိၼ်ဝၢၼ် ႁဵတ်းၵၢၼ်ႁႂ်ႈၶိုၼ်ႈယႂ်ႇမႂ်ႇသုင်- ၼႆယဝ်ႉ။


ၽွင်းၸဝ်ႈသိလ်ထမ်းဝုၼ်းၸုမ်ႉ ႁွတ်ႈထိုင်ၼၼ်ႉ မီးၸဝ်ႈၼႃႈတီႈၽူႈယႂ်ႇၵူၼ်းလူင် ၼႂ်းၸုမ်းမိူင်းလႃး မိူၼ်ၼင်ႇၵႅမ်ႁူဝ်ပဝ်ႈ ၸဝ်ႈသၢင်ႇလူႇ၊ ႁွင်ႈၵၢၼ်ၾၢႆႇသႃသၼႃ ၸဝ်ႈၸၢႆးတိပ်ႉ၊ ၽူႈယႂ်ႇၵူၼ်းလူင် ၼႂ်းတပ်ႉသိုၵ်း ဢၼ်ပၵ်းသဝ်းၼႂ်းဢိူင်ႇမိူင်းသိုဝ်လိုဝ်း မိူၼ်ၼင်ႇ ၸဝ်ႈသႅင်လူင်၊ ၸဝ်ႈၼွႆႉဢွင်ႇ၊ ၸဝ်ႈၸၢႆးၵႅဝ်ႈ၊ ၸဝ်ႈၼၢၼ်ယီႈၼုမ်ႇ (ၸၢႆးၼွႆႉ) ဢိၵ်ႇ ၽူႈၵွၼ်းဝၢၼ်ႈ/ဢိူင်ႇ လႄႈ ပေႃႈမႄႈၵူၼ်းမိူင်းၼႂ်းလၢႆဝၢၼ်ႈလၢႆဢိူင်ႇ တင်းၼမ်ပႂ်ႉႁပ်ႉတွၼ်ႈ ၵိုၼ်းၶွၼ်ႈၶိုၵ်ႉယႂ်ႇ။ ၸဝ်ႈသိလ်ထမ်းဝုၼ်းၸုမ်ႉ လႆႈမဵတ်ႉတႃႇသွၼ်းယမ်း ႁေႃးထမ်းတြႃးပၼ်ၵႂႃႇတီႈ လုမ်းၾၢႆႇၽွင်းငမ်းဝဵင်းသိုဝ်လိုဝ်းၼၼ်ႉ- ၼႆယဝ်ႉ။


ထိုင်မႃးဝၼ်းတီႈ 02/05/2017 ၸဝ်ႈပေႃႈသိလ်ထမ်း ၶူးဝႃးဝုၼ်းၸုမ်ႉ ယေႃးတူဝ်ႁွတ်ႈထိုင်တီႈ ဝတ်ႉၽရႃႉထၢတ်ႈၸွမ်ၸႅင်ႈ ပႃႇသၢၼ်ႈ ဢိူင်ႇမိူင်းသိုဝ်လိုဝ်း ၸႄႈဝဵင်းမိူင်းလႃး။ ၵူၼ်းဝၢၼ်ႈပႃႇသၢၼ်ႈ ဢိၵ်ႇလူၺ်ႈၵူၼ်းဝၢၼ်ႈၵူၼ်းမိူင်းၵူႈတီႈတီႈ ဢွၼ်ၵၢၼ်ႁႆႇၵွင်ႁႆႇမွင်း ႁူမ်ၸူမ်းႁပ်ႉတွၼ်ႈမူၼ်ႈမူၼ်ႈသိူဝ်းသိူဝ်း- ၼႆယဝ်ႉ။


တီႈဝိႁၢရ်ဝတ်ႉၽရႃႉထၢတ်ႈၸွမ်ၸႅင်ႈ ပႃႇသၢၼ်ႈၼၼ်ႉ လႆႈၸတ်းပၢင်ႁႅၼ်းတၢၼ်း ၸွမ်းၾိင်ႈထုင်းသႃသၼႃ ဢၼ်ပဵၼ်ၾိင်ႈထုင်းႁိတ်ႈႁွႆးၵဝ်ႇ တႆးမိူဝ်ႈၵွၼ်ႇ၊ ၸဝ်ႈသိလ်ထမ်းဝုၼ်းၸုမ်ႉ ဢိၵ်ႇသင်ၶၸဝ်ႈၶဝ် လႆႈပၼ်သိလ်ပၼ်ပွၼ်း မဵတ်ႉတႃႇႁေႃးထမ်းပၼ် ႁႂ်ႈၵူၼ်းဝၢၼ်ႈၵူၼ်းမိူင်း လႆႈယူႇၵတ်းယဵၼ်သိူဝ်းသႃႇ၊ ႁဵတ်းၵၢၼ်ႁႆႈၵၢၼ်ၼႃးၵေႃႈ ႁႂ်ႈမၢၵ်ႈမီးၶိုၼ်ႈယႂ်ႇ။ တၵ်ႉၵႃႇသတ်ႉထႃး ၵူၼ်းမိူင်းၵေႃႈ ႁပ်ႉတုင်းသႃထုဢဝ်ၵႂႃႇ- ၼႆယဝ်ႉ။