ပႃႇတီႇသိူဝ်ၽိူၵ်ႇ လူင်းပိုၼ်ႉတီႈႁူပ်ႉထူပ်း ၵူၼ်းမိူင်း မိူင်းသူႈ တႃႇပေႉပၢင်လိူၵ်ႈတင်ႈသွမ်ႈ၊ တႃႇတွင်ႈ ထၢမ်သဵင်ႁူဝ်ၸႂ်ၵူၼ်းမိူင်း ၸဵမ်ၸိူဝ်းၼႆႉ။

ဝၼ်းတီႈ 10/03/2017 ၶၢဝ်းယၢမ်း 12:30-15:00 မူင်း ပႃႇတီႇသိူဝ်ၽိူၵ်ႇ (SNDP) လူင်းသူၼ်းတုမ် ပေႃႈမႄႈပီႈၼွင်ႉၵူၼ်းမိူင်း တႃႇတေထိုင်မႃး ပၢင်လိူၵ်ႈတင်ႈသွမ်ႈ ႁူဝ်လိူၼ်ဢေႊပရိူဝ်ႊ ပီ 2017 တီႈ ဝၢၼ်ႈၼႃးပေ၊ ဢိူင်ႇၼမ်ႉတွင် ၸႄႈဝဵင်းမိူင်းသူႈ ၸိုင်ႈတႆး ပွတ်းၸၢၼ်း ဝႃႈၼႆ။


ၸၢႆးဢွင်ႇမိၼ်ႉၶၢႆႇ ၽူႈၼမ်းၼႂ်း ပႃႇတီႇသိူဝ်ၽိူၵ်ႇ ၸႄႈဝဵင်းမူႇၸႄႈ လၢတ်ႈဝႃႈ “ ႁဝ်းၶႃႈတေလူင်း ပိုၼ်ႉတီႈႁူပ်ႉထူပ်းပေႃႈမႄႈပီႈၼွင်ႉၵူၼ်းမိူင်းႁဝ်းၶႃႈတႄႉ တႄႇဢဝ် ဝၼ်းတီႈ 26/02/2017 မႃး။ ၼႂ်းၸႄႈဝဵင်းၵေးသီးတႄႉ ႁဝ်းၶႃႈလႆႈလူင်းပိုၼ်ႉတီႈႁူပ်ႉထူပ်းပေႃႈမႄႈၵူၼ်းမိူင်း ယၢမ်းတွၼ်ႈ ၵၢင်ၶမ်ႈ၊ ယွၼ်ႉဝႃႈ တွၼ်ႈၵၢင်ဝၼ်း ပီႈၼွင်ႉၵူၼ်းမိူင်းႁဝ်းဢမ်ႇတူဝ်ႈတၼ်းၵၼ်” ဝႃႈၼႆ။


ၼႂ်းပႃႇတီႇသိူဝ်ၽိူၵ်ႇ ၽူႈတေၶဝ်ႈၶႅင်ႇသၽႃးၵူၼ်းမိူင်း ပဵၼ်ၼၢင်းၶမ်းယဵၼ်ႇဢွင်ႇ၊ ၸႄႈမိူင်း မၢႆၼိုင်ႈ ပဵၼ်ၸၢႆးပႃႉထုၼ်း၊ မၢႆသွင်ပဵၼ် ၼၢင်းၸၢမ်ဢူး ၸဵမ်ၸိူဝ်းၼႆႉ။
လိူဝ်ၼၼ်ႉ ၼႂ်းၸႄႈဝဵင်းၵေးသီးသမ်ႉ ၽူႈတႅၼ်းသၽႃးၵူၼ်းမိူင်း ပဵၼ်ၼၢင်းတိၼ်ႇဢူး ၸႄႈမိူင်းမၢႆ ၼိုင်ႈ ပဵၼ် ၼၢင်းၼူၺ်းၼူၺ်း မၢႆ 2 ပဵၼ်ၼၢင်းမွၼ်းဢွင်ႇ။ တီႈဝဵင်းၵဵင်းတုင် ၽူႈတႅၼ်းသၽႃး ၶဵတ်ႇလိူၵ်ႈတင်ႈမၢႆသွင် ပဵၼ်ၻွၵ်ႊတိူဝ်ႊၸၢႆးယွတ်ႈႁွင် တေၶဝ်ႈၶႅင်ႇ။


လုၵ်ႈၸုမ်းပႃႇတီႇသိူဝ်ၽိူၵ်ႇ(SNDP) တႄႉ မူႇၸႄႈ၊ ၵူတ်ႉၶၢႆ၊ ၵျွၵ်ႉမႄး၊ သီႇပေႃႉ/ၼမ်ႉလၼ်ႈ၊ တူၼ်ႈတီး၊ မိူင်းပၼ်ႇ၊ မိူင်းသၢတ်ႇ၊ မိူင်းၽျၢၵ်ႈ၊ တႃႈၶီႈလဵၵ်း လႆႈႁူမ်ႈၵၼ် လူင်းသူၼ်းတုမ်။


ၼႂ်းပိုၼ်ႉတီႈၼႆႉ လိူဝ်သေပႃႇတီႇသိူဝ်ၽိူၵ်ႇ၊ ႁူဝ်သိူဝ်ယဝ်ႉ တေလႆႈၶႅင်ႇၵၼ်- ၶဝ်ယင်းတေလႆႈၶႅင်ႇပႃး ပႃႇတီႇၼူၵ်ႉယုင်း၊ ပႃႇတီႇသၢင်ႇသီႈ ဝႃႈၼႆ။