ပီႈၼွင်ႉၵူၼ်းမိူင်း ႁိမ်း 300 ၵေႃႉ လႆႈပၢႆႈၽေးသိုၵ်း တီႈၼႂ်းဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ယွၼ်ႉပၢင်တိုၵ်း တပ်ႉသိုၵ်းလူင်ပွင်ၸိုင်ႈမၢၼ်ႈ တင်းတပ်ႉ သိုၵ်းတဢၢင်း TNLA ။


မိူဝ်ႈဝၼ်းတီႈ 11/05/2017 ၵူၼ်းမိူင်း ၼႂ်းဢိူင်ႇသၢႆးၶၢဝ် ဢွၼ် ၵၼ်ပၢႆႈ ၽေးသိုၵ်း မႃးယူႇသဝ်း တီႈဝတ်ႉဝိႁၢရ် သူၺ်ႇမိၼ်ႇတႃႇ ၼႂ်းၸႄႈဝဵင်းၼမ်ႉတူႈ- ၼၢင်းၸၢမ်ႁွမ် ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈ ဝဵင်းၼမ်ႉတူႈလၢတ်ႈၼႄ တီႈၸုမ်းၶၢဝ်ႇၽူႈတွႆႇႁွၵ်ႈ။

မၼ်းၼၢင်းလၢတ်ႈဝႃႈ မိူဝ်ႈလဵဝ်ၼႆႉ ၵဵဝ်ႇလူၺ်ႈၶဝ်ႈၼမ်ႉတၢင်းၵိၼ်ၵေႃႈ လႆႈၶတ်းၸႂ်လဵင်ႉလူၵႂႃႇ ၸွမ်းၼင်ႇဢၼ် မီးၵူၺ်း။ “လွင်ႈၸွႆႈ ထႅမ်တႄႉ တိုၵ်ႉလူဝ်ႇတင်းၼမ် ယွၼ်ႉဝႃႈ ဢွၼ်ၼႃႈၼၼ်ႉ ၵူၼ်းပၢႆႈၽေး သိုၵ်းၵေႃႈ ယင်းမီးဝႆႉယူႇ၊ ပႆႇၸၢင်ႈ ပွၵ်ႈမိူဝ်းၵေႃႈမီး။ ပီႈၼွင်ႉႁဝ်း လုၵ်ႉတၢင်းမၢၼ်ႈတူင်ႈသေ ၶၢႆႉမႃးယူႇတီႈ ၸႄႈဝဵင်းၼမ်ႉတူႈႁဝ်း မီးႁိမ်း ၸမ် ပီယဝ်ႉ။ ပီႈၼွင်ႉၵူၼ်း ပၢႆႈၽေး ၸုပ်ႈၵဝ်ႇတင်း ၸုပ်ႈမႂ်ႇ ဢၼ်တိုၵ်ႉ ပၢႆႈမႃးၼႂ်း 2-3 ဝၼ်းၼႆႉ ပေႃးႁူမ်ႈၵၼ် မီး ႁိမ်း 600 ၵေႃႉ” ဝႃႈၼႆ။


မိူဝ်ႈလဵဝ် ၵူၼ်းဝၢၼ်ႈႁိမ်းႁွမ်းႁဝ်းၼၼ်ႉလႆႈ ဢွၼ်ၵၼ်တူမ်ႈႁုင် ႁဵတ်းလဵင်ႉပီႈၼွင်ႉၵူၼ်းပၢႆႈၽေး၊ ႁဝ်းၶႃႈလႆႈ ဢဝ်ၶဝ်ႈၼမ်ႉမၼ်း ၶွင်ၵိၼ်ယမ်ႉ ဢၼ်ၵဵပ်းႁွမ်ဝႆႉ မိူဝ်ႈဢွၼ်တၢင်းၼၼ်ႉသေ ၶိုၼ်း တူမ်ႈႁုင် လဵင်ႉၵၼ်ၵႂႃႇၵူၺ်း- ၼၢင်းၸၢမ်ႁွမ် လၢတ်ႈ။


တႄႇဢဝ် ႁၢင်လိူၼ်ဢေႊပရိူဝ်ႊ တေႃႇထိုင်ယၢမ်းလဵဝ် တပ်ႉသိုၵ်းလူင် ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ်ယူႇ တၢင်းပွတ်း ၼမ်ႉတူႈ၊ ၼမ်ႉၶမ်း၊ ၵူတ်ႉၶၢႆ၊ ၵျွၵ်ႉမႄးလႄႈ မၢၼ်ႈတူင်ႈ ၸဵမ်ၸိူဝ်းၼႆႉ။


ၼၢင်းၸၢမ်ႁွမ် ၽူႈတႅၼ်းသၽႃးၸႄႈမိူင်း လၢတ်ႈဝႃႈ ပဵၵ်ႉသမ်ႉဝႃႈ ၼႂ်းၶၢဝ်းတၢင်းသွင်ဝၼ်းပူၼ်ႉမႃးၼႆႉ ပၢင်တိုၵ်း ယဵၼ်ၵႂႃႇယဝ်ႉၼႆသေတႃႉၵေႃႈ ပီႈၼွင်ႉၵူၼ်းဝၢၼ်ႈ ၼႂ်းဢိူင်ႇသၢႆးၶၢဝ်တႄႉ ပႆႇႁတ်းပွၵ်ႈ ယွၼ်ႉၵူဝ်ပဵၼ်ပၢင်တိုၵ်း မႃးထႅင်ႈ ဝႃႈၼႆ။


ၸုမ်း Myanmar Peace Monitor ႁၢႆးငၢၼ်းဝႃႈ - ၼႂ်းပီ 2016 ၵူၺ်း တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း ပဵၼ်ပၢင်တိုၵ်းၵၼ် 309 ပွၵ်ႈ ဝႃႈၼႆ။