သင်ၶၸဝ်ႈ ၸႄႈဝဵင်းလၢႆးၶႃႈ ဢွၼ်ႁူဝ်ၼမ်းၼႃႈ ၸတ်းႁဵတ်းပွႆးလူင်းပၢင်သွၼ် လိၵ်ႈတႆး ၶၢဝ်းမႆႈ ပွၵ်ႈၵမ်း 22 တီႈဝတ်ႉၼမ်ႉႁူးၽြႃးထမ်ႈ မီးၽူႈၶဝ်ႈႁူမ်ႈ ပၼ်ႁႅင်း တင်းၼမ်။

ဝၼ်းတီႈ 25-27/04/2017 ၸုမ်းသင်ၶၸဝ်ႈ တူင်ႇဝဵင်းလၢႆးၶႃႈ ဢွၼ်ႁူဝ် ၸတ်းႁဵတ်းပွႆးလူင်း ပၢင် သွၼ်ၾိင်ႈငႄႈပုတ်ႉထလိၵ်ႈလၢႆးတႆး တီႈဝတ်ႉၼမ်ႉႁူးၽြႃးထမ်ႈ ဢိူင်ႇၼႃးပွႆး ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ်
ၸိုင်ႈတႆးပွတ်းၸၢၼ်း။


ၸဝ်ႈတူၼ်ၶူး ၵေႃးသလ ၽူႈမၢႆၾိင်ႈငႄႈပုတ်ႉထလိၵ်ႈလၢႆးတႆး လၢတ်ႈဝႃႈ “ ၶေႃႈယိူင်းဢၢၼ်း ဢၼ်လႆႈပိုတ်ႇပၢင်သွၼ်ၾိင်ႈငႄႈပုတ်ႉထ လိၵ်ႈလၢႆးတႆးၼႆႉ 1) ႁႂ်ႈတႆးၵူႈၵေႃႉ၊ မေႃလူ၊ မေႃဢၢၼ်ႇ၊ မေႃတႅမ်ႈ၊ မေႃမၢႆ၊ မေႃၸႂ်ႉတိုဝ်းလိၵ်ႈတႆး။ 2) ႁႂ်ႈလိၵ်ႈတႆး ယႃႇႁၢႆ၊ သိုပ်ႇသၢႆ ပႂ်ႉပႃးၵၼ်ၵႂႃႇၵူႈတီႈ၊ ၵူႈမိူင်း။ 3) ႁႂ်ႈလုၵ်ႈႁၵ်ႉ
လၢၼ်ပႅင်း မီးတၢင်းဢူၼ်ႈဢွၼ်ႇ၊ မေႃၼပ်ႉထိုဝ်ၽြႃးတြႃးသင်ၶ သြႃႇပေႃႈမႄႈ။ 4) ၵူၼ်းၵူႈသႅၼ်းသႅၼ်း ႁႂ်းမီးတၢင်းၽွမ်ႉႁူမ်ႈ။ 5) တီႈဢၼ်ဢမ်ႇမီးႁူင်းႁဵၼ်းၼၼ်ႉ ႁႂ်ႈလုၵ်ႈဢွၼ်ႇမီးသုၼ်ႇလႆႈသွၼ်ဢဝ်လိၵ်ႈ
ၸဵမ်ၸိူဝ်းၼႆႉ။

ပၢင်သွၼ်ၾိင်ႈငႄႈပုတ်ႉထ လိၵ်ႈလၢႆးတႆး ၼႆႉမီးၸဝ်ႈတႃႇၼ ၸွႆႈထႅမ်မႃး မိူၼ်ၼင်ႇ ၸဝ်ႈၶူးလူင် D.r ထမ်မသႃမိ၊ သြႃႇလႄႈတၵ်ႉၵႃႇ ၵူႈႁူဝ်ၵျွင်း ၼႂ်းတူင်ႇဝဵင်းလၢႆးၶႃႈလႄႈ ၸဝ်ႈတႃႇ တၢင်းတႃႈၶီႈလဵၵ်း မိူင်းထႆး
ၸဵမ်ၸိူဝ်း ၼႆႉ ၵမ်ႉထႅမ်ၸွႆႈၵူႈပီ” ၼႆယဝ်ႉ။


