ၸိုင်ႈတႆးပွတ်းၸၢၼ်း ၼႂ်းၸႄႈဝဵင်း သီႇသႅင်ႇ ၼၼ်ႉ ၸုမ်းၵူၼ်းၼုမ်ႇတႆး TYO ဢွၼ်ႁူဝ်ၸတ်းႁဵတ်း ပၢင်သွၼ်ၶွမ်း computer ၶဝ်းတၢင်း 7 ဝၼ်း။

ပၢင်သွၼ်ၶွမ်းၼႆႉ တႄႇ ပိုတ်ႇမႃးမိူဝ်ႈဝၼ်းတီႈ 29/3/2017 - တေႃႇ ဝၼ်းတီႈ 4/4/2017  ယိူၼ်းဢၢၼ်းဝႆႉ တႃႇၸဵတ်းဝၼ်း ၼႆသေတႃႉ သင်မီးၽူႈၵမ်ႉၸွႆႈထႅင်ႈတႄႉ ၶႂ်ႈတေႃႇထႅင်ႈၶၵ်ႉၼိုင်ႈသေ ပိုတ်ႇသွၼ် ၶၢဝ်းတၢင်း 15 ဝၼ်း။ တီႈပၢင်သွၼ်ၼၼ်ႉ မီးၵူၼ်းၼုမ်ႇမႃးႁဵၼ်းႁူႉ 26 ၵေႃႉ - ႁူဝ်ၼႃႈၵူၼ်းၼုမ်ႇတႆး ၸၢႆးပိုၼ်းႁၢၼ်လၢတ်ႈ။


ၸၢႆးပိုၼ်းႁၢၼ်ႁူဝ်ပဝ်ႈ ၵူၼ်းၼုမ်ႇတႆးလၢတ်ႈဝႃႈ-  ၼင်ႇႁိူဝ် လုၵ်ႈဢွၼ်ႇႁဵၼ်းတေ မီးတၢင်းၶိုၼ်ႈယႂ်ႇ ၊ မီးလွင်ႈယုမ်ႇယမ် တူဝ်ၵဝ်ႇ၊  မီးလွင်ႈတၢင်းႁူႉ တင်းႁၼ်ၼမ်၊  မီးၼမ်ႉၸႂ်ပူၵ်းပွင် ၵၢၼ်ၸိူဝ်ႉၸၢတ်ႈ တူင်ႇဝူင်းၵူၼ်းၵူႈထၢၼ်ႈ ၊ ၵွပ်ႈမၼ်းပဵၼ် ၵၢပ်ႈပၢၼ် IT ယဝ်ႉလႄႈ ၵူၼ်းႁဝ်းၵူႈၵေႃႉဢမ်ႇမေႃဢမ်ႇပဵၼ် လူဝ်ႇလႆႈမေႃ၊  လူဝ်ႇႁဵၼ်းႁူႉၵၢၼ် ၵူႈလွင်ႈ ဝႃႈၼႆ။


ပၢင်သွၼ် ၶွမ်း(computer) ၼႆႉပဵၼ်ပွၵ်ႈဢွၼ်တၢင်းသုတ်း။ ၸတ်းႁဵတ်းတီႈ ႁူင်းသဝ်း ပရႁိတ ၵူၼ်း ၼုမ်ႇတႆး TYO ၊ ၼႂ်းၸႄႈဝဵင်းသီႇသႅင်ႇ။ ပၢင်သွၼ် တႄႇၵၢင်ၼႂ် 9 မူင်း ထိုင်တၢမ်းၶမ်ႈ 4 မူင်း။


ၼႂ်းၸႄႈဝဵင်းသီႇသႅင်ႇၼႆႉ ပေႃးႁွတ်ႈထိုင် ၶၢဝ်းဢိုတ်းႁူင်းႁဵၼ်းလူင်ပွင်ၸိုင်ႈ ၶၢဝ်းမႆႈမႃးၸိုင် ၵူႈပီၵေႃႈ မီးပၢင်သွၼ်လိၵ်ႈလၢႆးတႆး မႃးပၢၼ်သိုပ်ႇပၢၼ်။ ပၢင်သွၼ် ၶွမ်း Computer တႄႉပွၵ်ႈၼႆႉပဵၼ် ပွၵ်ႈဢွၼ်တၢင်းသုတ်း  ဝႃႈၼႆ။