ၽွင်းတႅၼ်းသၽႃးၸႄႈမိူင်း ဝဵင်းသီႇပေႃႉ ၼၢင်းၸၢၼ်းၸၢၼ်းဢေး တၢင်ႇလၢတ်ႈၼႂ်းပၢင်ၵုမ်သၽႃး လွင်ႈပၵ်းပိူင်ၾၢႆႇလိူမ်ႈလႆႇၸႄႈဝဵင်း၊ ထုၵ်ႇလီၶိုၼ်းမႄးၵႄႈပဵၼ်ပၵ်းပိူင်မႂ်ႇ ပိူဝ်ႈတႃႇႁဵတ်းၵၢၼ်ၵႂႃႇမိူဝ်းၼႃႈ ငၢႆႈလူမ်လႄႈ မီးလွင်ႈၽဵင်ႇပဵင်းပဵၼ်ထမ်း။

တီႈပၢင်ၵုမ်သၽႃးမိူင်းတႆး ဝၼ်းထူၼ်ႈ 2 ဝၼ်းတီႈ 21//03/2017 ဢၼ်ၸတ်းႁဵတ်းတီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၽွင်းတႅၼ်းသၽႃးၸႄႈမိူင်း ပႃႇတီႇႁူဝ်သိူဝ် (SNLD) ၸႄႈဝဵင်းသီႇပေႃႉ ၼၢင်းၸၢၼ်းၸၢၼ်းဢေး တၢင်ႇလၢတ်ႈၼႂ်းသၽႃး ၵဵဝ်ႇၵပ်းလွင်ႈပၵ်းပိူင် ၸုမ်းၾၢႆႇလိူမ်ႈလႆႇၸႄႈဝဵင်း ထုၵ်ႇလီမူၼ်ႉမႄးၶိုၼ်းတမ်းဝၢင်းပိူင်မႂ်ႇ၊ ပိူဝ်ႈတႃႇႁႂ်ႈမီးလွင်ႈငၢႆႈလူမ်ၵႂႃႇမိူဝ်းၼႃႈလႄႈ မီးလွင်ႈၽဵင်ႇပဵင်းပဵၼ်ထမ်း တေႃႇၵူၼ်းဝၢၼ်ႈၵူၼ်းမိူင်း၊ ဢမ်ႇႁိူင်ႈၵိူင်းၾၢႆႇလႂ်။


ၼၢင်းၸၢၼ်းၸၢၼ်းဢေး လၢတ်ႈၼႄလွင်ႈတၢင်းလွင်ႈလႆႈတၢင်ႇလၢတ်ႈဝႃႈ- "ပိူင်လူင်မၼ်း ၼႂ်းမိူင်းတႆးၼႆႉ မီးဝႆႉပၵ်းပိူင်မၼ်းယဝ်ႉ၊ ၵူၺ်းၵႃႈ လွၵ်းလၢႆးဢၼ်တေႁဵတ်းမၼ်း ပႆႇမီး။ ၵွပ်ႈၼၼ်လႄႈ မိူဝ်ႈလူင်းမိုဝ်း ႁဵတ်းသၢင်ႈတႄႉတႄႉ မၼ်းႁဵတ်းသၢင်ႈယၢပ်ႇ၊ တေႁဵတ်းၸွမ်းလၢႆးၸိူင်ႉႁိုဝ်ၵေႃႈဢမ်ႇႁူႉ။ မိူဝ်ႈလိူၵ်ႈၵေႃပွင်ၵၢၼ် ၾၢႆႇလိူမ်ႈလႆႇၼၼ်ႉၵေႃႈ ဢမ်ႇမီးဝႃႈ ၵူၼ်းၸိူင်ႉႁိုဝ်တေလႆႈၶဝ်ႈလိူၵ်ႈ၊ ဢဵၼ်ႁႅင်းၵူၼ်းၵေႃႈ တီႈဢေႇမၼ်း တေလႆႈမီးၵႃႈႁိုဝ်၊ တေလႆႈမီးႁႃႈသိပ်းႁႃႉ၊ တေလႆႈမီးၼိုင်ႈပၢၵ်ႇႁိုဝ် ၸိူဝ်းၼႆႉၵေႃႈဢမ်ႇပႃး။ ၵွပ်ႈၼၼ် ၶဝ်ႁွင်ႉၵူၼ်းၸိူဝ်းဢၼ်ၸမ်ၸႂ်ၶဝ် ဢၼ်ၶဝ်ႈၸႂ်ၵၼ်ၸိူဝ်းၼၼ်ႉမွၵ်ႈ 20-30 သေၶဝ်ႈမႃး၊ မိူၼ်ၼင်ႇၶဝ်ၼင်ႇၵၼ်လိူၵ်ႈၵၼ်ၵူၺ်း"-ဝႃႈၼႆ။


