တူဝ်တႅၼ်းပႃႇတီႇႁူဝ်သိူဝ် SNLD ၻွၵ်ႊတိူဝ်ႊၸၢႆးၼေႃႇၶိူဝ်း ၵႂႃႇၶဝ်ႈႁူမ်ႈပၢင်ဢုပ်ႇၵုမ် လွင်ႈၼၢင်း ယိင်း ၸၼ်ႉၵူႈၸိုင်ႈမိူင်း တီႈမိူင်းပူႊၻၼ်ႊ ပိူဝ်ႈဢဝ်ပၢႆးဝူၼ်ႉမႃးပူၵ်းပွင် ၼၢင်းယိင်းၼႂ်းမိူင်းတႆး ႁႂ်ႈၶိုတ်းၸၼ်ႉလုမ်ႈၾႃႉ။

Photo By Dr. Sai Nor Khay

ဝၼ်းတီႈ 08-10/03/2017 တူဝ်တႅၼ်းငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် SNLD ၻွၵ်ႊတိူဝ်ႊၸၢႆးၼေႃႇၶိူဝ်း ၵႂႃႇၶဝ်ႈႁူမ်ႈပၢင်ဢုပ်ႇၵုမ် လွင်ႈၼၢင်းယိင်း ဢၼ်ၸုမ်းတူင်ႉၼိုင် ႁႂ်ႈၵူႈၵေႃႉမီးသုၼ်ႇႁူမ်ႈလႄႈပိူင်တီႇမူဝ်ႇၶရေႇၸီႇ ၸၢဝ်းၶိူဝ်းၻႅၼ်ႊမၢၵ်ႊ Danish Institute for Parties and Democracy – DIPD ဢွၼ်ႁူဝ်သေၸတ်းႁဵတ်း။ မီးတူဝ်တႅၼ်းမိူင်းႁူမ်ႈတုမ် မွၵ်ႈ10 ၵေႃႉ၊ တူဝ်တႅၼ်းမိူင်းၼီႊပေႃႊမွၵ်ႈ10ပၢႆလႄႈ ၵူၼ်းမိူင်းပူႊၻၼ်ႊ မွၵ်ႈ100ပၢႆႁူမ်ႈတင်းမူတ်းမွၵ်ႈ 150ၵေႃႉၶဝ်ႈႁူမ်ႈ။ပၢင်ၵုမ် ၸတ်းႁဵတ်းတီႈ Terma Linca Resort & Spa, Thimphu, Bhutan။


ၼႂ်းပၢင်ၼႆႉ ဢုပ်ႇဢူဝ်းၵၼ်ၵဵဝ်ႇလူၺ်ႈလွင်ႈၼၢင်းယိင်း၊ မိူၼ်ၼင်ႇ ၼၢင်းယိင်းထုၵ်ႇလီၶဝ်ႈပႃးၼႂ်း ၵၢၼ်မိူင်းၸိူင်ႉႁိုဝ်၊ ၼၢင်းယိင်းၼႂ်းၵၢၼ်ၽွင်းငမ်း၊ ၼၢင်းယိင်းၼႂ်းလွင်ႈဢွၼ်ႁူဝ်၊ ၼၢင်းယိင်း ၼႂ်းၶၵ်ႉတွၼ်ႈ ၵၢၼ်တႅပ်းတတ်း ၵၢၼ်ဝၢင်းၽႅၼ်ၸိူဝ်းၼႆႉ။


ၻွၵ်ႊတိူဝ်ႊၸၢႆးၼေႃႇၶိူဝ်း လၢတ်ႈဝႃႈ- “ပၢင်ႁူပ်ႉထူပ်းၼႆႉ မၼ်းပဵၼ်ပၢင်ဢၼ်ၾိုၵ်းပၼ် မိူင်းဢၼ် ပႆႇလႆႈတီႇမူဝ်ႇၶရေႇၸီႇ ၼင်ႇႁိုဝ် ၼၢင်းယိင်း ပေႃးတေမီးသုၼ်ႇလႆႈ ၽဵင်ႇပဵင်း ။ တွၼ်ႈတႃႇ ဝၢၼ်ႈမိူင်း တေၶိုၼ်ႈယႂ်ႇၵတ်းယဵၼ်ၼၼ်ႉၵေႃႈ ၼၢင်းယိင်းမီးသုၼ်ႇၸွမ်းယူႇ ၊ မိူင်းတႆးၵေႃႈ ၼင်ႇႁိုဝ် ပေႃးတေၶိုၼ်ႈယႂ်ႇၼၼ်ႉ ၼၢင်းယိင်းတႆး ထုၵ်ႇလီဢွၼ်ၵၼ် ၶဝ်ႈပႃးၼႂ်းၶၵ်ႉတွၼ်ႈ ၵၢၼ်မိူင်းၼမ်ၼမ်။ 3 ပုၼ်ႈ1 ပုၼ်ႈ ဢၼ်ဝႃႈၼႆႉၼၢင်းယိင်းတေလႆႈပႃး30ၼႂ်း100 ဝႃႈၼႆ။


ပၢင်ႁူပ်ႉထူပ်း ဢုပ်ႇၵုမ်လွင်ႈၼၢင်းယိင်းၼႆႉ တႄႇၸတ်းႁဵတ်းမႃးမိူဝ်ႈပီ 2015။ ပွၵ်ႈတီႈ 1 ၸတ်း ႁဵတ်းတီႈၼေႇပျီႇတေႃႇ မိူင်းႁူမ်ႈတုမ်မျၢၼ်ႇမႃႇ ၊ ပွၵ်ႈ2 ၸတ်းႁဵတ်းတီႈ မိူင်းၼီႊပေႃႊ၊ ပွၵ်ႈၼႆႉ ပဵၼ်ပွၵ်ႈတီႈ3  ပီၼႃႈမႃးၵေႃႈ တေၸတ်းႁဵတ်းၵႂႃႇတိၵ်းတိၵ်း ဝႃႈၼႆ။