ၸုမ်းၶၢဝ်ႇယႂ်ႇၼႂ်းမိူင်းမၢၼ်ႈလၢႆလၢႆၸုမ်း ႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇသၢၼ်ၶတ်း လူင်ပွင်ၸိုင်ႈ NLD ဢၼ်ၸႂ်ႉတိုဝ်းပၵ်းပိူင်မၢႆမီႈ လူင်ပွင်ၸိုင်ႈသိုၵ်းသေ ပၼ်တူတ်ႈတၢမ်ႇၵူၼ်းႁဵတ်းၵၢၼ်သိုဝ်ႇ (Media) ။ ပိူင်လူင်မၼ်း သၢၼ်ၶတ်း ၸွမ်ၽွင်းလူင် လူင်ပွင်ၸိုင်ႈတိူင်းတႃႈၵုင်ႈ ။

လိၵ်ႈပိုၼ်ၽၢဝ်ႇၼႆႉ ဢွၵ်ႇမိူဝ်ႈဝၼ်းတီႈ 13/11/2016 မိူၼ်ၸိူင်ႉၼင်ႇၸုမ်းၶၢဝ်ႇလၢႆလၢႆၸုမ်း ၼႂ်းၼၼ်ႉ ပႃးၸုမ်းၶၢဝ်ႇၵူႈမိူင်းမိူင်း မိူင်းမၢၼ်ႈ (BNI) ဢၼ်မီးလုၵ်ႈၸုမ်း 13 ၸုမ်း၊ ဢွၵ်ႇၶေႃႈပိုၼ်ၽၢဝ်ႇၵႂႃႇ ပိူင်လူင်မၼ်းမီး 7 ၶေႃႈ၊ ၵဵဝ်ႇၵပ်းလွင်ႈဢၼ်လူင်ပွင်ၸိုင်ႈ ပႃႇတီႇၻီႇမူဝ်ႇၶရေႇၸီႇၸိူဝ်ႉၸၢတ်ႈ (NLD) ၸွမ်ၽွင်းလူင် လူင်ပွင်ၸိုင်ႈတိူင်းတႃႈၵုင်ႈ ၸႂ်ႉမၢႆမီႈမတ်ႉတႃ 66 သေ တမ်းဝၢင်းပၼ်တူတ်ႈတၢမ်ႇ ၽူႈၵွၼ်းၾၢႆႇထတ်းထွင်လိၵ်ႈ ၸုမ်းသိုဝ်ႇ Eleven တင်း CEO ။


ၼႂ်းလိၵ်ႈပိုၼ်ၽၢဝ်ႇ လၢတ်ႈဝႃႈ- 1.လွင်ႈလွတ်ႈလႅဝ်းၸုမ်းသိုဝ်ႇၶၢဝ်ႇ (Media)ၼႆႉ ၼႂ်းၵၢပ်ႈပၢၼ် ၻီႊမူဝ်ႊၶရေႊၸီႊ ဢၼ်ပူၵ်းပွင်ဝၢၼ်ႈမိူင်းၶိုၼ်ႈယႂ်ႇႁိူဝ်ႈႁိူင်းမႃးၼႆႉ ပိူဝ်ႈတႃႇတေၸင်ႈၼိူင်းၸီႉၸမ်ႈ လွင်ႈလီလွင်ႈႁၢႆႉ လွင်ႈၽိတ်းလွင်ႈထုၵ်ႇ လူင်ပွင်ၸိုင်ႈလႄႈသင်၊ သၽႃးလႄႈသင်၊ ၾၢႆႇၽွင်းငမ်းလႄႈသင်၊ ၾၢႆႇတႅပ်းတတ်းတြႃးၸိူဝ်းၼႆႉလႄႈသင်၊ လွင်ႈလွတ်ႈလႅဝ်းၵၢၼ်သိုဝ်ႇၶၢဝ်ႇ (Media) ၼႆႉ မၼ်းပဵၼ်သင်ႉလၵ်းလူင်ဢၼ်ၼိုင်ႈယဝ်ႉ ။


2.ပိူဝ်ႈတႃႇတေတႅမ်ႈလိၵ်ႈလၢႆး ၸွမ်းၼင်ႇပိူင်တိုဝ်းၵမ်ၵၢၼ်သိုဝ်ႇၶၢဝ်ႇ (Media) ၼၼ်ႉၵေႃႈ မီးမၢႆမီႈၶေႃႈတိုဝ်းၵမ်ၵၢၼ်သိုဝ်ႇၶၢဝ်ႇသေ ၶွတ်ႇၽွတ်ႈၶွင်ႊသီႊသိုဝ်ႇၶၢဝ်ႇ ဢွၵ်ႇမႃးဝႆႉယဝ်ႉ ။