သိုပ်ႇလၢတ်ႈဝႃႈ- ပေႃးဝႃႈႁဵတ်းႁိူၼ်း၊ မၼ်းပူၼ်ႉပႅၼ်ၵႂႃႇၵႃႈႁိုဝ် ၸင်ႇလႆႈႁွင်ႉဝႃႈပူၼ်ႉပႅၼ် (ၵျူးၵျေႃႇ)ၼႆ ၼႂ်းလွၵ်းၵၢၼ်မၼ်းၼၼ်ႉ ဢမ်ႇမီးဝႆႉ။ မိူဝ်ႈဢၼ်ႁဵတ်းသၢင်ႈပူၼ်ႉပႅၼ်ၵႂႃႇယဝ်ႉ ၵူၼ်းၸိူဝ်းမိုတ်ႈၵိုဝ်းၸဝ်ႈၼႃႈတီႈ ၶႃႈႁၢပ်ႇၵၢၼ်ၶုၼ်ၶဝ် သမ်ႉဢမ်ႇလႆႈယႃႉ၊ ၵူၼ်းၸိူဝ်းဢမ်ႇမိုတ်ႈသမ်ႉလႆႈယႃႉ မၼ်းပဵၼ်ဝႆႉလွင်ႈသၢၼ်ၶတ်းၵၼ် ၸိူင်ႉၼႆဝႆႉ။ ၵွပ်ႈၼၼ် ႁၼ်ထိုင်ဝႃႈ ၵိုင်ႇလီၶိုၼ်းတူၺ်းပပ်ႉပၵ်းပိူင်ၼၼ်ႉလီလီသေ ၶိုၼ်းမူၼ်ႉမႄး၊ ထုၵ်ႇလီၶိုၼ်းသႂ်ႇပၵ်းပိူင်မၼ်းတီႈလႂ်ၸိူဝ်းၼႆႉ ၸင်ႇလႆႈတၢင်ႇလၢတ်ႈလွင်ႈၼႆႉ- ဝႃႈၼႆ။


"မိူဝ်ႈလဵဝ်ၼႆႉ ႁဝ်းတၢင်ႇၵႂႃႇတႃႇတေၶိုၼ်းမႄး၊ သင်ဝႃႈၶဝ်မႄးမႃးယဝ်ႉသေ ပဵၼ်ႁပ်ႉႁွင်းၵႂႃႇယဝ်ႉၼႆ ၼႃႈၵၢၼ်ဢၼ်ၶဝ်တေႁဵတ်းၵႂႃႇၼၼ်ႉ မၼ်းတေငၢႆႈလိူဝ်မႃး၊ ၵွပ်ႈဝႃႈတေႁဵတ်းၸိူင်ႉႁိုဝ်ၼႆ မၼ်းမီးပိူင်းမၼ်းဝႆႉမူတ်းယဝ်ႉ၊ မၼ်းတေဢမ်ႇၸၢင်ႈမီးလွင်ႈထဵင်ၵၼ် လွင်ႈၽိတ်းၽႅၵ်ႇၵၼ်၊ မၼ်းၸၢင်ႈႁဵတ်းၵၢၼ်လွတ်ႈလွတ်ႈလႅဝ်းလႅဝ်း ၶႅမ်ႉလႅပ်ႈၵႂႃႇ။ ၸိူဝ်းႁဵတ်းႁိူၼ်းပူၼ်ႉပႅၼ်ၵႂႃႇၼိူဝ်တၢင်း၊ ၵမ်ႈၽွင်ႈၵေႃႈလႆႈယႃႉပႅတ်ႈတင်းၼမ် လႆႈယႃႉပႅတ်ႈတင်းလင်ၵေႃႈမီး။ ၵူၺ်းၵႃႈ ႁိူၼ်းတေႃႇၼႃႈၵၼ်သေ ၾၢႆႇၼႆႉသမ်ႉလႆႈယႃႉ ၾၢႆႇပုၼ်ႉသမ်ႉဢမ်ႇလႆႈယႃႉ မၼ်းပဵၼ်ၸိူင်ႉၼႆဝႆႉ။ ၵွပ်ႈၼႆ သင်ဝႃႈမီးဝႆႉပၵ်းပိူင်ဢၼ်ၼႆႉ ၶႅမ်ႉၶႅမ်ႉလႅပ်ႈလႅပ်ႈၼႆတႄႉ ပေႃးဝႃႈယႃႉၵေႃႈယႃႉတင်းမူတ်း၊ ပေႃးဝႃႈဢမ်ႇယႃႉၼႆၵေႃႈ ဢမ်ႇယႃႉ၊ မၼ်းတေလႆႈၸွမ်းပၵ်းပိူင်မၼ်း- ၼၢင်းၸၢၼ်းၸၢၼ်းဢေး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။


ဢၼ်ၼၢင်းၸၢၼ်းၸၢၼ်းဢေး တၢင်ႇလၢတ်ႈၵႂႃႇၼႂ်းပၢင်ၵုမ်သၽႃးမိူင်းတႆး ၵဵဝ်ႇၵပ်းလွင်ႈၼႆႉ မီးၵူၼ်းၵမ်ႉထႅမ် 2 ၵေႃႉ၊ ပဵၼ်ပႃႇတီႇၼူၵ်ႉလႅင်တင်းသွင်ၵေႃႉ၊ ၵေႃႉၼိုင်ႈယူႇၵလေႃး ၵေႃႉၼိုင်ႈယူႇလွၵ်ႈၸွၵ်ႇ။ တၢင်ႇၵေႃႉတၢင်ႇၸိူဝ်းၵေႃႈ ဢွၼ်ၵၼ်ႁၼ်လီၸွမ်းဝႃႈ လွင်ႈပၵ်းပိူင်ၾၢႆႇလိူမ်ႈလႆႇၼႆႉ ၵိုင်ႇလီမူၼ်ႉမႄး ၵိုင်ႇလီမီးယူႇ၊ ၵူၺ်းၵႃႈ လွင်ႈတၢင်းဢၼ်ဢမ်ႇပဵၼ်ၵမ်ႉထႅမ်ၸွမ်းၼၼ်ႉ ယွၼ်ႉပိူဝ်ႈၶၢဝ်းယၢမ်းမၼ်းဢေႇ- လႆႈႁူႉၼင်ႇၼႆ။