ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ႁူမ်ႈလၢႆၾၢႆႇ ၵူတ်ႇထတ်းတီႉၺွပ်းၵူၼ်းႁဵတ်း ၵၢၼ်ၽိတ်း
ပၵ်းပိူင် ၾၢင်ႉထိုင်ပေႃႈ၊မႄႈလဵင်ႉ ႁႂ်ႈၸၢင်ႈၵူၼ်းႁဵတ်းၵၢၼ်ထုၵ်ႇမၢႆမီႈ။

သိုဝ်ႇၶၢဝ်ႇထႆး  komchadluek.net ပိုၼ်ၽၢဝ်ႇမိူဝ်ႈ ဝၼ်းတီႈ 26/04/2017 ၼၼ်ႉဝႃႈ - ၼႂ်းၶၢဝ်းတၢင်း တႄႇလိူၼ် ဢွၵ်ႊထူဝ်ႊၿိူဝ်ႊ 2016 - လိူၼ်ဢေႊပရိူဝ်ႊလ် 2017 ပူၼ်ႉမႃးၼႆႉ ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈ
မိူင်းထႆး ႁူမ်ႈလၢႆၾၢႆႇ လႄႇႁႃၵူတ်ႇထတ်း ၵူၼ်းႁဵတ်းၵၢၼ်ၽိတ်းပၵ်းပိူင်မၢႆမီႈ ၼႂ်းမိူင်းၵွၵ်ႇလႄႈ တၢင်ႇၸႄႈတွၼ်ႈ ၼႂ်းမိူင်းထႆး။


ၵူတ်ႇထတ်း 4,805 တီႈ ပဵၼ်ၼႂ်းၵုင်းထဵပ်ႈ1,296 တီႈ၊ တၢင်ႇၸႄႈတွၼ်ႈ 3,509 တီႈ။ တီႉၺွပ်းလႆႈႁႅင်းၵၢၼ်
ၶၢမ်ႈမိူင်း မၢၼ်ႈ၊ လၢဝ်း ၊ ၶႅမ်ႊၿေႃႊၻီႊယႃႊ ႁဵတ်းၵၢၼ်ၽိတ်းပၵ်းပိူင်မၢႆမီႈ ႁူမ်ႈတင်းမူတ်း 3,500 ၵေႃႉ။


ဢၼ်လႆႈၵူတ်ႇထတ်း ႁႅင်းၵၢၼ်တင်းမူတ်းမီး 66,411 ၵေႃႉ ၼႂ်းမိူင်းၵွၵ်ႇ 34,527 တၢင်ႇၸႄႈတွၼ်ႈ 31,884
ဢဝ်ၽိတ်းပေႃႈလဵင်ႉၼၢႆးၸၢင်ႈ 519 ၵေႃႉ ၼႂ်းမိူင်းၵွၵ်ႇ 127 ၵေႃႉ တၢင်ႇၸႄႈတွၼ်ႈ 392ၵေႃႉ ႁႅင်းၵၢၼ်
ၶၢမ်ႈမိူင်းၽိတ်းမၢႆမီႈတင်မူတ်း 3,761 ၼႂ်းမိူင်းၵွၵ်ႇ 1292ၵေႃႉ တၢင်ႇၸႄႈတွၼ်ႈ 2469 ၵေႃႉ ၵမ်ႈၼမ် ပဵၼ်ၵူၼ်း မိူင်းႁူမ်ႈတုမ်မျႅၼ်ႇမႃႇ ။


ႁႅင်းၵၢၼ်ဢၼ်ၺႃးတီႉၵမ်းၼႆႉ ပဵၼ်တၢင်းၽိတ်း  ႁဵတ်းၵၢၼ်သုၼ်ႇတူဝ် ၊ ၵႃႉၶၢႆ ၊ ႁဵတ်းၵၢၼ်ဢွၼ်ၵူၼ်းဢႅဝ်ႇ လႄႇ Tour Guide လႄႈ ၵူၼ်းႁဵတ်းၵၢၼ်ယၢမ်း ၸိူဝ်းၼႆႉ။ ယွၼ်ႉဝႃႈၼႃႈၵၢၼ်ၸိူဝ်းၼႆႉ ဢဝ်ဝႆႉပၼ်တွၼ်ႈ တႃႇၵူၼ်းထႆးႁဵတ်း ၊ ၼႃႈၵၢၼ်တွၼ်ႈတႃႇ ႁႅင်းၵၢၼ်ၶၢမ်ႈမိူင်းတႄႉ မီးဝႆႉ2 ပိူင်ၵူၺ်း မိူၼ်ၼင်ႇ ၵၢၼ်ၸႂ်ႉ မႃႇၸႂ်ႉ ႁႅင်း ( กรรมกร) လႄႈၵၢၼ်ၼႂ်းႁိူၼ်း (မႄႈဝၢၼ်ႈ) ၼၼ်ႉၵူၺ်း- ဝႃႈၼႆ။

