ပႃႇတီႇႁူဝ်သိူဝ် SNLD ဝဵင်းလိူဝ်ႇ ၸတ်း ပၢင်ပၼ်တၢင်းႁူႉၵူၼ်းမိူင်း ၵဵဝ်ႇၵပ်းသုၼ်ႇ လႆႈ သုၼ်ႇပဵၼ် ။

ဝၼ်းတီႈ29/11/2016 ၶၢဝ်းယၢမ်း 09:00-12:00 ၸၢႆးသိၼ်ႇမိၼ်းဢေး ပဵၼ်တူဝ်တႅၼ်း ငဝ်ႈငုၼ်း တီႇမူဝ်ႇၶရေႇၸီႇၸိူဝ်ႉၶိူဝ်းတႆး ႁိုဝ်ပႃႇတီႇႁူဝ်သိူဝ် SNLD သေ ၸတ်းပၢင်ႁူပ်ႉထူပ်ႉ ၵူၼ်းမိူင်းတီႈ ပွၵ်ႉၼွင်ၸၢင်ႉ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸႄႈ ၸိုင်ႈတႆးပွတ်းႁွင်ႇ ပၼ်တၢင်းၶႆႈၸႂ် လႄႈတိုၵ်းသူၼ်း ႁႂ်ႈၵူၼ်းမိူင်းႁူႉပုၼ်ႈသုၼ်ႇလႆႈသုၼ်ႇပဵၼ် ၊ လွင်ႈယူႇႁူမ်ႈတူင်ႇဝူင်းလဵဝ်ၵၼ် ၸိူဝ်းၼႆႉ မီးၵူၼ်းၼုမ်ႇၼႂ်းၸုမ်း TYO၊ ၸုမ်းၵူၼ်းၼုမ်ႇၸၢဝ်းၶိူဝ်း၊ ၵေႃလိၵ်ႈလၢႆး လီႇသူး၊ တဢၢင်း၊ၶၢင်ၸိူဝ်းၼႆႉၶဝ်ႈႁူမ်ႈ မွၵ်ႈ 30ၵေႃႉ ။


ၸၢႆးသိၼ်ႇမိၼ်းဢေး လၢတ်ႈဝႃႈ - “ယိူင်းဢၢၼ်းလူင်ဢၼ်လႆႈၸတ်းႁဵတ်းတႄႉၵေႃႈ ၼင်ႇႁိုဝ် ၵူၼ်းမိူင်းပေႃးတေႁူႉသုၼ်ႇလႆႈတူဝ်ၸဝ်ႈၵဝ်ႇ မေႃယူႇႁူမ်ႈၵၼ် ၼင်ႇႁိုဝ်ပေႃး တေပဵၼ်မႃး လွင်ႈငမ်း ယဵၼ် ပေႃးဢမ်ႇမီးလွင်ႈငမ်းယဵၼ်ၸိုင် ၾၢႆႇလိၵ်ႈလၢႆးၵေႃႈလီ၊ ၾၢႆႇႁႃငိုၼ်း၊ ၾၢႆႇပၺ်ၺႃ၊ ၾၢႆႇၶိုၼ်ႈယႂ်ႇမႂ်ႇသုင်ၸိူဝ်းၼႆႉ မၼ်းတိုၼ်းဢမ်ႇႁဵတ်းသင်လႆႈ။ ၵွပ်ႈၼၼ် ၶႂ်တိုၵ်း သူၼ်း ႁႂ်ႈသႂ်ႇ ၸႂ်လွင်ႈငမ်းယဵၼ်ၼမ်ၼမ်ၶႃႈ ”ဝႃႈၼႆ ။


ပႃႇတီႇႁူဝ်သိူဝ်ၽႅၼ်ၵၢၼ်ဝႆႉတေၸတ်းႁဵတ်းပၢင်ပၼ်တၢင်းႁူႉၵူၼ်းမိူင်းလွင်ႈသုၼ်ႇလႆႈ ထႅင်ႈလၢႆလၢႆ ၸႄႈဝဵင်း မိူၼ်ၼင်ႇ ထုင်ႉလွႆႁူဝ်သိူဝ်၊ မိူင်းမိတ်ႈ၊ ၵေးသီး၊ မူႇၸႄႈ၊ လၢႆးၶႃႈ၊ ၵဵင်းတုင် ၸိူဝ်းၼႆႉ ။


ပၢင်လိူၵ်ႈတင်ႈ ပတ်းပိုၼ်ႉၸိုင်ႈမိူင်း ဢၼ်ၸတ်းႁဵတ်းၵႂႃႇမိူဝ်ႈဝၼ်းတီႈ 08/11/2015 ၼၼ်ႉ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ်  (SNLD) ပေႉပၢင်လိူၵ်ႈတင်ႈ လႆႈတီႈ ၼင်ႈၼႂ်းသၽႃး 39 တီႈ –သၽႃးၵူၼ်းမိူင်း 12 တီႈၼင်ႈ ၊ သၽႃးၸႄႈမိူင်း 24 တီႈ ၼင်ႈ လႄႈသၽႃးၸိူဝ်ႉၸၢတ်ႈ 3 တီႈၼင်ႈ – ဝႃႈၼႆ ။