ၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် SNLD ၸႄႈဝဵင်းမိူင်းယႆ ၸိုင်ႈတႆးပွတ်းႁွင်ႇ တၢင်ႇလၢတ်ႈ ၼႂ်းပၢင်ၵုမ်သၽႃးၵူၼ်းမိူင်း ၶႂ်ႈလႆႈလွင်ႈၵမ်ႉထႅမ် တႃႇပူၵ်းပွင်မူႇဝၢၼ်ႈၶိုၼ်ႈယႂ်ႇ သိူဝ်ႇသဵၼ်ႈတႃႈ သၢႆတၢင်း တႃႇ 3 ဢိူင်ႇ ၼႂ်းမိူင်းယႆ ဝႃႈၼႆ ။

ဝၼ်းတီႈ 29/11/2016 ပၢင်ၵုမ်သၽႃးၵူၼ်းမိူင်း ပွၵ်ႈၵမ်း 2 ၵမ်းထူၼ်ႈ 3 တီႈၼေႇပျီႇတေႃႇ ၸၢႆးသီႇႁႃႉၵျေႃႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ ၸိုင်ႈတႆး ပွတ်းႁွင်ႇ တၢင်ႇလၢတ်ႈ တုၵ်းယွၼ်း ၶႂ်ႈလႆႈလွင်ႈၵမ်ႉၸွႆႈ တႃႇပူၵ်းပွင် သိူဝ်ႇသဵၼ်ႈတႃႈသၢႆတၢင်း ၼႂ်းဢိူင်ႇႁူဝ်တိုဝ်ႉ၊ ၼႂ်းဢိူင်ႇ ဝၢၼ်ႈၵျွင်းပၢင်ႇသိၼ်လႄႈ ၼႂ်းဢိူင်ႇလွႆငိုၼ်း တၢင်းယၢဝ်း 14 လၵ်း ဝႃႈၼႆ ။


ၸၢႆးသီႇႁႃႉၵျေႃႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ လၢတ်ႈဝႃႈ “ ယူႇတီႈၶႃႈႁဝ်းသေ လႆႈတၢင်ႇလၢတ်ႈတီႈၼႂ်းပၢင်ၵုမ်သၽႃးတႄႉ တႃႇတေႁဵတ်းသဵၼ်ႈတၢင်းသိူဝ်ႇယၢင် တီႈၼႂ်းဢိူင်ႇ ဝၢၼ်ႈ 3 ဢိူင်ႇ၊ သဵၼ်ႈတၢင်းၸိူဝ်းၼႆႉ မၼ်းပဵၼ်သဵၼ်ႈတၢင်းလိၼ်ဝႆႉသေ ၸဵမ်မိူဝ်ႈပၢၼ်လူင်ပွင် ၸိုင်ႈၵူႈသိုပ်ႇၵူႈပၢၼ်ၼၼ်ႉ ၶဝ်ပိုၼ်ႉပွႆႇဝၢင်းပႅတ်ႈသေ ပီႈၼွင်ႉႁဝ်းၶႃႈ ၸိူဝ်းဢၼ်ယူႇၼႂ်းဢိူင်ႇ ၸိူဝ်းၼၼ်ႉၼႆႉ လွင်ႈၵႂႃႇလွင်ႈပႆ မၼ်းယၢပ်ႇၽိုတ်ႇဝႆႉ သင်ႁဵတ်းပၼ်သဵၼ်ႈတၢင်းသဵၼ်ႈၼႆႉ ပဵၼ် တၢင်းသိူဝ်ႇယၢင်ၵႂႃႇယဝ်ႉၼႆ ၸိူဝ်းဝၢၼ်ႈဢၼ်ယူႇႁိမ်းႁွမ်း ၸိူဝ်းၼၼ်ႉ မွၵ်ႈ 25 ဝၢၼ်ႈ တေမီးသဵၼ်ႈ တၢင်းၶႅမ်ႉ။ ၶူဝ်းႁႆႈၶူဝ်းသူၼ်ၶဝ်ၵေႃႈ တေၸၢင်ႈဢဝ်ၵႂႃႇၶၢႆလႆႈၼႂ်းၵၢတ်ႇငၢႆႈ ၊ၸွမ်းၼႃႈဝၢၼ်ႈတႃသူၼ် ၵေႃႈ တေၶိုၼ်ႈယႂ်ႇမုၼ်းလႅင်းမႃး ယိူင်းဢၢၼ်းဢၼ်ၼႆႉသေ တုၵ်းယွၼ်း ၵႂႃႇၼႂ်းသၽႃး ႁႂ်ႈသိူဝ်ႇ သဵၼ်ႈတၢင်းပၼ် တႃႇ 14 လၵ်း” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ပွတ်းတွၼ်ႈၼႆႉ မိူဝ်ႈၵူႈပွၵ်ႈ ငဝ်းလၢႆးဢမ်ႇၼိမ်သဝ်း ဢမ်ႇၵတ်း ယဵၼ်လႄႈထုၵ်ႇလူင်ပွင်ၸိုင်ႈ ပိုၼ်ႉၽႃႈပႅတ်ႈဝႆႉ၊ ထိုင်မႃးယၢမ်းလဵဝ် လူင်ပွင်ၸိုင်ႈ မႂ်ႇၵေႃႈၶိုၼ်ႈ မႃးလႄႈ ၸင်ႇလႆႈတုၵ်းယွၼ်းတူၺ်းဝႃႈၼႆ ။ ၵဵဝ်ႇၵပ်းလွင်ႈ ၽႅၼ်ၵၢၼ် တေလူင်းႁဵတ်းသဵၼ်ႈတၢင်းပၼ်ၵူၼ်းမိူင်းၼႆႉ ။


