ငဝ်ႈငုၼ်းဝၢၼ်ႈႁႆး ၸတ်းႁဵတ်းပၢင်ယုၵ်ႉမုၼ်း ၼမ်ႉၵတ်ႉၽူႈဢွၼ်ႁူဝ်ၸၢႆးယိင်းပၢၼ်မႂ်ႇ ၸုပ်ႈတီႈ 1 လႄႈ ပိုၼ်ႉႁူႉလွင်ႈမၢၵ်ႇမႅင်းၸုပ်ႈတီႈ 03 ၽူႈၶိုၼ်ႈႁဵၼ်း ၸမ်ပၢၵ်ႇ။


ဝၼ်းတီႈ 11/05/2017 ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်းပွႆးလိုဝ်ႈပၢင်သွၼ် ပၢင်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ တီႈႁူင်းႁေႃးၼွင်ငိုၼ်း ဝဵင်းမႂ်ႇဝၢၼ်ႈႁႆး ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၼႂ်းပၢင်ၼႆႉ မီးၽူႈယႂ်ႇၵူၼ်းလူင်မိူၼ်ၼင်ႇ ၸွမ်ႁၢၼ် သၢႆၾႃႉ ၽူႈၸတ်းၵၢၼ် ၾၢႆႇၽွင်းငမ်း၊ ၸဝ်ႈႁၢၼ် ၸၢႆးသူႉ ၽူႈၼမ်းၼႂ်း (2) ဢိၵ်ႇၽူႈမီးၸၼ်ႉ ၵူႈတပ်ႉ ၵူႈႁွင်ႈၵၢၼ် ၶူးပူင်သွၼ်လႄႈ ၽူႈလဵပ်ႈႁဵၼ်းႁူမ်ႈ(97)ၵေႃႉ။


ၸွမ်ႁၢၼ် သၢႆၾႃႉ  မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ “သင်ႈဝႃႈလုၵ်ႈႁဵၼ်းႁဝ်း ၶိုၼ်းပွၵ်ႈမိူဝ်းၵႂႃႇယဝ်ႉ ၸိုင် လွင်ႈဢၼ်ႁဝ်းၶႃႈလႆႈမႃးလဵပ်ႈႁဵၼ်းႁူႉၸိူဝ်းၼႆႉ ႁႂ်ႈၶိုၼ်းဢွၼ်ၵၼ် ဢဝ်မိူဝ်းသွၼ်ၵၼ် ၶိုၼ်း ၼႂ်းပွၵ်ႉဝၢၼ်ႈဢိူင်ႇၽႂ်မၼ်းၸွမ်းၼင်ႇမူႇပိူင်ၽွတ်ႈႁႅၼ်း မုၵ်ႉၸုမ်းၸၢႆး ယိင်းပၢၼ်မႂ်ႇ ႁႂ်ႈပဵၼ်မုၵ်ႉပဵၼ်ၵေႃ ႁႂ်ႈပဵၼ်ၵၢၼ်ၽွၼ်းလီတႃႇဝၢၼ်ႈမိူင်းလႄႈ ၸိူဝ်ႉၸၢတ်ႈၸၢဝ်းၶိူဝ်းႁဝ်း” ဝႃႈၼႆ။


ၼႂ်းပၢင်ၼႆႉၵူၼ်းၼုမ်ႇၽူႈၶဝ်ႈႁူမ်ႈလဵပ်ႈႁဵၼ်းမီး90ပၢႆ ၵမ်ႈၼမ်လုၵ်ႉၼႂ်းထုင်ႉလၢႆလၢႆၸႄႈဝဵင်း ၼႂ်းၼႃႈလိၼ် SSPP/SSA ၽွင်းငမ်းၵုမ်းၵုမ်။


ၸဝ်ႈႁၢၼ် ၸၢႆးသူႉ လၢတ်ႈဝႃႈ “ၸၢႆးယိင်းပၢၼ်မႂ်ႇၼႆႉမၼ်းတေပဵၼ်ၽူႈဢွၼ်ႁူဝ်လီ ၼႂ်းဢိူင်ႇ ၼႂ်းဝၢၼ်ႈႁဝ်းၵႂႃႇမိူဝ်းၼႃႈ၊ ၼင်ႇႁိုဝ်ၵူၼ်းဝၢၼ်ႈႁဝ်းတေ ပူၼ်ႉလႆႈလွင်ႈၶီႇၼဵၵ်းတဵၵ်းတဵင်ၼၼ်ႉ ၸင်ႇလႆႈတမ်းဝၢင်းလွၵ်းပိူင် ပေႃႇလသီမုၵ်ႉၸုမ်းၸၢႆးယိင်းပၢၼ်မႂ်ႇ၊ ပေႃႇလသီႇၼႆႉ ၸၢင်ႈတွတ်ႈ ၶႅပ်းၵၢင်ၸႂ်တႃႇမူၼ်ႉမႄးထႅမ်ထွၼ်ပေႃႇလသီႇမုၵ်ႉၸုမ်း ႁႂ်ႈပေႃးလီမႃးလိူဝ်ၵဝ်ႇ” ဝႃႈၼႆ။


ပၢင်သွၼ်ၼႆႉတႄႇမိူဝ်ႈဝၼ်းထီႉ 01 - 10/05/ 2017  ၶၢဝ်းတၢင်းႁိုင်10 ဝၼ်း ၶူးပူင်သွၼ်ပဵၼ် ၸၢႆးဢၢႆႈႁိၼ်သႅင် ပူင်သွၼ်ပၼ် လၢႆးဢွၼ်ႁူဝ်၊ လၢႆးၸတ်းၵၢၼ်၊ ၵၢၼ်မိူင်း၊ ၾႅတ်ႊတရႄႊ၊ ၵၢၼ်မုၵ်ႉၸုမ်းလႄႈ တၢင်းႁူႉလွင်ႈၽေးၶဵၼ်မၢၵ်ႇမႅင်း ၸိူဝ်းၼႆႉ။