ၼႃႈၵၢၼ်လိူၵ်ႈတင်ႈသွမ်ႈ ဢၼ်တေၸတ်းႁဵတ်းၽွင်းႁူဝ်လိူၼ် ဢေႊပရိူဝ်ႊၼႆႉ ဢိင်ၼိူဝ်ပႃႇတီႇႁူဝ်သိူဝ် ႁွင်ႉမွၵ်ႇသေ မီးၽူႈႁွင်ႉၽဵင်းၵႂၢမ်းတႆး ၸိုဝ်ႈသဵင်ယႂ်ႇလၢႆလၢႆၵေႃႉ မႃးႁွင်ႉၽဵင်းၵႂၢမ်း လဝ်ႇမူၼ်ႈတူၼ်ႈၸႂ်ပၼ် ၵူၼ်းမိူင်း၊ ပၼ်ႁႅင်းၸႂ်ၵူၼ်းမိူင်း ၼႂ်းၸႄႈဝဵင်းၵေးသီး မိူင်းသူႈ။

ပၢင်ႁွင်ႉၽဵင်းၵႂၢမ်းၼႆႉ ဝၼ်းတီႈ20/03/2017 (မိူဝ်ႈၼႆႉ) တင်ႈတႄႇၶၢဝ်းယၢမ်း 9 မူင်းၵၢင်ၼႂ် ထိုင် 3 မူင်းဝၢႆးဝၼ်း၊ ၸတ်းႁဵတ်းတီႈတူၼ်ႈမႆႉႁုင်း ၼွင်ၵေႃႈ ၸႄႈဝဵင်းၵေးသီး။ မီးၽူႈႁွင်ႉၵႂၢမ်းတႆးၸိုဝ်ႈသဵင်ယႂ်ႇမိူၼ်ၼင်ႇ ၸၢႆးဢွင်ႇထီးၶမ်း၊ ၸၢႆးသၢႆၾူၼ်၊ ၸၢႆးလဵၵ်ႉ ဢိၵ်ႇၽူႈႁွင်ႉၵႂၢမ်းထႅင်ႈလၢႆလၢႆၵေႃႉ ႁူမ်ႈၵၼ်မႃးႁွင်ႉၽဵင်းၵႂၢမ်း လဝ်ႇမူၼ်ႈတူၼ်ႈၸႂ် ပၼ်ႁႅင်းၵူၼ်းမိူင်း၊ တိုၵ်းသူၼ်းႁႂ်ႈၵူၼ်းမိူင်းတႆး တွတ်ႈၶႅပ်းပၼ်သဵင် ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းဝၼ်းတီႈ 01/04/2017 တေထိုင်ၼႆႉ။


ၸၢႆးသၢႆၾူၼ် ၽူႈႁွင်ႉၽဵင်းၵႂၢမ်းတႆးၸိုဝ်ႈသဵင်ယႂ်ႇ ယၢမ်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ- “ ယူႇတီႇႁဝ်းၶႃႈ ၽူႈႁွင်ႉၽဵင်း ၵႂၢမ်းလၢႆလၢႆၵေႃႉႁူမ်ႈၵၼ်သေ တေၵႂႃႇပၼ်ႁႅင်းလဝ်ႇမူၼ်ႈတူၼ်ႈၸႂ် ပီႈၼွင်ႉႁဝ်းၶႃႈ တၢင်းပွတ်းၸၢၼ်း။ ဢွၼ်တၢင်းသုတ်းတႄႉ ႁဝ်းၶႃႈတေၵႂႃႇပၼ်ႁႅင်း ပီႈၼွင်ႉႁဝ်းၶႃႈတၢင်းပွတ်းၵေးသီး၊ ယဝ်ႉၵေႃႈ မိူင်းၼွင်လႄႈ မိူင်းသူႈ။ လွင်ႈႁူပ်ႉထူပ်းပၼ်ႁႅင်းပီႈၼွင်ႉႁဝ်းၶႃႈသမ်ႉ ယူႇတီႈၸုမ်းပၢႆးမွၼ်းတႆးႁဝ်းၶႃႈ လႆႈဢဝ်ႁႅင်းတူဝ်ႁႅင်းၸႂ်သေ ဢဝ်ၼမ်ႉၸႂ်ၸေႇတၼႃႇသေလူင်းလဝ်ႇမူၼ်ႈတူၼ်ႈၸႂ် ပၼ်ႁႅင်း ပီႈၼွင်ႉႁဝ်းၶႃႈၵႂႃႇ တႃႇပၢင်လိူၵ်ႈတင်ႈသွမ်ႈ ဢၼ်တေထိုင်မႃးၼႆႉ။ ၵူၺ်းၵႃႈ တၢင်းပွတ်းဢွၵ်ႇၶူင်း ၸႄႈဝဵင်းၵဵင်းတုင်တႄႉ ႁဝ်းၶႃႈ ဢမ်ႇတၼ်းလႆႈၵႂႃႇလဝ်ႇမူၼ်ႈ ပၼ်ႁႅင်းပီႈၼွင်ႉႁဝ်းၶႃႈယဝ်ႉ”- ဝႃႈၼႆ။


