ပၢင်ၾိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉ လၢႆးပူင်သွၼ်လိၵ်ႈလၢႆးတႆး တီႈဝၢၼ်ႈၶူၵ်ႉၼမ်ႉ ဢိူင်ႇသၢမ်သိူဝ် 

ၸႄႈဝဵင်းၼွင်ၶဵဝ် မီးၽူႈၶဝ်ႈလဵပ်ႈႁဵၼ်း ႁိမ်း 100။

ပၢင်သွၼ်ၼႆႉ ၸတ်းႁဵတ်းတင်ႈတႄႇ ဝၼ်းတီႈ 18 လိူၼ်ဢေႊၿရိူဝ်ႊတေႃႇထိုင် ဝၼ်းတီႈ 30 လိူၼ် ဢေႊပရိူဝ်ႊ 2017 ၽူႈဢွၼ်ႁူဝ် ၸတ်းႁဵတ်းပဵၼ် ၵေႃလိၵ်ႈလၢႆး ၾိင်ႈငႄႈတႆး ၸႄႈဝဵင်း ၼွင်ၶဵဝ် ၸႄႈတွၼ်ႈၵျွၵ်ႉမႄး 

ၸိုင်ႈတႆးပွတ်းႁွင်ႇ၊ ၾိုၵ်းၽွၼ်ႉၽိူမ်ႉထႅမ်ၼမ်ႉၵတ်ႉမေႃသွၼ် တႃႇ ႁၢင်ႈႁႅၼ်းလူင်းပူင်သွၼ်လိၵ်ႈတႆး 

ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ ၼႆယဝ်ႉ။

ၸၢႆးဢွင်ႇမိူင်း ၽူႈပွင်ၵၢၼ်ၼႂ်းၵေႃလိၵ်ႈလၢႆးၾိင်ႈငႄႈတႆး/ ႁူဝ်ပဝ်ႈပႃႇတီႇႁူဝ်သိူဝ် ဝဵင်းၼွင်ၶဵဝ် လၢတ်ႈဝႃႈ “ ႁဝ်းၶႃႈၾိုၵ်းၽွၼ်ႉပၼ် တႃႇတေၶိုၼ်းပူင်သွၼ်ပၼ်လိၵ်ႈတႆး ၼႂ်းႁူင်းႁဵၼ်းလူင် ပွင် ၸိုင်ႈမၢၼ်ႈ၊ 

ပေႃးၽွင်းၶၢဝ်းပိုတ်ႇႁူင်းႁဵၼ်း။ ၼႂ်းၸႄႈဝဵင်းၼွင်ၶဵဝ်ႁဝ်းၶႃႈၼႆႉ လႆႈပူင်သွၼ် လိၵ်ႈတႆး ၼႂ်းႁူင်းႁဵၼ်း

လူင်ပွင်ၸိုင်ႈမၢၼ်ႈမႃး မီးၶၢဝ်းတၢင်းသွင်ပီယဝ်ႉ”  ဝႃႈၼႆ။

ပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး တီႈၸႄႈဝဵင်းၼွင်ၶဵဝ် ပွၵ်ႈၵမ်းၼႆႉ ၸတ်းႁဵတ်း ပဵၼ်ပွၵ်ႈ ၵမ်းတီႈ (4)။ မေႃသွၼ်လူင် ၸၢႆးၾႃႈ ၼမ်းၼႃႈ ပူင်သွၼ်ပၼ်ၵႂႃႇ ဝႃႈၼႆ။

ၼႂ်းၸႄႈဝဵင်းၼွင်ၶဵဝ်ၼႆႉ လႆႈသွၼ်လိၵ်ႈတႆး ၼႂ်းႁူင်းႁဵၼ်းလူင်ပွင်ၸိုင်ႈမႃး မီးၶၢဝ်းတၢင်း သွင်ပီယဝ်ႉ 

တႄႇဢဝ် ပီ 2014-2015 ၊ ပီ 2015-2016 ၼႆယဝ်ႉ။ ဝၼ်းပူင်သွၼ် ပၼ်လုၵ်ႈႁဵၼ်း သမ်ႉ တေပဵၼ်ဝၼ်းသဝ်

တင်းဝၼ်းဢႃးတိတ်ႉ၊ ႁူင်းႁဵၼ်းဢၼ်လႆႈပူင်သွၼ်ပၼ်သမ်ႉ တင်းမူတ်းမီး 45 ႁူင်းႁဵၼ်း၊ မေႃသွၼ်

တင်းမူတ်းမီး 150 ၵေႃႉ ဝႃႈၼႆ။

ၸၢႆးဢွင်ႇမိူင်း လၢတ်ႈဝႃႈ သင်ဝႃႈႁူင်းႁဵၼ်းလူင်ပွင်ၸိုင်ႈပိုတ်ႇထႅင်ႈၼႆ တေပူင်သွၼ်တီႈႁူင်းႁဵၼ်း ဢၼ်ႁဝ်း ပႆႇလႆႈပူင်သွၼ်ၸိူဝ်းၼႆႉထႅင်ႈ၊ ယဝ်ႉၵေႃႈ မေႃသွၼ်ၵေႃႈတေၽိူမ်ႉၶိုၼ်ႈမႃးထႅင်ႈ မေႃသွၼ်ၵဝ်ႇ တင်း မႂ်ႇ ႁႂ်ႈမီး 200 ပၢႆဝႃႈၼႆ။

ၼႂ်းၸႄႈဝဵင်းၼွင်ၶဵဝ်ၼႆႉ ႁူင်းႁဵၼ်းလူင်ပွင်ၸိုင်ႈမၢၼ်ႈ မိူၼ်ၼင်ႇ ႁူင်းႁဵၼ်းၸၼ်ႉဢွၼ်၊ ႁူင်းႁဵၼ်း 

ၸၼ်ႉၵၢင်လႄႈ ႁူင်းႁဵၼ်းၸၼ်ႉသုင် တင်းမူတ်းမီး 100 ပၢႆ ၼႆယဝ်ႉ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 19/04/2017