ၸဝ်ႈၸၢႆးလိုၼ်းႁူဝ်ပဝ်ႈလူင် ၸုမ်းမိူင်းလႃး ဢွၼ်ႁူဝ်ၵူၼ်းဝၢၼ်ႈၵူၼ်ႈၵူၼ်းမိူင်း ၵေႃႇသၢင်ႈႁုၼ်ႇႁၢင်ႈပုတ်ႉထၸဝ်ႈ ဢၼ်သူႇယႂ်ႇတီႈသုတ်း ၼႂ်းမိူင်းတႆး ယဝ်ႉတူဝ်ႈသေ ၸတ်းႁဵတ်းပၢင်ပွႆးတၢင်ႇဢၼေၵၸႃ လူႇတၢၼ်းယၢတ်ႇၼမ်ႉၵႂႃႇ မိူဝ်ႈဝၼ်းတီႈ 10/5/2017 ။

ႁုၼ်ႇႁၢင်ႈၽြႃးလူင် ဢၼ်မီးၸိုဝ်ႈ မႁႃမျၢတ်ႈမုၼိမဵတ်ႉတႃႇၸုမ်ႈမိူင်း ၼႆႉ ႁူဝ်ပဝ်ႈလူင် ၸဝ်ႈၸၢႆးလိုၼ်း လႄႈ မႄးၼၢင်းပဵၼ်ၵဝ်ႉငဝ်ႈသေ ၵေႃႇသၢင်ႈမႃးမိူဝ်ႈပီ 2013/5/12 ၊ ၶၢဝ်းတၢင်း 4 ပီ၊ လႆႈၸႂ်ႉငိုၼ်းသဵင်ႈယူႇ 20,000,000 ယႂၼ် (တူၵ်းမႅၼ်ႈငိုၼ်းမၢၼ်ႈ 3,800,000,000 ၵျၢတ်ႉ) ၊ ပဵၼ်သႅၼ်းထၢတ်ႈၼင်ႈ၊ တၢင်းသုင်မီး28.5 မဵတ်ႉ (85.5ထတ်း)၊ တၢင်းယၢဝ်းပလင်ႇ မီး34မဵတ်ႉ။ ပဵၼ်ႁုၼ်ႇႁၢင်ႈပုတ်ႉထၸဝ်ႈ ဢၼ်ယႂ်ႇတီႈသုတ်း ၼႂ်းမိူင်းတႆး။


ၽူႈၶဝ်ႈႁူမ်ႈပၢင်ပွႆး ၸဝ်ႈၼိုင်ႈလၢတ်ႈၼႄဝႃႈ- “ၽြႃးၼႆႉ သူႇယႂ်ႇတီႈသုတ်းၶႃႈဢေႃႈ၊ ဢၼ်ယၢတ်ႇၼမ်ႉၼႆႉ ႁူဝ်ပဝ်ႈလူင် ၸဝ်ႈၸၢႆးလိုၼ်း၊ ၸဝ်ႈသၢၼ်းပိူဝ်ႇ၊ ၸဝ်ႈၶုၼ်သၢင်ႇလူႇ ဢိၵ်ႇ ၸဝ်ႈၶူးဝႃး ၊ တုပီႈတုၸဝ်ႈၵေႃႈ မႃးၼမ်ဢေႃႈ” - ဝႃႈၼႆ။


ၼႃႈလိၼ်ၶိုၵ်ႉတွၼ်းမၢႆ 4 ၼႆႉ ၸဝ်ႈၸၢႆးလိုၼ်းဢွၼ်ႁူဝ်သေ တႄႇပူၵ်းတင်ႈမႃးမိူဝ်ႈပီ 1989 ။ တႄႇမိူဝ်ႈၼၼ်ႉသေ ၵိုတ်းသိုၵ်း ဢဝ်ငမ်းယဵၼ် တင်းလူင်ပွင်ၸိုင်ႈမၢၼ်ႈမႃး ႁၢၼ်ႉတေႃႇဝၼ်းမိူဝ်ႈၼႆႉ။


တင်ႈတႄႇၵိုတ်းသိုၵ်းဢဝ်ငမ်းယဵၼ် ၵေႃႇသၢင်ႈၼႃႈလိၼ်ၶိုၵ်ႉတွၼ်းမႃး ၼႂ်းပိုၼ်ႉတီႈၵေႃႈ ပိုၼ်ၽၢဝ်ႇ ပဵၼ်ၶဵတ်ႇလႅၼ် ပိုၼ်ႉတီႈဢမ်ႇမီးၾိၼ်ႇ၊ တူဝ်ၸဝ်ႈၸၢႆးလိုၼ်း ဢွၼ်ႁူဝ်သေပူၵ်းပွင်ပိုၼ်ႉတီႈ ၶိုၼ်ႈသင်ႉၶိုၼ်ႈသုင်၊ မီးႁူင်းႁဵၼ်းၶႄႇ၊ ႁူင်းႁဵၼ်းလူင်ပွင်ၸိုင်ႈ၊ ႁူင်းႁဵၼ်းၸိူဝ်ႉၸၢတ်ႈ ၸဵမ်ၸိူဝ်းၼႆႉ။


ၵူၼ်းယူႇသဝ်းၼႂ်းပိုၼ်ႉတီႈ မီး 13 ၸၢဝ်းၶိူဝ်း၊ ၵမ်ႈၼမ် ၼပ်ႉထိုဝ်သႃသၼႃ ပုတ်ႉထၸဝ်ႈ။ တၢင်ႇသႃသၼႃ မိူၼ်ၼင်ႇၶရိတ်ႉယၼ်ႊ၊ မူႇသလိမ်ႊ၊ ၵိူဝ်းလီၽီပေႃႈၽီမႄႈ ပူႇယႃႈၶိင်းၼၢႆး ၸိူဝ်းၼႆႉၵေႃႈမီး။