3.ၸွမ်ၽွင်းလူင်တိူင်းတႃႈၵုင်ႈၼႆႉ ဢဝ်ပၵ်းပိူင်မၢႆမီႈမတ်ႉတႃ 66 (ဃ) ၼၼ်ႉသေ ၸႅင်ႈၵႂၢမ်းတီႈၸုမ်း သိုဝ်ႇၶၢဝ်ႇ CEO တင်းၽူႈၵွၼ်းၾၢႆႇထတ်းထွင်လိၵ်ႈ Eleven ။ ၵၢၼ်ႁဵတ်းၸိူင်ႉၼႆၼႆႉ မၼ်းပဵၼ်ဢၼ်ၶၢမ်ႈၼႃႈ ၶၢမ်ႈတႃ လူလၢႆမၢႆမီႈၵၢၼ်သိုဝ်ႇ (Media) ၊ ပဵၼ်လွင်ႈႁႄႉႁၢမ်ႈ ၵၢၼ်တႅမ်ႈလိၵ်ႈလၢႆး လွတ်ႈလွတ်ႈလႅဝ်းလႅဝ်းတင်းသဵင်ႈ။ လွၵ်းလၢႆးဢၼ်ႁဵတ်းၸိူင်ႉၼႆၼႆႉ မၼ်းဢမ်ႇတူၵ်းထုၵ်ႇ၊ မိူၼ်ၼင်ႇတေဢဝ်တၢင်းၽိတ်းၵၼ် လွင်ႈၽိတ်းလွင်ႈထုၵ်ႇၵၼ်သေတႅပ်းတတ်းၵႂႃႇ၊ မၼ်းဢမ်ႇမႅၼ်ႈၸွမ်းပၵ်းပိူင်မၢႆမီႈ- ႁဝ်းၶႃႈၶႂ်ႈၸီႉၸမ်ႈၼင်ႇၼႆ ။


4.မၢႆမီႈမတ်ႉတႃ 66 (ဃ) ဢၼ်ဝႃႈၼႆႉၵေႃႈ မၼ်းပဵၼ်ပၢၼ်လူင်ပွင်ၸိုင်ႈၵဝ်ႇ ၸႂ်ႉတိုဝ်းတႃႇတေ ၵုမ်းၵမ်ၵၢၼ်သိုဝ်ႇ၊ ယႃႇႁႂ်ႈသိုဝ်ႇၶၢဝ်ႇမီးလွင်ႈလွတ်ႈလႅဝ်းထၢင်ႇႁၢင်ႈ။ လူင်ပွင်ၸိုင်ႈၻီႊမူဝ်ႊၶရေႊၸီႊၼႆႉ ၵူၼ်းမိူင်းလိူၵ်ႈတင်ႈမႃးလူၺ်ႈလွၵ်းပိူင် ၻီႊမူဝ်ႊၶရေႊၸီႊ၊ ၵွပ်ႈၼၼ်လႄႈ လွင်ႈလွတ်ႈလႅဝ်းထၢင်ႇႁၢင်ႈၼႆႉ မၼ်းပဵၼ်သၢႆၸႂ်ၻီႊမူဝ်ႊၶရေႊၸီႊယဝ်ႉ။ လွင်ႈလွတ်ႈလႅဝ်းထၢင်ႇႁၢင်ႈၶွင်ၵၢၼ်တႅမ်ႈလိၵ်ႈၼႆႉ မၼ်းပဵၼ် သၢႆၸႂ်ၵၢၼ်ၵေႃႇတင်ႈ မိူင်းၻီႊမူဝ်ႊၶရေႊၸီႊယဝ်ႉ။ ဢၼ်ႁဵတ်းၸိူင်ႉၼႆၼႆႉ တိုၼ်းပဵၼ်လွင်ႈႁၢမ်ႈတၢပ်ႈ တႄႉတႄႉဝႃႈဝႃႈယဝ်ႉ- ႁဝ်းၶႃႈၶႂ်ႈတူၵ်ႇတၵ်ႉၸိူင်ႉၼႆ ။


