ၸဝ်ႈသုၶမ်း (တၢင်ႉယၢၼ်း) ၽူႈပွင်သၢင်ႈသႃသၼႃ သၼ်လွႆၸိုင်ႈတႆး ႁွတ်ႈထိုင်တီႈဝတ်ႉမႂ်ႇ မိူင်းၵွၵ်ႇသေ ပွၼ်ႈထမ်း မဵတ်ႉတႃႇ ပၼ်ပီႈၼွင်ႉတႆးၼပ်ႉပၢၵ်ႇ ။

ဝၼ်းတီႈ 13/11/2016 ၶၢဝ်းယၢမ်း 01:00-02:00 pm ၸဝ်ႈသုၶမ်း (တၢင်ႉယၢၼ်း) တၵ်ၵသီလ မႁႃထမ်မႃၸရိယ ၊ ၵမ်မၻ်ထႃၼႃၸရိယ M.A (Buddhism), M.A (Sri Lanka) ဢၼ်ပဵၼ် တူၼ်ၸဝ်ႈ ၽူႈပိုၼ်ၽႄႈသႃသၼႃမိူင်းသၼ်လွႆ လႆႈၵႂႃႇပွၼ်ႈထမ်း (တြႃး) ပၼ်ပီႈၼွင်ႉတႆး ၸိူဝ်းတူၵ်းႁွတ်ႈထိုင်မိူင်းထႆး တီႈဝတ်ႉမႂ်ႇ သႃထုပရႃၻိတ်ႇ ၶဵတ်ႇယၢၼ်းၼႃးဝႃး ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး ။ မီးပီႈၼွင်ႉတႆး ၼႂ်းမိူင်းၵွၵ်ႇလႄႈ ႁိမ်းႁွမ်းမႃး ထွမ်ႇငိၼ်း 600 ပၢႆ ။


ႁူဝ်ၶေႃႈတြႃးဢၼ်မီးၸိုဝ်ႈဝႃႈ “ၽွၼ်းလီသၢင်ႇၵၢၼ်းၵထိၼ်ႇ” သေပွၼ်ႈပၼ်ထမ်းတြႃး လိူဝ်ၼၼ်ႉ ယင်းတိုၵ်းသူၼ်းထိုင်ပႃး ပီႈၼွင်ႉတႆးၸိူဝ်းႁွတ်ႈၽႅဝ်မိူင်းထႆး ဢၼ်မႃးထွမ်ႇထမ်းဝႃႈ ယူႇတီႈလႂ်ၵေႃႈ လူဝ်ႇၽွမ်ႉၵၼ် ပဵၼ်ဢၼ်ၼိုင်ႈဢၼ်လဵဝ်ၵၼ်၊ ဢဝ်ၵၼ်ဝႃႈပႃးၵၼ်ပဵၼ် ။


ၸၢႆးသႅင်ၸၢႆး လၢတ်ႈဝႃႈ - “ ဢၼ်လႆႈမႃးထွမ်ႇထမ်းၼႆႉ လႆႈတၢင်းႁူႉၼမ်တႄႉတႄႉၶႃႈ ဢၼ်ဢမ်ႇ ယၢမ်ႈငိၼ်းၵေႃႈလႆႈငိၼ်း ၸၢင်ႈဢဝ်ၵႂႃႇၸႂ်ႉတိုဝ်ၼႂ်းၽဝၸၢတ်ႈပၢၼ်ႁဝ်း ႁဵတ်းႁႂ်ႈႁဝ်းမီးသတိ ဝိရိယ ၼႂ်းၵၢၼ်ယူႇၵၢၼ်ၵိၼ်ၸိူဝ်းၼႆႉတႄႉၶႃႈ ” ဝႃႈၼႆ ။


ၸဝ်ႈသုၶမ်း ႁူမ်ႈလူၺ်ႈတၵ်ႉၵႃႇသတ်ႉထႃး ၼႆႉဢွၵ်ႇၶၢဝ်းတၢင်း တင်ႈတႄႇႁူဝ်လိူၼ်ထူၼ်ႈ 11 ပီ 2016 ၵႂႃႇႁဵတ်းပွႆးၵထိၼ်ႇ ဝႆႈၽြႃးတီႈမိူင်းသီႇႁူဝ်ႇ (Sri lanka) သေဢိင်ၼိူဝ်တၵ်ႉၵႃႇသတ်ႉထႃး ၼိမၼ်တၼ(ၽိတ်ႈပၢင်း)လႄႈ လႆႈမႃးပွၼ်ႈထမ်းပၼ်ပီႈၼွင်ႉ ႁႅင်းၵၢၼ်ယၢၼ်မိူင်းတီႈဝတ်ႉမႂ်ႇ မိူင်းၵွၵ်ႇ မိူဝ်ႈဝၼ်းတီႈ13 ဝၼ်းတီႈ14 ၶိုၼ်းပွၵ်ႈၶိုၼ်း - ဝႃႈၼႆ ။


မိူဝ်ႈႁူဝ် ပီ2016 ပူၼ်ႉမႃးၼၼ်ႉၵေႃႈ ၸဝ်ႈတူၼ်ၶူးသုၶမ်း ယၢမ်ႈၵႂႃႇပွၼ်ႈထမ်းတြႃးတီႈမိူင်းၵွၵ်ႇ ။ ပီႈၼွင်ႉ တႆးမိူင်းၵွၵ်ႇလႄႈႁိမ်းႁွမ်း ၼပ်ႉပၢၵ်ႇ ႁပ်ႉထွမ်ႇတြႃးၸဝ်ႈ။