ဝႃႊရႃႊၼူၼ်ႊ  ပီႊတီႊဝၼ်ႊ ၽူႈၵွၼ်းႁွင်ႈၵၢၼ်ၾၢႆႇႁႅင်းၵၢၼ် လၢတ်ႈဝႃႈ - ၶႂ်ႈတိုၵ်းသူၼ်းႁႂ်ႈ ပေႃႈလဵင်ႉ ၼၢႆး ၸၢင်ႈ လိူၵ်ႈဢဝ်ၵူၼ်းႁဵတ်းၵၢၼ် ဢၼ်မီးဝတ်းဝႂ်တဵမ်ထူၼ်ႈလႄႈ ႁဵတ်းၵၢၼ်ၸွမ်းၼင်ႇ ဢၼ်တႅမ်ႈဝႆႉၼႂ်းဝတ်း ၼၼ်ႉ သင်ႇဢမ်ႇၼၼ်ၸိုင် တေမီးတူတ်ႈတၢမ်ႇမႂ်ငိုၼ်း 400,000 – 800, 000 ဝၢတ်ႇ တေႃႇၵူၼ်းႁဵတ်းၵၢၼ်
ၼိုင်ႈၵေႃႉ - ဝႃႈၼႆ။


ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ၵေႃႈလၢတ်ႈဝႃႈ – “ဢၼ်ၸဝ်ႈၼႃႈ တီႈလူင်းၵူတ်ႇထတ်းၼႆႉ မၼ်းပဵၼ်ၼႃႈတီႈၶဝ်ယဝ်ႉ ၵူၺ်းၵႃႈပေႃးႁဝ်းႁဵတ်းၸွမ်းၼင်ႇပၵ်းပိူင်မၢႆမီႈၸိုင်ႈ မိူင်းပိူၼ်ႈၸိုင် ပိူၼ်ႈၵေႃႈ ဢမ်ႇၸၢင်ႈမႃးတီႉၺွပ်းႁဝ်း။ ပေႃးယဝ်ႉၵေႃႈပေႃးႁဝ်းၶႂ်ႈႁူႉသင်  ႁႂ်ႈတွင်ႈထၢမ်
ၸဝ်ႈၼႃႈတီႈ ႁွင်ႈၵၢၼ်ၾၢႆႇလႂ်ၾၢႆႇ ၼၼ်ႉၵမ်းသိုဝ်ႈ ၼင်ႇႁိုဝ်ပေႃးတေလႆႈႁပ်ႉၶေႃႈမုလ်း ဢၼ်ၸႅင်ႈ လႅင်းမၼ်းၼၼ်ႉ”- ဝႃႈၼႆ ။


ႁွင်ႈၵၢၼ်ၾၢႆႇႁႅင်းၵၢၼ် ပိုၼ်ၽၢဝ်ႇ သဵၼ်ႈမၢႆႁႅင်းၵၢၼ်ၶၢမ်ႈမိူင်း မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2016 ၼၼ်ႉဝႃႈ-
ႁႅင်းၵၢၼ် ၶၢမ်ႈမိူင်းတင်းမူတ်းမီး 1,298,058 ၵေႃႉ ၽႄပဵၼ် ၶႅမ်ႊၿေႃႊတီႊယႃႊ 248,515 ၵေႃႉ ၊ လၢဝ်း106, 527၊ ၵူၼ်းမိူင်းႁူမ်ႈတုမ်မျႅၼ်ႇမႃႇမီး 943,016 ။ ၵမ်ႈၼမ်ႁဵတ်းၵၢၼ်ၵေႃႇသၢင်ႈ 245,352 ၵေႃႉ၊ လဵင်ႉသတ်း 108,069 ၵေႃႉ  ၊ ၼႃႈၵၢၼ်ၵူႈလွင်ႈလွင်ႈ 216,893 ၵေႃႉဝႃႈၼႆ။


ၸုမ်းၶၢဝ်ႇၽူႈတွႆႇႁွၵ်ႈ / သၢႆမွၵ်ႇႁွမ်
27/04/2017