မိူၼ်ၸိူင်ႉၼင်ႇလူင်ပွင်ၸိုင်ႈ တိူင်းတႃႈၵုင်ႈၼႆႉ မၼ်းပဵၼ်ၵူၼ်းမိူင်းၵမ်ႉထႅမ်သေ ၸင်ႇပဵၼ်မႃးလႄႈ မီးတိုဝ်ႉတၢင်းတႃႇတေၸႂ်ႉပၵ်းပိူင်မၢႆမီႈၵၢၼ်သိုဝ်ႇၶၢဝ်ႇ လႆႈယူႇသေတႃႉၵေႃႈ ဢမ်ႇၸႂ်ႉ၊ သမ်ႉၵႂႃႇၸႂ်ႉမၢႆမီႈဢၼ် လူင်ပွင်ၸိုင်ႈၵဝ်ႇၸႂ်ႉတိုဝ်းမႃး၊ လွင်ႈၼႆႉမၼ်းတုမ်ႉတိူဝ်ႉၸိုဝ်ႈသဵင်ၼႃႈတႃ ပွင်လူင်ၸိုင်ႈ ၻီႊမူဝ်ႊၶရေႊၸီႊတႄႉတႄႉ ။


6.ၵွပ်ႈၼၼ် တိုၵ်းသူၼ်းပႃးၸုမ်းသိုဝ်ႇၶၢဝ်ႇ (Media) တင်းလၢႆဝႃႈ-  ၽိုၼ်လိၵ်ႈၽိုၼ်လၢႆးၵူႈၽိုၼ်၊ လိၵ်ႈလၢႆးၵူႈတူဝ် ဢၼ်တႅမ်ႈတၢင်ႇၵႂႃႇၸိူဝ်းၼၼ်ႉ ပေႃးဝႃႈမီးလွင်ႈၽိတ်းပိူင်ႈၵႂႃႇၵေႃႈ ၶႂ်ႈႁႂ်ႈႁပ်ႉပုၼ်ႈၽွၼ်း တဵမ်တဵမ်ထူၼ်ႈထူၼ်ႈ။ ႁပ်ႉဢဝ်ပုၼ်ႈၽွၼ်းသေ ႁတ်းတေႃႇသူႈလွင်ႈၽိတ်းလွင်ႈထုၵ်ႇၵႂႃႇ၊ ႁဝ်းၶႃႈယုမ်ႇယမ်ၸိူင်ႉၼႆသေ တိုၵ်းသူၼ်းၼင်ႇၼႆ ။


7.ၵွပ်ႈၼႆ ၶႂ်ႈတိုၵ်းသူၼ်းလူင်ပွင်ၸိုင်ႈ တိူင်းတႃႈၵုင်ႈဝႃႈ လွင်ႈၸႂ်ႉမၢႆမီႈဢၼ်လူင်ပွင်ၸိုင်ႈၵဝ်ႇ ႁဵတ်းမႃးၼၼ်ႉ မၼ်းပဵၼ်ၵၢၼ်လွၵ်ႇငိုတ်ႈၼိူဝ်ၸုမ်းသိုဝ်ႇၶၢဝ်ႇ (Media) ၊ လွင်ႈၸိူဝ်းၼႆႉ ၶႂ်ႈႁႂ်ႈၵိုတ်းပၼ်ဝႆးဝႆး။ ႁႂ်ႈၵိုတ်းပၼ်ဝႆးဝႆးသေ ႁႂ်ႈႁူမ်ႈၵၼ်တင်းၶွင်ႊသီႊၵၢၼ်သိုဝ်ႇၶၢဝ်ႇမိူင်းမၢၼ်ႈသေ ႁႂ်ႈႁႃတၢင်းဢွၵ်ႇ ၸွမ်းၼင်ႇပၵ်းပိူင်မၢႆမီႈၵၢၼ်သိုဝ်ႇၶၢဝ်ႇ မီးၼၼ်ႉသေၵမ်း- ႁဝ်းၶႃႈတိုၵ်းသူၼ်းၼင်ႇၼႆ ။


ဢၼ်ႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇၵႂႃႇပွၵ်ႈၵမ်းၼႆႉ 1.ၸုမ်းၶူးသွၼ်ၾၢႆႇၶၢဝ်ႇမိူင်းမၢၼ်ႈ (Myanmar Journalist Association-MJA) ။ ၼႅင်ႈၶၢဝ်ႇၵျႃႇၼႄႇမိူင်းမၢၼ်ႈ (Myanmar Journal Network-MJN) ။ ၸုမ်းႁူမ်ႈတုမ်လိၵ်ႈလၢႆးပၢႆပေႇမၢၼ်ႈ (Myanmar Journalist Union-MJU) ။ ၸုမ်းၼႅင်ႈၵၢၼ်ၽူႈတၢင်ၼႃႈ (ၽူႈတၢင်ဝႃႈၵႂၢမ်း) ၾၢႆႇသိုဝ်ႇမိူင်းမၢၼ်ႈ (Myanmar Media Lawyer Network-MMLN) ။ ၸုမ်းၶၢဝ်ႇၵူႈမိူင်းမိူင်း မိူင်းမၢၼ်ႈ (Burma News International- BNI) ၸိူဝ်းၼႆႉ ။