ၸုမ်းတူင်ႉၼိုင်တူင်ႇဝူင်းတႆး CSO  ၼႂ်းၸႄႈဝဵင်းတူၼ်ႈတီး 25 ၸုမ်း တွတ်ႈၶႅပ်းၵၢင်ၸႂ်လိူၵ်ႈ ၸၢႆးတိၼ်ႇ ၶိုၼ်ႈပဵၼ်ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းတူၼ်ႈတီး တႃႇၶၢဝ်း တၢင်း 2 ပီ ။

ဝၼ်းတီႈ 30/03/2017 ယၢမ်းၵၢင်ၼႂ် 09:00-18:00 မူင်း ၸုမ်းတူင်ႉၼိုင်တူင်ႇဝူင်းတႆး ၼႂ်းၸႄႈ ဝဵင်းတူၼ်ႈတီး တင်းမူတ်း ဢွၼ်ၵၼ်ၶိုၼ်ႈႁွတ်ႈပၢင်ၵုမ် ၶတ်းလိူၵ်ႈႁူဝ်ပဝ်ႈမႂ်ႇ တႃႇၶၢဝ်းတၢင်း 2 ပီ ၼႂ်းပီ 2017-2018 ။ ပၢင်ၵုမ်ၼႆႉ ၸတ်းႁဵတ်းတီႈ ႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်း တူၼ်ႈတီး ၸိုင်ႈတႆး ပွတ်းၸၢၼ်း။ ၸၢႆးတိၼ်ႇ (ၽူႈတႅၼ်းၵဝ်ႇပႃႇတီႇသိူဝ်ၽိူၵ်ႇ ဝဵင်း လၢႆးၶႃႈ) လႆႈၶႅပ်းၵၢင်ၸႂ်ၼမ်သုတ်းသေ ထုၵ်ႇ ၶတ်းလိူၵ်ႈပဵၼ်ႁူဝ်ပဝ်ႈ ၵေႃလိၵ်ႈလၢႆး ၸႄႈဝဵင်းတူၼ်ႈတီး ၵႂႃႇဝႃႈၼႆ။

ၼၢင်းၼူၼ်းမူဝ် ၽူႈထတ်းသဵၼ်ႈသၢႆမၢႆ ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်း တူၼ်ႈတီး လၢတ်ႈဝႃႈ
“ပၢင်လိူၵ်ႈတင်ႈႁူဝ်ပဝ်ႈၼႆႉ ႁဝ်းၶႃႈဢဝ်ၸွမ်းပိူင်ၸုမ်းမီးဝႆႉသေ သွင်ပီ ၼိုင်ႈပွၵ်ႈ တေလိူၵ်ႈတင်ႈ ႁူဝ်ပဝ်ႈ။
မိူဝ်ႈၵူႈပွၵ်ႈတႄႉ 4 ပီ ၼိုင်ႈပွၵ်ႈ၊ ယွၼ်ႉဝႃႈ ၶၢဝ်းယၢမ်း မၼ်းႁိုင်လႄႈ ၸင်ႇလႅၵ်ႈပဵၼ် 2 ပီ ၼိုင်ႈပွၵ်ႈ။ ၼႂ်းပီၼႆႉ ႁူဝ်ပဝ်ႈပဵၼ် ပီႈၸၢႆးတိၼ်ႇ ယွၼ်ႉဝႃႈ လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈ” ဝႃႈၼႆ။

သိုပ်ႇလၢတ်ႈထႅင်ႈဝႃႈ ပၢင်လိူၵ်ႈတင်ႈႁူဝ်ပဝ်ႈ တီႈၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်း တူၼ်ႈ တီးၼႆႉ
ႁဝ်းၶႃႈ ဢဝ်သဵင်ၵူၼ်းတင်းၼမ်ဝႃႈသေ တွတ်ႈၶႅပ်းၵၢင်ၸႂ်ဢဝ် ၽႂ်လႆႈၶႅပ်း ၵၢင်ၸႂ်ၼမ်ၵေႃႈ ၵေႃႉၼၼ်ႉထုၵ်ႇလိူၵ်ႈပဵၼ်ႁူဝ်ပဝ်ႈ။ ၵူၺ်းၵႃႈ ႁူဝ်ပဝ်ႈလႄႈ ၸုမ်းပွင်ၵၢၼ်တႄႉ တၵ်းတေဢမ်ႇ လႆႈပဵၼ်ၸုမ်းပႃႇတီႇၵၢၼ်မိူင်း ဝႃႈၼႆ။

ပၢင်လိူၵ်ႈတင်ႈႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းတူၼ်ႈတီး ၼႂ်းပီ 2017-2018 ၼႆႉ ႁူဝ်ပဝ်ႈ ပဵၼ်ၸၢႆးတိၼ်ႇ၊ ၵႅမ်ႁူဝ်ပဝ်ႈ (1) လုင်းၸၢႆးဢေး၊ ၵႅမ်ႁူဝ်ပဝ်ႈ (2) ၸၢႆးဢွင်ႇမိၼ်း၊ ၽူႈၼမ်းၼႂ်း
ၸၢႆးၶမ်းၼုတ်း၊ ၵႅမ်ႁူဝ်ပဝ်ႈ( 1) ၸၢႆးယီႈၵွၼ်းၶိူဝ်း၊ ၵႅမ်ႁူဝ်ပဝ်ႈ (2) ၼၢင်းၶမ်းၼူၼ်း၊ ၽူႈယိပ်းငိုၼ်း
လုင်းၸၢႆးၶိတ်ႉတိၼ်ႇ၊ ၵႅမ်ၽူႈယိပ်းငိုၼ်း ပႃႈၼၢင်းသူၺ်ႇထေး၊ ၽူႈထတ်း သဵၼ်ႈ ၼၢင်းၼူၼ်းမူဝ်၊
ၵႅမ်ၽူႈထတ်းသဵၼ်ႈ လုင်းၸၢႆးၼုတ်း၊ ၽူႈပွင်ၵၢၼ် ၼႂ်း 10 ၵေႃႉၼႆႉ တၵ်းတေ ဢမ်ႇလႆႈၶဝ်ႈပႃးၼႂ်း
ပႃႇတီႇၵၢၼ်မိူင်းသေၵေႃႉ ဝႃႈၼႆ။

ၸုမ်းတူင်ႉၼိုင်တူင်ႇဝူင်းတႆး CSO ၼႂ်းၸႄႈဝဵင်းတူၼ်ႈတီး 25 ၸုမ်းၼႆႉ ၼိုင်ႈၸုမ်းလႂ် သူင်ႇတူဝ် တႅၼ်း
ၶဝ်ႈႁူမ်ႈတွတ်ႈၶႅပ်းၵၢင်ၸႂ် 3 ၵေႃႉ တင်းမူတ်းၽူႈမီးသုၼ်ႇၶဝ်ႈႁူမ်ႈတွတ်ႈၶႅပ်းၵၢင်ၸႂ် 75 ၵေႃႉ ဝႃႈၼႆ။

ဢွၼ်ၼႃႈၼႆႉ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီးၼႆႉ လုင်းၸၢႆးဢွင်ႇသႃႇ ႁပ်ႉႁဵတ်းႁူဝ်ပဝ်ႈမႃး
ၶၢဝ်းတၢင်း 4 ပီပၢႆ-ၼႆယဝ်ႉ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 24/04/2017