ၸုမ်းၵူၼ်းၼုမ်ႇၸိူဝ်းယူႇၸဵင်ႇၸၢၼ်းဝၼ်းဢွၵ်ႇ သီႇပေႃႉ ႁူမ်ႈၵၼ်ၸတ်းႁဵတ်းပၢင်ၾိုၵ်းလပ်ႉ ၼမ်ႉၵတ်ႉႁႂ်ႈႁၢင်ႇၵႆယႃႈမဝ်းၵမ် ။

Photo By - Sai Koung Tai Hsipaw

မိူဝ်ႈဝၼ်းတီႈ 27-31/10/2016 ၵူၼ်းၼုမ်ႇၼႂ်းပိုၼ်ႉတီႈၸတ်းႁဵတ်းပၢင် ၾိုၵ်းၽွၼ်ႉၼမ်ႉၵတ်ႉ ၵူၼ်းၼုမ်ႇတီႈဝတ်ႉ(ၵျွင်း)ၼႃးမူၼ်းၸဵင်ႇၸၢၼ်းဝၼ်းဢွၵ်ႇသီႇပေႃႉယၢၼ်14 လၵ်းဢိူင်ႇၼွင်ၵေႃႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄးၸိုင်ႈတႆးပွတ်းႁွင်ႇ။ မီးၽူႈသူၼ်ၸႂ်လုၵ်ႉမႃးၼႂ်း 15 ဝၢၼ်ႈၸၢႆး 40 ၵေႃႉယိင်း 32 ၵေႃႉႁူမ်ႈ 72 ၵေႃႉၶိုၼ်ႈလဵပ်ႈႁဵၼ်းဢဝ် ။


ၼႂ်းပၢင်ၼႆႉၶူးၸၢႆးတၢၼ်းဢွင်ႇ ပူင်သွၼ်ပၼ်ၽွၼ်းၸႃႉယႃႈမဝ်းၵမ်လႄႈ ၵၢၼ်သိုဝ်ႇၶၢဝ်ႇ၊ ၶူးၼၢင်း ၶမ်းလႅင်းသပ်းလႅင်းလွင်ႈပၢႆးဝူၼ်ႉၵူၼ်းမိူင်းလီလႄႈ လွင်ႈၵၢၼ်ပၢႆးမိူင်း၊ ၶူးၸၢႆးၼေႃႇမိူင်းပူင် သွၼ်ပၼ်လွင်ႈတႆးမိူၼ်ၼင်ႇလိၵ်ႈလၢႆး၊ ၵႂၢမ်းလၢတ်ႈ၊ဝၢၼ်ႈမိူင်း၊ သႃႇသၼႃႇၸိူဝ်းၼႆႉ။ လိူဝ်ၼၼ်ႉတွၼ်ႈၵၢင်ႈၶမ်းသွၼ်ပၼ်လွင်ႈၾိင်ႈငႄႈႁိတ်ႈႁွႆးၸိူဝ်းၼႆႉ ။


ၸၢႆးပိုၼ်းႁၢၼ်ၵူၼ်းၼုမ်ႇၼႂ်းၸုမ်း TYN လၢတ်ႈဝႃႈ - “ဢွၼ်တၢင်းသုတ်းယိၼ်း ၸူမ်းၽူႈဢၼ် ၸွႆႈထႅမ်ငိုၼ်းတွင်ႈ၊ယိၼ်းၸူမ်းၶူးသွၼ်ၵူႈၵေႃႉဢၼ်မႃးပူင်သွၼ်ပၼ်၊ဢိၵ်ႇတင်းယိၼ်းၸူမ်းထိုင်ၽူႈဢၼ်လႆႈၸွႆႈၶပ်းၶိုင်တႃႇပဵၼ်ပၢင်သွၼ်ၼႆႉၵူႈၵေႃႉ။ဢၼ်ၶႂ်ႈၾၢၵ်ႇထိုင်ဢူၺ်းၵေႃႉႁဝ်းႁႂ်ႈၵဵပ်းဢဝ်တၢင်းႁူႉဢၼ်မႃးၶိုၼ်ႈႁဵၼ်းၼႆႉမိူဝ်းၸႂ်ႉတိုဝ်းၼႂ်းၽဝၸၢတ်ႈပၢၼ်ႁဝ်းယႃႇႁႂ်ႈလႆႈပဵၼ်မႃးႁဵၼ်းယဝ်ႉသုမ်းၶၢဝ်းယၢမ်းလၢႆလၢႆ၊ ႁႂ်ႈမေႃဢဝ်တၢင်းႁူႉၸိူဝ်းၼႆႉ မိူဝ်းၸႂ်ႉတိုဝ်းပူၵ်းပွင်ၸဝ်ႈၵဝ်ႇလႄႈ ၼႂ်းပိုၼ်ႉတီႈ ၽႂ်မၼ်း”ဝႃႈၼႆ ။


ပၢင်ၾိုၵ်းလပ်ႉၼမ်ႉၵတ်ႉၵူၼ်းၼုမ်ႇတီႈထုင်ႉၼႃးမူၼ်းၼႆႉပွၵ်ႈၼႆႉပဵၼ်ပွၵ်ႈဢွၼ်တၢင်းသုတ်း ။


ၸၢႆးပိုၼ်းႁၢၼ်သိုပ်ႇလၢတ်ႈထႅင်ႈဝႃႈ - “ ယွၼ်ႉပဵၼ်ပွၵ်ႈဢွၼ်တၢင်းသုတ်းလႄႈသင် ဝႃႈမီးတီႈယုပ်ႈ ယွမ်းလွင်ႈသင်သေဢမ်ႇဝႃႈၶႅၼ်းတေႃႇပွင်ႇၸႂ်သေဝၢင်းၶႂၢင်းပၼ်ႁဝ်းၶႃႈသေၵမ်း။မိူဝ်းၼႃႈမႃးၼင်ႇႁိုဝ်တေလီလိူဝ်တွၼ်းလိူဝ်ၵဝ်ႇၼၼ်ႉႁဝ်းၶႃႈတေၶတ်းၸႂ်ယူႇ”  - ဝႃႈၼႆ ။


မိူဝ်ႈဝၼ်းတီႈ 12-14/09/2016 ၸုမ်းၵူၼ်းၼုမ်ႇထုင်ႉမိူင်းၶိူဝ်း၊ ၸုမ်းယွတ်ႈၸဵင်တႆး၊ ၸုမ်းသႅၼ်း ႁုၼ်ႈမႂ်ႇ(သီႇထွၵ်ႈ) ႁူမ်ႈၵၼ်ဢွၼ်ႁူဝ်ၵူၼ်းၼႂ်းပိုၼ်ႉတီႈ ၸတ်းႁဵတ်းပၢင်ၽိူမ်ႉထႅမ်ၼမ်ႉ ၵတ်ႉၵူၼ်း ၼုမ်ႇ ပွၵ်ႈၵမ်း 2 တီႈၵျွင်းသြႃႇၸဝ်ႈၸႄႈၶၢၼ် ဢိူင်ႇသီႇထွၵ်ႈ ထုင်ႉမိူင်းၶိူဝ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။