ၵွပ်ႈမီးလွင်ႈဢမ်ႇပေႃးၸႂ်ၼိူဝ်ၵၼ် ၸင်ႇဢုပ်ႇၵၼ်လွင်ႈငမ်းယဵၼ်
ထၢမ်- လွင်ႈဢၼ်လႆႈၵႂႃႇႁူပ်ႉထူပ်း ၸွမ်ၸိၵ်းသိုၵ်းမိၼ်းဢွင်ႇလၢႆႇၼႆႉ လႆႈၵႂႃႇဢုပ်ႇဢူဝ်းၵၼ် ၸိူင်ႉႁိုဝ်ၽွင်ႈၶႃႈ?။
တွပ်ႇ- ဢၼ်ၼႆႉလၢတ်ႈၵႂႃႇယဝ်ႉ၊ ၵူၺ်းၵႃႈ ၾၢႆႇၼိုင်ႈၼႆႉတႄႉ တၢင်ႇၸိူဝ်ႉတၢင်ႇပိူင် ဢၼ်တိုၵ်ႉဢုပ်ႇဢူဝ်းၵၼ်ယူႇ ၵေႃႈမီးယူႇ၊ မၼ်းပႆႇယဝ်ႉပႆႇတူဝ်ႈ။ မိူၼ်ၼင်ႇ ၸုမ်းၸိူဝ်းဢၼ်ပႆႇလူင်းလၢႆးမိုဝ်းၼၼ်ႉ ၼင်ႇႁိုဝ်ၶဝ်ပေႃးတေ လူင်းလၢႆးမိုဝ်းမႃးၼႆႉ ထုၵ်ႇလီလႆႈႁဵတ်းၸိူင်ႉႁိုဝ်၊ ဢၼ်ၼႆႉႁဝ်းဢုပ်ႇၵၼ် ယင်းပႆႇလႆႈၸႂ်ၵၼ်။ ၵူၺ်းၵႃႈ ဢၼ်ၼႄႉၼွၼ်းတႄႉ ၸုမ်းဢမ်ႇလူင်းလၢႆးမိုဝ်းၸိူဝ်းၼႆႉ ဢမ်ႇၸႂ်ႈဝႃႈၶဝ်သၢၼ်ၶတ်းၼိူဝ် NCA ၊ ၵူၺ်းၵႃႈ ၶဝ်ၶႂ်ႈႁႂ်ႈမၼ်ႈၸႂ်ၵၼ်ၵူႈၾၢႆႇသေ ပေႃးတမ်းၸႂ်ၵေႃႈ ၶဝ်တေလူင်း၊ မၼ်းပဵၼ်ၸိူင်ႉၼၼ်။
ယွၼ်ႉပိူဝ်ႈၼၼ် ၼင်ႇႁိုဝ်ၶဝ်ပေႃးတေဢွၼ်ၵၼ်လူင်းလၢႆးမိုဝ်းမႃးၼႆႉ ထုၵ်ႇလီလႆႈႁဵတ်းၸိူင်ႉႁိုဝ်၊ ပၼ်ႁႃတၢင်းၾၢႆႇၶဝ်မီးၸိူင်ႉႁိုဝ်၊ ပၼ်ႁႃၶဝ်ၼႆႉ ႁဝ်းတေလႆႈၸွႆႈၵႄႈပၼ်ၸိူင်ႉႁိုဝ်ၼႆ မၼ်းပဵၼ်ၼႃႈတီႈပုၼ်ႈၽွၼ်း ၵူႈၾၢႆႇၾၢႆႇယဝ်ႉ၊ မၼ်းဢမ်ႇၸႂ်ႈၼႃႈတီႈပုၼ်ႈၽွၼ်း လူင်ပွင်ၸိုင်ႈၾၢႆႇလဵဝ်ၵူၺ်း တေလႆႈဝႃႈၸိူင်ႉၼၼ်။