ၸွမ်းၼင်ႇၶပ်ႉမၢႆပၢင်ပွႆးႁွင်ႉၽဵင်းၵႂၢမ်းမီးဝႆႉၼၼ်ႉ ဝၼ်းတီႈ 20/03/2017  ၸတ်းႁဵတ်းတီႈတူၼ်ႈမႆႉႁုင်း ၼွင်ၵေႃႈ ၸႄႈဝဵင်းၵေးသီး။ ဝၼ်းတီႈ 21/03/2017 တေၸတ်းႁဵတ်းတီႈ ပၢင်ႇပွႆးၾၢႆႇဢွၵ်ႇဝဵင်း မိူင်းၼွင်။ ဝၼ်းတီႈ 22/03/2017  တေၸတ်းႁဵတ်းတီႈ ပွၵ်ႉ 4 ၸႄႈဝဵင်းမိူင်းသူႈ။ ၽူႈႁွင်ႉၽဵင်းၵႂၢမ်းၸိုဝ်ႈသဵင်ယႂ်ႇ ၸိူဝ်းမႃးႁွင်ႉၽဵင်းၵႂၢမ်း ၸွမ်းၼင်ႇလႆႈပူၵ်းပၢႆႉပိုၼ်ၽၢဝ်ႇၵႂႃႇၼၼ်ႉမီး ၸၢႆးလၢဝ်သႂ်၊ ၸၢႆးသႅင်ၸွမ်ၾႃႉ၊ ၸၢႆးဢွင်ႇထီးၶမ်း၊ ၸၢႆးထႅၼ်ႈလႅဝ်း၊ ၼၢင်းလၢဝ်ၼုမ်ႇႁွမ်၊ ယိင်းယိင်းၶိူဝ်း၊ ၸၢႆးသၢႆၾူၼ်၊ ၸၢႆးလဵၵ်ႉ လႄႈ ၸၢႆးၽွၼ်းမၢဝ်း ၸိူဝ်းၼႆႉ။


မိူဝ်ႈပီ 2015 ပူၼ်ႉမႃးၼၼ်ႉ ယူႇတီႈၸုမ်းပၢႆးမွၼ်းတႆး ၽူႈႁွင်ႉၽဵင်းၵႂၢမ်းတႆး လၢႆလၢႆၵေႃႉႁူမ်ႈၵၼ်သေ ဢတ်းဢွၵ်ႇၽဵင်းၵႂၢမ်း ပၼ်ႁႅင်းပႃႇတီႇႁူဝ်သိူဝ်၊ လူင်းသူၼ်းတုမ် ႁွင်ႉၽဵင်းၵႂၢမ်း ပၼ်ႁႅင်း မႃးၸိူင်ႉၼႆၼင်ႇၵဝ်ႇ။


ပႃႇတီႇၵၢၼ်မိူင်း ဢၼ်တေၶဝ်ႈၶႅင်ႇၵၼ် ၼႂ်းၸႄႈဝဵင်းမိူင်းသူႈ၊ ၵေးသီးၼႆႉ မီးပႃႇတီႇတႆး 2 ပႃႇတီႇ မိူၼ်ၼင်ႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ၼွၵ်ႈသေၼၼ်ႉ ယင်းမီးပႃႇတီႇမၢၼ်ႈ မိူၼ်ၼင်ႇ ပႃႇတီႇၼူၵ်ႉယုင်းလႄႈ ပႃႇတီႇသၢင်ႇသီႈၸိူဝ်းၼႆႉ။