ၵႅမ်ၽွင်းလူင် ၸွမ်ႁၢၼ် တၼ်းထုတ်ႉ တွပ်ႇလၢတ်ႈၼႂ်းသၽႃးဝႃႈ “ ယူႇတီႈၽူႈတႅၼ်းသၽႃး တၢင်ႇ လၢတ်ႈ တုၵ်းယွၼ်းမႃး တႃႇသိူဝ်ႇသဵၼ်ႈတၢင်းယၢင် 14 လၵ်းၼၼ်ႉ ၼႂ်းပီ 2017-18 ၼႆႉ တေပႂ်ႉ ငိုၼ်းဢၼ်ၼႂ်းသၽႃးတမ်းဝၢင်း ၵမ်ႉၸွႆႈပၼ်မႃး၊ ဢဝ်ၶေႃႈမၵ်းမၼ်ႈ တီႈလူင်ပွင်ၸိုင်ႈ မိူင်းတႆး သေ ၸင်ႇတေၸၢင်ႈတမ်းဝၢင်းပၼ်တႃႇ 8 လၵ်း” ဝႃႈၼႆ ။


သဵၼ်ႈတၢင်းဢၼ်ၵူၼ်းမိူင်းတုၵ်းယွၼ်းၼၼ်ႉ ႁႂ်ႈၾၢႆႇၸဝ်ႈၼႃႈတီႈၶဝ်လူင်းသိူဝ်ႇတၢင်းယၢင် ပၼ် တႃႇ 14 လၵ်း တႄႇဢဝ် တၢင်းဝၢၼ်ႈၼမ်ႉလၼ်းၵႂႃႇ။ ဝၢၼ်ႈၼမ်ႉလၼ်းၼႆႉ မီးၼိူဝ်သဵၼ်ႈ တၢင်း သီႇပေႃႉ၊ သွင်ၵေး၊ မိူင်းယႆ တႄႇဢဝ်ဝၢၼ်ႈၼၼ်ႉ လတ်းၽၢၼ်ႇၵႂႃႇ တၢင်းဢိူင်ႇႁူဝ်တိုဝ်ႉ၊ ဢိူင်ႇဝၢၼ်ႈၵျွင်းပၢင်ႇသိၼ်ႇ၊ ဢိူင်ႇလွႆငိုၼ်းၼၼ်ႉ တေၵႂႃႇပွင်ႇ သဵၼ်ႈတၢင်းၵႃး မိူင်းယႆ၊ လႃႈသဵဝ်ႈ။ ၵွပ်ႈၼႆလႄႈ ၼႂ်းတူင်ႇတၢင်ႇၸိူဝ်းၼၼ်ႉ မၼ်းဢမ်ႇမီး သဵၼ်ႈတၢင်းၵႃးဢၼ်ၶႅမ်ႉမၼ်း ပေႃးဝႃႈ လႆႈႁဵတ်းသဵၼ်ႈတၢင်းၼႆႉ လႆႈၸိုင် ဝၢၼ်ႈၵူၼ်းဢၼ်ယူႇႁိမ်းႁွမ်းၼၼ်ႉ တေလႆႈၸႂ်ႉသဵၼ်ႈ တၢင်းလီၵႂႃႇမူတ်းမူတ်း ဝႃႈၼႆ ။