ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး/ပႃတီႇႁူဝ်သိူဝ် (SNLD) ၶွၼ်ႈၵၼ် သႂ်ႇႁႅင်း လူင်းႁႃသဵင် ၼႂ်းၸႄႈဝဵင်းၵဵင်းတုင် သေ ၶတ်းၸႂ် တႃႇဢွင်ႇပေႉ ပၢင်လိူၵ်ႈတင်ႈသွမ်ႈ။

ဝၼ်းတီႈ 1/4/2017 ၼႆႉ တေၸတ်းႁဵတ်းပၢင်လိူၵ်ႈတင်ႈသွမ်ႈ ယဝ်ႉလႄႈ တႃႇတေဢွင်ႇမၢၼ် ၼၼ်ႉ ၵေႃႉပဵၼ်ႁူဝ်ပဝ်ႈမိူင်းတႆးပွတ်းဢွၵ်ႇ ၸၢႆးဝိၼ်းမျၢတ်ႉဢူး (လုင်းလႅင်) ဢွၼ်ႁူဝ်ၼမ်းၼႃႈသေ တႄႇႁႃသဵင်မႃး တေႃႇယၢမ်းလဵဝ်။ ဝၼ်းတီႈ 22  တူဝ်ၵႅမ်ၽူႈၼမ်းၼႂ်းၵူႈလွင်ႈလွင်ႈ၊ ၽူႈၶၢၼ်ပၢၵ်ႇ ပႃႇတီႇႁူဝ်သိူဝ် ၸၢႆးလဵၵ်ႉ ႁွတ်ႈထိုင်ၵဵင်းတုင်သေ သႂ်ႇႁႅင်းႁႃသဵင် တႃႇလႆႈ တီႈၼင်ႈ ၽူႈတႅၼ်း သၽႃးၸႄႈမိူင်း ၶဵတ်ႇလိူၵ်ႈတင်ႈသွမ်ႈ မၢႆ 2 ၸႄႈဝဵင်းၵဵင်းတုင်။


ၽူႈတႅၼ်းသၽႃးၵူၼ်းမိူင်း ၸၢႆးႁၵ်ႉ (ၸၢႆးသီႇႁၵျေႃႇ) ၵေႃႉမႃးသႂ်ႇႁႅင်းႁႃသဵင် ၼႂ်းၵဵင်းတုင်ၼၼ်ႉလၢတ်ႈ ဝႃႈ -    “တႃႇပႃႇတီႇႁူဝ်သိူဝ်ႁဝ်း တေဢွင်ႇပေႉ ပၢင်လိူၵ်ႈတင်ႈသွမ်ႈ တၢင်းၵဵင်းတုင်ၼႆႉ ႁဝ်းၶႃႈထႅမ် ဢဵၼ်ႁႅင်းသေ ၶတ်းၸႂ်ဝႆႉယူႇဢေႃႈ။ မိူဝ်ႈလဵဝ်ဢၼ်ႁဝ်းၶႃႈ တိုၵ်ႉႁၢင်ႈႁႅၼ်းတႄႉ ၵူၼ်းဢၼ်တေ ၸွႆႈထႅမ်ပႂ်ႉပၼ်ႁူင်းတွတ်ႈၶႅပ်းၵၢင်ၸႂ် ၼၼ်ႉဢေႃႈ။ ၼႂ်းၸႄႈဝဵင်း ၵဵင်းတုင်ၼႆႉငဝ်းလၢႆးမၼ်း လႅပ်ႈတေဢွင်ႇပေႉယူႇ၊ ႁဝ်းၶႃႈမီးႁႅင်းၸႂ်ယူႇၶႃႈ” - ဝႃႈၼႆ။


ၶဵတ်ႇလိူၵ်ႈတင်ႈ မၢႆသွင် ၼႂ်းၸႄႈဝဵင်းၵဵင်းတုင်ၼႆႉ မီး 14 ဢိူင်ႇ၊ ႁူင်းတွတ်ႈ ၶႅပ်းၵၢင်ၸ်ႂ  57 တီႈ၊ ၸၢဝ်းၶိူဝ်း ၸိူဝ်းယူႇသဝ်းတႄႉ ပီႈၼွင်ႉတႆးၶိုၼ်၊ လိုဝ်ႉ၊ ဢႃးၶႃႇ(ဢီႇၵေႃႈ)၊ လႃးႁူႇ (မူးသိူဝ်း)၊ လွႆလႃႉ၊ ဝႃႉ၊ ဢႅၼ်ႇ၊ မၢၼ်ႈ၊ ၶႄႇလႄႈ ၵလႃးၵေႃႈမီးၽွင်ႈ။


ပႃတီႇဢၼ်တေၶဝ်ႈၶႅင်ႇတႄႉ   ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇ တီႇၼူၵ်ႉယုင်း၊  ပႃႇတီႇသၢင်ႇသီႈ၊  ပႃႇတီႇဢႃးၶႃႇ၊  ပႃႇတီႇလႃးႁူ၊ ၸဵမ်ၸိူဝ်းၼႆႉ။  တီႈၼင်ႈဢၼ်ႁၢမ်းပဝ်ႈဝႆႉ ၼႆႉတႄႉ ပဵၼ်ၵွပ်ႈ ၽူႈတႅၼ်းပႃႇတီႇဢႃးၶႃႇ ဢူးပီႊထိူဝ်ႊတွင်းၸဵင်ႇ လူႉတၢႆၵႂႃႇ - လႆႈႁႃၽူႈတႅၼ်း လိူၵ်ႈတင်ႈသွမ်ႈၶိုၼ်း။


မိူဝ်ႈပၢင်လိူၵ်ႈတင်ႈပတ်းပိုၼ်ႉတူဝ်ႈမိူင်း ပီ 2015 ၼၼ်ႉ ပႃႇတီႇတႆး သၢမ်ပႃႇတီႇ  မိူၼ်ၼင်ႇ  ပႃႇတီႇ ႁူဝ်သိူဝ်၊ သိူဝ်ၽိူၵ်ႇ၊ ၵွင်ၸႆး  ၶဝ်ႈၶႅင်ႇ သေတႃႉ ထုင်ႉလိၼ်ပွတ်းဢွၵ်ႇၶူင်း ၼႆႉ ပႃႇတီႇတႆး ဢမ်ႇ လႆႈသေတီႈၼင်ႈ။ ဢၼ်လႆႈတီႈၼင်ႈၼမ်လိူဝ်ပိူၼ်ႈတႄႉ ပဵၼ်ပႃႇတီႇ သၢင်ႇသီႈ (ပႃႇတီႇၶွင်သိုၵ်း တပ်ႉမတေႃႇမၢၼ်ႈ) ၊ ဢၼ်တၢမ်းမႃးတႄႉ ပဵၼ်ပႃႇတီႇၼူၵ်ႉယုင်း (ပႃႇတီႇၼၢင်းဢွင်ႇသၢၼ်းသုၵျီႇ)၊ ပႃႇတီႇၸၢဝ်းၶိူဝ်း မိူၼ်ၼင်ႇဢႃးၶႃႇ၊ လႃးႁူႇ ၸိူဝ်းၼႆႉ ၵေႃႈ လႆႈတီႈၼင်ႈၽွင်ႈ။