ပၢင်လိူၵ်ႈတင်ႈသွမ်ႈ ဝၼ်းတီႈ 1 လိူၼ်ဢေႊပရိူဝ်ႊ ပီ 2017 ၼႂ်းၸႄႈဝဵင်းမိူင်းသူႈၵေႃႈ ပႃႊတီႊႁူဝ်သိူဝ် (SNLD) ၵိၼ်ၶၢတ်ႇပေႉပုၼ်ႈ၊ ပေႉတင်းသၢမ်တီႈၼင်ႈ။

ၼႂ်းၸႄႈဝဵင်းမိူင်းသူႈၼႆႉ တင်းမူတ်းမီး 5 ပႃႇတီႇၶႅင်ႇၵၼ်။ မီးပႃႇတီႇႁူဝ်သိူဝ် (SNLD) ၊ ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇၼူၵ်ႉယုင်း (NLD) ၊ ပႃႇတီႇသၢင်ႇသီႈ (USDP) လႄႈ ပႃႇတီႇဝႃႉ (WLP) ၸိူဝ်းၼႆႉၶဝ်ႈၶႅင်ႇလိူၵ်ႈတင်ႈ။ ႁူဝ်ၵူၼ်းၽူႈမီးသုၼ်ႇတွတ်ႈၶႅပ်းၵၢင်ၸႂ် မီးမွၵ်ႈႁႃႈမိုၼ်ႇ။


တီႈယူႇၽွင်းတႅၼ်းသၽႃးၵူၼ်းမိူင်း ပႃႊတီႊႁူဝ်သိူဝ် ၸၢႆးဝိၼ်းဢေး (ႁွင်ႉ) ၸၢႆးထုၼ်းဢေး လႆႈၶႅပ်းၵၢင်ၸႂ် 10,216 ၶႅပ်း ၊ ပႃႇတီႇသိူဝ်ၽိူၵ်ႇလႆႈ 868 ၶႅပ်း၊ ပႃႇတီႇၼူၵ်ႉယုင်း လႆႈ 3,190 ၶႅပ်း ၊ ပႃႇတီႇသၢင်ႇသီႈ လႆႈ 3,484 ၶႅပ်း။


သၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ (1) ပႃႇတီႇႁူဝ်သိူဝ် ၸၢႆးလိၼ်းမျၢတ်ႉလႆႈ 4,764 ၶႅပ်း၊ ပႃႇတီႇသိူဝ်ၽိူၵ်ႇလႆႈ 576 ၶႅပ်း၊ ပႃႇတီႇၼူၵ်ႉယုင်းလႆႈ 2,817 ၶႅပ်း၊ ပႃႇတီႇဝႃႉ 81 ၶႅပ်း။ [သၽႃးၸႄႈမိူင်းမၢႆ(1) ၼႆႉ ၼေႃႇၽူႈတႅၼ်း ပႃႊတီႊသၢင်ႇသီႈတႄႉ လႆႈလူႉသဵင်ႈၵႂႃႇ ဢွၼ်ၼႃႈၼၼ်ႉလႄႈ ဢမ်ႇမီးၽူႈၶဝ်ႈၶႄႉ။]


သၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၵေႃႈ ပႃႊတီႊႁူဝ်သိူဝ် ၼၢင်းၵွင်ၶမ်း လႆႈ 5,753 ၶႅပ်းသေ ပေႉတၢင်ႇပႃႇတီႇဝႆႉ။ ပႃႇတီႇသိူဝ်ၽိူၵ်ႇလႆႈ 502 ၶႅပ်း၊ ပႃႇတီႇၼူၵ်ႉယုင်းလႆႈ 685 ၶႅပ်း၊ ပႃႇတီႇသၢင်ႇသီႈလႆႈ 1ယ558 ၶႅပ်း၊ ပႃႇတီႇဝႃႉလႆႈ 107 ၶႅပ်း။


ၵၢၼ်လိူၵ်ႈတင်ႈသွမ်ႈ တီႈၸႄႈဝဵင်းမိူင်းသူႈ တီႈၼင်ႈသၽႃးတင်း 3 တီႈၼႆႉ ပႃႇတီႇႁူဝ်သိူဝ် (SNLD) ဢွင်ႇပေႉတင်းမူတ်း။


ၼႂ်းၸႄႈဝဵင်းမိူင်းသူႈၼႆႉ မိူဝ်ႈပၢင်လိူၵ်ႈတင်ႈ 2015 ၼၼ်ႉ ယွၼ်ႉပိူဝ်ႈၼႃႈလိၼ်ဢမ်ႇၼိမ်သဝ်း၊ ပဵၼ်ပၢင်တိုၵ်းသိုၵ်းသိူဝ်ၼႆသေ ဢမ်ႇလႆႈၸတ်းပၢင်လိူၵ်ႈတင်ႈ၊ ၸင်ႇၶိုၼ်းလႆႈမႃးလိူၵ်ႈတင်ႈၼႂ်း ပၢင်လိူၵ်ႈတင်ႈသွမ်ႈ ပွၵ်ႈၵမ်းၼႆႉ။