ပွႆးလူင်းပၢင်သွၼ်ၾိင်ႈငႄႈပုတ်ႉထလိၵ်ႈလၢႆးတႆး တီႈဝတ်ႉၼမ်ႉႁူးၽြႃးထမ်ႈၼႆႉ လၢႆလၢႆဢိူင်ႇႁူမ်ႈ ၵၼ်သေ ၸတ်းႁဵတ်း မိူၼ်ၼင်ႇ ဢိူင်ႇၼႃးပွႆး 5 ပၢင်၊ ဢိူင်ႇတူၼ်ႈႁုင်း 2 ပၢင်၊ ဢိူင်ႇပၢင်သၢင်း 10 ပၢင်၊ ဢိူင်ႇၼွင်ၵေႃႈ 8 ပၢင်၊ ဢိူင်ႇႁၢႆးသႅင် 3 ပၢင်လႄႈ ဝၢၼ်ႈမၢၵ်ႇၵွၵ်ႇ/ ဝၢၼ်ႈၵုင်းမႆႉႁႆး ၸဵမ်ၸိူဝ်းၼႆႉ ၸၼ်ႉလိၵ်ႈသမ်ႉ
တႄႇဢဝ်ၸၼ်ႉငဝ်ႈ ထိုင် ၸၼ်ႉႁူၵ်း လုၵ်ႈႁဵၼ်းမႃးၶိုၼ်ႈႁဵၼ်း တင်းမူတ်း 1000 ပၢႆ၊ လုၵ်ႈႁဵၼ်းၸိူဝ်းၶဝ်ႈ
တွပ်ႇလိၵ်ႈ 881 ၵေႃႉ၊ ဢွင်ႇပူၼ်ႉ 731 ၵေႃႉ။ ၶူး/မေႃသွၼ် ပူင်သွၼ်ပၼ်သမ်ႉ တင်းမူတ်းမီး 73 ၵေႃႉ ၼႆယဝ်ႉ။


ပၢင်သွၼ်ၾိင်ႈငႄႈပုတ်ႉထ လိၵ်ႈလၢႆးတႆးၼႆႉ တႄႇပိုတ်ႇ ဝၼ်းတီႈ 26/02-11/04/2017 ၼႂ်းၸႄႈ ဝဵင်းလၢႆးၶႃႈ တင်းမူတ်း ပၢင်သွၼ်မီး 113 ပၢင်၊ ၶူး/မေႃ ဢၼ်ပူင်သွၼ်မီး 308 ၵေႃႉ၊ လုၵ်ႈႁဵၼ်း တင်းမူတ်းမီး 6146 ပၢႆ ၸၼ်ႉလိၵ်ႈသမ်ႉ တႄႇဢဝ် ၸၼ်ႉငဝ်ႈထိုင် ၸၼ်ႉႁူၵ်း။


ၼွၵ်ႈလိူဝ်ၼၼ်ႉ ၼႂ်းၸႄႈဝဵင်းမိူင်းၵိုင် ဢိူင်ႇမိူင်းၶုၼ် ပၢင်သွၼ်ဢၼ်လႆႈပိုတ်ႇၵႂႃႇမီး 7 ပၢင်၊ မေႃသွၼ် 14 ၵေႃႉ၊ လုၵ်ႈႁဵၼ်း တင်းမူတ်းမီး 280 ပၢႆ။ ၼႂ်းၸႄႈဝဵင်းၵေးသီးသမ်ႉ လႆႈပိုတ်ႇၵႂႃႇ 5 ပၢင် မေႃသွၼ် 10 ၵေႃႉ၊ လုၵ်ႈႁဵၼ်းတင်းမူတ်း မီး 160 ပၢႆ ၼႆယဝ်ႉ။


ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 01/05/2017