ထၢမ်-ၶၢဝ်းတၢင်းဢၼ်လႆႈၵႂႃႇႁူပ်ႉထူပ်းၼႆႉ ဢၼ်လီႁၢၼ်ႉၸႂ် မီးသင်ၽွင်ႈၶႃႈ?။
တွပ်ႇ-ဢၼ်လီႁၢၼ်ႉၸႂ်ၼႆႉ တေလႆႈဝႃႈပုၼ်ႈတႃႇသုၼ်ႇတူဝ်ၼႆႉ 1.ႁဝ်းဢမ်ႇလႆႈၺႃး ဢမ်ႇလႆႈဢုပ်ႇဢူဝ်းၵၼ်တင်း ၼၢင်းဢွင်ႇသၢၼ်းၸုၵျီႇသေပွၵ်ႈ၊ ၵမ်းၼႆႉပဵၼ်ၵမ်းဢွၼ်တၢင်းသုတ်းယဝ်ႉ၊ ထူပ်းၵေႃႈလႆႈထူပ်း၊ ဢုပ်ႇၵေႃႈလႆႈဢုပ်ႇ။ 2.ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇၵေႃႈ တင်းလႆႈထူပ်းသေတင်းလႆႈဢုပ်ႇၵၼ်ၼႆႉ ပွၵ်ႈၼႆႉပဵၼ်ၵမ်းဢွၼ်တၢင်းသုတ်းၼင်ႇၵဝ်ႇ။ ၵွပ်ႈပိူဝ်ႈၼၼ် ႁဝ်းၵေႃႈမုင်ႈမွင်းဝႃႈ ဢၼ်ႁဝ်းထူပ်းၵၼ်ဢုပ်ႇၵၼ် ၵမ်းၼႆႉ မၼ်းတေႁဵတ်းႁႂ်ႈႁဝ်းၸမ်ၸႂ်ၵၼ်မႃးသေ မႃးၵမ်ႉၸွႆႈတီႈဢၼ်ႁဝ်းဢုပ်ႇဢူဝ်းၵၼ်ၵၢၼ်မိူင်း ႁဝ်းႁၼ်ထိုင်ၸိူင်ႉၼႆ။
ထၢမ်-ဢၼ်ဢမ်ႇႁၢၼ်ႉၸႂ်သမ်ႉ မီးၸိူင်ႉႁိုဝ်ၽွင်ႈၶႃႈ?။
တွပ်ႇ-ဢၼ်ဢမ်ႇႁၢၼ်ႉၸႂ်ၼႆႉ ၵွပ်ႈပိူဝ်ႈႁဝ်းမီးလွင်ႈဢမ်ႇပေႃးၸႂ် ႁဝ်းၸင်ႇဢုပ်ႇၵၼ် ၸင်ႇသိုပ်ႇဢုပ်ႇၵၼ်၊ ၸိူဝ်းၼႆႉႁဝ်းၵေႃႈဢမ်ႇတၢပ်ႈလၢတ်ႈယဝ်ႉ။ ပေႃးဝႃႈမီလွင်ႈပေႃးၸႂ်ၵၼ်ယဝ်ႉၼႆၵေႃႈ ပေႃးပဵၼ်ၸူႉႁၵ်ႉၵၼ်ၵေႃႈ ႁဝ်းၵေႃႈလူဝ်ႇဢဝ်ၵၼ်ၵူၺ်းယဝ်ႉ၊ ဢမ်ႇလူဝ်ႇထၢမ်သင်ထႅင်ႈယဝ်ႉ။
(ၶႅၼ်းတေႃႈပႂ်ႉသိုပ်ႇဢၢၼ်ႇ လွင်ႈထတ်းသၢင်ႁၼ်ထိုင် လွင်ႈၶၢဝ်းတၢင်းၵႂႃႇဢုပ်ႇဢူဝ်းၵၼ် တီႈၼေႇပျီႇတေႃႇ)
Tags: Interview
