တင်ႈတႄႇလိူၼ်မၢတ်ႊၶျ်တေႃႇထိုင် လိူၼ်ဢေႊပရိူဝ်ႊလ် ၼႂ်းၶၢဝ်းတၢင်းၶၢဝ်းမႆႈ 2 လိူၼ်တၢင်းၼႃႈၼႆႉ ၸုမ်းၵေႃတႆး တေၸတ်းႁဵတ်းပၢင်သွၼ် လိၵ်ႈဢိင်းၵလဵတ်ႈ၊ ဝႆႉၼၵ်းလွင်ႈၵၢၼ်လၢတ်ႈၵၢၼ်ထွမ်ႇ ဢိၵ်ႇပၢင်ပူၵ်းပွင်ၼမ်ႉၵတ်ႉၵူၼ်းၼုမ်ႇ။

ပၢင်သွၼ်ၼႆႉ တေပိုတ်ႇၼႂ်းဝၼ်းတီႈ 20/03/2017 ၵႂႃႇ၊ ၸႂ်ႉၸိုဝ်ႈပၢင်သွၼ်ဝႃႈ တႆးၵေႃႉၾၢႆႇၵၢၼ်ႁဵၼ်း (Dai Kaw Learning Society) ။ ႁူဝ်ၶေႃႈၵၢၼ်ႁဵၼ်း မီး 6 ႁူဝ်ၶေႃႈ၊ လိၵ်ႈဢိင်းၵလဵတ်ႈ ၵၢၼ်လၢတ်ႈလႄႈၵၢၼ်ထွမ်ႇ ပဵၼ်ပိူင်လူင်။ လိၵ်ႈတႆး၊ ၵၢၼ်သၢင်ႈတူင်ႇဝူင်းၵူၼ်း၊ ၵၢၼ်တၢင်ႇလၢတ်ႈၾၢႆႇတႆး၊ ၵၢၼ်ယုၵ်ႉမုၼ်းၼမ်ႉၵတ်ႉတူဝ်ၵဝ်ႇလႄႈ ယဵၼ်ႇငႄႈၾိင်ႈထုင်း ၸဵမ်ၸိူဝ်းၼႆႉ။ တေႁပ်ႉလုၵ်ႈႁဵၼ်းၸိူဝ်းမီးၸၼ်ႉ 8 ၶိုၼ်ႈၼိူဝ်ၵူၺ်း-ၼႆယဝ်ႉ။


"ပၢင်သွၼ်ၼႆႉ ၼႂ်းတူင်ႇလႂ်တူင်ႇၼၼ်ႉ ၼင်ႇႁိုဝ်ၵူၼ်းၼုမ်ႇၶဝ်မႃးၶွၼ်ႈတုမ်ၵၼ်လႆႈ၊ မႃးၸႅၵ်ႇပၼ်တၢင်းႁူႉ တၢင်းႁၼ်ၵၼ်လႆႈ။ မိူၼ်ၼင်ႇ ပေႃးၵူၼ်းၼုမ်ႇၶဝ်လူဝ်ႇတၢင်းႁူႉၸိူင်ႉႁိုဝ်ၵေႃႈ ပေႃးဝႃႈႁဝ်းမီးတၢင်းႁူႉတၢင်းမေႃ ၼၼ်ႉ ႁဝ်းၵေႃႈၵႂႃႇၽိူမ်ႉထႅမ်ပၼ်တီႈၶဝ်လႆႈ၊ ၶႂ်ႈႁႂ်ႈပဵၼ်မႃးၸိူင်ႉၼၼ်။ ပၢင်သွၼ်ၼႆႉ ႁဝ်းတေတႄႇတီႈ ၵေႃတႆးၼႆႉဢွၼ်တၢင်း" -ၼၢင်းမူၺ်သႅင် ၽူႈၵုမ်းပၢင်သွၼ်လၢတ်ႈ။


မုၵ်ႉၸုမ်းၵေႃတႆးၼႆႉ ငဝ်းလုမ်းပၵ်းဝႆႉတီႈထုင်ႉလွႆတႆးလီ ၸႄႈဝဵင်းၵႃလီႉ ၸိုင်ႈတႆးပွတ်းၸၢၼ်း။ ၶူင်းၵၢၼ်လူင် ဢၼ်ၵေႃတႆးတူင်ႉၼိုင်ႁဵတ်းသၢင်ႈယူႇဝႆႉၼၼ်ႉ မီး 3 ဢၼ်- 1. Internship ၵႃလီႉ။ 2.Social walker လႃႈသဵဝ်ႈ လႄႈ 3.Internship တႃႈၵုင်ႈ- ၼႆယဝ်ႉ။